Hokogea o Firaunu wotemo ibooto de ahao ai ali-ali wihuputu de wihinoa to Yusupu ai hagaraaraoko, abe o ali-ali gea ma dodunguu o koano ai kuahaka de aino. De ahao waleino o baju duru ma rorahai abe ma lawe ma alu-aluhu de genangoli wihinoauku o Yusupika de ai tomarukuoli wihinoauku o gule abe o gurasino. De mata-mata gea o Firaunu wodiai la wohitunguu o Mesiiri ma nyawaika abe o Yusupu ai kuaha wamake manga koanoino.
Estere 8:15 - Ma Jou ai Demo-demo o Totobelohoka15 De ahao o Modekai o koano ai tauoka wohupu de wapake o baju ilape-lape abe imaketero hoka o koano ma baju ma guru-gurutu abe utu o baju ma bihi-bihi de utu ma gare-garehe de ai peaka wapake o sapeo ma amoko abe ona yokokurutiye dika ka idadi yapake de ai sapeo gea ihidalape de o gurasi ho duru ma hohailoa. De naga o Modekai ai poretoka o ngoere duru ma ngina-ngina de ma guru-gurutu de ena gea ma wuu-wuu hoka o koano dika wapake ho enangoo duru ma rorahai. De o Susana ma kota ma nyawa duru yogigoro de manga sosanangi ma hagaaga abe ihititi o pareta ma hurata ma hungi nenanga. အခန်းကိုကြည့်ပါ။ |
Estere 8:15
15 ပူးပေါင်းရင်းမြစ်များ
De o bunga-bunga ma redi-redioka naga ma ngi-ngi ma ngoe yamehele de o hakaru ma leto-letongo abe yapelaka de yatatorika ihidongoatika. De naga ihidemeheloka o hakaru utu abe duru ma leto-letongo de o bia-bianga ma kai abe enangoo duru ma leto-letongo. De naga o liate ma ngoe o bunga-bunga ma redi-redi ma goronaka de enangoo yodiai o hakaru ma rorahaiino. De o loliate ma hidogoronaka yadide o ngoere ma amoko hoka o ngorana ma dadatoko ma ngoere abe yodiai o lawe ma alu-aluhino de o ngoere gea utu ma gare-garehe de utu ma bihi-bihi. De o liate amomoiika naga ma didide o haakaino ma rupa o gogoli de genangika o dadatoko ma ngoere ihidiliko de o liliko abe yodiai o ngoere ma gare-garehino de ma wuu-wuuino. De naga o hiaini ma ngi ma ngoe ma rupa o kuruhii ma guru-gurutu ma dodipokouku abe yakelenga o mehele ma rorahaioka la o nau-nauru ka idadi yolomo yomahiduiye o hiaini ma ngi-ngioka gea. De o kuruhii ma guru-gurutu mata-mata yodiai o haaka de o gurasi ma dutuino masara daku ma lokuino ihidalape de ma bole-bole hoka o babangini.
Duru ma dodihiraino o Peresia de o Media ma tonakoka gea yomulaenge yotulihuku manga kokoano manga ade-ade o hohininga ma bukuoka. Ho ngaro abe ma oraha manga koano duru wohira wahikoano de mata-mata wodiai abe yoigo la ko yawohangua ena gea ma titi yotulihuku o bukuoka. De ka de o koano womatengo gea wohonengoka de ahao naga ai duruuru o koano womatengoli ho unangoo kiani ai ade-ade ihitulihuku o bukuoka de manga buku-buku gea ihiromanga o kokoano manga buku. De ma oraha o Ahasi-weroso wodadi o Peresia ma nyawa de o Media ma nyawa manga koano de ai duduhunu abe yotobatuli-tulihi ona ihitulihuku o kokoano manga bukuoka gea abe hokokia ma titi mata-mata abe o koano o Ahasi-weroso unangoo wodiai de ai kuaha de ai buturungu. Ho ka de womulaenge wohikoano ka hiadono ma bobaha ai nyawa wahikoano, naga ai ade-ade ma ngoe abe ihitulihuku. De o Modekai to unangoo ai ade-ade ona ihitulihuku o kokoano manga bukuoka abe hokokia o koano wigorakiye hiadono o Modekai duru de ai kuahaka de o nyawa manga horomati duru ilamoko unangika.
