2 Samuele 22:24 - Ma Jou ai Demo-demo o Totobelohoka

²⁴ Ho to Una ai himangoka wohietongo wato to ngohi ahi howono ko iwa, angamoi duru tomahitiari done tahowono Unangika.

2 Samuele 22:24 ပူးပေါင်းရင်းမြစ်များ

Dodadi 17:1

De o taongo ngimoi de hange ipahaika de o Abaraama ai ngumuru adonoka ai taongo morihiwo de hiwo. De ahao Ma Jou o Yawe womahimatokoli unangika de wihingahu wato, “Abaraama, Ngohi naa Ma Jou Tokokurutiye abe o kia dika tato todiai gea ka idadi todiai. Ngona ahi himangoka kiani nowango itiai la ko iwa moi tamake ani datoroka abe ka idadi tonitaere.

Dodadi 6:9

Hokonaa o Nuhi ai ade-ade. Una gea ai hininga irahai, abe ma oraha gea nako o nyawa mata-mataika yomakokutuono de o Nuhi ka unangohi ai wowango ma datoro itiai hiadono ko moiua ka idadi iwitae iwihitaana. De o Nuhi gea ka ihikaika yomaketedodiawo una de Ma Jou.

Dodadi 7:1

De mata-mata o Nuhi wohidiai ibooto de ahao Ma Jou o Yawe wihingahu o Nuhika wato, “Nuhi, naa ma oraha adonoka abe kiani ngini nikokiwohama ngona de ngoni fekata de ani ngofa-ngofaka de manga feka-fekata. De gea ka idadi ani kapaika niwohama mangale abe nako o nyawa mata-mataika ahi himangoka ma ka to ngonahi ani datoro itiai.

Higiriiri 51:6

Masara ngaro hokogea tomaboa Ngona noigo la ufa tomahipongono, To Ngona ani mau la ahi hiningaka ma gou-goungu dika itagi. Ngona noigo nohidotoko la naga o sosawaro ahi badanga ma goronaka, Ka hiadono ngohi tososawaro tomahiaturu ahi wowango ma datoroka.

Sosawaro 4:23

Mata-mata ngone hodiai ngaro ma dorou eko ngaro ma owa, ma mata-mata gea imulaenge nanga hiningaka de aino. Ho gea abe itagi nanga hiningaka ahao ihupu de imahimatoko nanga wowango ma datoroka. Ho abe ngini kiani duru ka ihikaika nimahigoana la ufa nia hininga itagi ma dorouika angamoi ngaro mata-mata utu nia wowangoka ma ka enangohi kiani niogoana.

Yohanese 1:47

Ho yoboaino o Yesusino de ona yotagiohi iwihimangino abe o Natanele ko womahiadonuahi de o Yesusu wihidaere unangika wato, “Ho ngone naa himakeoka o nauru abe ko woelu-elukua ho itiai una naa hihiromanga o Isiraele ma nyawa ma gou-goungu.” Hokogea o Yesusu wotemo o nyawa manga himangoka.

2 Korintusu 5:11

De ahi gogianongoru, ngomi duru mihioriki abe Ma Jou ahao wonatailako ngone homoi-homoi ho ngomi naga mia hawana de ma horomatioka Unangika ma titi ai hitailako gea. De gea ma titi hiadono ngomi naa duru mioigo la wiwihisanangi Unangika. De naga moioli abe ihititi mia hawanoka gea, abe ngomi duru miahigaro o nyawaika la miato ona iwinii-niiki Unangika. Angamoi nako ona iwiniiki itiai Unangika, gea ahao ma oraha watailako nanga Baluhu idodutu de wasanangi onangika. De Ma Jou Una duru womihioriki itararono abe to ngomi naa mia hininga ko iwa ma dumutu o dorouika, ho ngomi mionganono abe nginioo ka idadi niataoko itiai ma titi to ngomi mia hininga ma rorahai.

Efesusu 1:4

Ho naa tonahihohininga ma titi ai hidoaka ma owa duru ma hohailoa abe Ma Jou wonahidoakoka. De abe ai owa ihira-hira, duru ma dodihiraka abe o dunia naa ko wotulaadauahi de Una wonairikoka ngone abe ahao hingaku Unangika la ahao hodadi to Una ma hirete ai nyawa duru ma hohailoa. Abe Una wonahideeoka wato womadingaka ngone mata-mata la homakohowono de o nyawa utu. De gea ihititi ai hininga ma doraka ngoneino ho hiadono wonahidadi la ngone hotebi-tebini de ko iwaka nanga howono to Una ai himangoka.

Kolose 1:21

De ma dihira ngaro nginioo naa, ma, inihikatingakoka kohagurutika de Ma Jou, angamoi nia hiningaka niwimusu Unangika de hiadono nia wowango ma datoroka nitobadiai itorou.

Kolose 1:22

Masara ma oraha naa de ngini winihigiliokau Unangino ma titi o Kristusu ai badanga womahidoaka la wohonenge. De gea wodiai Ma Jou la ahao ka idadi ngini winiao ai himangino de duru ko iwaka nia howono nginioka, angamoi wakokiofioka nia howono mata-mata de winihiromanga o debi-debini ma nyawa.

Ibarani 12:1

De naa o hiketero moi ka idadi todiai abe tonahiketero to ngone nanga wowango de o roreebe abe ngone o nyawa nanga biaha homapopaata homaketeroreebe. De ona ma dodihiraino abe duru iwingaku-ngakuoka de to ona manga ade-ade niihenoka, ona gea yomahiadonikaka ma roreebe ma batingika ho ma oraha naa ona ko yomaketeroreebeokaua masara gea inawuni-wuningoli ngone naa abe ko homahiadonuahi ma batingika. Ho mangale ma titi ona gea ko manga ngoe inawuni-wuningi, ho abeika ngone hanoaka o kia dika naga ngoneoka abe ena gea inahikokapaanga hiadono ko hotai-taitua, masara koaho gea ena hanoaka la ka idadi homapopaata de houwini. De o howono o kia dika naga ngoneoka abe biaha ena gea inatobatukoro, enangoo ma kiani hanoa la ka idadi ka ihikaika hoaguru nanga himangika de homapopaata de nanga dongohono ka hiadono nanga roreebe ma batingika homahiadonika.