2 Timotiusu 3:15 - Ma Jou ai Demo-demo o Totobelohoka

¹⁵ De igoungu ngona ani etetekinohi de notobatoihene Ma Jou ai Demo-demoino, ho gea duru nohioriki abe to ngomi mia dodotoko gea duru itaana de to Una ai Demo-demoka de aino ho hiadono ka idadi nangaku mia dodotokika gea. De ai Demo-demo ena gea inahisawaro la hohioriki hokokia ka idadi Ma Jou wonaduhunu nanga howo-howonino. De gea inahingahu ato kiani ngone hingaku o Yesusu Kristusika de gea ahao nanga howono Una waofi.

2 Timotiusu 3:15 ပူးပေါင်းရင်းမြစ်များ

Higiriiri 19:7

Ma Jou ai Pareta gea mata-mata duru ka itotiai dika, de ka idadi nanga jiwa inahiwangoroli. To Una ai hiaturu gea duru igou-goungu hiadono ka idadi hongaku enangika, abe ngaro o nyawa biaha dika ma ka idadi inahisawaro.

Sosawaro 22:6

Kiani hadotoko nanga ngofa-ngofaka la manga wowango ma datoro itotiai, de ipahaino ngaro manga wowango ma dodagi mata-mata masara ko yorehenua ma totiaiino gea.

Sosawaro 8:17

“Ngohi o ngo Sosawaro duru tadora o nyawaika abe to onangoo manga dora ilamoko ngohino. De onagona dika abe de manga hininga ma gahumu yolingiri o sosawaro ma gou-goungu, ahao ona gea yamake manga sosawaro.

Matiusu 22:29

De o Yesusu wapaluhu onangika wato, “Iya, marai naga abe duru niataoko ihowono! Nako ngini niafikiri niato o nyawa yohonengoka gea ko yomomikokaua, gea ma titi Ma Jou ai Demo-demo ikuranga nimangaratii, de ngaro Ma Jou ai kuaha ma enangoo ko niataokuahi.

Lukasa 1:15

De una ahao ai wowango ma karajaangino de duru iwihisanangi nanga Baluhika ma titi wileleani irahai. De mangale ma titi wileleani Unangika ho una gea ko wadadiua waokere o angguru ma teongo ma gohaka eko o daluku angamoi ka womahidoboainohi de Ma Jou o Womaha iwilufungoka.”

Lukasa 2:40

De manga ngofaka o Yesusu wolamoko de ai buturungu ka idogo, de ai hininga aomanga de o sosawaro. De Ma Jou duru widora Unangika hiadono ka ihikaika wihiowa.

Lukasa 24:27

De ahao o Yesusu wahitararono onangika Ma Jou ai Demo-demoino mata-mata abe ma dodihiraino de ihitulihukuoka ato ahao hokokia kiani idadi Unangika. De gea womulaenge de o Musa ai demo de wagoraka ma demo mata-mata abe iwihidumutu o Mesiaika de wahitararono hokokia ma demo ihingodumoka. De ahao wogila-gila de wagoraka Ma Jou ai uru ma dodofanga utuinoli manga demo de genangoo wahitararono ona yahinootoika la ka idadi ihioriki hokokia kiani idadi Ma Jou ai Mesiaika. Masara gea wahitararono de ko womafetonguahi abe tanu Una gea manga Mesia.

Lukasa 24:32

De gea ona yahinooto duru yogarago de yomakoketemo ato, “Una gea o Yesusu! De gea ma titi ho hiadono kangano nanga dodagioka ma oraha wonahitararono Ma Jou ai Demo-demoino de to ngone nanga hininga hoka duru ifae de o garago. De nanga garago gea ma titi o Yesusu Una ma hirete abe wonahitararono ngoneino!”

Lukasa 24:45

De ahao Una wafelenga manga hininga la ka idadi ona yataoko itiai Ma Jou ai Demo-demoino.

Yohanese 5:47

Ho nako to una ai demo gea wotulihukuoka ko niangakua, done sarakia niangaku to Ngohi ahi demo?” Hokogea o Yesusu de ai demo wahitaana o Yahudi ma nyawa manga balu-baluhu manga hiningaika.

Hidingoto 10:43

De abe Ma Jou ai uru ma dodofanga ma demo, to ena mata-mata ma hidumutu ka o Yesusika dika. Abe ona yotemo ato onagona dika iwingaku Unangika ka idadi manga howo-howono waofioka ma titi to Una ai romangino.”

Hidingoto 13:29

“De manga datorino gea de duru yahingodumu Ma Jou ai uru ma dodofanga ma demo mata-mataika abe ma titi hokokia iwihohonenge. De gea yahingodumu ibooto de iwihiguti ma gota isosalioaka de wauku de iwikelenga o lungunoka.

