2 Korintusu 8:3 - Ma Jou ai Demo-demo o Totobelohoka

^3-5 Abe ma dihiraino gea de ma duduhunu ko yatoomuahi de ona yoihene ma titi manga gogianongoru o ngongakuoka o Yerusaleemoka naga manga perelu. De nagali abe yoihene o gogianongoru utu nagau manga hidee la o duduhunu yahidingoto o Yerusaleemika. De gea ko o ribuutuinoua hiadono yamao kiani ihidoaka. Hokogenangua, masara gea to ona ma hirete manga mauoka de aino la hiadono yoigo ihidoaka ma duduhunu gea manga gogianongoruika. Ho ona o Makedoniaka duru yogaho-gahoko ngomino la ato onangoo ka idadi yaduhunu manga ria-dodoto o ngongakuoka o Yerusaleemika. Angamoi ona yamao nako ka idadi yaduhunu manga gogianongoruika, manga hidoakino gea de yamao abe ona ma hirete yamakeoka o garago de o hiowa moi duru ilamoko Ma Jouino. De abe ma oraha yomulaenge yatoomuino o duduhunu de manga datoro gea duru manga hininga ma rorahaioka dika de aino. Angamoi ona gea ka ihidoakua dika manga duduhunu, masara ona duru ihitihira Ma Jou ai mau manga hiningaka. Abe ona yomadingaka Ma Jouika la Una dika wahihira-hira de wahidailako. De ahao ona ihioriki abe ngohi o Paulusu de ahi dodiawo naga mia hininga la miaduhunu nanga gogianongoruika gea, ho ona yomahidoaka ngominoo la ato yoigo yanii-niiki to ngomioo mia hininga. De naa ngohi tagou-goungu tinihingahu abe ona ihidoaka ko ma hohutulua dika abe hoka honganono o hu-huha ma nyawaino, masara duru utuohi iwoe abe ona ihidoaka. Ho ngaro ma titi manga tiwino de ngaro manga hiningaino, masara nanga gogianongoru gea o Makedoniaka duru ifoloiholi ma owa yodiai ho hiadono yatilakuroka to ngomi naa mia nganganono onangika. Ho ngomi miato ona manga hininga gea duru irahai! De hokogea mia hingahu abe hokokia Ma Jou wapake nanga gogianongoru o Makedonia ma gogarejaka la yaduhunu nanga gogianongoru utuoli abe o Yerusaleeme ma kotaka yogogere.

2 Korintusu 8:3 ပူးပေါင်းရင်းမြစ်များ

1 Tawari 29:9

De o Isiraele ma nyawa manga hidoaka Ma Jou o Yaweika gea duru ihititi manga garagoka de aino. Ona ka de yoihene abe ma titi manga hidoaka hokogea ma amoko de ma ngoe de duru yososanangi de manga higiriiri duru ilamoko. De manga koano o Dautu unangoo ai higiriiri duru ilamoko abe wodogarago ai nyawa manga hininga ma dumutu Ma Jouika.

Huhupu 35:29

Hokogea o Isiraele ma nyawa o nauru de o ngofeka manga hidoaka yao Ma Jou o Yaweino de manga balaha ko yomahinganonua angamoi manga hidoaka gea manga igoka dika de aino. Ona duru yoigo yokarajaanga mata-mata gea Ma Jou o Yawe wahibehehongoka abe o Musa wadofanga onangika Ma Jou ai hingahu o Isiraele ma nyawa mata-mataika.

Huhupu 35:5

Abe ngone mata-mata ka idadi wapake nanga hidoakino ho gea ti ngini nia kiahonangino ka idadi nimahidiai nia hidoaka Ma Jou o Yaweika. Onagona dika abe de manga hininga ma igoka de aino ka idadi manga hidoaka o gurasi ma dutu, de o haaka ma dutu, de o tabaaga ihisapuroka de o hori.

Maruku 14:8

O ngofeka naa modiaioka abe gea makunu modiai, abe mohituagioka ahi badangino. Ngaro ko ihilungunuahi masara muna moboa la mato ahi badanga mohidiaioka abe hoka imakiniiki de to ngone nanga biaha ma titi o honenge.

Hidingoto 11:29

Ho mangale ma titi ai hingahu gea ho ona iwingaku-ngaku o Antiokia ma kotaka yomaputuhu la ato yahidingoto o dora ma hidoaka manga gogianongoru o ngongakuoka abe o Yudea ma tonakoka yogogere. De ona homoi-homoi yahidoaka onangika abe hokokia imakiniiki de manga borigogakunu.

Roma 10:2

De gea ngohi duru tahioriki abe ona manga hiningaka de duru yamagawe la ato iwihisanangi Ma Jouika hiadono manga howono ka idadi waofi. Masara ngaro ona naga de manga magaweoka ma manga hininga gea ko imakiniikua de ma dodotoko ma gou-goungu.

1 Korintusu 16:2

Abe hokonaa nidiai. O Gareja ma wange ma getongo de kiani ngini homoi-homoi nia tiwi o hidoku moi niatingakika de nihidoaka o garejaika. De ma hidoku moi gea ka idadi imakiniiki de gea abe ngini homoi-homoi niamakeoka Ma Jouoka de aino abe o wange tumidi ipopaha gea. Abe nako ilamoko niamake, gea ka idadi nia hidoku hatoli ilamokoli abe nihidoaka. Masara abe nako ma hohutulu dika niamake, gea de ahao hatoli ihutulu abe niahidoaka. De hokogea tinihibehehongo la tato ufa hiadono ngohi tomahiadonoka nginino de ahao kiani ma duduhunu gea niatoomu. Koaho ngohi ko toboauahi de gea nimahidiaioka.

