Dodadi 1:1 - Ma Jou ai Demo-demo o Totobelohoka1 Duru ma dodihiraka Ma Jou womulaenge wotulaada o dunia de o dihanga mata-mataika. အခန်းကိုကြည့်ပါ။ |
Dodadi 1:1
67 ပူးပေါင်းရင်းမြစ်များ
Ngohi o wange butaangaino totulaada o dunia de o dihanga de o gahi, de ngaro to ena ma dola mata-mataika, masara gea mata-mata o wange butaangaino dika de tabootoka totulaada. Ho de ma wange ma tumidi gea ko totulaadokaua ho ma wange gea Ngohi tohiowa de duru tomadingakoka Ngohino ho ma wangeoka gea ona yamake ma owa abe manga hiaini ihititi manga horomatioka Ngohino.”
Abeika ngini niolega daku ma dihangiye. Kiani niolegaiye de nimaleha ka onagona yotulaada ma dihanga ma dola mata-mataika gea. Ka Una dika abe wohiaturu ma muru-murumu la o futu-futu de imakiniiki ihapongo, de wohiromanga amomoiika la ma murumu homoi-homoi naga de ma romangoka. De mangale ma titi to Una ai buturungu duru ingodu-ngodumu ho ma murumu gea ka ihikaika naga, ko moiua ihihanga. Hokonaa Ma Jou ai uru ma dodofanga o Yesaya ai higaro ma demo abe Ma Jou wihiakunu la wahingahu o Isiraele ma nyawaika ma oraha ona manga dekanoka o Babele ma tonakoka. Genangoka yogogere mangale ma dihira yogogerohi manga tonakoka de yomahijou o Kanani ma nyawa manga popangaoika ho kiani onangika Ma Jou wahohowono. De manga hohowono gea Ma Jou wahigunoa la o Babele ma nyawa yaparangi o Isiraele ma nyawaika hiadono yahikala de ko manga ngoe yao to ona manga tonaka o Babelika.
Done ngini ko nihiorikuahi de ko niihenuahi abe Ma Jou o Yawe Una nanga Jou abe ko iwa ai baha ho ka hiado-adonika Una nagahi. Una gea abe wotulaada o dunia de ma dola mata-mataika! Ho Una duru ko idadiua iwibole-bole de ko iwikiookua. De ai sosawaro ko iwa ma batingi ho ngone o nyawa ko hadonikaua.
De hokonaa Ma Jou o Yawe ai demo, abe Una ma dihanga wotulaada de wahitauru la wakelenga ma ngioka. De Unangoo abe o dunia naa de ma dola mata-mataika wotulaada. Una gea abe wonahidoaka nanga womaha ngone o nyawa mata-mataino la ka idadi howomaha, de abe mata-mataika naga de ma wowangoka, gea to ena ma wowango ihititi duru Unangoka!
De ipaha de o Yesusu womaniata ai Babaiye wato, “O Baba, o dunia naa de o Horogaoo to Ngona ani giamoka ho Ngona dika to ena ma Baluhu idodutu. De Ngohi totarimakase Ngonaika ma titi ma dodihirainohi de nohikaaturu la ngaro o nyawa abe manga sosawaro ikuranga ma ka idadi yataoko itiai o dodotoko ma gou-goungu ma titi Ngona. Masara abe ona yomahiromanga ato yososawaro de manga tobahioriki ilamoko, ona gea ikuranga yataoko ma gou-goungu angamoi Ngona nagogonoka la nato ufa ona yamake.
Abe ma oraha gea duru o kangela de o huha ma ngoe niaohana. De ngaro mata-mataika, masara ka ma oraha genangohi ma kokangela ilago-agomo. Abe duru ma dodihiraka abe Ma Jou wotobatulaada ka hiadono ma oraha naa, ko iwahi ma kangela hokogea ma amoko. De ma kangela gea ahao ipahaino, de duru ko iwakau hokogea ma kokangela idadi ka hiado-adonika.
Abe yotemo ato, “Mia gogianongoru, ngini naa adodoa ho niato nidiai hokonaa? Angamoi ngomi naa ka o nyawa biaha dika imaketero hoka nginioli! De ngomi miboaino nenangino la o Abari ma Rorahai minihingahu-ngahu nginika, la ngini nia popangao nianoaka. Angamoi ena gea mata-mata ka parahaja dika! Ho gea nianoa dika la nimangali Ma Jouika abe Una duru wotobawango! Abe Una gea wotobatulaada mata-mataika, abe ngaro daku ma dihangoka eko ma duniauku naa de ma gahi de gea mata-mata ma dola, masara ka Una dika wotobatulaada mata-mataika!
