Dodadi 39:9 - Ma Jou ai Demo-demo o Totobelohoka

⁹ Ko iwa moi o tauoka naa manga kuaha abe hoka ngohioli hiadono ai kiahonanga mata-mataika ahi kuahaka. Masara ngona abe ngoi fekata duru ko idadiua toniso. Ho done sarakia ani hininga taniiki hiadono ngohi todiai hokogea duru itorou? Gea duru o howono ma amoko Ma Jouika.” Hokogea o Yusupu womioluku.

Dodadi 39:9 ပူးပေါင်းရင်းမြစ်များ

Dodadi 13:13

De o nyawa abe yogogere o Sodomo ma kotaka gea, duru itagi manga hafini o dorouika dika ho duru yotobadiai o howono Ma Jou o Yawe ai himangoka.

Dodadi 20:3

Masara ahao o futu moiuku de o Abimeleke wobuluhara, de ai buluhara ma goronaka de Ma Jou wihingahu unangika wato, “Abimeleke, ma titi ani howono ho naa ngona nohonenge! De angamoi muna gea abe naa ma duru nomiaoino la nomihidadi ngoni fekata, muna gea ami rokata nagau.” Hokogea Ma Jou wihingahu.

Dodadi 20:6

De Ma Jou wipaluhu ai buluhara ma goronaka gea wato, “Ngohi tonihioriki abe ngona nagoungu gea nodiai de ani hininga ihohailoa dika. De gea ma titi Ngohi tohiaturu hiadono ko nahowonua Ngohino abe ko tonihigunoaua nomigagao munangika.

Dodadi 20:9

Ho ahao o Abimeleke wibehehongo o Abarahaama la woboa ai himangino. Ho una woboaino de o Abimeleke wileha wato, “Hobata, naa moi tonileha, sarakia, ngona nato bote tahowonoka ngonaika hiadono nomahibalaha ngohino? Eko o kia ma titi hiadono nohiaturu la Ma Jou womihohowono hokonaa ngohi de ona abe tahikoano? Ngona notemo nato o ngo Sara ngoni firanga ma gea nomibudi ngomino. De gea ko itiaiua ngona nodiai o nyawaika.”

Dodadi 24:2

De naga o Abarahaama ai duduhunu womatengo abe duru womanoa o Abarahaama ai tauoka de una wapareta ai kiahonanga mata-mataika. Ho una gea o Abarahaama wiahokino de wotemo unangika wato, “Naga moi kiani nohihibehehongo ngohino abe kiani ani giama naso ahi uguru dau ma timiye hoka nanga biaha la nohitunguu ani demo ma gou-goungu.

Dodadi 39:10

De ngaro o Potifara ngoi fekata duru o wange-wangeiye mihigaro-garo unangika masara duru o Yusupu woluku yomaidu o ngi moioka hiadono una ka ihikaika womidokaowara.

Dodadi 41:40

Ho ngohi naa tonigoraka la tonihitagongo de ma hiaturu mata-mata gea abe nomihingahuoka naa kiani la ngone o Mesiiroka haniiki. Ho ngona naa ani karajaanga tonihititi ahi tauoka la nohikaaturu ahi tau ma goronaka de ma hoanoka. De ani tagongo ma kuaha hiadono ngona nahipareta ahi kokawaaha mata-mataika o Mesiiroka. Hokogea ani kuaha ma amoko masara naga ma batingi ani kuaha abe o demo ngohi o koanoino dika kiani nohihigihene.

Dodadi 42:18

O wange hange ipahaika de o Yusupu watutumu ai ria-riakika de wahingahu onangika wato, “Ngohi naa duru de ahi horomati Ma Jouika. Ho hokonaa ahi behehongo nginika, tato ngini naa nako nianiiki ahi hiaturu de ka idadi ngohi tinihigunoa niwango.

2 Samuele 11:27

De gea ami gari ma wange muruono ipaha de ahao o Dautu ai duduhunu wahidingoto munangika la imingotaka to una ai tauika. De ahao o ngo Baseba gea womihidadi to unangoli ngoi fekata de muna ma oraha momagerewoto de ami ngofaka o nauru. Masara Ma Jou o Yawe duru ko wosanangiua abe de ena gea o Dautu wodiai.

