Filiipi 2:22 - Ma Jou ai Demo-demo o Totobelohoka

²² Masara naa o Timotiusu, una gea ngini niwihiorikoka abe ai hininga Ma Jouika womahitaanoka ma titi una de ngohi mimakutuono miahingahu-ngahu o Abari ma Rorahai o nyawaika, de una ka ihikaika naga ahi datekoka wohiduhunu, abe imaketero hoka o ngofaka abe woigo ai baba widuhunu la wihisanangi.

Filiipi 2:22 ပူးပေါင်းရင်းမြစ်များ

Hidingoto 16:2

De nanga gogianongoru o ngongakuoka abe yogogere o Lisitira de o Ikoniumu ma kapongoka, ona mata-mata manga hininga duru iwisanangi o Timotiusika.

Roma 5:4

De abe homatongohono nanga kangela ma goronaka, nanga dongohonino gea de ka idadi utuohi itararono homahioriki abe ma dihirainohi de Ma Jou wonaetongo ngone wato ai nyawa abe duru de nanga ijaka. De ahao mangale ma titi homahioriki itararono abe ngone Ma Jou ai nyawa abe duru de nanga ijaka, gea ka idadi utuohi hohioriki de honganono abe ahao Ma Jou wonahikodoku to Una ai medebini ma dararono gea ngoneino.

1 Korintusu 16:10

De nako ma oraha o Timotiusu womahiadono nginino, ngohi tinihibehehongo la ngini niwiao irahai la ufa hiadono naga ma titi nginioka de una ai hawana ipuda. Angamoi unangoo wagorakoka Ma Jou ai karajaanga abe imaketero hoka ngohioli tokarajaanga.

1 Korintusu 4:17

Ho gea ma titi hiadono nanga gianongoru o Timotiusu tihidingoto nginika, angamoi una to ngohi ahi ngofaka nanga Baluhoka abe duru tidora de abe una duru wingaku o Kristusika. Una gea tihidingoto la tato winihihohininga nginika hokokia ngohi ahi wowango imakiniiki hoka o Kristusoli ai hininga. De ahi wowango ma datoro o Kristusoka gea duru imaketero abe hoka todoto-dotoko o gareja homoi-homoiika.

2 Korintusu 2:9

De nengokadauino ma oraha tinihurata nginika de ma titi moioli naga ahi hiningaka. De gea tinihurata la ka idadi tinihioriki nako ngini ka ihikaika nihihingounu ngohino eko koua. De naa tinihiorikoka abe ngini duru nihingounu ahi demoino.

2 Korintusu 8:22

De nanga gianongoru womatengoli gea abe wiwihidingoto de o Titusu la yomakiniiki yoboa initutumu, una gea ma ngoeoka womahitaana ngomino abe duru iwimagawe wileleani nanga Baluhika. De hongoli ma oraha naa ai magawe utuohi ilamoko ma titi woihenoka ma abari nginioka de aino. Abe una woihenino ho hiadono una duru winingaku ma titi ti ngini nia hininga ma dumutu ma rorahaiika.

2 Korintusu 8:24

De naa mangale ma titi o gogareja yairiki de yahidingoto ona yaruange gea, ho ngohi togahoko nginika la niadafongo de nia hininga ma rorahai. Angamoi ngohi tahingahuoka o gareja ma doomu mata-mataika tato ngini genangoka nia hininga ma rorahai. Ho ma oraha ona yaruange gea yomahiadono nginika de ka idadi nia hininga ma dora niahimatoko onangika. De ahao ahi demo idadi imaketero abe hoka ngohi totemoka o gogareja ma nyawaika. Angamoi ahao nako ma oraha ona yaruange nginioka de yolio manga ngi homoi-homoiika de ona ahao yoade-ade ma titi abe nia dora itagi onangika. De gea ahao ngini duru niataana de mia demo ho ona o gogareja ma nyawa duru ihioriki abe to ngomi mia demo onangika ka ma gou-goungu dika.

2 Korintusu 8:8

De iti ufa niataoko ihowono ahi demo nginika, angamoi ngohi ko tinihulokua abe ma titi ma duduhunu niatoomu. Masara ngohi tinihingahu dika abe ma titi nanga gogianongoru utu manga hininga ma magawe abe duru yoigo yaduhunu utuika. De genangino ka idadi hohidotelega ti ngini nia hininga ma dora abe de nanga gogianongoru utuoli manga hininga ma dora la hohioriki imakiniiki eko koua.

Filiipi 1:12

Ahi gogianongoru, naa duru toigo tinihingahu, abe ngaro ma kangela abe naa idadioka ngohino, ma tanu ahi kangelaino naa duru idadi ma utumu. Abe ngohi tohiromanga tato ma utumu, gea o Abari ma Rorahai naa, utuohi iwoe ihikabarihi o nyawa manga ngoe-ngoeika nenangoka, de gea ma titi ahi kangelaino.

