2 Peturusu 3:17 - Ma Jou ai Demo-demo o Totobelohoka

¹⁷ Masara ngini ahi gogianongoru abe ngohi duru tinidora nginika, ngini tinihitiariokau abe ma titi o nyawa manga rerehene ma dodotoko ahao hokokia ihofoko, de naa ngini duru nihiorikoka ma titi ena gea. Ho kiani ngini nimaagoa-goana nia hiningaka, done ahao o nyawa inihiloara abe to ona manga rerehene ma dodotokika, abe ona gea o pareta o kia dika naga ma ko yaniikua de ko yolegaikaua. De done ti ngini nia ngongaku ma bitu-bitumoka de aino inihirehene ma hoanika.

2 Peturusu 3:17 ပူးပေါင်းရင်းမြစ်များ

Sosawaro 1:17

Masara ka de hokogea manga hininga de itigioka to onangoo manga bodito. Ho nako ona yoigo yomahitiari la ufa yobodito, gea kiani yomadotoko o totaleo ma sosawaroino. Abe ka de o totaleo amao o bodito itigioka enangika de imatingaka ho ihohoka ma gurutika ho ko adaenua ma bodito gea.

Matiusu 16:11

Ho gea tanu itararonoka abe kangano ma ragi tafetongo de gea duru ko mangaleua ma titi Ngohi topusingi de o roti! Ho done sarakia hiadono ahi demoino de ngini niataoko ihowono ho niato bote Ngohi topusingi de nanga inomo? Angamoi to Ngohi ahi hiningaka de o inomo duru ko ihihipusingua. Ho naa Ngohi tohigalioli de tinihitiarioli nginika tato kiani nihidodiai o Farisi ma nyawa manga ragi de o Saduki ma nyawa manga ragioo kiani nihidodiai.”

Matiusu 16:6

De ahao o Yesusu wahitiari onangika ma titi o nyawa manga dodotoko wato, “Ngini kiani nihidodiai o Farisi manga doomuino ma nyawa manga ragi de o Saduki manga doomuino ma nyawa manga ragioo kiani nihidodiai.”

Matiusu 7:15

De o Yesusu ka wadotokohi wato, “De ngini kiani nimahidodiai angamoi naga o nyawa utu de ahao yomahingahu nginika ato Ma Jou ai uru ma dodofanga masara ona gea tanu inieluku dika nginika. De ona gea manga hininga ma dumutu la ihibinaaha ti ngini nia ngongaku ma titi manga ngeluku ma demoino. De nako ngini ko nihidodiaiua niatailako manga wowango, gea ona ka idadi inibudi angamoi yomadokangeluku abe hoka o nyawa abe manga hininga ma dodipokouku ho gea manga demoka de yabole-bole o nyawaika. De ona gea ka idadi tahiketero abe ona hoka o fuhuku ma kaho duru itotualono abe imahipahitaakauku hoka o domba ma rupa la ato yabudi o nyawaika. Angamoi o domba gea ko itualonua de ko ingamoua o aewani utuika, masara nako o fuhuku ma kaho gea ma dumutu la ihibinaaha de imadoma o domba-domba gea.”

Yohanese 16:4

Ahi demo naa tinihitihiraka la ma oraha mata-mata gea idadi de ka idadi nimahihohininga abe nia kangela gea Ngohi tinihingahuokau. Ma dihira ko tinihingahuahi angamoi Ngohi nagahi nginioka de manga dohata ma dumutu ka Ngohino dika.”

Hidingoto 2:42

De ona gea mata-mata ka ihikaika yaniiki o hidingoto ma nyawa gea manga dodotoko de manga doomu. De abe ma oraha yomatoomuino la yomahohininga ma titi o Yesusu ai badanga womahidoaka ho yomakutuono yolomo, ona mata-mata ka ihikaika naga yaniiki. De nagali abe ona mata-mata yomatoo-toomuino la yomakutuono yomaniata.

