2 Kokoano 4:13 - Ma Jou ai Demo-demo o Totobelohoka

¹³ Ho muna moboaiye de o Elisa wihuloko ai duduhunu o Gehasika wato, “Ngona nomihingahu abe muna duru mimisanangi de ami leleani ngomino abe muna duru momihitihira ngomi de mia perelu.” Ho manga tarimakase ma demo gea o Gehasi womihingahu munangika. De ahao o Elisa wato, “Naa nomileha munangika abe hokokia mia balaha ngomioo la ka idadi mimiduhunu muna. Nomileha nako moigo tomidemo de ami gogahoko o koanoika eko o tentara ma hidimonika.” De muna mopaluhu o Elisaika, mato, “Ahi baluhu, ngaro ufa hokogea, abe ona ahi tauoka duru ihiao irahai.” Hokogea yomakoketemo ibooto de muna mosobo la ka idadi o Elisa de o Gehasi yomahiaini.

2 Kokoano 4:13 ပူးပေါင်းရင်းမြစ်များ

Dodadi 14:24

Hokogea ahi behehongo ma demo Ma Jou o Yaweika ho, tarimakase o Sodomo ma Koano, masara abe ngohi todafongo ngonaino gea ma inomo dika abe ahi nyawa yaolomokau. De togahoko la ahi dodiawo yahange abe ihiniiki de ihiduhunu, abe o Mamere, o Eskolo, de o Anere, iti ona naa tagahoko la nahikodoku itiai onangika ma kiahonangino naa.” Hokogea o Abaraama ai demo o Sodomo manga koanoika.

1 Kokoano 2:32

De ngohi tigahoko Ma Jouika la Una wihohowono o Yoabika abe duru imakataana de ai datoro ma dihiraino gea. Abe wahohonenge o nauru yahinooto abe nako ona de una de ka onangohi manga hininga de manga datoro itiai Ma Jou ai himangoka. De gea o Yoaba wihohonenge o Nere ai ngofaka o Abanera abe una wodadi o Isiraele manga tentara ma nyawa manga hidimono wokokurutiye. De nagali wihohonenge o Yetere ai ngofaka o Amasa abe una wodadi o Yehuda ma nyawa manga tentara ma hidimono. De abe ma oraha wahohonenge ona yahinooto de gea womatohiki wodiai angamoi ahi baba o Dautu duru ko wihiorikua ma titi o Yoaba ai hidee ma dorou gea.

2 Kokoano 4:12

De witemo ai duduhunu o Gehasika, wato, “Nouti nomihingahu nanga dodiawo abe muna o Suneme ma nyawa nato ngohi toigo la mimakoketemo.”

2 Kokoano 4:14

Muna mosoboka de ahao o Elisa wileha o Gehasika wato, “Ho sarakia ngona, naga moi abe nato ka idadi homiduhunu?” De una wopaluhu wato, “Abeika, muna ko iwa ami ngofaka de ami rokata una duru iwiperekioka.” Hokogea dika wihingahu o Elisaika.

Higiriiri 37:3

Kiani nimahinganono Ma Jou o Yaweika de nidiai ma rorahai, La gea niwango nisosanangi de nia gogere iriidi nia tonakoka,

Roma 16:2

De ngohi togahoko nginika la nimidafongo muna gea abe hokokia itiai nanga Baluhu ai nyawa yomakadafongo. De togahokoo la ngini nimiduhunu de ami perelu abe o kia dika naga, angamoi munangoo nengokadauino de maduhunoka o nyawa yowoe-woeika. De ngaro ngohi naa ma hirete masara ngohioo mohiduhunoka. Ho ngohi duru togahoko nginika la nimidafongo irahai nanga gianongoru o ngo Febe.

Roma 16:6

De ahi tabea o ngo Mariaika tohidingoto, abe muna gea tomihioriki duru mokarajaanga nginioka la minihiutumu nginika ma titi ami karajaangino.

Ibarani 13:5

De ti ngini nia wowango ma goronaka de ufa niohafini o tiwika, masara koaho ngaro ti ngini nia kiahonanga iwoe eko ngaro hatoli ihutulu, ma koaho niriidi dika nia hiningaka. De gea ka idadi ngini niriidi angamoi ma dodihiraino de Ma Jou Una ma hirete wonahibehehongoka ngoneino wato, “Ngohi naa duru ko toninoaikaua ka hiado-adonika, masara Ngohi duru ka ihikaika ngonaka la tonigoana.” Hokogea ai behehongo ma demo abe ma dodihiraino ihitulihukuoka.

Ibarani 6:10

De gea ma rorahai ahao niamake Unangino angamoi hohioriki Una gea duru itiai dika ai putuhu abe ma oraha waurusu o nyawaika. Ho mangale to Una ai putuhu ka itiai dika, ho Una duru ko wawohangua nia datoro ma rorahai, masara ahao ngini niamake nia utumu genangino. Abe ti ngini nia karajaanga abe nidiaioka Unangika de abe nia dora Unangika itagioka ma titi niatobaleleani nia gogianongoruika ma dihirainohi ka hiadono ma oraha naa naga. De gea nia datoro mata-mata duru ko wawohangua, masara ahao nia utumu Unangino niamake abe ma titi nia datorino gea.