2 Samuele 12:13

De o Dautu duru itaiti womatoduba wato, “Ngohi naa duru tahowonoka Ma Jou o Yaweika.” De o Natana wipaluhu wato, “Ma Jou ani howono wonihiapongoka ho ngona ko nohonengua ma titi ani howono gea.

Higiriiri 51:4

De angamoi tahowono Ngonaika, duru nomatengoika ngohi tahowonoka. Ani himangoka Ma Jou, ngohi todiaioka abe duru itorouholi. De ahao Ngona Ma Jou nomahitaana abe Ngona duru nototiai, Abe ani hohowono ma demo ngohino duru itaana.

Huhupu 20:14

“Ngini ko idadiua nimakitigi de o nyawa ngaro onagona dika nako ko nia fekatua eko ko nia rokatua.”

Sosawaro 6:29

De duru imaketero hokogea o nauru ai hasili nako womaidu de o nyawa utu ngoi fekata. Ngaro onaguna dika ma nako una wahowono munangika hokogea de ahao naga ai hohowono iwidaene.

Sosawaro 6:32

Masara nako naga womatengo abe wahowono de o ngofeka abe muna o nyawa utu ngoi fekata de hahidotelega una abe wotohi-tohiki, de gea ka unangohi duru wobodo abe wahowono o nyawa ngoi fekatika. De hokogea angamoi una womahibinaaha to una ma hirete ai nyawa.

Gogao 20:10

De Ma Jou wahingahu wato, “Nako naga yomakitigi o nauru de o ngofeka de muna gea o nyawa utu manga fekata ahao ona yomakitigi gea kiani niahohowono ka hiadono ona o nauru de o ngofeka gea niahohonenge. De nako naga nginioka o nauru abe una de ai baba ngoi fekata yomakitigi de una wahowo-howono gea duru wihimaleke ai babaika. Ho duru tinihitiari la ufa niahowono hokogea abe idadi o himaleke ma amoko nia hidogoronaka. De una de ai baba ngoi fekata kiani niahohowono ka hiadono ona yahinooto yohonenge. Abe ngaro hokogea niahohonenge masara ona imaketero hoka to ona ma hirete manga awunu yakopoa.” Hokogea Ma Jou wahohowono o Isiraele ma nyawa nako yomakitigi ihowono mangale ma titi ai dora ai nyawaika.

Gogao 6:2

“De nahingahu o Isiraele ma nyawaika abe manga howono o nyawaika gea igoungu o howono Ma Jou o Yaweika. Abe hoka naga o nyawa abe to ona manga kiahonanga ihidodogumika de manga dodiawo manga datekoka la gea yogoana manga kiahonanga gea. Masara ma bahauku de ona abe yogoana ma kiahonanga gea yahingahu ma dutuika ato ihihangoka, eko ona ato ena gea o nyawa yatohikoka. Masara manga demoino gea de yoeluku dika hiadono manga dodiawo yarusi. De naga o howono o fara moioli abe o nyawa yodiai manga dodiawoika abe ona manga datekoka yadohiki. Ekola naga o nyawa ato to ona ma hirete manga kiahonanga yofukunu de ma ija yahingahu o nyawaika. De ahao naga o nyawa abe yomaija masara ka yofangu ma hononga dika. De ahao ma oraha yoboali la ato ma ija ma hou yofangu o kiahonanga ma dutuika, masara ona abe yofukunu yogahokoli ato kiani utuohi ihidogo ma ija. De hokogea manga rusi yodiai manga dodiawoika. Ekola ihira yofukunu manga kiahonanga yapake ma ija ko itiaiua ka hiadono yaribuutu la kiani yofangu utuohi ilamoko ho ihifoloi manga utumu de enangoo ihititi o rusino. Ho o nyawa manga howono o nyawaika mata-mata hokogea o howono duru Ma Jou o Yaweika.

Gegetongo 32:23

Masara abeika nako hoka ngini niawohangika nia behehongo gea, ahao Ma Jou winietongo abe ngini niahowo-howonoka Unangika. De ufa nimahieluku ma titi nia howono gea, angamoi Una ahao wagou-goungu winihohowono ho duru ko idadiua niodokaowara nia hohowono gea!” Hokogea o Musa wahitiari onangika.

