De una womileha munangikali wato, “Ho o kia noigo la tonihidoaka la ena gea natumungikahi ka hiadono ani kabingi namakeoka?” De muna mopaluhu unangika mato, “Ngohi toigo la ani gule de ma haekoka abe to ngona ani dodunguu de ani tutukunoo abe nasoino. Gea ena mata-mata nohihidoaka ngohino. De ngohi ahao ani kiahonanga gea tohigilioli ngonaika abe ma oraha ahi kabingi woboaino wohidotaka de ahao unangika tohidoaka la wao ngonaika.” Hokogea mogahoko de ahao ai kiahonanga gea womihidoaka ma oraha yomaidu una de muna. De yomaidu ipaha de o Yehuda wogila-gila ai dumutika. De ngoi hunungu gea ipaha muna de ami badangoka.
Dodadi 41:42 - Ma Jou ai Demo-demo o Totobelohoka42 Hokogea o Firaunu wotemo ibooto de ahao ai ali-ali wihuputu de wihinoa to Yusupu ai hagaraaraoko, abe o ali-ali gea ma dodunguu o koano ai kuahaka de aino. De ahao waleino o baju duru ma rorahai abe ma lawe ma alu-aluhu de genangoli wihinoauku o Yusupika de ai tomarukuoli wihinoauku o gule abe o gurasino. De mata-mata gea o Firaunu wodiai la wohitunguu o Mesiiri ma nyawaika abe o Yusupu ai kuaha wamake manga koanoino. အခန်းကိုကြည့်ပါ။ |
Dodadi 41:42
27 ပူးပေါင်းရင်းမြစ်များ
De ahao o Firaunu wahokino ai goroba moi abe ngade-ngade hoka to unangoli de wihibarene o Yusupu ai gorobauku gea. De naga o gogoana yamuruono naga iwihihira-hira o goroba ma himangika de yokokiboaka o nyawa mata-mataika la ona iwihidagi-dagi yopoa-poaka ato, “Niatotilabukuku! Niatotilabukuku!” Hokogea yodiai la manga nyawa mata-mataika ihitunguu manga horomati o Yusupika. Hokogea o Firaunu wigoraka o Yusupu la wihidadi ai hiaturu ma demo ma dodofanga abe duru de ai kuahaka hiadono naa una dika mata-mataika wahipareta o Mesiiri ma tonakoka.
Abe manga koano o Ahasi-weroso wihikuaha o Modekaiika hiadono una wodadi o popareta manga haeke mata-mataika ho hiadono ka o Ahasi-weroso dika abe to unangohi ai kuaha ilamoko. De o Modekai o Yahudi ma nyawa abe wodadi o Yahudi ma nyawa manga dimono wokokurutiye ho ona mata-mataika duru de manga horomati unangika. De ona iwisanangi unangika angamoi duru wokarajaanga waduhunu ai gogianongoru o Yahudi ma nyawa de ka ihikaika nako naga manga musu de manga hidee yaruwaeoli, una waademo hiadono manga hidee ko idadiuali. De hokogea o Modekai waduhunu la ka idadi o Yahudi ma nyawa yogogere yoriidi o tonakoka gea.
Ka de o Hamana hokogea wotemo ibooto de ahao o koano ai ali-ali, abe ena to una ai kuaha ma dodunguu, wihuputu ma ali-ali gea de wihidoaka o Hamanika la ka idadi ma ali-ali gea wapake wohitunguu o pareta ma huratoka la ihitaana abe ma hurata gea igoungu to ma koano ai hurata. De naa abeika una o Hamana duru womahitaana abe una o Yahudi ma nyawa manga musu de una gea o Hamedata ai ngofaka de o Agaga ai toforauku, abe ma dihiraino o Agaga gea wodadi ai nyawa manga koano.
