Efesusu 2:4 - Ma Jou ai Demo-demo o Totobelohoka4-5 De ngaro ngone hokogea ma dihiraino hoka hohonengoka to Una ai himangoka, masara Ma Jou Una ka wonahidawango ka ma moi de o Kristusoli. De gea wonaduhunu ma titi to Una ai hininga ma dora kohaamoko ngoneino. Ho ngaro ngone nanga howono ma goronakahi de nanga honenge ma goronakahi, masara Una ai hininga ma dora nagahi ngoneino, ho wonahiwango genangino. De gea ma titi Ma Jou ai hininga ma owaka dika de aino hiadono wato wonaduhunu. အခန်းကိုကြည့်ပါ။ |
Efesusu 2:4
34 ပူးပေါင်းရင်းမြစ်များ
De Ma Jou wihingahu o Musaika wato, “Irahai ani gogahoko gea masara ngona Musa ko idadiua namake ahi himanga angamoi ko yapoaua o nyawa yomalega Ngohino de ka yowangohi ho ufa hokogea done ngona nohonenge. Ho hokonaa dika Ngohi todiai la ahao tohidumutu ahi owa ma dararono ingodumu ngonaika de initilakuru. De ka de ma oraha initilakuru de tomahingahu tomafetongo, ‘Ngohi Ma Jou o Yawe,’ la hiadono ahi romanga ngona ka idadi noihene. Ngohi Ma Jou abe duru ahi hiokoo itagi o nyawaika abe toigo taduhunu de to Ngohi ahi dora duru itagi onangika abe toigo la yamake ahi dora manga wowangoka. Ho Ngohi tosanangi tonihimatoko ahi owa ma dararono ngonaika.” Hokogea Ma Jou wohimoteke o Musa ai gogahokika.
De ma tonaka ma guru-gurutika gea de ahao Ngohi o Yawe tomahimatoko onangika. De gea tomahimatoko de totemo onangika tato, ‘Ngohi naa tinidora nginika, de ahi dora gea itongohono ka hiado-adonika. De gea ma titi hiadono Ngohi ka ihikaika tatobagou-goungu nginika.’” Hokogea Ma Jou o Yawe ai demo ai nyawaika.
De womaniata womahingahu Ma Jou o Yaweika wato, “Gea! Ngona Ma Jou o Yawe de ma dihirahi ngohi ahi tonakokahi de tato marai hokonaa idadi. De angamoi ngohi tonihioriki abe to Ngona dika ani dora ko iwa ma batingi de duru noigo o nyawa naduhunu. De ani hininga itongohono de ko itai-taitua o nyawa nahohowono ho hiadono ngaro nato nahohowono ma nako yomatoduba hiadono manga dorou yanoaka de gea ko nahohowonokaua. Gea mata-mata ngohi tohioriki de gea ma titi hiadono toara o Tarasiisi ma kotaika.”
Ho ma demoino gea de ka idadi hohioriki abe ngaro o Yahudi ma nyawa eko abe ko o Yahudi ma nyawaua, masara ko homakohowonua Ma Jou ai himangoka, angamoi ngaro onagona dika iwingaku Unangika de ona gea Ma Jou wadafongo de waetongo yomaketero dika Unangoka. De Una gea to ngone mata-mata nanga Baluhu idodutu, abe ngaro onagona dika yomagahoko Unangiye la waduhunu, masara gea ona mata-mataika duru waduhunu de wahiowa onangika de o hiowa kohangoe.
De ngini ufaoo niataoko ihowono abe ma titi Ma Jou ai dongohono nginika abe ko winihohowonuahi. De igoungu abe Ma Jou ai hininga duru irahaiholi ngoneino de duru womatongohono de ai dongohono ma amoko la wato ka wonahidoakohi ma oraha ngoneino. Masara gea womatongohono de ai hininga ma rorahaiino ko mangaleua ma titi abe winihigunoa dika la niahowo-howono, masara womatongohono la wato winihidoaka ma oraha la ngini nitoba nia howonino. Ho done sarakia ngini niaetongo ai dongohono ma amoko gea niato ko kia-kiaua?
De abe womatongohono de ko wahohowonuahi, ai dongohonino gea de naga moioli ai hininga ma dumutu. Abe Una woigo womahimatoko to Una ai medebini ma dararono abe duru kohaamoko o nyawaika. De gea ma dihirainohi de nagau ai hidee la o nyawa waduhunu ai hiokoo ma doraka de aino. De ahao ona gea abe Ma Jou waduhunu, to ona manga wowangoino de Una womaputuhu la womahimatoko ai medebini ma dararono la mata-mataika ka idadi yamake ai medebini gea.
De naga ai hidoaka ma owa moioli hamake Unangino ho hiadono ngone koaho hihigiriiri Unangika. Abe igoungu ma dihiraino de ngone hodadi hoka o howono ma gogilaongo angamoi ka hatobahowo-howono, masara ipahaino de o Kristusu wonabanguoka la ko iwaka nanga papakiti o howonika, ho ngone naa wonahiluasoka. De o Kristusu ai bobangu gea tanu ai awunu abe iuihi ma oraha wohonenge o gotaka. De gea ma titi wonabanguoka de ai awunu hiadono nanga howono Ma Jouika wakokiofioka. De abe Una waofi nanga howo-howono, ai datorino gea de duru itaana abe to Una ai hininga ma owa duru ilamokoholi de iwoeholi abe itagi ngoneino!
