2 Samuele 1:2 - Ma Jou ai Demo-demo o Totobelohoka

² De ahao ma wange hangeoka de womatengo ka o goohi abe o Saulu ai tentaraino manga dodogumino woboa. De woboa o Sikaga ma kotaino de naga ma abari wototaka. De una gea ai pakeanga wakakihoka de duru wokutu ai mumukuku de o tonaka ma kafo la wohitunguu abe duru wohuha. Ka de womahiadono o Dautu ai himangino de womahimotumuku o tonakuku la duru wohitunguu ai horomati o Dautika.

2 Samuele 1:2 ပူးပေါင်းရင်းမြစ်များ

Dodadi 22:4

Ho yoikoka de yomaidu o homoaka manga futu hinooto ho o wange hangeino manga dodagi. De o Abarahaama wolega-lega kohagurutikahi de o loku wohidotelega, de wamakeoka ma loku gea abe Ma Jou wihingahuoka unangika.

Dodadi 37:29

De ma oraha o Yusupu iwifukunu gea o Rubene ko iwiwa ho ka de woiki witutumoli o Yusupu la wato wihihupu o baitiye masara ka de waika de o Yusupu ko iwiwa. De o Rubene duru ai hininga imaketero hoka womarofu, ma titi ai hininga ma huha, ho hiadono ai pakeanga wakakihoka.

Dodadi 37:34

De duru o Yakubu ai hininga ma huha hoka woigo womarofu hiadono ai pakeangoo wakakihoka. De ahao womaturuuru de hoka o karongo womahinoauku ma titi ai hininga ma huha. De hiadono duru ai dekana o wange-wangeiye hokogea ai huha dika iwihipareta.

Dodadi 43:28

De ona iwipaluhu ato, “Marai una nagahi gea doka mia tonakoka abe ma oraha ngomi wiwinoa de una ka woputurungohi.” Hokogea yotemo ibooto de ahao yomaponukokali o Yusupu ai himangoka hiadono manga pea itiki o tonakuku.

2 Samuele 1:3

De o Dautu wileha unangika abe woboa o Saulu ai tentaraino gea de wato, “Ngona naa o kiaino noboa?” De una wopaluhu wato, “Ahi baluhu, ngohi naa o Isiraele ma tentara ma doomuino de toara la ka idadi tonitutumu naa.”

2 Samuele 13:19

Masara naa o ngo Tamara ami baju gea ka makakihi enangika de ahao o uku ma kafo momadoburaraha ami peauku ma titi ami hininga ma huha mohitunguu. De ahao ami himanga matatoko de ami giama de ka mosobo moari-ari.

2 Samuele 4:10

De naa tiniade-ade abe hokokia idadi ma dihiraino o Sikagoka. Abe naga womatengo woboa ngohino de wohihingahu wato, ‘O Saulu una wohonengoka.’ De una gea wato bote wohihisanangi ma titi ai abari ma demoino gea. Masara ka de toihene ai demo gea de genangoka dika tihohonenge. Abe ahi datoro gea to una ai abari ma balaha!

Estere 4:16

Muna mato, “Ama, kiani ngini nihiniata ho o Yahudi ma nyawa mata-mata abe yogogere o Susana ma kotaka naa natoo-toomuino la ngini mata-mata ko niolomua de ko niokerua o wange hange ma dekana ngaro o futu, ngaro o wange, ngini nihikokihininga ngohi. De ngohi de ahi duduhunu o ngo-ngofeka mata-mata ngomioo hokogea o wange hange ma dekanino ngaro o futu, de ngaro o wange ma ngomioo ko miolomua de ko miokerua. De o wange hange gea ipaha de ahao ngohi toiki o koano ai ngi duru womadingakoka de towohama titutumu ma oraha wogogeruku ai kaderaka. De nako idadi ngohi tohonenge tomahidiaioka tohonenge!” Hokogea ami demo ami amaika.

Estere 5:1

O wange hange ko yolomua de ko yokerua gea ipaha abe o ngo Estere de o Yahudi ma nyawa o Susana ma kotaka yaniiki ami behehongo itiai de ahao o ngo Estere momahidiai mitutumu o koano ho momahinoauku ami pakeanga abe o koano ngoi fekata dika ka idadi mapake de moiki o koano ai tau ma goronaika la mitutumu. De ma oraha gea ami rokata o Ahasi-weroso wogogeruku ai kaderaka. Ho o ngo Estere moiki ai tau ma goronaika de mogila-gila hiadono mowohamika ai ngoranika abe genangoka una wogogeruku ai kaderaka.

