“De abe naga utuohi yoihene Ma Jou ai Demo-demo ona gea imaketero hoka o bibiti abe ipuraraha o hihikauku. Abe ngaro yoihenoka masara manga hininga itagi ka o dunia ma kiahonangika dika la ato yowango yososanangi dika. Ho gea yahibudi de o kiahonanga la ato iti yokaya, de gea ka hiadono Ma Jou ai Demo-demo adehoroka de manga horoodo. Ho to ona manga wowango imaketero hoka o datomo abe ko ihofo-hofokua.”
2 Peturusu 1:8 - Ma Jou ai Demo-demo o Totobelohoka8 De hokogea ngini kiani nimahidogo-dogo nia ngongakuika. Angamoi nako gea mata-mata naga idogo-dogo nia wowangoka, gea itararonoka abe duru niwihioriki nanga Baluhu idodutu o Yesusu Kristusika. De mangale ma titi ngini niwihioriki Unangika ho duru iniduhunu hiadono nia boriwowangoka ko parahajaua masara duru itohofoko de ma hofoko ka ma rorahai dika. အခန်းကိုကြည့်ပါ။ |
2 Peturusu 1:8
33 ပူးပေါင်းရင်းမြစ်များ
“De ai dutu woihene ai demoika gea de duru ko wisanangiua ho wipaluhu wato, ‘Duru ani datoro gea itorou! De boteua ani magawe ko iwa to ngohi ahi karajaangika! Ho ngona naa nohitaere ngohino nato tatobaribuutu o nyawaika, e? De ngona nato bote o nyawa manga gugutuku ma hasili de tomahitongohioka dika, de abe ko tokarajaangua gea taribuutu la o nyawa ihihidoaka to ona manga hasilino gea. Ho naa done sarakia hiadono noelu-eluku?
Ho, ahi gogianongoru abe duru tinidora, mangale ma titi ngone holaku nanga Baluhoka de duru honganono ahao nanga momomiki hamakeoka, gea hiadono naa ngohi tinihigaro. Ngohi tinihigaro tato ngini kiani nimahingutukuku nia ngongakuoka la hiadono genangoka duru ko nilage-lageua. De kiani ka ihikaika nianiiki nanga Baluhu ai karajaanga abe winihitagongoka nginika. Abe ngini nihioriki nia karajaanga gea ko parahajaua angamoi nanga Baluhoka de aino iboa ma karajaanga gea. De nihiorikoo abe nia momomiki ma nganganono, gea o nganganono moi duru ma gou-goungu. Hokogea ahi higaro ma demo nginika.
De naa ngohi tinihigaro nginika tato ufa nihitailako to ngohi ahi wowango, masara koaho irahai ngini nimatailakohi ngini ma hirete de nimafikirohi la nihioriki nako niagou-goungu niwingaku o Yesusika eko koua. De ngini nihiorikoka abe nako niwingakuoka Unangika, gea o Yesusu Kristusu womanoa nginioka. Masara nako hoka ko niwingakua gea ahao Una ko iwiwa nginioka. De genangino de ngini ka idadi duru nihioriki abe o Yesusu Kristusu naga womanoa ti ngini nia badanga homoi-homoioka iti nia ngongaku naga Unangika.
De igoungu ona o Makedoniaka ma ngoe yaohana o kangela de ma oraha naa ona duru yodadioka o hu-huha ma nyawa. De ngaro ona manga wowango hokogea masara ona duru yogogarago, de manga hiningaka duru yamagawe la yaduhunu manga gogianongoruika. De barikua ona yohu-huha gea de yatoomuino o duduhunu abe kohaamoko!
Angamoi nginioka de igoungu naga nia boloi duru kohangoe. Abe nia boloi moi gea nia ngongaku naga duru ilamoko, de naga moioli nia tobahioriki Ma Jou ai Demo-demoino enangoo duru ilamoko. Abe gea nia tobahioriki ma demo nia uruino de gea niahitararono ai demo o nyawaika. De ti ngini nia magawe la niato niwihisanangi Ma Jouika, enangoo de ma boloioka. De ngaro nia hininga ma dora abe niamake ngomioka de aino, masara enangoo duru ilamoko nia kokihiningaka. De mangale naga nia boloi duru irupa-rupa nginioka ho ngomi minihigaro la miato utuohi idogo nia hininga ma rorahai hiadono enangoo naga de ma boloioka. Abe ma titi o duduhunu duru ilamoko ngini ka idadi niatoomu la niahidingoto nanga gogianongoruika.