Hokogea itemo ma dodihiraino, de gea ngone ka idadi hohioriki abe ai demo gea ena igoungu angamoi hohiorikoo abe duru mata-mataika idadi Unangoka de aino. De ngaro o kia dika naga, ma gea mata-mata naga to Una dika ai kuahaka. De mata-mataika Una wohidadi la genangino de wamake o higiriiri. Ho gea duru itiai abe ai dulaada mata-mataika iwihigiriiri Unangika naa de ka hiado-adonika! De hokogea duru igoungu. Amin. Ho naa tohidotoomuino ahi demo mata-mata abe kanganoinohi. De gea tinihingahu nginika abe ahao Ma Jou wohingodumu ai behehongo ma demo abe ma dodihiraino de wahibehehongoka o Yahudi ma nyawaika, la ka idadi onangoli yamake ai hiowa ma amoko onangika.
masara nako ngone naa, to ngone nanga Jou ka womatengo dika, de Una gea nanga Baba. Ma dulaada mata-mata Unangoka de aino iboa, de Una ma titi hiadono ngone naga de nanga wowangoka. De to ngone nanga Baluhu idodutu, o Yesusu Kristusu, Unangoo ma ka womatengo dika. De ma dulaada mata-mata Ma Jou watulaada o Yesusu Kristusino dika, de o Yesusu Kristusino ngone howango.
De gea Ma Jou ai mauoo la gea ngohi tahitararono o nyawa mata-mataika abe ma titi hokokia wodiai ai hidee ma dogogono gea abe ma dodihiraino de ka wagogonohi o nyawaino. Angamoi Ma Jou, Una mata-mataika wotobatulaada, de ngaro duru ma dodihirakahi gea, masara nagau ai hiningaka ai hidee naa abe wato ahao wodiai. Masara gea duru ma deka-dekanuku wagogono ai hidee ma dogogono gea ka Unangoka dika.
De nagali utuoli Ma Jou ai Demo-demoka abe inahimatoko ngoneino ma titi ka ai Ngofakohi duru wokurutiye nako de ai momalaekata. Abe hoka ma demo moioli naa abe inahitararono ma titi ai Ngofakika wihiromanga wato Una gea wotobatulaada de ko iwa ai bobaha masara wowango ka hiado-adonika. De gea Ma Jou wotemo ai Ngofakika wato, “Ngona o dunia ma Baluhu idodutu, abe duru ma dodihiraka de Ngona ma hirete notulaada o dunia naa de ma dihangoo, de gea mata-mata iboa to Ngona ani karajaangoka de aino.
De nako ma oraha nenangoli abe hohiromanga ngone hato ma oraha ma bobaha de Ma Jou ka wonatemohi ngoneino. Masara nenangoli de ka wonatemokali ngoneino abe to Una ai Ngofakino wonatemo. De abe ma titi to Una ai Ngofaka gea, duru ma dodihiraka de o dunia naa de ma dihangoo Ma Jou o Baba wotulaada de to Unangoo ai Ngofakino, de gea Ma Jou o Baba waputuhoka wato gea mata-mataika ahao idadioka to ai Ngofaka ai kuahaka, ho ai Ngofaka gea wodadi to ena mata-mataika ma dutu.
De gea to ngone nanga ngongakuino ma titi hiadono ka idadi homangaratii abe o dunia naa Ma Jou wotulaada ai demoino dika. Angamoi ai dulaada abe naa ka idadi hamake de nanga lako, gea idadi ai kuahaino abe ai kuaha gea duru ko idadiua hamake. Ho gea nako hoka ngone ko iwa nanga ngongaku, gea ko idadiua homangaratii abe ai dulaada naa o kiaka de aino idadi.
Masara abe ona yomia-mia Ma Jou ai demoika de gea duru yangofuoka ma gurutika, de gea ma titi naga moi atamunuku manga hiningaka angamoi ona ato borotaua de yafikiri genangika. De gea ma titi abe hokokia ma amoko Ma Jou ai demo ma kuaha wonahimatokoka ma dodihiraino. Angamoi ngone hohiorikoka abe duru ma deka-dekanuku abe Ma Jou wohidadi o dunia naa de ma dihangoo, de gea wohidadi ma titi ai demoino dika ai uruoka de aino ihupu. De ma dunia naa wahuloko la o ngootoka de aiye ipuda, de ma ngooto gea wapake la ka idadi ma dunia ma rupa idadi.
