Dodadi 1:26 - Ma Jou ai Demo-demo o Totobelohoka26 De Ma Jou wotemoli o wange ma butaanga gea wato, “Naa, Ngone hodiai o nyawa, de hahidadi la ona ngade-ngade hoka Ngoneoli. De ona ahao de manga kuahaka hiadono ka idadi yapareta o dunia ma aewani mata-mataika. Ho ngaro o nawoko mata-mata de o kia dika de ma womahoka o akeroka de o gahioka ma ka idadi yapareta. De o dunia ma amokika o totaleo de o aewani mata-mataika o nyawa manga kuahaka, ho ngaro o dofo eko o fuhuku, de ngaro ma ago-agomo eko ma hohumuduru, masara, mata-mataika o nyawa manga kuahaka.” အခန်းကိုကြည့်ပါ။ |
Dodadi 1:26
34 ပူးပေါင်းရင်းမြစ်များ
Abe ma dihira Ma Jou o Yawe wodiaiokau o tonakino, o aewani mata-mata de o totaleo daku ma hoanino. De ai dulaada mata-mata gea homoi-homoiino wohikokiboaino o Adamino la wamake abe de ma roma-romanga o kia o Adama gea wohiromanga o fara homoi-homoiika. De o kia dika o Adama gea wohiromanga o aewani irupa-rupa gea, ahao idadi to ena ma romanga.
De Una duru ma dodihiraka de witulaada o nyawa womatengo, de ipahaino de o nyawa de o dutu mata-mataika o dunia ma amokika de wonatulaada abe womatengoino gea. De ma dodihiraka gea de womaputuhokau abe ahao ma nyawa de ma dutu o kiaka wagorakiye la naga to ona manga kuaha o nyawa utuika, de abe o kiaka wahiguti la manga kuaha ko iwaka. De ngaro o nyawa manga tonaka ma batingi homoi-homoi ma gea mata-mata ko idadiuahi de Una wohiaturokau.”
De ma demoino gea de ka idadi hamake abe ngone mata-mata abe hingaku-ngakuoka ko iwaka nanga hiningaino ma dadatoko. De nako ngone homahiketero de o Musa, una igoungu womatatoko ai himanga ma titi Ma Jou ai medebini ma dararono naga ai himangoka. Masara nako to ngone nanga himangoka gea ko iwa ma dadatoko, ho nanga Baluhu idodutu ai medebini ma dararono ka idadi ihabaka nanga himangino la o nyawa utu yamake nanga Baluhu ai medebini ma dararono ngoneoka. De mangale nanga Baluhu ai Womaha ka ihikaika wokarajaanga nanga kokihiningaka, ho ka ihikaika wohidogo ai medebini ma dararono ngoneino. De hokogea wohidogo ai medebini ma dararono ngoneino ka hiadono utuohi imakiniiki to ngone nanga hininga de to Unangoli ai hininga la ka idadi homaketehiningamoi de Una. De hokogea ma behehongo ma hungi ma abari duru kohagurutiye abe Ma Jou womihitagongo ngomino la miahingahu-ngahu o nyawaika, ho gea ngomi duru mitomoroini mihiabari arihonongaika!
De abe ma titi Ma Jou ai Ngofaka o Kristusu, Una gea ai rupa duru hoimoi de Ma Jou o Baba ai rupa. Ho ngaro Ma Jou duru ko idadiua de ngone himake de nanga lako, ma, o Kristusu wonahimatoko ngoneino Ma Jou ai rupa. De nako Ma Jou ai dulaada mata-mataika de ai dulaada gea hohidotelega de o Kristusu, ka o Kristusohi wokurutiye angamoi duru Una gea hoka Ma Jou ai dulaada ma riaka, abe ma titi Una nagau de ahao ma dulaada mata-mataika itoturuino wotulaada.
De nia hininga ma hirahi gea inihikatingaka ipaha de ahao o hininga ma hungioli Ma Jou winihinoaukuoka. De nia hininga ma hungi gea Una ka ihikaika waturuuru la hiadono utuohi imakiniiki de to Unangoli ai hininga abe winihidoaka nginika. De gea hiadono utuohi itararono niwihioriki to Una ai hininga.
De nako o aewani ma rupa mata-mata o duniaka naa, masara gea mata-mataika ngone o nyawa ka hakunu hohiaturu hiadono inahingounu ngoneino. Abe ngaro o aewani o tonakoka eko o totaleo mata-mata, eko ngaro abe imalia-liara eko o nawoko mata-mataika, masara gea ma rupa mata-mataika de ka idadi ngone o nyawa hohiaturu enangika.
De igoungu ngone hihigiriiri nanga Baluhu idodutu de nanga Babaika ma titi nanga akirino gea. Masara nanga akiri genanginoo hapake la o nyawa utuika hahikoboto de ma dorou. Masara tanu gea ena duru ko itiaiua angamoi onangoo o nyawa abe Ma Jou wahidadi la onangoo ngade-ngade hoka Unangoli, ho gea ngone hahikobotoka to Una ai dulaadaika abe ona gea ngade-ngade yomaketero hoka Unangoli.
ကြော်ငြာတွေ