Ho o mede moioka de ma tanggala ngimoi de hangeoka o Hamana wahoko o koano ai duduhunu yotobatulihi ai hura-hurata de wahingahu onangika o hurata ma titi abe o Yahudi ma nyawa kiani yokokihonenge ngaro manga tonaka ma amokika. De o Hamana wato o koano ai behehongo ma hurata kiani ona ihitulihuku de o demo imaketemomoi abe o nyawa yapake o Media de o Peresia ma tonakoka ho ngaro o demo ma dulihi imakokohowono ma kiani ihitulihuku de manga demo homoi-homoiika. De ma hurata gea ahao idadi o pareta ma hungi o koano ai kokawaaha mata-mataika ho yahidingoto o popareta ma nyawaika naa onangika: Ona yokokurutiye abe manga kuaha o kokawaaha mata-mataika, O propinsi ma gubernuuru yaratuhu moi de yamonaoko de yatumidika, O dimo-dimono hoka o kimalaa abe yahipareta o nyawa ma doomu homoi-homoiika abe yomahitoomu manga tofora manga romangika. Ho o popareta ma dimo-dimono mata-mataika gea ona abe kiani yakokimake o hurata homoi-homoiika. De manga hurata abe ahao yamake ihitulihika de to ona manga nyawa manga demo. De ngaro ma dulihi imaketemomoi masara o hurata ma titi duru ka moi dika. De hokonaa ma titi abe kiani yotulihi o huratoka: “Nia koano o Ahasi-weroso winihibehehongo ngini ai kokawaahaika hokonaa: O Yahudi ma nyawa mata-mata to ngone nanga tonakoka kiani yokokihonenge. O Yahudi ma nyawa niahikokiofi nanga tonakino ka ma moi o wange moi dika. O doma ma wange gea o mede o Adara abe o mede ngimoi de hinooto ma tanggala ngimoi de hangeuku. Ngaro o nauru eko o ngofeka de ngaro ma gilau hiadono ona yaperekioka ma, kiani ka ma moi niahikokihibinaahaka. De ngini abe niatoma o Yahudi ma nyawa ka idadi niale de nimahitingini manga kiahonanga.” Hokogea ma titi abe kiani naga o Hamana ai hurata ma goronaka gea. Ho o koano ai duduhunu yotobatulihi ai hura-hurata, ona yaniiki o Hamana ai hingahu gea de yapake ma koano o Ahasi-weroso ai romanga de ahao o hurata amomoi ihidatataulu de ihitunguu de o koano ai ali-ali abe o koano ai kuaha ma dodunguu. De o koano ai hidingoto ma nyawa yomahidiai yomataiti yototaka o pareta ma hurata mata-mataika gea. De ngaro ngade-ngade o taongo moiohi ma dekana de ahao adono o doma ma wange masara ona abe ko o Yahudi ma nyawaua kiani yomahidiaiohi la yatoma o Yahudi ma nyawa abe naga to ona manga tonakoka. De manga tonaka ma propinsi utu duru kohagurutika ho o hidingoto ma nyawa manga dodagi kohadekanino.
De o Modekai ai hiaturu la ihidingoto de o koano ai kuaha ho o hurata amomoiika yapake manga koano o Ahasi-weroso ai romanga. De yomahidiai la ka de o hurata kohangoe gea yotulihi ibooto de ahao o hurata amomoi ihidatataulu ibooto de ahao ihitunguu de o koano ai ali-ali abe o koano ai kuaha ma dodunguu. De o koano ai hidingoto ma nyawa onangoo yomahidiai la ka idadi ahao yomataiti yototaka o behehongo ma hurata mata-mata gea. De o Modekai wohiaturu la ona yomaketemomoi ahao yapake o kuda abe duru ipalesa imapopaata. De o koano ai hidingoto ma nyawa homoi-homoi yomale o kuda abe o koano ai kuda ma duduonino abe yapaliara la duru itongohono imapopaata. Hokogea manga hidiai yabootokahi de ahao ona ka idadi yokokisobo.