Filiipi 1:16

de gea ma titi manga dora. Angamoi ona gea ihioriki abe Ma Jou wohiaturu de wohihitagongo ngohi la o Abari ma Rorahai toodemo o nyawa manga hima-himangoka, ho ona gea ato ihiduhunu.

Filiipi 1:5

angamoi ngini de ngohi ka nengokadauinohi de o Abari ma Rorahai homakuduhunu abe hahingahu-ngahu o nyawa utuika. Abe nengokadau de ahao niihene o Abari ma Rorahai ka hiadono ma oraha naa de ka homakuduhunohi.

Filiipi 1:7

Ngini naa duru de ahi dora tiningano-nganono, gea ho itiai ahi hininga itagi nginika hokogea. De gea tinidora angamoi ngini mata-mata nihidununoka ahi karajaanga ma goronaka naa abe Ma Jou wohihiowa de wohihitagongino. De abe ma titi ahi karajaanga, gea ena duru ma titi hiadono ihibuika nenangoka, angamoi o nyawa utu yatae o Abari ma Rorahaiika ato ko igoungua. Ho ngaro ngohi o bui ma tauoka dika togogere eko ngaro ahao ma oraha ihiurusu o nyawa manga himangoka abe kiani o Abari ma Rorahai toodemo de tahitararono ma titi onangika, ma, ngini duru ma ngoe nihiduhunoka ngohi naa.

Filiipi 2:20

Duru o nyawa moioo de ko iwa abe yomatoteroino de o Timotiusu, abe una de ngohi duru mia hininga ka moi dika, de una duru winingano-nganono ngini.

1 Timotiusu 1:18

Ahi ngofaka o Timotiusu, ahi gogahoko ngonaika abe totulihi ahi hurata ma goronaka naa, gea idadioka ahi behehongo ngonaika. De ahi behehongo gea duru imakiniiki de ma himatoko ma demo abe ma dihira o gareja ma hihira yamake Ma Jouoka de aino abe ma titi ngona. Abe ma demo gea yamake Unangoka de aino de ahao ona ihidemo nginika. De naa tonihihohininga ma titi ma himatoko gea la tato tonihigaro ma totiaiika. Abe nako ka ihikaika nomahohininga de naniiki ma himatoko ma demo Ma Jouoka de aino gea, gea ahao inihiputurungu la ka nakunu ma dorouika nalawana. Abe gea ngade-ngade imaketero hoka ma himatoko ma demo gea idadioka ani dae moi la ka nolaku ma oraha naparangi ma dorouika.

1 Timotiusu 4:6

Ahi ngofaka, nako ahi dodotoko o huratoka naa ngona nadotoko nanga gogianongoruika la hiadono ona yangaku genangika, gea nomahitaana nodadioka o nyawa abe nileleani irahai o Yesusu Kristusika. De naa moioli tonihigaro tato kiani nogila-gila ani hininga nomahitoofo de o ngongaku ma dodotoko ma rorahai gea, abe hoka nengokadauino ka ihikaika naniiki de nomahitoofo genangino.

2 Timotiusu 1:2

De naa ngona o Timotiusu tonihurata ngonaika, abe ngona ahi ngofaka ma titi o ngongakuoka de duru tonidora ngonaika. De naa tonigahoko nanga Baba Ma Jou de nanga Baluhu idodutu o Yesusu Kristusika. De gea tonigahoko la Una ahao wonihiowa ngonaika, de woniao de ai hininga de ma dora ngonaika, de ahao wonihidoakoo to Una ai hininga ma miriidi.

2 Timotiusu 3:10

Masara ngona o Timotiusu, ngona de ona gea abe o rerehene ma dodotoko yotobadotoko, gea ngona de ona duru nimakohowono. Masara nako ngona de ngohi, gea ngone hatoli homaketero nanga hininga. Angamoi ka nengokadauinohi de ngona duru nohihioriki to ngohi ahi hininga de ahi dodotoko. De gea ahi hininga ma dumutu de ahi wowango ma datoro, de ahi ngongaku Ma Jouika, de ahi hininga ma mobole de ahi dora o nyawaika, gea ahi hininga ma dola mata-mata duru nohihioriki ngohi angamoi ma dodihirainohi de ngone duru homahikoriki. De gea ngaro nengokadau abe ma oraha o nyawa ihihikangela ngohino, ma gea nohihioriki abe ngohi tomatongohono de ka tohidagiohi ahi karajaanga Ma Jouoka de aino.

Titusu 1:4

Ho naa ahi hurata tohidingoto ngona o Titusika, abe ngona nodadioka hoka ahi ngofaka idodutu ma titi ngona de ngohi nanga ngongaku ka moi. De naa tonigahoko Ma Jou nanga Babaiye de nanga Duduhunika o Yesusu Kristusu nanga Koano abe Ma Jou wonahibehehongoka. De tonigahoko la Una ahao wonihidoaka ngonaika to Una ai hininga ma owa de ai hininga ma miriidi.