3 Yohanese 1:11 - Ma Jou ai Demo-demo o Totobelohoka

¹¹ Ho ahi dodiawo, naa ngohi tonihitiari ngonaika tato ufa nomaaduru hoka onangoli manga datoro ma dorou, masara kiani natobaniiki ma rorahai dika ani wowangoka. Angamoi onagona dika ma rorahai yotobadiai, ona gea manga wowango ma titi Ma Jouoka de aino iboa. Masara abe onagona dika yotobadiai itorou, ona gea tanu imaketero hoka ona ko iwihiorikua Ma Jouika.

3 Yohanese 1:11 ပူးပေါင်းရင်းမြစ်များ

Higiriiri 34:14

Ngini kiani duru nimakitingaka de ma dorou mata-mata. De abe nidiai itorou nitoba genangino de nimangali ma owaika, Ngini kiani ka ihikaika o dame nimahitihira nia wowangoka, Hiadono o hikadame nihidagi la nimakao irahai.

Higiriiri 37:27

De naa tinihitiari nginika abe ka nidiaiohi ma dorou, Kiani nitoba nia datoro ma dorouino de nimangali ma owaika. Abe iti nianiiki Ma Jou ai mau de nidiai abe Una wato itiai, De ahao niamake nia gogere iriidi nia tonakoka ka hiado-adonika.

Huhupu 23:2

“De ufa ngini nimahisapurika de ona yomatotoomuika la ato yodiai itorou. De ufa nianiiki o nyawa manga demo abe ona yowoe-woeika, ngini kiani nia hiningaka nianiiki abe ma dumutu ma goungika ngaro ka nomatengo dika.

Sosawaro 12:11

Onagona dika yotobakarajaanga manga dumuleoka ahao manga inomo duru yawedonoka, masara ona abe ka ihikaika yaniiki manga hininga ma homoa, ona gea ko iwa manga sosawaro.

Yohanese 10:27

Nako to Ngohi ahi domba ona gea duru tahikokioriki de ahi ilingi ona ihigihene ho ihiniiki Ngohi.

Yohanese 12:26

Ma onagona dika yairiki la Ngohi todadi manga Baluhu, gea kiani ka ihikaika ihiniiki Ngohi la ngaro o kiaka dika Ngohi naga ma onangoo naga genangoka. De ona gea abe ihihigihene Ngohino itiai, ahao manga karajaanga gea ahi Baba wabalaha de ai horomati onangika.”

Yohanese 3:20

“Onagona dika yotobadiai itotorou ona gea ka yodohata o dararono ma gou-goungika gea, de yoluku yanoa o fufutu gea la yoboa o dararonino. O fufutu yoluku yanoa ma titi ato done manga howonino yahitararono. Gea ma titi ho hiadono manga hohowono o binaahaika gea nagahi.

1 Korintusu 11:1

Ho ngini kiani nimaaduru hoka ngohioli, abe imaketero hoka ngohioli tomaaduru hoka o Kristusu.

1 Korintusu 4:16

Ho naa duru togahoko nginika la nihihigihene ngohi nia babaino la hiadono ngini nimaaduru abe hoka to ngohioli naa ahi wowango ma datoro.

Efesusu 5:1

Ho mangale ma titi ti ngini nia howo-howono Ma Jou waofioka, ho ngini nia wowango ma goronaka kiani nimaaduru abe hoka to Unangoli ai hininga. Angamoi ngini nidadioka to Una ai ngofa-ngofaka idodutu de duru winidora nginika, ho kiani to Una ai hininga nimaaduru nia wowangoka.

Filiipi 3:17

Ahi gogianongoru, togahoko la ngini mata-mata nimaaduru abe hoka ngohioli ma titi Ma Jou ai mau tatobaniiki. De gea ka ngohinoua dika ka idadi nimaaduru, ma naga nginioka yamuruono naga abe to ona manga wowango ma dumutu de gea to ngomi imaketero, ho onangoo ka idadi niamake ona gea manga wowango ma datoroka nimaaduru.

1 Tesalonika 1:6

De naga ma titi moioli hiadono ngomi duru mihioriki abe Ma Jou winiirikoka ngini. De gea ma titi abe ngaro o nyawa utu duru inihikangela nginika ma titi niangaku mia demoika, masara gea ngini ka nigarago dika, de nia garago gea ihititi Ma Jou o Womahino. Ho genangoka de duru itararono ngomino abe ngini nimaaduru hoka ngomioli de hoka nanga Baluhu o Yesusu Kristusoli. Angamoi ngaro ngomi eko ngaro Una, eko ngaro ngomi mata-mata ma nako hiadono o nyawa imihikangela ngomino ma ka migarago dika. De nginioo hokogea nimatongohono de nigarago ma oraha o kangela niaohana, ho duru itararono abe Ma Jou dika winiiriki ngini la nidadioka to Una ai nyawa.