Hidingoto 16:1

De o Paulusu de o Silasa yosoboka manga dodagioka de ihira yoiki o Derebe ma kapongika de ipahaino ahao yogila-gila o Lisitira ma kapongika. De genangoka naga womatengo wingaku-ngaku abe ngoi meme o Yahudi ma nyawa abe munangoo mingakuoka o Yesusika, masara ai baba una gea o Yunanioka ma nyawa. De to una ai romanga o Timotiusu.

Hidingoto 17:2

De abe hoka o Paulusu ai biaha, una watobaniiki manga doomu o Hiaini ma wangeoka. De gea o Hiaini ma wange ma getongo waniiki abe o minggu hangeino. Abe ma doomu hange gea homoi-homoioka de una wahigaro de wahitararono onangika ma titi Ma Jou ai Demo-demoino.

Hidingoto 26:24

De o Paulusu ka wotemo-temohi ai gogiriaka de ka itodokanino de ma gubernuuru o Fetusu waamo-amokiye wato, “Paulusu, ngona naa initogohangoka! Abe bote ngona nomadotokoholi ho hiadono duru initogohangoka naa!”

Roma 1:2

De abe ma titi o Abari ma Rorahai gea, ma dodihirainohi de Ma Jou wonahibehehongokau wato ahao ai Abari ma Rorahai wonahingahu ngoneino. De gea wonahingahu ma titi to Una ai uru ma dodofangino. Abe ona gea ihitulihuku ai behehongo ma hingahu gea ai Demo-demo ma debi-debinoka.

Roma 16:26

Masara ma oraha naa de ahao Ma Jou wahingahu ma abari gea to ngomi mia uruino abe ngomi ai Abari ma Rorahai miatobahingahu-ngahu o nyawaika. De gea idadioka duru imaketero abe hoka ma dodihiraino de Ma Jou ai uru ma dodofanga ihitulihukuoka. De hokogenangoo imaketero de abe nanga Jou wohiparetaka de wohiaturoka la nako ma oraha adonoka de o nyawa ka idadi yoihene to Una ai Abari ma Rorahai. De gea igoungu abe nanga Jou wohiaturu mata-mata la ona ko o Yahudi ma nyawaua ngaro o tonaka o kiaka dika yogogere, masara ka idadi yoihene to Una ai Abari ma Rorahai de yaniiki hiadono iwingaku Unangika. Abe nanga Jou Una gea ngaro ka hiado-adonino ma Una nagau, de ngaro ka hiado-adonika masara Una nagahi, de ko iwa ai bobaha.

Roma 2:27

De nako tinihikohowono ngini o Yahudi ma nyawa abe nimahunaka masara ka niatotilakuru Ma Jou ai Pareta de onangoli abe ko yomahunaua masara yatobanii-niiki to Una ai Paretaika, gea duru ka onangohi abe yataana de to Una ai mau. Ho ahao to ona manga datoro ma rorahaiino de inihitaana nginika abe Ma Jou ai hohowono itiai ngini niamake. Angamoi abeika, ngaro o nyawa abe ma dodihiraino de ko yamakeua ma Pareta Ma Jouino ma ona ka akunu yaniiki to Una ai Paretaika. Ho hongoli ngini o Yahudi ma nyawa tanu ka idadi nianiiki enangika, angamoi ai Pareta gea ma deka-dekanuku naga nginioka. De ahi demoino gea mata-mata de itararono abe duru itiai Ma Jou winihohowono ngini o Yahudi ma nyawaika.

1 Korintusu 1:21

Angamoi abeika Ma Jou ai sosawaro. Ngone o duniaka ma nyawa naa ngaro nanga sosawaro hapake, ma, ko himakeua Ma Jou de Una ko hihiorikua. De hokogea ma dihirainohi wohiaturu Ma Jou la wato ufa ngone o nyawa himake ma titi to ngone dika ma hirete nanga sosawaroino. Hokogenangua, masara Ma Jou wonahimatoko ai sosawaro ngoneino abe gea Una wapake o Kristusu ai gota isosalioaino ma abari la wonaduhunu ngone onagona dika hongaku genangika. Ho ngone o nyawa duru hoigo homahinganono ka ngone ma hireteino dika de gea hohiromanga hato hososawaro, masara nako Ma Jou, hokogenangua. Abe Una wato nako hiadono homahinganono o Kristusu ai karajaangika abe wodiaioka ai gotaka, gea de ahao wonahiromanga wato hososawaro. De igoungu naga o nyawa manga ngoe abe yafikiri ato ai gota ma abari gea ibodo.

