Dodadi 6:17 - Ma Jou ai Demo-demo o Totobelohoka

¹⁷ Hokogea tonihibehehongo ngonaika angamoi Ngohi ahao tohiboaino o nguihi duru kohaamokiye hiadono o dunia alufungoka. De gea mata-mata tohibinaaha abe iwango o dunia ma lokuoka ho hiadono o kia dika de ma womahoka ikokihonenge.

Dodadi 6:17 ပူးပေါင်းရင်းမြစ်များ

Dodadi 2:7

De ahao o wange ma butaanga de ipaha Ma Jou o Yawe o tonakino wihidadi o nyawa moi o nauru. De Ma Jou o nauru gea ai ngunungiye widuwuwu la gea wihiwango de to Una ai womaha, ho o nauru gea ka idadi wowomaha hiadono wowango.

Dodadi 6:13

Ho Ma Jou wihingahu o Nuhika wato, “Ngohi tomaputuhoka o nyawa abe naga o duniaka kiani tahibinaaha angamoi o nyawa manga sade dika ihidagi. Hokogea manga wowango ma datoro ka hiadono o dunia ma amokika aomanga de manga dorou. Ho Ngohi tato ngaro o nyawa de ngaro o aewani ma, kiani mata-mataika tahibinaaha ka ma moi de o nguihi.

Dodadi 6:7

Ho naa Ngohi taputuhoka abe koaho tahibinaahaka o dunia ma nyawa mata-mataika, de ko o nyawaua dika abe tatulaadauku masara ka ma moi de o aewani mata-mataika ngaro o dofo de o fuhuku de abe imalia-liara o dunia ma lokuoka. De o totaleo abe ihoo-hoho daku ma hoanino enangoo tohikokibinaaha. Hokogea todiai angamoi duru ahi hininga ihuha abe ma titi tatulaadaukuoka mata-mata gea.” Hokogea Ma Jou womatemo.

Dodadi 7:15

Abe o aewani mata-mata de ma womahoka o pasanga amomoi ikokiboaino o Nuhino de yomahikokaaini yokokiwohama o kapa ma goronaika.

Dodadi 7:17

De o wange moruatinohi o nguihi ka idogo-dogo ma lukuiye o dunia ma lokuoka ho hiadono o kapa apudaka ho o tonaka atingaka ma gurutiye. De o nguihi ka idogo-dogo ma lukuiye hiadono duru ka ingoo-ngootika.

Dodadi 7:4

Naa o futu tumidohi de ahao Ngohi o awana tohiguti o duniauku. De Ngohi tohiaturu la o wange moruatino ho o futuoo moruatino ma dekanino tohiguti o awana de ka hiadono ko iwa ma ngogoro. De ahao mata-mata o dunia ma lokuoka de ma wowangoka abe tatulaadaukuoka, ngaro o kia dika naga de ma womahoka, masara kiani tohiofi mata-mataika de o nguihi naa.” Hokogea Ma Jou wihingahu o Nuhika.

Dodadi 9:9

Ho wahibehehongo onangika wato, “Naa Ngohi tinihidoaka ahi behehongo nenanga nginika de hiadono ti ngini nia totoforaukuoo tahidoaka ahi behehongo naa.

Higiriiri 107:34

De o tonaka duru ikutufuru hiadono ma datomo duru de ma hofokoka, Una ahao wodiai la ma tonaka gea idadioka igahi, De ka hiadono manga datomo ko iwangokaua. Hokogea Ma Jou wodiai de angamoi o nyawa abe yogogere manga tonakoka gea, Ona duru yotobadiai itotorou hiadono Ma Jou wahohowono onangika.

Huhupu 14:17

De ahao Ngohi todiai la manga hiningaka tohitogowini o Mesiiri ma nyawa hiadono duru iniribuutu ininii-niiki ngini o Isiraele ma nyawaika. De Ngohi ahao tahimatoko onangika ahi buturungu. De mata-mata Ngohi todiai o Firaunika de ai tentaraika abe manga goroba parangi yotobaao o nyawa utu ahao yahiade-ade. De hiadono gea abe todiai nia musuika ahao idadi ma titi hiadono o nyawa ko manga ngoe ahao manga heranga de manga horomati Ngohino itagi.

