Masara o ngo Rahele ka de momangakunu de mohonenge de ngade-ngade ami ngomaha itoaka de motemo mato, “Una naa duru o huha ma ngofaka ho kiani nihiromanga o Ben-oni.” Masara ai baba wato, “Koua, hokogenangua angamoi una ahao duru ahi datekoka ho tihiromanga, ‘Ahi Nirakoka.’” Ho de to ona manga demo o Yakubu wifetongo, “o Benyamini.”
Dodadi 49:27 - Ma Jou ai Demo-demo o Totobelohoka27 O Benyamini hoka o fuhuku ma kaho abe ena duru itualono, Hiadono ai nyawa yososawaro yagogataheke manga musuika, O ngoru-ngorumiye yamataka manga musu abe yahikalaka, De o futu-futuiye yahikodoku manga musu manga kiahonanga.” အခန်းကိုကြည့်ပါ။ |
Dodadi 49:27
25 ပူးပေါင်းရင်းမြစ်များ
Hokogea o Yakubu wahiowa ai ngofa-ngofaka yangimoi de yahinootoika de o hiowa ma demo abe duru imakataana de ona homoi-homoiika. De gea wohioriki itigioka wohonenge de wapake manga oara ma behehongo ma demo abe wahitaana onangika la wahingahu homoi-homoiika abe hokokia idadi onangika abe ma oraha manga totoforauku ahao yolape-lapeuku. De ona yangimoi de yahinooto homoi-homoiika ahao yodadi o Isiraele ma nyawa manga dutu.
“Ona hahiketero hoka o boki kohaamoko abe imomiki de itagioka, De ngaro o kiaika aika ma ko iwa o aewani abe alawana enangika de ilaku, De hokogenangoo de o Isiraele ma nyawa manga buturungu, Abe onangoo ngaro o kiaika dika yoiki de ko moiua yalawana de yolaku. Hoka o boki o singa abe imaino-inomo de ko imahiai-ainua itagi, Ka hiadono amakeokahi ma inomo de yaolomo ka hiadono apunuhu. Ho to ena ma inomo kiani ma awunu akopoakahi de ahao imahiaini. Hokogenangoo ona abe naa yomomikoka de yomulaengoka yotagi, Kiani o nyawa manga awunu akopoakahi de ahao yoriidi, To ona manga dumutu yamakeokahi de ahao onangoo yomahiaini.” Hokogea o Bileama ai demo ma betongo o dakoro ma hinooto abe wamake Ma Jouino.
De o Yesusu ka wohigila-gilahi ai behehongo ma demo abe iwitobanii-niiki yangimoi de yahinootoika wato, “De naa abeika nitotoihene to Ngohi ahi demoino, angamoi naa tinihitiari nginika abe ma titi ahao hokokia idadi nginika. De ngini naa tinihidingoto o nyawaika la nihiabari ma titi abe ma oraha itigioka Ma Jou wahikoano ai nyawaika. Masara tinihiketero ngini abe ngade-ngade hoka o domba abe duru imura, de naa tinihidingoto o fuhuku ma kaho ma ngi-ngiika, ho kiani duru ngini nimahidodiai onangoka. Abe kiani nimahidodiai ma titi nia demoino de nia wowango ma datorino la ufa niaruwae onangika abe yototualono, done ahao inihikangela nginika. De gea nia datorino kiani nihidodiai la nia sosawaroino niapake de abe nia hiningaka de duru niabole-bole o nyawaika.
De o Yesusu ka wadotokohi wato, “De ngini kiani nimahidodiai angamoi naga o nyawa utu de ahao yomahingahu nginika ato Ma Jou ai uru ma dodofanga masara ona gea tanu inieluku dika nginika. De ona gea manga hininga ma dumutu la ihibinaaha ti ngini nia ngongaku ma titi manga ngeluku ma demoino. De nako ngini ko nihidodiaiua niatailako manga wowango, gea ona ka idadi inibudi angamoi yomadokangeluku abe hoka o nyawa abe manga hininga ma dodipokouku ho gea manga demoka de yabole-bole o nyawaika. De ona gea ka idadi tahiketero abe ona hoka o fuhuku ma kaho duru itotualono abe imahipahitaakauku hoka o domba ma rupa la ato yabudi o nyawaika. Angamoi o domba gea ko itualonua de ko ingamoua o aewani utuika, masara nako o fuhuku ma kaho gea ma dumutu la ihibinaaha de imadoma o domba-domba gea.”
De kiani niagoana irahai angamoi ngohi duru tohioriki abe tosoboka de ahao naga o nyawa abe o rerehene ma dodotoko yotobadotoko. Abe ahao ona yoboa ti ngini nia doomuino de yahirehene nia gogianongoru utu manga ngongakuoka de aino. De ona gea tahiketero de o fuhuku ma kaho abe duru itualono de gea yatobatoma o domba.
De o Musa ai hiowa ma demo abe ihidumutu o Benyamini ma nyawaika hokonaa, wato, “O Benyamini ma nyawa, ona gea Ma Jou o Yawe duru wadora onangika, de ona yowango yosanangi dika to Una ai datekoka. Abe Una ka ihikaika watobagoa-goana, de wahigororomino arihononga la ufa o bodito o kia dika idadi onangika.”
Abeika niatailako ahi wowango ma ade-ade. Ngohi naa tomaboa o Isiraele ma nyawaino, duru genangino ma nyawa abe ma dodihiraka de Ma Jou womiirikoka la midadi to Una ai nyawa. Abe to ngohi ahi tofora gea o Benyamini abe una mia tofora o Isiraele ai ngofaka womatengo. Ho gea ihihitaana abe ngohi naa duru o Yahudi ma nyawa ma dutu, de o awunu moi dika ma hirete ngohioka, abe o homoaino ma nyawa manga awunu ko iwa ihisapuru ngohino. De ngaro ahi huhuna, masara gea ihihunaka duru ahi wange tufangeoka la imakiniiki de to Musa ai Pareta. De abe ma titi o Musa ai Pareta taniiki, gea duru tatobagou-goungu taniiki, abe ngohi duru o Farisi ma nyawa, ho ka ngomiohi miato mianiiki duru itiai Ma Jou ai Pareta.
ကြော်ငြာတွေ