Efesusu 5:18 - Ma Jou ai Demo-demo o Totobelohoka

¹⁸ De ufa ngini inidaluku, angamoi ma daluku gea ka idadi nia wowangoka ka ihikapusaka. Masara koaho nimahigunoa la ka ihikaika Ma Jou o Womaha winihilufungu ai kuahaka de winihihira-hira ngini homoi-homoi nia boriwowangoka.

Efesusu 5:18 ပူးပေါင်းရင်းမြစ်များ

Dodadi 9:21

De o wange moi ai angguru ma teongo ma gohaka waokere ilamoko hiadono iwidaluku. De una naga womatengoka ai tau o ngoerino ma goronaka iwikiookoka. De ai giooko ma goronaka womaidu ka ai bululunoka de ko wohiorikua.

Sosawaro 20:1

Nako hiadono o nyawa yadalukoka, gea ahao o kangamo idadi manga hidogoronaka. Ho onagona dika abe o daluku yahirehenika, ona manga sosawaro duru ko iwa.

Yesaya 25:6

De dokengika abe ma oraha adonoka de o Siono ma lokuoka naa de Ma Jou o Yawe Wokokurutiye ahao wahidiai o ngolo-ngolomo ma amoko duru ma rorahai. Abe ai ngolo-ngolomoka gea de wahiolomo o dunia ma nyawa mata-mataika de ma roehe de ma hakioka de ma ngokere gea o angguru ma gohaka ma teongo duru ma rahai. Ho ma inomo de ma ngokere gea ngaro mata-mataika masara duru ka enangohi ma jame de ma rorahai.

Yesaya 5:22

De nginioli abe nijago niokere o daluku, abe nimagorakiye niato nako de o nyawa utu ma ka nginiohi ma daluku ilamoko ka idadi niokeruku. De abe ngini ma oraha niaurusu o nyawa manga howono de nisanangi niodafongo o tiwi ona yahowo-howonino la iti niaputuhu niato ona ko yahowonua. Masara ona abe ko iwa manga howono, onangika nisanangi niahohowono onangika. De nginioo abe nia datoro hokogea ka o bobinaaha dika inidodamaa ma oraha nia gahe adonoka.

Yesaya 55:1

Ma Jou wahoko o nyawaika wato, “Ngini mata-mata abe nia ngomaha yoduu-dudungu, abeika ngini niainohi o akerino naa! De ngaro ti ngini nia tiwi ko iwaka, ko adodoaua, masara ka idadiohi nikokiboaino! Niboaino la nimangiriki o angguru ma teongo ma gohaka eko o hapi ma susu de niokere! Abe gea biaha kiani nimaijaino masara naa ngaro ufa dika de nifangu, ka idadi nimaleino dika de niokere!

Matiusu 23:25

De o Yesusu ka wataerohi onangika wato, “Ngini nitobadoto-dotoko o Musa ai Paretaino de nginioo o Farisi ma nyawa ahao nia hohowono duru kohadubuho niamake nginika! Angamoi ngini duru nihidodiai niaihoro nia mangko ma riwoto de ma poretino, masara doka ma goronaka de nia mangko aomangoka de ma dola abe nimagora de abe nia horoodoka de aino iboa! Ho doka ma goronaka de duru ko itebinua. De gea tanu imaketero dika abe hoka nginioli angamoi nako o nyawa inimake de bote ona ato ngini nitebinoka Ma Jou ai himangoka, masara doka nia hiningaka de aomangoka de ma dorou. Ho gea Ngohi tato ngini ka nimadokangelukino dika!”

Matiusu 24:49

Abe nako ma duduhunu gea womulaenge wapoha-poha ai dodiawo abe onangoo o duduhunu o tauoka gea, de watobaniiki o rame-rame, de hiadono ka iwitobadaluku, gea ahao done hokokia idadi?

Lukasa 1:15

De una ahao ai wowango ma karajaangino de duru iwihisanangi nanga Baluhika ma titi wileleani irahai. De mangale ma titi wileleani Unangika ho una gea ko wadadiua waokere o angguru ma teongo ma gohaka eko o daluku angamoi ka womahidoboainohi de Ma Jou o Womaha iwilufungoka.”

Lukasa 11:13

Ho naa Ngohi tato abe nako ngini o howo-howono ma nyawa de ka idadi o hidoaka ma rahai niahidoaka ti ngini nia ngofa-ngofakika, ho Ma Jou Unangoo ka idadi wonabaluhu de ma hidoaka abe utuohi irorahai ngoneino. De hongoli nia Baba o Horogaka ka idadi winihidoaka Ma Jou o Womaha nginika iti ngini nimagahoko hokogea Unangika.” Hokogea o Yesusu ai dodotoko iwinii-niikika abe ma titi hokokia yomaniata.