Matiusu 12:40

Abe ma dodihiraino o Yunusu una o nawoko kohaamoko iwilahiroka ho una naga o nawoko ma pokoroka ai dekana ai futu hangeino. De ai futu hange ibooto de ahao iwihihupuoli ai ngango. De hokogenangoo Ngohi o Nyawa ma Ngofaka abe toboa o Horogaka de tauku ahao ahi futu hange dika o tonaka ma goronaka de ahao Ngohi towangoli ahi honengino.”

Matiusu 16:21

De abe ma oraha gea de imahikaino de o Yesusu ma ngoe wahingahu iwinii-niikika abe hokokia ahao idadi Unangika. De gea Una wahingahu onangika wato kiani o Yerusaleeme ma kotaika woiki de genangoka ahao o Yahudi ma nyawa manga balu-baluhu iwihikangela Unangika. Abe to ona manga hidemo Ma Jouiye abe yokokurutiye de abe ona yotobadoto-dotoko o Musa ai Paretaino de manga hibaluhu utuoli naga, masara ona mata-mata ahao iwihikangela de hiadono iwitoma Una. Masara Una wahingahuoo onangika wato ai wange hange dika de womomikoka ai honengino.

Yosua 7:6

De ma oraha yomahiadonino o Isiraele ma nyawa manga ngiino de o Yosua woihene abe idadi kangano de duru wohuha. De ahao una de o Isiraele manga baluhu yoiki Ma Jou o Yawe ai Behehongo ma Petika de genangoka manga pakeanga yakakihi de yomaoku-okutuku de o tonaka ma kafo manga mumukuku la ihitunguu manga hininga ma huha. De yomakokimotumuku o tonakoka Ma Jou o Yawe ai Behehongo ma Peti ma himangoka. De genangoka yomamotumuku ka hiadono yofutu.

Himatoko 3:9

De gea abe Ngohi tohiaturu la ona o Ibilihi ma haeke ma doomuino abe ma oraha naa ona inihikangela, ahao ona gea yoboa nginika de kiani inihoromati nginika. De gea ona abe yoelu-eluku de yomahiromanga ato o Yahudi ma nyawa, masara ona gea ko o Yahudi ma nyawa ma gou-goungua, angamoi o Ibilihi ma haeke ona yanii-niiki. Ho abeika nitotoihene! Ngohi ahao tohiaturu la ona gea ko idadiokaua inihikangela, masara gea ahao yoboa de yomamotumuku nia himangoka, de ma oraha gea ona ihioriki abe ngini gea Ngohi duru tinidora nginika.”

1 Samuele 20:41

Ho ka de o ngofaka gea woiki ai gurutikaka de o Dautu wohupu ai gogogono ma ngiino abe duru imakadateke de o hakaru ma doomu gea. De o Yonatana ai himangoka ma hange o Dautu womaponuku hiadono ai himanga itiki ma tonakuku. De ona yahinooto duru manga dora itagi hiadono manga koongo itifa angamoi kiani yomakitingaka ho yomakokooino yoari-ari de yomahiketehilooa. Ma nako o Yonatana ai huha de o Dautu ai huha ma ka o Dautohi ai hininga duru ihuha.

1 Samuele 25:23

Ka de o ngo Abi mimake o Dautu de momataiti mouti ami keledaioka de mauku ma tonakuku. De ahao muna duru momaponuku ai himangoka.

1 Samuele 4:12

De ma wange gea naga o Isiraele manga tentara womatengo o Benyamini ma dutuino abe wosobo manga parangi ma ngioka de woara womapopaata de ko wotogu-togumua hiadono womahiadono o Silo ma kotaino. De ngade-ngade womahiadono o kotaino gea de ai pakeanga wakakihoka de duru wokutu ai mumukuku de o tonaka ma kafo la wohitunguu ai hininga duru ihuha.

1 Samuele 4:16

De una o tentara wihingahu unangika wato, “Ahi baluhu, ngohi naa o parangioka de taino. Ngohi naga o parangi ma goronaka duru o wange naa dika de tomapopaata naangino.” De o Eli wileha wato, “Ho o kia idadi genangoka?”