De nia gogianongoru o Yerusaleemoka ahao to ona manga hininga ma dora duru ma amoko itagi nginika. Abe ona ahao ininiata Unangika ma titi ngini, angamoi Ma Jou winipake ngini la wahiowa onangika. Abe Una wohira winihidailako nginika de ahao ipahaino de nginioli niadofanga nia gogianongoruika gea la manga perelu niahingodumu. Ho duru igoungu abe manga hininga ma dora nginika gea ihititi Ma Jou ai hidoakoka abe ma dihiraino de winihidoaka nginika.
De abe hoka kangano totemo tato ngini tinigahoko Ma Jouika, gea tinigahoko hokonaa. Tinigahoko la nginioka nia dora ka idogo-dogo hiadono nia tobahiorikoo idogo ilamoko, abe ma titi ka idogoli niwihioriki Unangika. De nako nia dora gea idogo-dogo, de ahao nia hiakunu moioli naa idogo ilamoko, abe nia hiakunu la o kia dika naga ipuda nia hiningaka ma, Ma Jou ai hininga duru niataana. Ho ma titi hange gea tinigahoko Ma Jouiye la idogo ilamoko nia wowangoka.
De igoungu, ngaro o kia dika naga, ma nako ahi Baluhu idodutu o Yesusu Kristusu duru tihioriki, gea ka enangohi duru de ma utumoka. De o kia dika abe naga utuoli, gea enangoo taetongo ko kia-kiaua. De Una gea ma titi hiadono gea mata-mata abe ahi wowango ma dihira tanoaka, de gea ena tohiromanga ka o wale-wale dika, la ka idadi o Kristusoli tomahitongohi,
Angamoi nako ngini niataoko itiai to Una ai mau nginino, gea ahao ngini niakunu niwango abe hoka itaana nanga Baluhu idodutu ai nyawa yowango. Abe nia wowangoka ka ihikaika naga wamake nia datoro ma rorahai ma hofoko irupa-rupa, de gea nia wowango ka ihikaika niwihisanangi Unangika. De nagali nako niataoko itiai Ma Jou ai mau, ahao utuohi idogo niwihioriki to Una ai hininga.
Abe ngini kiani nimahingutuku Unangoka de kiani ka ihikaika niwango de nioaguru Unangika hiadono nia buturungu ka idogo-dogo nia ngongakuika. Abe gea duru imakadaene de ma dodotoko abe hoka nengokadau inidotokokau. De moioli kiani nidiai, de gea nia hiningaka ma tarimakase kiani naga de ma boloioka hiadono ka ihikaika nitarimakase Ma Jouiye.
De kiani nimahigunoa la o Kristusu ai demo-demo imanoa nia kokihiningaka hiadono duru niongano-nganono ai demo gea. Abe kiani niapake nia tobahioriki ma gahumu ai demoino gea ma oraha nimakodotoko de ma oraha nimahiketehitiari. De abe ma oraha niapake o Higiriiri ma Nyanyianga ma buku abe ma dihira ihitulihukuoka, de o nyanyianga utuoli naga abe niwihigiriiri Ma Jou, gea mata-mata ka idadi ninyanyi la nimahiketehipoputurungu nia ngongakuoka. De abe ninyanyi, gea niwihigiriiri de nia hininga ma tarimakase Unangika.
Ho naa, mia gogianongoru, ngomi minihibehehongo nginika. De gea nengokadau ma oraha ngomi nagahi nginioka de gea minidotokoka nginika abe hokokia kiani niwango la niwihisanangi Ma Jouika. De igoungu nengokadauinohi ngini naa nianiiki mia demo gea hiadono Unangika niwihisanangi. De masara naa ngomi duru minihigaro de minihibehehongo nginika ma titi nanga gogao nanga Baluhu idodutu o Yesusika, de gea minihibehehongo la ngini ka idogo-dogoli abe nianiiki mia dodotoko ma demo gea hiadono utuohi niwihisanangi Unangika ma titi nia wowango ma datorino.
Mia gogianongoru, ngomi nenangoka ka ihikaika mitarimakase Ma Jouiye ma titi ngini, angamoi gea miihenoka abe ngini nia ngongaku Unangika ka idogo-dogo de nagali nia doraoo ma idogo hiadono ngini duru nimakodora. Ho gea ma titi nia ngongaku de nia dora gea hiadono ngomi miato duru itaana abe miato kiani ngomi naa mitarimakase Unangiye ma titi ngini.
