Gegetongo 35:30 - Ma Jou ai Demo-demo o Totobelohoka

³⁰ “De nagahi ma hiaturu utuoli abe ngini o Isiraele ma nyawa kiani nianii-niiki. Abe nako o nyawa yagoungu yatomaka manga dodiawo, gea manga hohowono kiani o hone-honenge yadaene. Masara nako o hakihii ma nyawa yomatengo dika abe yotemo ato yatoma manga dodiawo, gea ko idadiua. Angamoi kiani o hakihii ma nyawa yahinooto eko yofoloi de manga demo imakiniiki. Abe nia hiurusu ma ngioka de inihingahu ato yomatengo gea yatomaka o nyawa, de gea ahao o hone-honenge ma hohowono yataana onangika.

Gegetongo 35:30 ပူးပေါင်းရင်းမြစ်များ

Huhupu 21:12

De hokonaa Ma Jou ai pareta abe o Musa wadofanga o Isiraele ma nyawaika, wato, “Onagona dika nginioka abe nako yapoha o nyawaika hiadono yohonenge, ona gea kiani niahohowono ka hiadono onangoo yohonenge.

Gegetongo 35:16

“Masara nako idadi abe yomatengo yahipoha manga dodiawo de o behi eko de o hakaru ma amoko eko de o gota de gea ma titi hiadono manga dodiawo yohonenge, gea imakohowono. Nako hokogea manga datoro de ahao ka idadi yaetongo ato ona yatomaka o nyawa, de onagona dika yatoma-toma, ona gea kiani yahohowono de o hone-honenge.

Gegetongo 35:31

De nako hiadono niaurusoka o nyawa de naga nia putuhu abe yomatengo kiani yamake o hone-honenge ma hohowono, gea ufa ngini niodafongo o bobangu ma tiwi la niahihupu yomatengo gea ma rorahaiika de ko yahohonengokauali. Angamoi onagona dika yagoungu yatomaka o nyawa, onangoo gea kiani yahohonenge.

Matiusu 18:16

“Masara nako hoka una ko wodafongua ani demoika, gea kiani nahoko ani gogianongoru womatengo eko yahinooto la ininiiki de gea ngini niwigilioli abe una wahowonoka de niwitemoli unangika. La gea ma oraha de ngini nihidaere to una ai howono de abe una wopaluhu hokokia, gea nia demo mata-mata de naga ma hakihii abe yotoihene, de gea nia gogianongoru womatengo eko yahinooto abe ininiiki. Angamoi hokogea haniiki ma hiaturu abe hamake Ma Jou ai Demo-demoka.”

Yohanese 7:51

Ho una gea widemo o Yesusu wato, “Nanga pareta abe inahidumutu o kia itiai de o kia ko itiaiua naga e? De nako o pareta gea haniiki, sarakia, itiai o nyawa hihohowonoka ngaro ngone ko hitailakouahi abe hokokia wodiai hiadono wahowono? Koua, hokogea ko itiaiua!” Hokogea o Nikodemusu watemo ai dodiawoika.

2 Korintusu 13:1

De ahao ma oraha tomahiadono genangika de gea ma hangeou abe toboa tinitutumu nginika. De nako ngini utu ngohi kiani tiniurusu ma titi nia howono, gea ahao taniiki o urusu ma hiaturu abe ihitulihukuoka Ma Jou ai Demo-demoka. Abe gea itemo ato, “O urusu ma goronaka de nako naga abe yatae o nyawaika ato ona gea yahowonoka, gea kiani naga o hakihii ma nyawa abe yahinooto eko yofoloi abe manga demo hoimoi la genangino ka idadi niahitaana nako igoungu ma nyawa gea yahowonoka eko koua.” Hokogea ma hiaturu abe ma dodihirainohi, de hokogea ngohi ahao taniiki nginioka.

1 Timotiusu 5:19

De nako o nyawa womatengo dika woboa ngonaino de witae o gareja ma hihiraika, gea ufa ai dadae ma demo gea nodafongo. Masara nako hiadono yahinooto eko yaruange naga iwitae o gareja ma hihiraika gea, de ahao kiani natailako manga dadae ma demo gea nako igoungu eko koua.

Ibarani 10:28

De gea igoungu abe nako Ma Jou ai behehongika o nyawa yaoluku, ona gea ahao kiani manga hohowono yadaene. Abe ngaro ai behehongo ihira-hiraika ekola ngaro ai behehongo ma hungioli, masara ahao naga manga hohowono onangika abe yaoluku enangika. Angamoi abeika hohidifikiri ma behehongo ma hira de ma behehongo abe ngone haniiki ma oraha naa. Abe ma dodihiraino ma oraha o Musa de nako naga o nyawa abe wongelo o Musa ai Paretaika de duru woluku waniiki ma Paretaika, una gea ko iwihiapongua masara iwihohonenge dika, abe iti naga o hakihii ma nyawa yahinooto eko yofoloi abe iwihitaana ai howonika gea. De nako genangoo ma dubuho ma hohowono nako gea ka to Musa ai Paretaino dika yoluku yaniiki,

Himatoko 11:3

De ma oraha gea ahao naga ahi hakihii ma nyawa yahinooto abe ona duru yahigaro o nyawaika la ato ihingaku Ngohino. De ona yahinooto gea abe ma dodihirainohi de nagau ma hingahu ma titi ona abe ahi Demo-demo ma goronaka. De ona yahinooto yomahinoaukuoka de o pakeanga ma kokekekere abe o karongino yodiai, la gea ihitunguu abe ona yaoino o bodito ma hingahu ma demo. De yahinooto gea ahao tahiakunu la yatobamake ahi demo Ngohioka de aino, de ahao genangino o nyawaika yahingahu-ngahu. De abe ma futu o sana moi de o ratuhu hinooto de moributaanga gea abe o nyawa yahipareta to Ngohi ahi kota, hokogenangoo ma dekanino abe ona yahinooto gea yahingahu-ngahu o nyawaika ahi Demo-demo. De gea ma dekana nako haetongo de o taongo, gea o taongo hange de ma honongaino.” Hokogea toihene Ma Jou ai demo ngohino.