2 Peturusu 1:7 - Ma Jou ai Demo-demo o Totobelohoka

⁷ De gea ngaro nia hiningaka imakiniikoka de to Ma Jouoli ai hininga, ma gea ka nimahidogohi abe nimakodora nia gogianongoru o Yesusoka abe imaketero hoka o ria-dodoto o tau moioka yomakodora. De ngaro nia dora itagioka nia gogianongoruika, masara kiani ka nimahidogohi la o nyawa mata-mataika niadora.

2 Peturusu 1:7 ပူးပေါင်းရင်းမြစ်များ

Roma 12:10

De kiani nimakodora de nia hininga ma gahumu abe hoka itiai o ria-dodoto o tau moioka yomakodora. De kiani ngini duru nimaketehoromati la hiadono ko ti nginiua ma hirete nia perelu nihitihira masara nia gogianongoru manga perelu enangohi niolegaika.

Galatia 6:10

Ho ahao nako naga ma oraha la ka idadi haduhunu o nyawaika, gea ma oraha ma getongo kiani hale de hapake la o nyawa mata-mataika haduhunu. De hongoli nako nanga gogianongoruika abe ngone o ngongaku moi, abe onangika kiani duru inamagawe haduhunu.

Kolose 3:14

De gea mata-mata kiani nidiai, masara kiani duru nihitihira o dora. Abe kiani o dora nimahinoauku hiadono nimakodora, angamoi duru o dora gea ena abe inihiketerimoi la hiadono nia rimoi gea duru ihingodu-ngodumoka.

1 Tesalonika 3:12

De gea minigahokoo la ahao nanga Baluhu winiduhunu nginika la nia dora ka idogo-dogo hiadono duru ilamoko de gea hiadono ngini duru nimakodora de o nyawa utuikaoo ma niadora. De gea ahao nia dora ka imakadaene dika de to ngomioo mia dora nginika, abe gea mia dora enangoo duru ilamoko nginika.

1 Tesalonika 5:15

De nako hiadono nia gogianongoru utu abe yahowono nia gogianongoru utuika, de ona gea kiani duru niagoana done yomahibalaha de ma dorou manga gogianongoruika. De gea ufa hiadono idadi hokogea nginioka, masara ngini kiani ka ihikaika nihitaili la ma rorahai dika nidiai nia gogianongoruika de o nyawa utu mata-mataikaoo.

Ibarani 13:1

De naa, ahi gogianongoru, ngini kiani nigila-gilahi nimakodora abe hoka itiai o gogianongoru o ngongaku moioka yomakodora.

1 Peturusu 1:22

De mangale ma titi naga nia hingounu ma gou-goungika abe o Abari ma Rorahaiika hiadono ti ngini nia wowango ihitebinoka genangino. Ho mangale nia wowango itebinoka ho ngini ka niakunu nimakodora ngini o gogianongoruoka abe de nia dora ma gahumu dika. Ho naa tinihuloko nginika tato ngini kiani duru nimakodora de nia hininga ma gahumu abe nia hininga ma debi-debinoka de aino.

1 Peturusu 2:17

Ho nako ngini niwango hoka Ma Jou dika ai gogilaongo, gea kiani nia wowango hokonaa. Abe ngini kiani naga nia horomati o nyawa mata-mataika, De kiani nimakodora nia gogianongoru o ngongakuoka, De kiani nia horomati naga duru kohaamoko Ma Jouika, De ngaro ma kokoano o duniaka masara kiani onangikaoo niahoromati.

1 Peturusu 3:8

De naa ahi behehongo moiokahi abe tinihibehehongo ma titi nia gogao nia gogianongoruoka. De gea ngini mata-mata kiani nimahiketehiningamoi, de nako naga nia gianongoru abe yamao yohuha manga hiningaka eko yogarago, masara nginioo nia hiningaka de hoka niamao abe imaketero hoka to onangoli manga hiningaka. De kiani ngini nimakodora nia gogianongoruoka abe de nia hininga ma mobole de ma dodipokouku.

1 Yohanese 3:14

De nako ngone naa, ngone hohiorikoka abe Una wonagorakoka o hone-honenge ma kuahaino de wonahigogeroli o wowango ma ngango ma kuahakali. De gea ka idadi hohioriki mangale ma titi ngone homakodora nanga gogianongoru o ngongakuoka. De nako o nyawa ko iwa manga dora manga hiningaka, ona gea ka yomanoahi o hone-honenge ma kuaha ma goronakahi.

1 Yohanese 3:16

De abeika ngone homafikirohi o Kristusu ai hininga ma dora abe wonahimatokoka ngoneino. De abe ma dihiraino to Una ai wowango womahidoaka la ngone naa wonaduhunu, de duru to Una ai datorino gea de ngone hamake o dora ma gou-goungu. Ho gea nako to Una ai dora ma gou-goungu imanoa ngoneoka, gea tanu ngone ka idadi homahigunoa la to ngoneoo nanga wowango homahidoaka la hato nanga gogianongoru haduhunu abe homahingongaku moioka.

1 Yohanese 4:21

Ho ngone naa ufa hawohanga to Una ai behehongo ngoneino abe ma dihiraino wonahibehehongoka wato, “De onagona dika iwidora Ma Jouika, ona gea kiani manga gogianongoruikaoo yadora.” Ho gea kiani ngone homakodora de nanga gogianongoru.