Roma 16:18

Angamoi ona gea ngaro yomahingahu ato iwileleani nanga Baluhu idodutu o Kristusika masara tanu to ona manga hininga la yomaleleani to ona dika ma hirete manga hafini. De to ona manga dodotoko ma demo duru inouhu ho duru yososawaro yabudi o nyawaika abe ma titi manga demoino. Ho nako o nyawa ko yahiorikua abe to ona manga hininga ma dumutu ato yabudi, ona gea ka idadi yabudioka manga demo ma nouhino.

1 Korintusu 10:12

Ho onagona dika yomahinganono ona ma hirete dika de ato manga gogao Ma Jouika ko yolage-lageua, ona gea koaho yomahidodiai done yoruba imaketero hoka onangoli ma dihira yahowonoka Ma Jouika.

1 Korintusu 15:58

Ho, ahi gogianongoru abe duru tinidora, mangale ma titi ngone holaku nanga Baluhoka de duru honganono ahao nanga momomiki hamakeoka, gea hiadono naa ngohi tinihigaro. Ngohi tinihigaro tato ngini kiani nimahingutukuku nia ngongakuoka la hiadono genangoka duru ko nilage-lageua. De kiani ka ihikaika nianiiki nanga Baluhu ai karajaanga abe winihitagongoka nginika. Abe ngini nihioriki nia karajaanga gea ko parahajaua angamoi nanga Baluhoka de aino iboa ma karajaanga gea. De nihiorikoo abe nia momomiki ma nganganono, gea o nganganono moi duru ma gou-goungu. Hokogea ahi higaro ma demo nginika.

2 Korintusu 11:3

De ngohi tohawana tato done ahao inibudi o rerehene ma dodotokino abe imaketero hoka duru ma dodihiraka de o Ibilihi ma haeke abe imibudi o ngo Hawa ma titi o dodihaino. De done ahao nia hininga ma dumutu itagi ko iahumokaua o Yesusu Kristusika masara nia hininga idadi hinooto.

Galatia 5:4

De nako nihitaili ka ihikaika nianiiki ma Pareta gea la niato nimahitotiai Ma Jou ai himangoka, genangoka de aino de ngini nimakitingakoka de o Kristusu, angamoi gea nioporetoka Ma Jou ai hidoaka ma owa nginika.

Efesusu 4:14

De hokogea tonahigaro la tato ibootohi homaaduru abe hoka o ngofa-ngofakoli manga hininga abe ona gea imaketero hoka o lulu ho ka ihikaika manga hininga yao aika aino. Abe nako o ngofa-ngofaka, ona gea ngaro ma dihiraino de hadotokokau onangika, masara nako o dodotoko o fara moioli ahao yoihene, de gea hatoli igapanga manga hininga aturuuruoli de aniikoli ma dodotoko ma hungi gea. Ho naa ngohi tonahitiari tato naga o nyawa utu abe yososawaro yodoto-dotoko, masara gea yotobaelu-eluku de manga dodotoko ma rerehene la ato inabudi la onangikali haniiki. Ho ngone naa ufa inabudi de ufa o dodotoko o fara moioli haniiki.

Filiipi 3:2

Ho hokonaa ahi hitiari. Kiani nihidodiai ona abe o nyawa yotobadiai itorou, abe ona ato ngini kiani nimahunakahi de ahao ka idadi winidafongo Ma Jou. Gea ona yoeluku dika, angamoi ko enangua ma titi hiadono Ma Jou wonadafongo.

Kolose 2:5

Angamoi ngaro ngohi naa ahi badanga ko iwa nginioka ma oraha naa, masara to ngohi ahi hininga naga nia hidogoronaka. De ngohi togarago ma titi tamakeoka abe ngini nimaketerimoi de nimahikokaaturu itiai, de abe nia ngongaku o Kristusika duru imahikeketika hiadono ko ikelu-kelua. Ho ahi hiningaka tomatemo tato, iti abe ti ngini nia ngongaku iputurungu o Kristusoka hiadono ko idadiua inihirehene Unangino. Abe hokogea ma titi hiadono naa tinihitiari.

