Dodadi 19:24 - Ma Jou ai Demo-demo o Totobelohoka

²⁴ De gea o dihangino Ma Jou o Yawe wapurarahuku o uba itoka-tokara dau o Sodomo de o Gomora ma kota-kotauku.

Dodadi 19:24 ပူးပေါင်းရင်းမြစ်များ

Dodadi 13:10

De ma oraha gea ona naga o lokuoka yomaokoino, ho o Loti wolega-lega o Yorodani ma tonaka ma dola mata-mataika, ka hiadono Soara ma kotaika. De ma dola gea wamake duru irahai abe naga o akere de ma ngairi ma ngoe imaketero hoka ma dodihiraka naga Ma Jou o Yawe ai redioka. Ngade-ngade o tonaka gea ma rahai imaketero hoka hamake o Mesiiroka. De ka irahaiohi o tonaka gea angamoi Ma Jou o Yawe ko wohibinaahauahi o kota hinooto genangoka ma romanga o Sodomo de o Gomora.

Dodadi 13:12

Abe o Abaraama wogogere o Kanani ma tonaka ma gupakahi, masara o Loti wogogere o kota-kota ma hidogoronaka abe naga o Yorodani ma dolaka. De naga o kota moi ma romanga o Sodomo de duru o kota gea ma datekoka, o Loti de ai nyawa genangoka ihigoko manga tau o ngoerino.

Dodadi 18:17

De Ma Jou o Yawe ai hiningaka womatemo wato, “O Abarahaama naa tiirikoka la wodadi ahi dodiawo, de una ahao ai ngofa-ngofakuku wadotoko la to ona manga wowango hoka to unangoli ai wowango itiai. Abe wahidumutu onangika o ngekomo igou-goungu la duru yaniiki to Ngohi ahi totiai. De ai totoforauku gea ahao duru ko manga ngoe-ngoeuku de yomahiromanga moi dika ngaro manga dutu manga ngoe. De ona gea ahao yodadi o doomu moi abe duru de manga buturungoka. De ngaro o nyawa utu manga gogere o nuuhu eko o tonaka o kiaka dika, de ngaro hokokia manga demo imaketemomomoi ma, onangoo mata-mataika o dunia ma lokuoka ka idadi ahao yamake ma owa o Abarahaamino. De hokogea idadi la tihidoaka o Abarahaamika imaketero abe hoka tihibehehongokau. De ma titi mata-mata gea tihingahuoka, ho nenangoli abe ahao ibootino todiai o Sodomo de o Gomora ma kota-kotaika, enangoo kiani tihingahu ahi dodiawoika naa.”

Dodadi 19:23

De ka de o Loti womahiadono o Soarika gea de o wange ipotokaihaka.

Higiriiri 11:6

Ho wadopuraraha onanguku abe ka idadi yahibinaaha. Wahidopuraraha de o uku de o uba itoka-tokara, De gea wahidataloko onangika de o hidaloko kohahauku. Hokogea manga dohata ma hasili yamake!

Huhupu 9:23

Hokogea Ma Jou wihuloko de hokogea idadi abe ka de o Musa wagoraka ai tutukunu de wohitumutu daku o dihangiye de Ma Jou o Yawe wohiguti o Mesiiri ma tonakuku o es ma awana de wohitunguu de o kuruuhu imakiniiki kohabuturungu hidutu ma leletongo iuti hiadono ma tonakuku de ikerewoto ma tonaka ma lokuino.

Hosea 11:8

Masara ngaro Ma Jou ai hiningaka de duru wangamo onangika, gea wohigila-gila ai demo wato, “Masara Ngohi naa done sarakia de tinihidoaka ngini la ahao inihibinaaha? Ngini naa o Isiraele ma nyawa nidadioka ahi ngofaka, ho ko idadiua tinihihononga tinihihupu ma homoaika. Duru ko tadadiua tinihohowono de o bobinaaha abe imaketero hoka ma kota hinooto gea ma dihiraino o Adima de o Seboimi. Angamoi ahi hininga aturuuruoka ma titi ahi dora ma hiokoo duru itagi nginika!

Lukasa 10:12

De naa tagou-goungu tinihingahu abe ahao dokengika de Ma Jou watailako de wahohowono o nyawaika de ona gea manga hohowono duru kohadubuho. Abe ngaro o Sodomo de o Gomora ma nyawa manga datoro duru itorou, masara ka onangohi iniolu-oluku nginika abe manga hohowono duru itubuho.”

Higalioli 29:22

De ipahaino de ti ngini nia ngofa-ngofakuku de nagali o homoa ma nyawa abe yoboa manga tonaka homoi-homoiino, ona mata-mata ahao yamake to ena ma hasili, abe ma titi ma hohowono de ma popanyake abe Ma Jou wohipoha ti ngini nia tonakoka mangale nia howono gea.

Higalioli 29:23

Abe nia tonaka ma amokika ahao naga ma gahi de ma uba itoka-tokara yawoongo ma tonaka gea. Ho ko moiua yodatomo de ko moiua iwangoiye genangoka, de ma bahauku de ahao hamake imakadaene hoka o kota ma dodihiraino gea o Sodomo de o Gomora de o Adima de o Seboimi. Angamoi ma kota gea Ma Jou duru wahibinaaha mangale ma titi ai ngamo duru kohaamoko.

2 Peturusu 2:6

De nagali o Sodomo de o Gomora ma kota, abe ena gea duru Ma Jou wahihohowono de o uku ho duru wahibinaahaka hiadono ma hou ka ma kafokahi ililiaroko. De ai hohowono gea idadioka o hitiari moi o nyawaika abe manga hiningaka ato iwilawana Ma Jouika, done onangoo yamake to Una ai hohowono.

Yudasa 1:7

De naga ma ade-ade moioli tinihihohininga, de gea ma titi ma dodihiraino o Sodomo de o Gomora de naga ma kota utu abe ihigilolitino ma kota hinooto gea. Abe ma nyawa ma dodihiraino yogoo-gogere ma kota-kotaka gea to onangoo manga datoro hatoli imaketero abe hoka o malaekata ma dorouoli ma datoro, angamoi onangoo yomakitigi ko itiaiua de nagali yohafini utuika abe ko imakiniikua de Ma Jou ai hininga de ai hiaturu ai dulaadaino. De gea ma kota ma nyawa onangoo ma bahauku de Ma Jou wahibinaaha de o uku ka hiado-adonika. De igoungu ona gea ka ma dodihirainohi de hidutu ka ma oraha naa de ka wahihohowonohi de o uku. Ho ona gea yodadioka o dodotoko de o hitiari ngone mata-mataino abe ma titi hokokia ma mogiria Ma Jou ai hohowono onangika abe ko iwinii-niikua.

Himatoko 14:10

ma ona gea mata-mata ahao yadaene onanguku Ma Jou ai ngamo ma hohowono. De gea Ma Jou ai hohowono onanguku duru kohagiria, abe ma hohutuloo de ko ikurangua. Abe gea ai hohowono imaketero hoka o angguru ma teongo ma gohaka abe duru ireeika o angguru dika de ko iwa ma hikasapuru, ho duru ihauku to ena ma mao. De to Ma Jou ai hohowono enangoo hoka duru ihauku, de ona abe yadaene onanguku, ona gea ahao duru yokangela ma titi o uku de nagaoo o ubaino yauku onangika. De o nyawa mata-mata gea manga hohowono, gea idadi o momalaekata manga himangoka de o Domba ma Ngofakoo ai himangoka.