De naga ma titi utuohi hiadono ngohi ko toigoua ma titi ami romanga gea itulihuku ma bukuku gea abe kangano tafetongoka abe ma dola o bao-bao manga roma-romanga. Abe ahao done ami karajaanga ko molegaikakaua de moiki motulu-tulu de mahiade-ade o nyawa utuika. Abe muna matobahiade-ade o nyawa utu manga wowango. De done hokogea ahao mahowono Ma Jouika ma titi ami uruoka.
De igoungu ahi behehongo gea ma dumutu ngonaika la tato naduhunu yahinooto gea, masara tanu irahai tahidumutoo nanga gogianongoruika mata-mataika abe genangoka o Kereta ma nuuhoka yogoo-gogere. De onangoo gea koaho yomadoto-dotokohi abe hokokia yaduhunu o nyawaika hiadono ona gea ka idadi yakunu yotobadiai abe ma rorahai. De nako ahao naga idadi ma kangela o kia dika abe ahao naga yadaene o nyawaika abe ka hiadono manga perelu o nyawa utu duru ko iwa hiadono yohuha, gea de ahao nanga gogianongoru genangoka ka idadi yaduhunu onangika de manga perelu yahidailako angamoi gea ma dodihirainohi de ona yomadotokoka de yakunoka yotobadiai abe ma rorahai. De nako hokogea yodiai, gea yomahitaana abe manga wowango gea duru ko parahajaua.
De ahi olo, tonigahoko Ma Jouika la Una woniduhunu la ani tobahioriki ka idogoli hiadono ka nohioriki Ma Jou ai owa mata-mata abe wonahidoakoka ngone hingaku-ngakuino. De tonigahokoo la ani tobahioriki gea idadi ma titi hiadono ani gogao ani gogianongoruika nohiputurungu hiadono ngini nimakao hatoli irahaioli. Abe nako ngini nimakao irahai hokogea, ahao ihiboa o higiriiri o Kristusiye.
Ho ngohi toigo la ufa initebeturu masara koaho inimagawe, de gea ngohi toigo la nimaaduru abe hoka onangoli yamakeoka ma utumu Ma Jouino, abe manga utumu gea imaketero hoka ma dihiraino wahibehehongoka onangika. De ona gea yamake ma utumu Unangino ma titi manga ngongaku de manga dongohono abe Unangika.
Ahi gogianongoru, abeika hokokia ma amoko Ma Jou ai hidoaka ma owa ngoneuku. Abe Una wonahidoakoka ngoneino mata-mataika abe hoperelu la howango ka hiado-adonika, de ngaro abe nanga hiakunu hokokia la howango itiai to Una ai himangoka, ma enangoo gea mata-mataika wonahidoakoka. De gea mata-mata wonahidoaka ma titi to Una ma hirete ai kuahaino, angamoi ka Una dika Ma Jou, ho Ma Jou ai kuaha gea imanoa ka Unangoka dika. De abe nanga wowango ka hiado-adonika de nanga hiakunu la howango itiai, gea mata-mata hamakeoka mangale ma titi abe ngone hihioriki Unangika. Abe Una gea wonaahoko Unangino ma titi to Una ma hirete ai medebini ma dararono de ai hiningaoo duru irorahai dika.
De gea igoungu ma dihiraino ona yomulaenge yomatingaka o dunia naa ma pese-pesekoka de aino, de gea ma titi abe ona ihioriki abe nako o Yesusu Kristusu Una gea nanga Baluhu idodutu de nanga Duduhunu. Masara gea ipahaino de ahao yogilio de yaniikoli o dunia ma pese-pesekika hiadono ena gea yadehoro de yahikala onangika ho ena gea dika yanii-niiki. Ho nako ona ma dihiraino manga hininga abe ko iwihiorikuahi nanga Baluhika de abe manga hininga ma oraha naa naga, masara ka ma oraha nenangohi de duru manga hininga itorou.
Masara koaho ngini ka ihikaika nioaguru nia ngongakuika la to Una ai owa utuohi ma amoko niamao nia kokihiningaka. De koaho ka ihikaika idogo-dogo nia tobahioriki la utuohi itararono niwihioriki o Yesusu Kristusika, abe Una gea nanga Baluhu idodutu de nanga Duduhunoo. Ho naa ngone ngaro ka hihigiriirioka Unangika ma oraha naa naga de ka hiado-adonika. Amin.
ကြော်ငြာတွေ