Efesusu 6:4

De abe ngini o ba-baba, ufa nia ngofa-ngofakika niao ko itiaiua hiadono ma titi nginioka de ona yotobangamo, ma koaho niapaliara onangika de o dodotoko de o hitiari abe gea ena imakiniiki de nanga Baluhu idodutu ai hininga ngoneino.

Higalioli 4:6

Ho kiani ngini duru nihidodiai nianiiki enangika. Angamoi ahao o nyawa utu yamake nia wowango ma dodagi de yoihenoli ma titi ai huhuloko ma demo gea. Ho nako ona yamake abe nia wowango ma datoro ma rorahai gea ihititi to Una ai huhuloko ma demoka de ahao ona yomaketeade-ade de inihigiriiri ato, ‘Abeika o nyawa yowoe-woe gea duru yososawaro!’ Hokogea manga higiriiri ma demo.

1 Timotiusu 4:13

De ma oraha naa de ka hiadono abe ahao ngohi toboa tonilega, gea ka ihikaika kiani nabasa Ma Jou ai Demo-demo nanga gogianongoruika, de ufa nomatogumu ona nahigaro ma totiaiika de nadotoko onangika.

2 Timotiusu 1:1

Ahi gianongoru o Timotiusu, ngohi naa o Paulusu, abe Ma Jou wohiirikoka ngohi la todadi o hidingoto ma nyawa abe tahingahu-ngahu o nyawaika ma titi o Yesusu Kristusu nanga Koano abe Ma Jou wonahibehehongoka. De gea ngohi wohihidingoto la tohingahu-ngahu ma titi o wowango ma ngango abe gea ma wowango Ma Jou wohibehehongoka. De gea wonahingahu wato iti ngone naga de o Yesusu Kristusu de gea ai wowango hamakeoka.

2 Timotiusu 1:5

De naa duru totarimakase Unangika angamoi tomahohininga ma titi ani ngongaku iahumu Unangika. De ani ngongaku gea ka imakadaene dika abe hoka ma dodihiraka to ngona ngoni be o ngo Lois ami ngongaku de ngoni memeoo o ngo Yunike ami ngongaku, abe onangoo duru iwingaku nanga Baluhika. De hiadono ma oraha naa naga duru tonganono abe ani ngongaku naga imanoa ngonaka imaketero hoka ma dihira imanoa onangokaoo, de gea ma titi ho duru totarimakase Unangiye ma titi ngona.

2 Peturusu 3:16

De ngaro to una ai hurata mata-mataika abe gea ma goronaka de naga ai dodotoko abe ma titi nanga Baluhu ai gahe woboali, masara gea ai hurata homoi-homoiika de ai demo duru imakiniiki de to ngohioli ahi demo nginika, ho ngini ka idadi duru niangaku mia demoika abe ma titi nanga Baluhu ai gahe woboali. De igoungu, abe nako to Paulusu ai dodotoko, naga ma titi utu genangino abe hatoli ikangela hataoko itararono, de ena gea ma titi abe o nyawa utu ihikawalimi la hiadono to ena ma dumutu ihikohowonoka. De ona gea o nyawa abe ikuranga yomadotoko de manga ngongaku ka idomo-domohi. De gea ka to Paulusua dika ai dodotoko abe ona ihikawalimi, masara Ma Jou ai Demo-demoino utuoli naga abe enangoo ona ihikawalimoka. De ona gea ahao yamake ma hofoko to ona manga datorino de gea o bobinaahaka.

Himatoko 19:10

Ho ka de wohitemo hokogea de ngohi tomamotumukuoka o malaekata gea ai louoka la tato tomahuba unangika. Masara una wohitaere ngohino wato, “Ufa hokogea nodiai! Ngona kiani Ma Jouika dika nomahuba. Angamoi ngohi naa to Una ai gilaongo abe imaketero hoka ngonali de abe hoka nanga gogianongoru utuoli abe ngone homoi-homoi hahingahu-ngahu o Yesusu ai ade-ade de duru hahigaro o nyawaika la hato ona ka idadi iwingaku Unangika. Angamoi ma hingahu ma demo abe yahigaro o nyawaika la iwingaku o Yesusika, ena gea ma hirete abe yahiakunu Ma Jou ai nyawaika la ma abari gea ka idadi yahingahu-ngahu o nyawa utuika.” Hokogea o malaekata ai demo ngohino.

1 Samuele 2:18

De ma oraha gea o Samuele, ngaro una ka o ngofakohi masara ka ihikaika wileleani Ma Jou o Yawe ai Tauoka. De una wapake o baju yodiai o lawe ma alu-aluhino abe enangoo yomadingakoka Ma Jouika. De o baju gea ma romanga o efodo abe ma rupa imaketero hoka ona o hidemo Ma Jouika yapake.