2 Kokoano 13:20 - Ma Jou ai Demo-demo o Totobelohoka

^20-21 De ahao o Elisa wohonenge de o Isiraele ma nyawa iwilungunu de ai lungunu gea hoka o aruku. De ipaha naga o heheranga idadi o Elisa ai lungunoka gea. De hokonaa ma ade-ade. O tao-taongiye abe ma oraha o maata ipaha de ahao imulaengoli ihiwara de gea o Moaba ma nyawa ona yoboa o Isiraele ma nyawa manga tonakino yangohama la manga kiahonanga yaora. De ma moiuku adonoka ma oraha o Moaba ma nyawa yahikangela hokogea de naga o Isiraele ma nyawa ma nauru wohonengoka. De ahao ai dodiawo yamuruono naga iwiao ai honenge ma lungunika abe imakitingaka ko ikurutikaua de o Elisa ai lungunu ma ngi. De ona abe iwiao manga dodiawo ai honenge ihira yoboa o Elisa ai lungunu ma ngiino masara ko yomahiadonuahi manga dodiawo ai lungunu ma ngiika. De abeika! Ona yamake o Moaba ma nyawa yoboaino o doomu moi abe yotobaora-ora. De angamoi duru yamodongo onangika ho hiadono duru yomataiti manga dodiawo ai honenge gea yaumo dika o Elisa ai lungunu ma goronaika de ona yomataiti yoara. Masara ka de o nauru ai honenge adaene o Elisa ai kobo-kobonguku o aruku ma goronaka gea de ka itodokanino o nauru ai honenge gea wowangokali hiadono una womapaatiye de womaokoino! Hokogea o Elisa ai heheranga ma baha ma ade-ade.

2 Kokoano 13:20 ပူးပေါင်းရင်းမြစ်များ

Dodadi 48:1

De ipaha o wange moiuku naga iwihingahu o Yusupika ato, “Marai ani baba ai buturungu ihihanga hoka iwigogama.” Ho ka de woihene hokogea de o Yusupu woiki ai baba witutumu de ai ngofakoo o Manase de o Efaraimi onangoo wao.

Dodadi 49:33

Hokogea o Yakubu wahibehehongo onangika ibooto de ahao ai lou wagoraka de wakelengali ai koiuku de womarubaiha ai koioka. Ka de womaiduokali hokogea de ai ngomaha itoaka ho Ma Jou wahidotoomuino ai totoforaka manga jiwa ma ngioka abe ona yododihiraika yohonenge.

2 Kokoano 24:2

De ahao Ma Jou o Yawe wahidingoto o Yehuda ma nyawa manga musu la yoiki o Yehuda ma tonakika de duru yahikala onangika la ihibinaaha ma tonakika gea. De manga musu abe wahidingoto naga manga dodoomu manga ngoe abe yoiki o Yehuda ma tonakika la o Isiraele ma nyawa manga kiahonanga yaora. Abe ona naga yoboa o Babele ma tonakino, de o Arama ma tonakino, de o Moaba ma tonakino, de o Amono ma nyawa manga tonakino. De ona mata-mata gea manga dumutu moi dika de gea la o Yehuda ma nyawa manga tonaka gea duru yahikala de yahibinaaha imaketero abe hoka ma dihiraino Ma Jou o Yawe ai uru ma dodofanga yahingahuokau o Isiraele ma nyawaika abe wahingahu ahao naga ma oraha abe ahao idadi hokogea onangika.

2 Kokoano 3:5

De ipahaino abe ma oraha o Isiraele manga koano o Ahaba wohonengoka de ahao o Mesa una womaputuhu wato wawohanga dika manga behehongo gea. Ho womulaenge wilawana o Isiraele manga koano ma hungi o Yorama abe ko wahidingotokaua manga bobangu o dombaino gea.

2 Kokoano 3:7

De ahao una wahidingoto ai demo o Yehuda manga koano o Yosafatika, de ai demoino gea una wato, “O Moaba manga koano una wawohangika mia behehongo de wohilawana ngohino. Ho naa tomagahoko la ngona nohiniiki de homakuduhunu haparangi o Moaba ma nyawaika.” De o Yosafata una wipaluhu wato, “Ka idadi toniniiki la ngone de ona homarihimanga. De ahi tentara ma nyawa de ahi kuda, gea mata-mata tonihidoaka ani giama ma hoatika la nahiaturu o parangi ma goronaka.

2 Kokoano 5:2

De o Naamana ai tauoka naga momatengo o ngofeka o moholehe abe o Isiraele ma nyawa. De hokonaa to muna ami ade-ade. Ma dihira naga o Arama ma tentara o doomu moi yowohama o Isiraele ma tonakika de yomagora manga kiahonanga de naga manga nyawa yamuruono naga abe yataoko de yao o Arama ma tonakika. De o moholehe naa abe ma dihira yataokino de imihidoaka o Naamana ngoi fekatika la momihidadi ami gilaongo.

2 Kokoano 6:23

Ho o Isiraele ma nyawa manga koano wahidiai abe hoka o rame-rame ma ngolo-ngolomo ma amoko. Ho o Arama ma nyawa manga tentara gea yolomo de yokere hiadono yakokipunuhoka de ahao o koano gea wahibehehongo la ona gea yolio to ona manga koanoika, de ona mata-mata yokokilio. De hokogea mata-mataika idadioka abe o Arama manga tentara ko yohonengua. Ho mangale ma titi gea hiadono ona de manga koano yamaleke de yotoba. De yomahitaana abe yotobaka angamoi ko yangohamokaua yahikangela o Isiraele ma nyawaika.

Hihira 3:12

Ho manga hihira Ma Jouino gea wohonengoka de ahao o Isiraele ma nyawa yomulaengoli yodiai itorou Ma Jou o Yawe ai himangoka ho wahohowonoli. De angamoi yotobadiaioli itorou ho Ma Jou o Yawe wihiputurungu o Moaba ma nyawa manga koano o Egono hiadono unangoli wapareta o Isiraele ma nyawaika.