1 Korintusu 9:17

De nako hoka ma dihira ngohi ma hirete tomaputuhu tato o Abari ma Rorahai tahingahu-ngahu o nyawaika, gea de ahao itiai o hidailako tamake o nyawaino. Masara hokogenangua idadi. Ma dihira gea Ma Jou wohiiriki ngohi de wohihitagongo ngohino la wato ai Abari ma Rorahai tahingahu-ngahu. Ho gea ko to ngohiua ahi ngiriki, masara Una wohiiriki ngohi.

Galatia 4:15

Abe ma oraha gea ngohi duru tohioriki abe ngini nia hininga duru de ma garagoka ngohino de hiadono ti ngini nia magawe naga la niato nihiduhunu. De nako hoka ka idadi ngini nia lako ma gomono niahuputu de nihihidoaka ngohino la niato nihiduhunu ngohi, de gea ngohi duru tohioriki abe ngini hokogea nidiaioka ma oraha gea. Ho naa mode nia hininga ma garago gea o kiaikaka? De bote naga ma titi o kia hiadono nia hininga ngohino yaturuuruoka?

Filiipi 2:13

Abe ngini ka niakunu Ma Jou ai mau nianiiki mangale ma titi Una ma hirete wokarajaanga nia kokihiningaka la hiadono nioigo nianiiki ai mau. De Una wokarajaanga nia kokibadangokaoo la nia buturungu naga. Ho ma titi duru Ma Jouoka de aino hiadono ka idadi niakunu Ma Jou niwihisanangi.

Kolose 4:13

De ngohi ma hirete tihioriki to Epafras ai datoro ho naa tinihingahu nginika abe una gea duru de ai magaweoka wokarajaanga la wato winiduhunu ngini. Abe gea winiduhunu ngini o Koloseoka de onangoo nanga gogianongoru abe o Laodikia ma kotaka de onangoo abe o Hirapolis ma kotaka yogogere, ho gea ngini mata-mataika o Epafras winikokiduhunu nginika.

1 Tesalonika 2:8

De gea ngomi mia dora nginika hokogea ma amoko hiadono ngomi duru misanangi minihikodoku nginika Ma Jou ai Abari ma Rorahai de to ngomi ma hirete mia wowangoo. Abe gea ma titi duru minidora nginika ho miato ka idadi mia wowangoo mimahidoaka nginika la ka idadi minihiutumu nia wowangoika.

Filemono 1:14

Tanu hokogea todiai, masara ngohi tato ufa hiadono ko tonilehauahi ani hininga de ka todiai. Masara ngohi duru toigo la ani datoro ma rorahai gea ngonaka de aino nomaputuhu done nato ka ngohioka de aino toniribuutu.

1 Peturusu 4:11

De abe ma titi nia hiakunu gea abe Ma Jou winihiakunoka nginika, ngini utu winihiakunu la nitobadotoko o doomu ma himangoka. Ho ngini abe hokogea winihiakunu, gea tinihuloko tato ngini kiani nihidodiai la Ma Jou ai Demo-demo duru nianiiki itiai abe ti ngini nia dodotoko ma demo ma goronaka. De abe ngini utuoli winihiakunu la nitobaleleani eko nitobaduhunu nia gogianongoru utuika, de ngini gea kiani nia tagongo nidiai irahai la nia gogianongoru yamake ma utumu nia hiakunino gea. Abe ngini kiani nidiai nia tagongo de Ma Jou ai buturungino, angamoi tanu ti ngini nia buturungu gea ka Unangino dika winihidailako. De nako nia borihiakunu niao itiai abe imakiniiki de Ma Jou ai hininga nginika, gea de ahao nia datoro mata-mata itagi irahai ti ngini nia doomu ma goronaka. De mangale ma titi mata-mata itagi irahai ho hiadono o nyawa iwihigiriiri Ma Jouika. De abe ma titi ti ngini nia higiriiri Ma Jouika, gea hohioriki abe ihititi o Yesusu Kristusoka angamoi ma titi to Una ai duduhunu nia gareja ma doomuoka hiadono niwihigiriiri ai Baba Ma Jouika. De gea itiai hihigiriiri Ma Jouika angamoi ka Una dika abe duru de ai medebini ma dararonoka de ai kuaha duru kohaamoko. De gea imanoa ka Unangoka dika ka hiadono ma oraha naa de ka hiado-adonika. De ai medebini gea ma titi hiadono itiai ngone mata-mata hihigiriiri Unangika. Amin. Ho naa ngohi duru tinihigaro nginika la nia borihiakunu niao itiai la ka idadi nihiboa o higiriiri Ma Jouika.

1 Peturusu 5:2

Ho naa ngohi tinihigaro ngini o gareja ma hihiraika la ngini niagoana de niapaliara Ma Jou ai nyawa abe naga nia doomuoka. Abe onangika niao imaketero abe hoka ngini o domba ma gogoana de ona gea yodadi nia domba ma duduono. De abe niatobahiaturu onangika, gea nia tagongo ufa niaetongo niato o hiribuutuino hiadono gea ngini nidiai, masara koaho ngini nia hiningaka de duru niomagawe nia tagongika gea. Angamoi nako naga nia hininga ma magawe enangika, gea nianiiki Ma Jou ai mau nginika. De ufa nia tagongo nidiai ma titi nia gaji ma tiwi niohafini genangino, masara koaho gea nidiai angamoi doka nia hiningaka de nimatemo niato, “Ngohi naa duru toigo la tileleani dika Ma Jouika.”