De adonoka ma wange abe kiani yoiki yototaka o koano ai hurata gea, de ma koano o Ahasi-weroso ai hidingoto ma nyawa wahitataiti, wato, “Nisobo!” Ho yoikoka de duru o wange genangoo ai behehongo ma hurata gea yabasa o nyawa mata-mataika abe naga o Susana ma kota ma honongaka abe yakurunga de ma dadaduhu ma gurutiye de o koano ai tauoo naga genangoka. Mata-mata gea yodiai ibooto de ahao o Hamana de ma koano yogogeruku o ngolo-ngolomoka de yokere o angguru ma gohaka. Masara manga kokawaaha o Susana ma kotaka ka de yoihenoka o pareta ma hurata gea de duru yopusingi manga kokihiningaka angamoi ko yomangaratiiua hoka manga hiningaka ato, “Adodoa ho hokonaa idadi?”
O wange hange ko yolomua de ko yokerua gea ipaha abe o ngo Estere de o Yahudi ma nyawa o Susana ma kotaka yaniiki ami behehongo itiai de ahao o ngo Estere momahidiai mitutumu o koano ho momahinoauku ami pakeanga abe o koano ngoi fekata dika ka idadi mapake de moiki o koano ai tau ma goronaika la mitutumu. De ma oraha gea ami rokata o Ahasi-weroso wogogeruku ai kaderaka. Ho o ngo Estere moiki ai tau ma goronaika de mogila-gila hiadono mowohamika ai ngoranika abe genangoka una wogogeruku ai kaderaka.
Ho ka de yomatoomuino de o Hamana womulaenge woade-ade womagorakiye. Wadefetongo onangika ai kiahonanga de ai tiwi ilamoko hiadono duru wokaya. De abeika to una ai ngofaka o nau-nauru duru yowoe de o koano ka ihikaika wigorakiye. De o Hamana womahingahuoli abe ka ihikaika ai kuaha idogo hiadono nako una de o koano ai popareta utu, ma, ka o Hamanohi abe duru wigorakiye.
Ho o Hamana kiani wale o koano ai baju ma guru-gurutu abe duru ma rorahai gea de wihinoa o Modekaiuku de ahao wihibarene o koano ai kuda ma poretoka de wihidagi-dagi o ngeko-ngekomika o kota ma goronaka. De manga dodagi ma goronaka o Hamana kiani waamo-amokiye wopoa-poaka, wato, “Abeika o nauru nenanga angamoi hokonaa nanga koano woigo wohitunguu ai horomati onangika abe duru iwihisanangi!” Hokogea kiani o Hamana wodiai la wihingounu ai koanoika.
Ihira irahai o koano nahuloko ani duduhunika la yale o koano ma baju ma guru-gurutu abe duru ma rorahai de ena gea kiani o baju abe ngona o koano napakeoka. De ahao yaleoli o koano ai kuda abe o nyawa inimake ngona o koano ma oraha nofarene ai kuda ma poretoka gea. De o koano nahuloko la ani duduhunu utu yale o koano ma dodunguu abe biaha ihipasi ani kuda ma peauku la duru o nyawa ihioriki gea duru to ngona ani kuda.
Ho naa o hurata mata-mata yodiai ibooto de yahidoaka o koano ai hidingoto ma nyawaika de ahao o koano wahuloko onangika la yomataiti yototaka. Ho ona homoi-homoi yokokifarene manga kuda ma poretuku de imaketero hoka o kuda ma roreebe yokokisobo abe duru ipalesa imapopaata manga kuda. De duru ma oraha genangoo o hurata gea yahidoaka o popareta ma nyawaika o Susana ma kota ma honongaka abe o koano ai tau naga genangoka de ona yomulaenge o pareta ma hurata gea yakokibasa o kokawaahaika o Susana ma kotaka.
Eko bote ma oraha niloiki unangika de gea niato niwimake womatengo abe ai baju duru ma rorahai de ma hali? Marai hokogenangua, angamoi o nyawa abe manga baju hokogea ma rorahai yomahinoauku, ona gea yogogere o kokoano ma tauoka dika. Masara nako o Yohanese ai baju hokogenangua angamoi una womanoa o tonaka ma kakaahaka dika.
“De ngaro ma bunga-bunga gea ka iwangoiye dika, masara nako hohidotelega to ena ma hohailoa de abe ma dihiraino to nanga koano o Saloomo ai baju ma hailoa, ma ka o bunga-bungahi duru ihohailoa. De gea o Saloomo ai tiwi duru ilamoko ho ai baju duru ma rorahai, masara ma bunga-bunga naa ihikala ai bajuika ma titi ma hohailoaino.”
De ahao o Yesusu wogilio ai dodotoko ma dihira ma demoika abe wadotoko ma titi ufa hiporete Ma Jouika la o dunia ma kiahonanga hohitihira nanga wowangoka. De Una wotemo wato, “Ma moiuku naga womatengo wokaya-kaya, de una gea ka ihikaika womahinoauku de o baju ma hohailoa de ma hali-hali, de o wange-wangeiye una wolomo o inomo duru ma rorahai de womahisosanangi dika.
ကြော်ငြာတွေ