De ngohi tinihurata nginika ma titi o Yesusu Kristusu, abe Una gea iwihiromanga Unangika o Hingahu ma Demo ma dutu, de abe Unangoka o wowango ma ngango ma titi. De Una gea ngaro ai dulaada naa ko idadiuahi masara Una nagau. De ipahaino de ahao ngomi naa abe wiwinii-niiki, ngomi ma hirete miihene de miamake ma Hingahu ma Demo gea. Abe ma titi ngomi mitotoihene to Una ai ilingi ma demoino, de ngomi wiwilega-lega Unangika de to ngomi ma hirete mia lako hinooto, de nagali wiwiso to Una ai badangika de to ngomi mia giama.
De ai giama wagorakoka de ahao wohingahu ai behehongo abe o dunia ma dola de o Horoga ma dola mata-mataika, wato, “De naa tagou-goungu tohingahu tato, ahao nako ma oraha adonoka abe ma malaekata ma tumidi ai guguli wawuwuoka, ma oraha gea de Ma Jou ko wodamaaokaua, masara duru ma wange gea dika de ahao Una wohingodumu to Una ai dogogono ma hidee. Abe ai dogogono ma hidee gea duru ma dodihiraka de Una wahingahuoka ai uru ma dodofangika. Ho ahao ma oraha ma guguli ma tumidi awuwuoka de gea ma oraha abe Una wohingodumu ai dogogono ma hidee. De hokogea ma behehongo abe tinihingahu ngini mata-mataika, masara naa tapake Ma Jou ai romanga la ngini ka idadi duru nihioriki abe ahao kiani idadi abe imaketero hoka tinihibehehongoka, ho naa ngohi tafetongo to Una ai romanga abe wotobawango ka hiado-adonika, abe Una wotulaada o Horoga de to ena ma dola mata-mata, de ngaro o dunia de ngaro o gahi, ma gea ma dola mata-mataika Una dika wotulaada.” Hokogea o malaekata gea ai behehongo de ai hingahu ma demo.
De gea wopoa-poaka waamo-amokiye wato, “Ngini kiani duru niwihoromati Ma Jouika de niwihigiriiri Unangika ma titi ai kuaha kohaamoko, angamoi naa adonoka ma oraha la Una waurusu o nyawa mata-mata manga wowango de manga hininga. Ho kiani nimahuba Unangika abe wotobatulaada mata-mataika, abe ngaro daku ma dihangoka eko naa o duniaka eko ngaro o gahioka eko o akere ma jojobuubuoka, ma Una dika wotobatulaada ho kiani niwihigiriiri Unangika.” Hokogea ma malaekata ai hingahu ma demo.
De ahao ka wotemohi wato, “Naa tabootokau ahi karajaanga abe ma dodihiraka de tohideeokau! De Ngohi naa ko kia-kiauahi idadi de Ngohi nagau, de Ngohi duru ko iwa ahi bobaha. De onagona dika abe manga ngomaha yodudungoka, onangika gea ahao Ngohi tahiokere o jobuubuino abe nako ma akere genangino yaokere, de gea yamake o wowango genangino. De gea tahiokere onangika masara ngaro ufa de yofangu angamoi Ngohi ka tahidoaka dika onangika.
De ahao Una gea wohihulokoli wato, “Naa ngona nohitulihuku ahi demo naa abe o Laodikia ma gareja manga malaekatikali, la unangoli ka idadi wadofanga ahi demo abe o gareja ma nyawaika. Notulihi nato, ‘Naa to Ngohi ahi demo nginika. Ngohi naa abe ihihiromanga o Amin, angamoi ahi demo mata-mata ma gou-goungu dika, de nako hiadono totemoka, gea ahi demo hokogenangoo. De Ngohi tatobagou-goungu tahingahu o nyawaika Ma Jou ai hingahu ma demo, angamoi to Ngohi ahi demo mata-mata ka ma gou-goungu dika. De Ngohi naa Ma Jou ai dulaada ma titi de ma koano gea Ngohioka.’” Hokogea Una womahingahu.
“Nanga Baluhu de nanga Jou. Nako hoka ngomi miahigiriiri o jou utuika eko o kia dika naga utuika, gea ngomi duru ko miataanua. Ngomi minihigiriiri Ngonaika angamoi Ngona dika Jou mata-mataika notulaada! De minihigiriiri abe ma titi ani mauino dika la gea notulaada de hiadono ani dulaada mata-mataika naga idadi. Ho gea ngomi kiani minihigiriiri Ngonaika! Mia horomati minihidoaka kiani Ngonaika! Ma titi ani kuahaino ho to Ngona ani romanga kiani mihilamoko! Nako Ngonaika dika minihigiriiri, gea ngomi duru miataana abe mia higiriiri ma hidumutu Ngonaika.” Hokogea ma dimono yamonaoko de yaiata manga higiriiri ma demo Unangika.
ကြော်ငြာတွေ