Estere 9:27 - Ma Jou ai Demo-demo o Totobelohoka

²⁷ Ho hiadono o Yahudi ma nyawa yomaputuhu ato yaniiki duru imaketero hoka o Modekai wotulihi ai hurata ma goronaka ho o tao-taongiye yodiai manga hohininga ma rame-rame gea. De o nyawa abe ko o Yahudi ma nyawaua masara ahao onangoo duru yoigo yodadi o Yahudi ma nyawa hiadono yaturuuru manga agama de ka yaniiki dika o Yahudi ma nyawa manga agama, onangoo kiani ka ihikaika yaniiki o hohininga ma rame-rame ma hiaturu gea ka hiadono manga totofora yolape-lapeuku. De o Purimi ma rame-rame ma hiaturu gea ena abe o Modekai wotulihuku o huratoka de wohidingoto onangika la ona ihioriki ma rame-rame ma oraha o mede Adara ma tanggala ngimoi de iatoka de o wange hinootoino ma dekana yorame-rame.

Estere 9:27 ပူးပေါင်းရင်းမြစ်များ

Estere 8:17

De o propinsi mata-mataika ma kota-kota o kiaka dika yabasa o koano ai pareta ma hurata ma hungi nenanga de o sosanangi imakiniiki. Abe ma oraha yabasa o hurata naa de o Yahudi ma nyawa ka de yoihene de duru yogarago. De ona ihirame-rame o pareta ma hungi nenanga de yodiai o ngolo-ngolomo de duru yorame-rame. De naga o nyawa abe ko o Yahudi ma nyawaua masara naa onangoo duru yoigo yodadi o Yahudi ma nyawa hiadono yomahisapuru onangika hiadono yaturuuru manga agama de ka yaniiki dika o Yahudi ma nyawa manga agama. De hokogea yodiai angamoi de o pareta ma hungi naa ona yomulaenge yamodongo o Yahudi ma nyawaika.

Estere 9:20

De o Modekai wotulihuku mata-mata abe idadioka o wange gea de wotulihi o huratoo ma ngoe abe wohidingoto o Yahudi ma nyawa mata-mataika o tonakoka gea abe yomanoa ma koano ai kuahaka. Ho ngaro yogogere ma gogurutika eko ko ma gurutikaua de ngaro yogogere o kotaka eko o kapongo ma etetekoka kiani yamake o Modekai ai hurata gea.

Estere 9:21

De manga huratoka o Modekai wahingahu kiani o tao-taongiye ka de adonoka o mede ngimoi de hinootoka abe ma romanga o mede Adara ma tanggala ngimoi de iatoka, de kiani o wange hinootoino ma dekana ihirame-rame manga lolaku.

Estere 9:28

Ho o Yahudi ma nyawa mata-mata manga tau homoi-homoiika o tao-taongiye kiani yaniiki o Purimi ma rame-rame de to ena ma hiaturu ma ngekomo abe kiani ka ihikaika ona mata-mata yaniiki ka hiadono manga totofora yolape-lapeuku de ngaro ahao o kiaka dika o Yahudi ma nyawa yogogere ma kiani yaniiki.

Yesaya 56:3

“De to Ngohi ahi hiowa ka idadi o nyawa onagona dika yamake iti ihitobanii-niiki Ngohino. Ho ngaro o homoa ma nyawa masara ufa yomatemo ato, ‘Ou, ngohi naa Ma Jou duru ko idadiua wohidafongo.’ De ngaro o nyawa abe utu yaetongo onangika ato duru ko kia-kiaua adaene angamoi manga ngofaka ko idadiua yomamake, masara onangoo ka idadi yamake o hiowa Ngohioka de aino.

Yesaya 56:6

“De abe ona ko o Yahudi ma nyawaua masara ihitobaniiki Ngohino de ihileleani, de yodora Ngohi o Yawe ahi romanga, onangika gea ka idadi tahiowa. Abe ona ko yatilakurua o Hiaini ma wange ma hiaturu masara yodafongoka to Ngohi ahi behehongo ma demoika.

Yosua 9:15

Ho o Yosua de o Hewi ma nyawa gea yomahiketehibehehongo la ufa yomaketeparangi masara yomakao irahai de o dame dika. De o Isiraele ma nyawa manga hihira utu onangoo yomahikoboto la ufa yawohanga manga behehongo gea onangika.

Hihira 11:40

De manga hohininga yodiai hokonaa, o tao-taongiye o Isiraele ma nyawa manga momoholehe yohupu ma hoanika de manga wange iatino ma dekana la yomahohininga o Yefata ngoi ora ami dubuho abe imidaene munangika. Muna o Isiraele ma nyawa abe manga dutu adaene o Gileada ma nyawaika.

1 Samuele 30:25

Hokogea o Dautu ai putuhu, de ipahaino de ai demo gea idadi o pareta moi. De ngaro ma oraha gea ka hiadono ma oraha naa naga abe ma ade-ade ihitulihuku masara ngone o Isiraele ma nyawa ka haniikohi ai pareta ma demo gea.