Kolose 2:8

Ahi gogianongoru, ngini kiani nimaagoana done o nyawa abe yotobadotoko o ngelu-ngeluku ma homoa de ona gea ahao initaurino nia hininga de hiadono inihiloara abe to ona manga dodotokika. Abe to ona manga dodotoko gea tanu o nyawaka de aino dika, abe ona o dunia ma biaha yatobadotoko de yomafiki-fikiri hiadono manga hininga ma tobahioriki dika yamake, de genangino yadotoko o nyawaika. Ho manga dodotoko gea duru imakohowono de o Kristusu ai dodotoko.

Ibarani 3:14

Angamoi nako hoka ngini nimahirehene o Kristusoka de aino, gea ngini niwiporetoka Unangika. Masara iti ka ihikaika nia hiningaka imahisoika to ngone nanga ngongaku de nanga nganganono ma lifunika abe ma dihiraino de niihenoka, de ko nimahipipidilua genangino ka hiadono nia wowango ma baha adonoka. De nako hokogea ngone, gea inahitaanoka abe ngone duru hodadioka o Kristusu ai dodiawo ma titi ai kuahaka, abe ahao Una wonahikokodoku to Una ai kuaha ngoneino la ngoneoo naga de nanga kuahaka.

1 Peturusu 5:9

De ngini kiani nibitumoka nia boringongakuoka angamoi genangino de ngini kiani nialawana o Ibilihi ma haekika gea. De ufa niafikiri niato ka ngini dika abe ena gea inihikangela, angamoi hohiorikoka abe nia gogianongoru mata-mataika o dunia ma amokika, onangoo o kangela yaohana abe imaketero hoka nginioli naa niaohana.

2 Peturusu 2:7

Masara ma oraha genangoo de o Loti Ma Jou widuhunu to ona manga hidogoronaino angamoi una gea wototiai Ma Jou ai himangoka. Abe una ai hininga duru ihuhaholi ma titi ma nyawa ma kotaka gea abe ona duru ko yolegaikaua ma paretaika gea masara ona duru ka yanii-niiki dika manga wowango ma datoro ma dorouika.

2 Peturusu 3:1

Ahi gogianongoru abe ngohi duru tinidora nginika. Ngohi ahi hininga ma dumutu naga la tato tinihihohininga nginika ma titi abe nengokadau nimadotokoka. Angamoi ngini niihenoka ma hingahu ma demo ma ngoe, abe naga utu ma hingahu Ma Jou ai uru ma dodofangino iboa, abe ona gea yotebi-tebini to Una ai himangoka. De nagali ma huhuloko ma demo nanga Baluhu idodutu de nanga Duduhunoka, abe nengokadau ai demo gea ngomi ai hidingoto ma nyawa miadofanga nginika. De ma dodotoko gea tato tinihihohininga nginika la ka idadi ma debi-debini niongano-nganono nia kokihiningaka homoi-homoi. De hokogea ahi hininga ma dumutu, ho gea ma titi hiadono ngohi tinihurata ma hinooto ibooto nginika. De ngaro ahi hurata ihira-hiraika nginika abe nengokadau ngini niamakeoka, de ngaro abe ahi hurata naa ena, masara ahi hurata hinootoo naa abe ma goronaka de ahi hininga ma dumutu ka moi dika. De ahi hininga gea la tato tinihihohininga nginika ma titi abe nengokadau nimadotokoka, la ka idadi ma debi-debini niongano-nganono nia kokihiningaka.

Himatoko 2:5

Ho gea tato ngini kiani nimahihohininga abe ngini hokokia nia dora ma dodihiraka de ma oraha naa hokokia ma gurutuku nirubaka. De ngini kiani nitoba genangino de niogilio la nianiikoli nia wowango ma datoro abe hoka ma dodihiraka nia ngongaku ma wowangoka. De masara nako ngini ko nitobaua, gea Ngohi ahao toboa nginika de tagoraka ti ngini nia posi ma liate to ena ma ngiino la gea nia gareja ma doomu ahao ihikapusakoka. De hokogea ahao kiani Ngohi todiai nako hoka ngini ko nitobaua.