2 Tawari 17:11 - Ma Jou ai Demo-demo o Totobelohoka

¹¹ De naga o Filistina ma nyawa yamuruono naga abe yoboa o Yosafatino de iwihidoaka o haaka ma dutu unangika de nagali utu manga hadia, ho manga hidoaka gea ihitunguu manga horomati ai kuahaika. De naga o Arabino ma nyawa yoboa de manga duduono ma amoko abe iwihidoaka o Yosafatika. De gea naga o domba ma nauru o sana tumidi de o ratuhu tumidi de manga kabingi enangoo o sana tumidi de o ratuhu tumidi iwigao manga horomati ma hidoaka unangika.

2 Tawari 17:11 ပူးပေါင်းရင်းမြစ်များ

2 Samuele 8:2

De ahao o Isiraele ma nyawa manga musu o Moaba ma nyawa, onangoo o Dautu wahikala. Wahikala ipahaino de wahuloko la manga musu gea yomatatatorika yomaidu dau ma tonakuku la ka idadi watuga manga ngoe yamuruono. De gea watuga manga ngoe de o tali moi abe hatoli ikurutu la wahikeregu hiadono naga manga doomu hangeika. De ahao manga doomu hinooto yahohonenge dika onangika, ho manga doomu moi dika abe yahigunoa la ka yowangohi. De o Moaba ma nyawa gea abe yowango-wangohi kiani iwihingounu o Dautika de ka ihikaika naga manga nagimi unangika abe kiani yotobafangu.

1 Kokoano 5:1

Ma dihiraino abe ma oraha o Dautu ka wowangohi de wodadi o koano de una de o Tirusu manga koano o Hurama ona yahinooto ka ihikaika yomaketedodiawo. Ho ipahaino ma oraha o Hurama gea woihene abe o Dautu ai ngofaka o Saloomo wituruuruoka de wodadi o Isiraele manga koano ma hungi de una wosanangi. De gea o Hurama wahidingoto ai nyawa yamuruono naga la yadofanga ai demo o Saloomoika abe to una ai hininga ma rahai de ai horomati ma demo wohidingoto o Isiraele manga koanoika.

2 Kokoano 3:4

De ma oraha gea doka o Moaba ma tonakoka naga manga koano ai romanga o Mesa. De o Mesa una gea wososawaro wapaliara o domba la duru ifaa-faatuku. De manga koano gea de o Isiraele manga koano yomahiketehibehehongoka ho kiani o Mesa o tao-taongiye wahidingoto o domba ma ngofaka o dutu o sana o ratuhu moi o Isiraele ma tonakika. De nagali ma gogo ma amoko kiani una wahidoaka o Isiraelika, abe gea o domba ma nauru o dutu o sana o ratuhu moi kiani yaguti de ma gogo gea wahidingoto o Isiraele manga koanoika. Ho ma domba ma ngofaka de ma gogo ma amoko gea idadi hoka manga pajaka abe o Moaba ma nyawa kiani yotobafangu o Isiraelika.

2 Tawari 17:12

Ho o Yosafata ai kuaha ka ihikaika idogo de una wohigoko o tentara manga doomu ma ngi muruono naga abe akurunga de ma dadaduhu abe duru iputurungu. De wohigokoli o kota ma hungi muruono naga abe ma titi o Yehuda ma nyawa ka idadi manga inomo ma boloi yagogono o kota-kota gea ma goronaka.

2 Tawari 17:5

De Ma Jou o Yawe duru o Yosafata wihiputurungu hiadono ai koano ma kuaha idogo ilamoko. De o Yehuda ma nyawa manga horomati ilamoko unangika ka hiadono ka ihikaika naga manga hadia ma hidoaka unangika ho hiadono manga koano gea duru wokaya.

2 Tawari 9:14

De utuohi o Saloomo ai utumu ka ihikaika wamake abe naga ona yotobafuku-fukunu de ona ihiketehituruuru manga kiahonanga kiani manga utumino ma hidoku moi iwihidoaka unangika. De o Arabino manga kokoano homoi-homoiika de o tonaka manga gubernuuru homoi-homoiika ona mata-mata o tao-taongiye naga manga hidoaka o gurasi de o haaka yoboa iwidotaka o Saloomoika.

2 Tawari 9:24

De o tao-taongiye ka ihikaika naga o nyawa yoboaino la iwitutumu o Saloomoika. De ngaro onagona dika naga yoboa iwitutumu ma kiani de manga hadia abe yoigo iwihidoaka unangika. Ho manga hidoaka hoka o haaka, de o gurasi, de o pakeanga duru ma rorahai, de o parangi ma dae, de o rampa-rampa, de o kuda, de o keledai, ho gea ena mata-mata naga abe iwihihadia o Saloomoika.