De ahao o Modekai o koano ai tauoka wohupu de wapake o baju ilape-lape abe imaketero hoka o koano ma baju ma guru-gurutu abe utu o baju ma bihi-bihi de utu ma gare-garehe de ai peaka wapake o sapeo ma amoko abe ona yokokurutiye dika ka idadi yapake de ai sapeo gea ihidalape de o gurasi ho duru ma hohailoa. De naga o Modekai ai poretoka o ngoere duru ma ngina-ngina de ma guru-gurutu de ena gea ma wuu-wuu hoka o koano dika wapake ho enangoo duru ma rorahai. De o Susana ma kota ma nyawa duru yogigoro de manga sosanangi ma hagaaga abe ihititi o pareta ma hurata ma hungi nenanga.
De kanganoinohi o Hamana ko iwidideuahi de o koano ai dodunguu ma ali-ali wahuputu o Hamana ai hagaraaraino de womahinoaokoli to una ma hirete ai hagaraaraka. Masara naa ka de o Modekai woboaka ai himangino, de o koano ai ali-ali gea wahuputoli de wihinoa to Modekai ai hagaraaraoko abe ma ali-ali gea ma dodunguu o koano ai kuahaka de aino. De o ngo Estere mitagongo o Modekaiika la una wohiaturu to muna ami tau ma hungi naa de ma nyawa de ma kiahonanga abe mata-mata to Hamana de ahao kanganoika o koano womihidoaka munangika. Ho mata-mata abe ma dihira to Hamana naa aturuuruoka o Modekai ai giamika.
Masara o behehongo ma hurata, abe una wotulihi, ena gea ko idadiua o nyawa ahao yahihihanga o pareta ma bukuino ngaro ngohi ma ko idadiua angamoi ihitunguuoka de o koano ai dodunguu ma ali-ali. Ho naa ngini inihinootoika tinihikuaha la o behehongo ma hurata moioli nitulihi de ma demo o kia dika ngini niato itiai de enangoo ahao nihitunguu de to ngohi ahi dodunguu ma ali-ali. De nihidodiai nia hurata ma dola angamoi enangoo ka de nihitunguu de ahi ali-ali de enangoo idadioka o pareta nanga tonaka ma amokika ho duru ko idadiua o nyawa yahihihanga. De nia hurata gea ka idadi nihidingoto o Yahudi ma nyawaika o kiaka naga ona yogogere nanga tonaka ma propinsi mata-mataika.” Hokogea o koano wahibehehongo o Modekai de o ngo Esterika.
Abe mata-mata niamake manga dodotokino gea idadi nia utumu nia wowangoka. Ho ahi hiketero hokonaa, nia wowango ma datoroka tohiketero ma rorahai de o rante nia tomaruku de utu abe niapake ma hohailoa nia tadauroka. Abe imaketero hoka o rante niapake nia tomarino de daku nia peaka niapake ma kiahonanga ma hohailoa la o nyawa inimake nginika ato nia rupa irahai, de hokogenangoo nako nia wowango ma datoro irahai hiadono o nyawa yomalega ti ngini nia datorika de yamake ma datoro ma rupa ma rorahai. De hokogea ngini ahi ngofa-ngofaka nia datoro nako nianiiki nia baba de nia meme manga dodotoko nginika.
“Masara ai baba ka wahuloko ai duduhunika wato, ‘Nimataiti niaoino ahi baju ma biri-birini abe ka enangohi ihohailoa de niwihinoauku ahi ngofakuku. De niaoino o ali-ali la womahinoaoko ai hagaraaraka la genangino de tohitunguu abe una tidafongoka. De o sandaala enangoo niaoino la ka idadi womahisandaaliye.
Ho gea yomahiketehibehehongo ibooto de ahao o Yonatana ai baju ma guru-gurutu wahuputoka de ena gea wihidoaka o Dautika de naga utuohi o Yonatana ai hidoaka unangika abe ai badanga ma dadatoko ma baju abe wapake o parangioka, de ai humaranga o dopo-dopoino abe ma doto arihononga, de ai toimi, de ai ban abe wapake womahidubuluino o parangioka. Ho to una ai kiahonanga ma rorahai gea mata-mata ka ma moi o Yonatana wihidoaka ai dodiawo o Dautika la wohitunguu manga behehongo de ai dora unangika.
ကြော်ငြာတွေ