Matiusu 24:39

De ma nyawa gea kiani yamake iboakahi ma nguihi gea de ahao ona ka idadi ihioriki de yongaku abe manga hohowono adonoka, de gea ma nguihi yahikokiofi ona mata-mata. De hokogenangoo ahao idadi ma oraha Ngohi o Nyawa ma Ngofaka toboali la tahohowono o nyawaika. Angamoi ahao ma oraha genangoo de o nyawa duru yatodokana ma titi ko ihiorikua abe manga hohowono ma gahe itigioka.”

Lukasa 17:27

Angamoi ma dodihiraino gea abe ma nguihi ko iboauahi de ma nyawa gea duru ko ihiorikua abe manga hohowono itigioka, ho ona manga wowango ma biaha ka yatobanii-niikohi. Abe hoka ona yatobaniikohi manga ngolo-ngolomo de manga rame-rame, de manga goo-gogilaka yodiai abe hoka manga biaha gea yotobadiai ka hiadono ma wange abe o Nuhi wowohamika ai kapa ma goronaika. De o Nuhi una wowohamoka de ahao ma nguihi idadi de yahikokihibinaaha o nyawa mata-mataika.”

Roma 5:21

De tanu enangoo imakiniiki de Ma Jou ai hininga ma dumutu ma dodihirainohi, abe Una duru woigo wonahimatoko ai hininga ma owa gea ngoneino. Angamoi ai Pareta inahimatoko ngoneino abe duru hoperelu ai hininga ma owa gea. De igoungu idadi hokogea, abe to Una ai owa idogo-dogo hiadono duru ilaku ngoneoka. Ho ma dodihirainohi de ngone o howono ma kuahaka homanoa hiadono ka hokokihonenge, masara ma oraha naa de ka idadi ngone homanoali Ma Jou ai hininga ma owa ma kuahaka angamoi Una wonahitotiaioka. De genangino de ngone hamake o wowango ka hiado-adonika ma titi nanga Baluhu idodutu o Yesusu Kristusino.

Higalioli 32:39

Ho naa abeika nimalega Ngohino la duru nihioriki Ngohi naa o Yawe! De duru ko iwa o jou utu yomakadaene hoka Ngohioli! Abe Ngohi dika ka idadi tahohonenge de tohiwango, de ka Ngohi dika takunu tahiodiri de ahao tahitogumoli. Nako hiadono ahi kuaha itagioka, moioo de ko iwa ka idadi ihitatoko eko ihilawana Ngohi.

Ibarani 11:7

De mangale o Nuhioo wingaku Ma Jouika ho hiadono una womadiai o kapa la genangino yapake ona abe ai tau ma goronaka la ufa yohonenge ma titi o nguihi. De gea ma dihiraino de Ma Jou wihitiari moi o Nuhika ma titi o hohowono abe ngaro duru o dunia ma dodihirainohi hiadono ma oraha gea masara ma hohowono gea ko ma moiuahi idadi, ho o nyawa duru ko ma moiuahi yamake de manga lako. De ngaro o Nuhioo ma ko ma moiuahi wamake ma hohowono abe hokogea ma rupa, masara una wohingounu Ma Jou ai demoika ho ma kapa womadiai. Ho Ma Jou wifetongo o Nuhika wato una o totiai ma nyawa ma titi to una ai ngongaku Ma Jouika. Masara nako o dunia ma nyawa utu abe ma oraha o Nuhi, ona gea yomahitaana abe manga hohowono kiani yamake, angamoi ona duru yoluku Ma Jou ai hitiari ma demo onangika abe iboa o Nuhino. Ho ma titi ma hitiari gea ona yoluku hiadono ka idadi hamake abe o dunia ma nyawa ma oraha gea duru itiai Ma Jou ai hohowono onangika.

2 Peturusu 2:5

De ngaro o dunia ma nyawa abe duru ma deka-dekanuku yomanoa o dunia ma lokuoka abe ma oraha o Nuhi, ma onangoo manga hohowono ko wanoaikaua masara gea Ma Jou wahikokihohowono de o nguihi abe ona mata-mataika iwilawa-lawana. Masara nako o Nuhi una gea Ma Jou ai totiai watobahingahu-ngahu o nyawaika, ho una waniiki Ma Jou ai mauika. De o Nuhi de ona yatumidi gea abe ai tau ma goronaka, ka ona dika Ma Jou waduhunu o nguihino ho ko wahohowonua onangika.