2 Kokoano 17:27 - Ma Jou ai Demo-demo o Totobelohoka

²⁷ De ma hingahu gea wodafongo ho wahibehehongo ai popareta ma nyawaika wato, “Ngini kiani niwilingiri o Isiraele ma nyawa una gea Ma Jou ai hidemo ma nyawa womatengo abe ma dihira wogogere o Samaria ma kotaka. Ho ka de niwimake de ahao niwihigilio o Isiraele ma tonakika. De ngohi ahao tihikarajaanga unangika la ona abe naa ma duru tahigogere genangoka, ahao onangika wadotoko Ma Jou ai hiaturu abe ilaku ma tonakoka gea, de ena gea abe ahao kiani wahitararono onangika.” Hokogea o Asuru ma nyawa manga koano ai hiaturu ma behehongo.

2 Kokoano 17:27 ပူးပေါင်းရင်းမြစ်များ

1 Kokoano 12:31

De o Yerobeama wodiai o huhuba ma tau ma ngoe o kiaka naga o tonaka itoporoniye abe o nyawa biaha yomahuba-huba o popangaoika genangoka. De naga o nyawa abe wahidadi manga hidemo abe yoleleani manga popangaoika. De ngaro ma dihira Ma Jou wahibehehongo wato abe manga hidemo kiani o Lewi ma nyawaino masara o Yerobeama wairiki manga hidemo abe ona ko o Lewi ma nyawainoua.

1 Kokoano 13:2

De Ma Jou ai uru ma dodofanga abe woboaino de duru de ai ilingi ma amokiye Ma Jou o Yawe ai hohowono ma demo wohidemo, wato, “Nototoihene ngona, o huhuba ma ngi, naa totemo ngona o huhuba ma ngiika abe Ma Jou o Yawe ai hohowono ma demo ma dumutu inidaene! Una wato ahao o ngofaka o nauru womaboa ai romanga o Yosia de una gea o Dautu ai toforauku. De o Yosia gea una ahao wahihuba ani lokuoka ona abe yatobaleleani o popangaoika. Abe ona gea yodiai de ihigoko o popangao ma ngi o kiaka dika naga o tonaka itoporoniye. Ona gea abe yoleleani o popangao wahidadi ai huhuba abe womahihuba ani lokuoka. De to ona manga kobo-kobongo abe ma dihiraino yoleleani o popangaoika manga kobo-kobongo gea wakokitufuku to ngona ani lokuoka.” Hokogea Ma Jou o Yawe ai hohowono ma demo o haro-harongo ma huhuba ma ngiika.

2 Kokoano 17:26

Ho ahao o nyawa genangoka yomaketeade-ade ma titi ma boki gea ho ipahaino de naga o hingahu iboa o Asuru ma nyawa manga koanoino. De ma hingahu hokonaa itemo, “Mia koano kiani nohioriki ma titi o nyawa gea abe ngona nahigogere o Isiraele ma nyawa manga kota-kotaka ko ihiorikuahi abe ona ahao hokokia yomahuba itiai Ma Jouika abe wahipareta o tonakoka gea. Ho Una Ma Jou gea wohiboa o boki o singa ma ago-agomo la yahibinaaha angamoi ona yomahuba Unangika ihowono.” Hokogea ma hingahu abe iboa o Asuru ma koanoino.

2 Kokoano 17:28

Ho naga Ma Jou ai hidemo ma nyawa womatengo abe unangoo iwihihupu o Samaria ma kotaino de naa una abe o Asuru manga koano wihuloko wolio o Betele ma kotaika. De genangoka una wadotoko onangika la ka idadi yomahuba itiai Ma Jou o Yaweika.

2 Tawari 11:15

De o Yerobeama una ai kokawaaha manga hidemo wairiki o nyawa biahaino de ona gea wahidadi o hidemo manga popangaoika abe yoleleani o popangao ma huhuba ma ngi-ngioka. De ona yomahuba-huba o popangaoika abe o Yerobeama wodiai abe ma rupa hoka o kabingi de o hapi ma ngofaka.