De o Hanunu wangaku ai nyawa manga demoika gea ho wataokino o Dautu ai nyawa de ahao manga gumi homoi-homoi yakulu ma hononga dika la duru yahimaleke onangika. De yakulu manga gumi ma hononga ipahaino de ahao yagutioli o Dautu ai nyawa homoi-homoi manga baju ma guru-gurutuku la manga hale imatawangeika dika. De hokogea duru yahimaleke onangika de ahao yahigunoa la ka idadi yolio manga tonakika.
2 Samuele 10:5 - Ma Jou ai Demo-demo o Totobelohoka5 Masara mangale ma titi manga himaleke ma amoko yamao ho ma oraha yolio de ko yogila-gilauahi o Yerusaleemika. De ipahaino naga abe iwihingahu o Dautika hokokia idadi ai nyawaika gea ho wohidingoto ai demo onangika abe wato, “Ngarouahi ngini niboa o Yerusaleemino naa. Ka idadi nimagoo-gogerohi o Yeriko ma kotaka la nia gumi niohiaini hiadono ilio imaketero hoka ma dihiraino, de gea ahao ngini nigila-gila nilio naangino.” အခန်းကိုကြည့်ပါ။ |
2 Samuele 10:5
6 ပူးပေါင်းရင်းမြစ်များ
De ahao o Amono ma nyawa iwihioriki abe o Dautu duru wangamo onangika, ho yomahidiai la yomaketeparangi de o Isiraele ma nyawa. De gea yomahiketehibehehongo de o tonaka utuika manga nyawa abe yahewa manga tentara ma nyawa la ka idadi yomakuduhunu yalawana o Isiraele ma nyawaika. Ho o Siria ma tonaka manga nyawaino yahewa yasana monaoko abe yogogere o Bete Rehobo de o Soba ma kapongoka. De ahao o tentara yasana ngimoi de yasana hinooto yahewa o Tobo ma kapongino. De nagali abe yomahiketehibehehongo de o Maka ma nyawa manga koano la yahewa to una ai tentara ma nyawa yasana moi.
De ma oraha o Ahaba wahikoano o Isiraele ma nyawa de womatengo ai romanga o Hiele womaputuhu wato o Yeriko ma kota wohigokoli ngaro ma dihira Ma Jou wahingahuokau o Isiraele ma nyawaika abe ko woigoua o kota gea yodiaioli ma hungi. De igoungu, ka de o Hiele o Yeriko ma kota ma tau homoi-homoiika ma lifunu wodiai ibooto de to una ai ngofaka o domoro ai romanga, o Abirama, una wohonenge. De ika-ika ma oraha o Hiele o kota o Yeriko ma dadaduhu ma ngorana ma dadatoko wohipasi ibooto de ai ngofaka ma baha ai romanga, o Segubu, unangoo wohonenge. Hokogea idadi duru imaketero abe hoka ma dihira Ma Jou o Yawe ai hingahu manga tofora o Yosuaika abe ma titi o Yeriko ma kota.
Naa, o Kanani ma nyawa abe yogogere o Yeriko ma kotaka duru yamodongo o Isiraele ma nyawaika abe ona yomahitiginoka manga kotaino. Ho duru yomahidukusioka manga kota ma goronaka la ko moiua ka idadi yohupu eko yowohama ma hoanika. Ho manga kota ma dadaduhu ma ngorana abe idateke ma hoanika ena gea duru yakusi-kusioka.
ကြော်ငြာတွေ