1 Tesalonika 2:14

De gea mihioriki ngini niangaku ai Demo-demoika gea mangale ma titi ngini ma oraha gea ngaro utu inihikangela nginika ma ka idadi nimatongohono dika. De gea nia datoro duru imakiniiki de nanga gogianongoru o Yudea ma tonakoka manga datoro. Abe ona gea ma dihira abe ahao gea iwingaku o Yesusu Kristusika de manga date-datekoka abe onangoo o Yahudi ma nyawa, ona gea duru yahikangela nanga gogianongoruika ma titi manga ngongaku Unangika. De naa ma duruika nginioo naga utu nia date-datekoka abe onangoo o Tesalonika ma kotaka yogogere hoka nginioli, de gea ona utu duru inihikangela nginika. Ho ngini duru nimaketero hoka Ma Jou ai nyawa utuoli gea abe o Yudea ma tonaka ma gogarejaka yomatoo-toomuino. Abe onangoo gea manga dutu-dutu o Yahudi ma nyawa yahikangela onangika.

2 Timotiusu 3:10

Masara ngona o Timotiusu, ngona de ona gea abe o rerehene ma dodotoko yotobadotoko, gea ngona de ona duru nimakohowono. Masara nako ngona de ngohi, gea ngone hatoli homaketero nanga hininga. Angamoi ka nengokadauinohi de ngona duru nohihioriki to ngohi ahi hininga de ahi dodotoko. De gea ahi hininga ma dumutu de ahi wowango ma datoro, de ahi ngongaku Ma Jouika, de ahi hininga ma mobole de ahi dora o nyawaika, gea ahi hininga ma dola mata-mata duru nohihioriki ngohi angamoi ma dodihirainohi de ngone duru homahikoriki. De gea ngaro nengokadau abe ma oraha o nyawa ihihikangela ngohino, ma gea nohihioriki abe ngohi tomatongohono de ka tohidagiohi ahi karajaanga Ma Jouoka de aino.

Ibarani 6:12

Ho ngohi toigo la ufa initebeturu masara koaho inimagawe, de gea ngohi toigo la nimaaduru abe hoka onangoli yamakeoka ma utumu Ma Jouino, abe manga utumu gea imaketero hoka ma dihiraino wahibehehongoka onangika. De ona gea yamake ma utumu Unangino ma titi manga ngongaku de manga dongohono abe Unangika.

1 Peturusu 3:11

De abe ma titi manga wowango ma datoro ma dorou, enangoo kiani yatingakika onangoka de aino la ma rorahaioli yotobadiai manga wowangoka. De kiani ka ihikaika yoogoana manga gogao o nyawa mata-mataika la ufa yomaketeribuutu masara yowango o dame ma goronaka.

1 Peturusu 3:13

De naa moi tinileha nginika abe ma titi yotobadiai ma dorou. Sarakia, nako ngini ka ihikaika niatobaniiki o datoro ma rorahai dika nia wowangoka de gea naga o nyawa yoboaino la ato inihikangela nginika, gea ahao hokokia idadi nginika? Ka idadi ona yoboaino de ihirusaka ti ngini nia wowango Ma Jouika ma titi manga dorouino? Duru ko idadiua! Ho ngaro ufa dika de ngini nipusingi ma titi ona gea!

1 Yohanese 2:29

De ngone hohiorikoka abe Ma Jou Una gea duru wototiai dika, ho genangino de ka idadi hohioriki abe o nyawa onagona dika o totiai dika yanii-niiki manga wowangoka, ona gea Ma Jouoka de aino yomaboakali. Angamoi o totiai ma titi imanoa ka Unangoka dika, ho nako o nyawa yaniiki to Una ai totiai manga wowangoka, gea hohioriki abe onangoo tanu Unangoka de aino yoboa abe imaketero hoka manga totiai enangoo iboa Unangino.

1 Yohanese 3:10

De hokonaa ngone ka idadi hahikohowono o nyawa la hahioriki to onagona manga wowango ma datoro iboa Ma Jou ai hiningaka de aino de to onagonali abe manga datoro ihititi o Ibilihi ma haeke ma hiningaka. Abe onagona dika o totiai ko yanii-niikua manga wowangoka de manga gogianongoru o ngongakuoka ko yadoraua onangika, ona gea abe manga datoro ko imakiniikua de Ma Jou ai hininga abe tanu kiani imanoa ai ngofa-ngofaka homoi-homoioka. Masara to ona gea manga hininga imakadaene dika abe hoka o Ibilihi ma haekoli ma ngofa-ngofaka yodiai. Ho naa duru tinihigaro nginika la ufa nimaaduru abe hoka onangoli o Ibilihi ma haeke ma ngofa-ngofaka, masara kiani niwango nitotiai abe hoka itiai Ma Jou ai ngofa-ngofaka yowango, angamoi ngini niagoungu nidadioka to Una. Ho koaho ngini o totiai dika nianii-niiki de nia dora itagi nia gogianongoruika.

1 Yohanese 4:1

De ahi gogianongoru abe duru tinidora nginika, naa moi tinihitiari ma titi o nyawa utu manga dodotoko de manga hingahu ma demo. Abe ngaro o nyawa yomahingahu ato bari Ma Jou o Womahoka de aino iboa manga demo, ma gea kalioli ngini nitangakuholi manga demoika gea, masara koaho ihira niatailakohi manga demo la nihioriki gea iboa Ma Jouoka de aino ekola o womaha utuokali de aino iboa manga demo gea. De tinihitiari hokogea angamoi naga o nyawa ko manga ngoeoka o duniaka naa abe yomahiromanga ato Ma Jou ai uru ma dodofanga, masara ona gea yotobaeluku dika de gea ko Ma Jou ai demoua abe o nyawaika yahingahu-ngahu.