Lukasa 12:45

“Masara naa tinileha moi. Nako hoka ma dutu wosoboka ai dodagioka de ahao ai duduhunu gea ai hininga ma dorou ipuda de womafikiri wato, ‘Marai ahi dutu ko ai dekanohi de ahao woboa, ho ka idadi taniiki to ngohi dika ahi mau naa ai tauoka.’ Nako ai hininga ma dorou hokogea, sarakia, ahao ma dutu widosanangi unangika eko koua? Abe nako ma duduhunu gea womulaenge wapoha-poha ai dodiawo abe onangoo yomahikarajaanga moi o tauoka gea, de watobaniiki o rame-rame, de hiadono ka iwitobadaluku, gea ahao done hokokia idadi?

Lukasa 21:34

“De naa Ngohi tinihitiarioli la ka ihikaika nimagoana done nia hininga irehene Ma Jouoka de aino ma titi o rame-rame ma daluku inihipareta eko o dunia naa ma perelu nihitihira nia wowangoka. Angamoi done Ma Jou ai hohowono ma wange adonoka de ko nimahidiaiua ho duru initodokana nia hiningaka. De ufa hiadono inihidiliko ma hohowonoka angamoi ko nimagoanua ho ko nimahidiaiua ma oraha iboaino ai hohowono. Angamoi ai hohowono gea ahao yakokidaene o nyawa mata-mata o dunia ma lokuoka.

Yohanese 2:10

De wiade-ade unangika wato, “O nyawa manga biaha yahitihiraka manga angguru ma rorahai abe yahiokere onangika abe yahokino. Gea yahiokere hiadono yakokiwedonoka de ahao manga angguru biaha abe ikuranga imutiti enangoli yahiokere. Masara nanga biaha gea ngona nohikawalimi, angamoi ngaro ani angguru kangano irahai ma ka nenangohi irahai abe nagogonika hiadono ma oraha naa de ahao nohihupu.”

Hidingoto 11:24

De o Baranabasa una ai hininga ma rorahai, de Ma Jou o Womaha duru iwilufungu unangika, de ai ngongaku duru iputurungu Ma Jouika. De genangoka ma nyawa duru ko manga ngoe yomahidogo iwingaku-ngaku manga doomuika.

Roma 13:13

Ho nanga wowango ma dodagioka de kiani hatobaniiki o dararono ma datoro dika abe gea ka ma rorahai dika nanga datoro. De gea kiani hokonaa nanga wowango. Abe ko idadiua haniiki o rame-rame abe naga genangoka o nyawa yadalu-daluku de gea hiadono manga badanga ma hafini ho ona ko yomahiparetakaua. De ufaoo ngone inatobadaluku eko homakitigi de abe ko nanga fekatua eko nanga rokatua. De ngaro naga utu o howono abe nanga badangoka hahowono ma enangoo ko idadiua haniiki. De ufa ngone homaketeribuutu eko homaketetaleana.

1 Korintusu 11:21

Abe naga ihihingahu ngohino ato bari ngini nimaketejai-jai niolomo de ko nimaketedamaaua. De niolomo ibootino de bari ngini utu ka inihafinohi de masara ngini utu hiadono inidaluku de o angguru ma gohaka ma teongo gea.

1 Korintusu 5:11

Masara naa ngohi tinihurata de tinihibehehongo tato, nako onagona dika yomahingahu ato, “Ngohi ani ria-dodoto o Yesusoka.” Nako ona yomahingahu hokogea masara manga wowangoka de ka imaketero dika de o dunia ma nyawahi manga biaha, onangika gea abe ngohi ahi huratoka gea tinihibehehongo tato ufa ko nimaketedodiawo onangika. Abe nako ona manga wowangoka de yomakokitigi ko itiaiua, eko yotobataleana, eko yomahuba o pangaoika, eko yotobadoa-doana, eko yatobadaluku, eko yotobarusi-rusi. Ho nako o nyawa yomafetongo o gianongoru o Yesusoka masara manga wowangoka ma datoro naga hokogea, ngohi tato ngaro ka niolomo dika de ona, ma ko idadiua.

1 Korintusu 6:10

de ona yotobatohiki, de ona yotobataleana, de ona yotobadaluku, de ona yotobadoa-doana, de ona yotobarusi-rusi. Ona gea mata-mata de ko idadiua yodadi Ma Jou ai kokawaaha.

1 Tesalonika 5:7

Angamoi biaha o futu-futuoka o nyawa yomatobaidu, de nagali manga biaha o futu-futuoka o nyawa yotobaokere hiadono yadaluku.

Titusu 1:6

Abe nairiki o nau-nauru la yodadi o gareja ma hihira, ona gea kiani manga wowango hokonaa. Ona gea manga wowangoino ko iwa manga datoro la hiadono o nyawa utu ka idadi yatae-tae onangika. Abe una kiani watobagou-goungu ngoi fekatika abe ma titi ko wahowonua de o ngofeka utuika. De abe nako to una gea ai ngofa-ngofaka, ona gea kiani naga manga higihene yatobagou-goungu manga dimonika, de ufa to una ai ngofa-ngofaka gea ka yomahisosanangi dika abe manga higihene ko iwa manga dimonika. Ho nako womatengoani abe ai ngofa-ngofaka o nyawa yahioriki abe ona manga datoro ko itiaiua de yatobalawana o nyawaika, to ona manga dimono gea ko idadiua nigoraka la wodadi o hihira o garejaka.