De abe Ma Jou wonaduhunu, gea ai hininga ma dumutu wato ka idadi wohimatoko o dunia mata-mataika abe hokokia ma amoko ai hininga ma owa ngoneino. Ho ma oraha genangoka de imahikaika de ahao o dunia mata-mataika ka idadi yamake ai hininga ma owa ngoneino, abe gea ko moiua yakunu yaetongo eko yatuga angamoi duru ilamokoholi ai hininga ma owa ngoneino. De gea ai owa wohimatoko o Yesusu Kristusu ai datorino abe gea wodiai la wonaduhunu ngone.
De gea ngohi duru toheranga abe ma tagongo ma hohailoa gea wohihidoaka ngohino, angamoi nako ngohi de o nyawa utu mata-mata iwingaku-ngakuoka, ma ka ngohiohi tanu duru ko kia-kiaua ihidaene. Masara ngaro hokogea ngohi, ma Una wohihitagongo de ma karajaanga ma hohailoa gea la wato ngohi tahingahu-ngahu abe ko o Yahudi ma nyawaikaua ma titi to Kristusu ai owa abe ngone ai nyawaino. De gea ai owa duru ma amoko de duru ka irahaiholi hiadono ko hakunua ngone hatuga, de nanga hiningaka enangoo ko aboaikaua genangika.
De naa, mia gogianongoru abe duru nanga Baluhu idodutu winidora, ngomi naa ka ihikaika mitarimakase Unangika ma titi ngini. De gea ngomi miato mia tarimakase ma demo itaana angamoi ma dihiraino ngini winiirikoka la wato ka idadi ngini ngaro ufa dika de nginioo niamake ma hohowono abe hoka ona gea ko yangaku-ngakua ma gou-goungika ona gea ahao kiani yamake. Ma nako ngini, winiirikoka la ahao nia baha adonoka de ka idadi winihidoaka nia utumu nginika. Abe nia utumu gea ngini homoi-homoi ahao o hidoku niaborimake ma titi to nanga Baluhu idodutu o Yesusu Kristusu ai medebini ma dararonino niamake. Ho gea ma titi ho hiadono ma dodihiraino de Una winiahoko nia ngongakuino, la gea ahao nia baha adonoka de gea ena ahao niamake. De gea winiahoko o Abari ma Rorahaiino abe ngomi ma dihira minihingahuoka genangoka. Abe ma oraha gea ngini niodafongoka o Abari ma Rorahai de gea Ma Jou waputuhoka wato ma titi Ma Jou o Womahino winitingakino la gea nidadi to Una ai nyawa de niwileleani ka Unangika dika. Ho mangale ma titi nia leleanino de nia ngongaku abe ma gou-goungino hiadono ahao ka idadi nginioo niamake ai medebini ma dararono angamoi ahao ma wange gea de ngini naga nanga Baluhu idodutuoka.
Abe Ma Jou Una gea wonaduhunoka de wonaahokoka Unangino la ka idadi nanga wowango hao itiai la itebini ai himangoka. De gea wonaahoko, gea duru ko ma titiua nanga wowango ma datoroka naga moi abe homahitaana hototiai hiadono wonaduhunu. Duru ko iwa ma titi ngoneoka, masara ka Una ai hiningaka dika de aino abe wato wonaduhunu ngone. Abe Una duru ma dodihiraka ma oraha o dunia ko wotulaadauahi de ai hininga ma owa ngoneino wonahideeokau wato ahao ai Ngofaka o Yesusu Kristusu wihidingoto o duniauku naa la ka idadi wonaduhunu ngoneino. De hokogea idadioka ai hidee ma dodihiraino abe ai hidoaka ma owa gea ka wonahidoaka dika ngoneino ma titi o Yesusu Kristusino. Ho mangale ma titi ai duduhunu ma amoko ngoneino gea, ho ufa hiadono ngone hapidili nanga karajaanga masara kiani hohidagiohi abe o Abari ma Rorahai ka hahingahu-ngahuohi o nyawaika.
De ngone kiani hihigiriiri nanga Jouika, abe Una gea to nanga Baluhu idodutu o Yesusu Kristusu ai Jou de ai Babaoo, ho duru itiai abe ngone hihigiriiri Unangika. De gea kiani hihigiriiri ma titi to Una ai hininga ma dora kohaamoko ngoneuku. De mangale ma titi ai hininga ma dora gea hiadono ngone homaboali la nanga wowango ma hungi naga Unangoka de aino. De genangoo ma titi hiadono ngone kiani hihigiriiri nanga Jouika. De mangale ma titi o Yesusu Kristusu womomikoka ai honengino, ho hiadono to ngoneoo nanga nganganono duru ko ihihangua ka hiado-adonika, abe ma titi ngone duru hohioriki abe ahao ma oraha adonoka de ngone hamake nanga utumu Unangino. Abe ma oraha naa nanga utumu gea ko hamakeuahi ho ka hongano-nganonohi.
ကြော်ငြာတွေ