Dodadi 42:24 - Ma Jou ai Demo-demo o Totobelohoka

²⁴ Ho ka de woihene manga demo gea de ai koongo imulaenge itifa ho womadohuku womalingiri ma ngi la genangoka womahidutulukino de woari. Gea woari ibootino de ahao wagilioli onangino de ma hohutulu watemoli onangika. De ahao wiiriki ai riaka o Simeono onangino de wahuloko ai gogoanika la una iwipakitoka duru ai ria-dodoto manga himangoka.

Dodadi 42:24 ပူးပေါင်းရင်းမြစ်များ

Dodadi 34:25

Masara ka de o wange hange ipahaika de manga nabo ma gogiriaka yadotodiri angamoi yahikangela hiadono ko yomasikaakaua. De ona ko yafikirua naga o bodito manga ngoranoka masara duru ma oraha gea yale o Yakubu ai ngofaka o Simeono de o Lewi ato manga biranga idodutu, o ngo Dina gea, imihibalaha. Ho yangika de manga humaranga ma doto arihononga de yakokitoma o nau-nauru mata-mataika o Sikeme ma kotaka.

Dodadi 42:23

Hokogea yomakoketemo o Yusupu ai himangoka angamoi ona ato bote una o Mesiiri ma nyawa ho ko wohiorikua to ona manga demo. De angamoi naga o Yusupu ai duduhunu womatengo abe to Yusupu ai demo wadofanga ai ria-riakika. De to onangoo manga demo waturuuru o Mesiiri manga demoika ma oraha wadofanga o Yusupika. Masara o Yusupu ka womangaratii ma oraha ai ria-riaka gea yomakoketemo.

Dodadi 43:14

De ngone duru honganono la Ma Jou Wokokurutiye winiduhunu la ma oraha niwihimanga o Mesiiri ma popareta gea de una winisanangi nginika hiadono o Simeono wihigilio nginika de o Benyamini ko witumungua genangoka la ka idadi ngini nikokilioli nenangino. Masara nako yohonenge de gea ahi hininga ma huha ngaro kohadubuho masara ka tamoku dika.” Hokogea o Yakubu ai behehongo o Yehudaika de ai ria-dodotika.

Dodadi 43:23

De ahao una wohiatu-aturu gea wapaluhu onangika wato, “Ngini naa ngaro ufa nihawana de ufa nia hininga ihuha ma titi ma tiwi gea abe o inomo ma bobangu. De angamoi ma inomo ma tiwi gea ena ngohi tamakeokau. Ho marai ti ngini nia Jou, abe nia totofora manga Jou, gea Una wohiaturoka la nia tiwi naga genangoka nia karongo ma goronaka.” Hokogea wahingahu onangika ibooto de ahao manga ria-dodoto o Simeono wihihupu de wingotaka onangika.

Dodadi 43:30

Masara ka de hokogea wotemo ibooto de kiani o Yusupu womataiti wohupu angamoi ai dora ilamoko ai dodotika hiadono ko womatongohonokaua. Ho wowohama o kamarika moi abe duru womatengoka de ahao duru ai koongo itifa.

Dodadi 45:1

De o Yusupu duru ko wapoakaua womatongohono ai duduhunu o Mesiiri ma nyawa manga himangoka ho wahuloko onangika wato, “Ona dika abe naga ahi himangoka naa yomagoo-gogere naangoka, ho ngini utu nikokihupuokahi!” Ho gea ka ai ria-riakokahi de ai dodoto o Benyamini naga genangoka de ahao womahingahu onangika abe una manga ria-dodoto.

Dodadi 45:2

De o Yusupu woari. De hiadono woari kohaamokiye ho o Mesiiri ma nyawa onangoo yoihene, de gea yoade-ade hiadono o Firaunu de ona mata-mata ai tauoka ihikokioriki abe o Yusupu woari.

Lukasa 19:41

De ona yogila-gilali de duru yomahitigika o Yerusaleemika gea de o Yesusu womalega ma kotaika de woari ma titi ai hininga ma huha.

Roma 12:15

De nako naga o nyawa abe yogogarago, nginioo ka idadi nigogarago de de ona. Masara nako naga o nyawa abe manga hiningaka yohuha, gea nginioo ka idadi niamao to ona manga huha.

1 Korintusu 12:26

De nako hiadono ma kiahonanga moi ma odiri yamao, gea ma kiahonanga mata-mataika yamao ma odiri gea. Eko nako hiadono ma kiahonanga moi de ma horomati yamake, gea ma kiahonanga mata-mataika yogogarago. Ho gea ho koaho ngoneoo homaketerimoioka la nanga hininga ma dumutu ka moi dika.

Ibarani 4:15

De to ngone nanga Hidemo wokokurutiye Ma Jouika, Una gea ka idadi duru wonahioriki abe to ngone nanga hininga ma buturungu ka ikurangohi. Angamoi Unangoo ma dihiraino de iwihiata-atara ma ngoe, de abe o hiatara mata-mataika inadaene ngone o nyawaino, enangoo gea mata-mata iwidaenoka Unangika. Masara ngaro hokogea iwihiata-atara Unangika, masara Una duru ko wahowonua.