Lukasa 12:48

“Masara nako ma duduhunu onagona dika abe ko ihiorikua ai dutu ai mau, ona gea manga hohowono itaana, abe hatoli ihutulu dika manga hohowono. De hokogenangoo nako hiadono Ma Jou ai nyawa ihiorikoka to Una ai mau, ipahaino de ahao Una kiani wagahoko onangino ma hibalaha abe duru itaana. Abe ma titi onagona dika abe Ma Jou wahidoaka ma amoko onangika, ipahaino ahao kiani Ma Jou wagahokoli ma hibalaha ma amoko onangino. De onagonaika dika abe wahitagongo de o tagongo eko o hiakunu ma amoko, ipahaino de ona gea ahao kiani Ma Jou wagahokoli ma hibalaha ma amoko onangino.” De hokogea o Yesusu ai demo onangika abe wato kiani ka ihikaika ai nyawa yomahidiai angamoi o nyawa duru ko moiua de ihioriki ai gahe ma wange gea muruonoka de woboali.

1 Korintusu 4:2

De abe ma titi Una womihitagongo ngomino, naa o demo moi abe duru igoungu ato, onagona dika abe o nyawa utu yahitagongo moi onangika, ona gea kiani yomahitaana de yatobagou-goungu abe manga tagongo gea yodiai itiai.

Titusu 2:10

De ufa yadohi-dohiki manga dimonika, masara kiani ona yomahitaana manga wowango ma datorino la gea manga dimono ka ihikaika duru yangaku ona manga gogilaongika. Angamoi nako o gogilaongo de manga hingounu duru itiai manga hidimonika abe hoka imaketero ahao naa ahi behehongo ma demo abe nabasaka, de gea ahao idadi hoka o hiliara moi Ma Jou ai dodotokino. De ahao o nyawa utu ma oraha iwimake o gilaongo womatengoino abe ai hingounu ingodumu ai dimonika de bote ahao ma nyawa gea womatemo wato, “Abeika o gilaongo gea ai hininga ma rahai! Marai ngohi kiani tileha unangika abe ai ngongaku ma titi o kia!” Marai ahao hokogea itemo manga hiningaka hiadono yoigo yototoihene nanga dodotokino abe ma titi Ma Jou nanga Duduhunu.

Ibarani 13:4

De ngini mata-mataika kiani nimahitiari la ufa niaruwae o gogiabereki manga gogaoika. Angamoi onagona dika abe yomakitigi ko itiaiua, ona gea ahao kiani Ma Jou wahohowono onangika. De ngini onagona dika abe niilakoka, ngini kiani duru niogoana nia gogao abe ngini o giaberekioka de ufa nimakitigi de utuika.

1 Yohanese 3:9

Ho onagona dika yomaboali Ma Jouino, ona gea o howono ko anii-niikua, angamoi gea Ma Jou ai ngofa-ngofaka yodadioka, ho Ma Jou ai hininga imanoa onangoka. De ona gea tanu ko yadadiua yatobahowono angamoi duru Ma Jouoka de aino ona yomaboa.

Himatoko 21:8

Masara ona utu abe yohawana ihingaku Ngohino ho ona ihioluku de ko ihingakua, ona gea manga baha ahao yaumoikaka abe o uku ma ngooto ma goronaika. De hokogenangoo to ona manga hohowono abe ona yomahidadidorouoka, de onangoo yatotoma o nyawa, de ona abe yomakitigi ko itiaiua, de ona abe ka ihikaika yaniiki manga dodiai, de ona yomahuba-huba o popangaoika, de ona mata-mata abe yotobaelu-eluku. Ho ona gea mata-mata ahao manga baha yamake o uku ma ngooto ma goronaka, abe genangoka o uku de o uba itoka-tokara yauku onangika. De o uku ma ngooto gea ena abe ihiromanga enangika ato o hohonenge ma hinooto.” Hokogea to Una ai demo ngohino.

Himatoko 22:15

Masara nako ona utu abe yotobadiai itorou, ona gea ahao ko yowohamua ma kota ma goronaika. Abe ona gea ka ihikaika yaniiki manga dodiai, eko ngaro ona abe yomakitigi ko itiaiua, eko ngaro ona yatomaka o nyawa, eko ngaro ona abe yomahuba-huba o popangaoika, eko ngaro ona abe manga hiningaka duru yosanangi la o ngelu-ngeluku yaniiki, ma ona mata-mata gea duru ko idadiua Ma Jou ai kotaika yowohamika masara to ona manga ngi, gea hatoli imakitingakika.”