1 Yohanese 4:17 - Ma Jou ai Demo-demo o Totobelohoka

¹⁷ De mangale ma titi abe to ngone nanga wowango ma datoro o duniaka naa de gea imakiniiki de to Kristusoli ai wowango ma datoro ma dihiraino, ho genangino de ka idadi hotemo hato to Una ai dora duru ingodumoka abe to ngone nanga hiningaka. Ho ma titi ai dora ingodu-ngodumoka ngoneoka ho ahao ma wange adonoka abe Una wonatailako nanga datoro de gea ko hohawanua. De ma wange gea ngone naga de nanga domoroinoka ma titi ai dora imanoa ngoneoka.

1 Yohanese 4:17 ပူးပေါင်းရင်းမြစ်များ

Matiusu 10:15

De naa tagou-goungu tinihingahu abe ahao dokengika ma oraha Ma Jou watailako de wahohowono o nyawa, ahao ona gea manga hohowono duru kohadubuho. Abe ngaro o Sodomo de o Gomora ma nyawa abe manga datoro duru itorou, masara ka onangohi abe iniolu-oluku nginika manga hohowono duru itubuho onangika.”

Matiusu 11:22

Ho naa ngini tinihingahuohi abe ahao dokengika o hohowono ma wangeoka de nako ngini de ona abe o Tirusu de o Sidonoka, ma ka ti nginiohi nia hohowono duru itubuho nginika ma titi ko nitobaua.”

Matiusu 11:24

Ho naa tinihingahuohi ngini o Kapenaumu ma nyawaika abe ahao dokengika o hohowono ma wangeoka de nako ngini de ona abe wahibobinaahaka o Sodomoka, ma ka ti nginiohi nia hohowono duru itubuho ma titi ngini ko nitobaua ma oraha niamake ahi heheranga abe todiaioka nginioka.”

Matiusu 12:36

“De naa tinihingahuohi nginika abe ahao dokengika ma oraha Una winitailako ti ngini homoi-homoi nia wowango, de ma wangeoka gea kiani nimahitararono Unangika ma titi nia demo mata-mata abe ka nifeto-feto dika ma oraha nia wowangoino naa de nitemo-temo.

Yohanese 15:20

Ho ufa niawohanga ahi demo nginika abe tato, nako o huhuloko de o huhuloko ai dutu, ko idadiua o huhuloko gea wato ka unangohi wokurutiye. De naga ahi demo moioli abe ma titi nako Ngohi todadioka ti ngini nia Baluhu de o kangela ihidaene, ufa niafikiri nginika ko inidaenua, angamoi nginioo ahao inihikangela. Abe nako naga o nyawa ko ihihigihenua Ngohi, gea ti nginioo nia demo ko ihigihenua.

Yohanese 17:22

“De ahi medebini ma dararono tahidoakoka ihingaku-ngakuika abe duru imakadaene hoka nengokadau ani medebini ma dararono Ngona nohihidoakino Ngohino. Gea onangika tahidoaka la onangoo yodadi moi imaketero hoka Ngona de Ngohi ka ma dodihirainohi de hodadi moi.

Roma 8:29

De abe Ma Jou ai hininga ma dumutu ma titi ngone, gea woigo wato ngone homoi-homoi nanga hiningaka de hodadioka abe duru homaketero hoka to Una ai Ngofakoli o Yesusu ai hininga. De nako Ma Jou, Una ma dodihirainohi de wonahiorikokau abe ngone onagona honanga ahao hodadi to Una ai nyawa. Ho ngone abe wonahiorikoka abe ahao hodadi to Una ai nyawa, ngone naa wonaahoko Unangino. De ngone ko ma titiua wonaahoko dika, masara Unangoo wonaetongo ngoneino wato hototiai ai himangoka. De ka hokogenangua dika, masara nagahi abe wonahibehehongoka ngoneino wato ahao to Una ai medebini ma dararono wonahikokodoku ngone homoi-homoiino la ngone ahao hodadi homaketero abe hoka ai Ngofakoli. Ho gea mata-mata Ma Jou wonahidiai ngoneino angamoi imakiniiki de ai hininga ma dumutu la wato ngoneoo abe hodadioka to Una ai ngofa-ngofaka, gea ngone ahao duru homaketero de o Yesusoli. Abe o Yesusu Una gea wodadi hoka Ma Jou ai Ngofaka duru ma riaka, de ngoneoli naa hodadi hoka to Una ai doo-dodoto duru ko nanga ngoe. Ho gea ma titi hiadono Ma Jou wohiaturu mata-mataika la gea imakiniiki de to Una ai hininga ma dumutu ma titi ngone ai ngofa-ngofaka. Ho ahi demoino gea de duru ka idadi hohioriki abe ngaro ma oraha naa naga inahikangela masara hohiorikoo abe ahao dokengika de to Una ai medebini ma dararono wonahikokodoku ngoneino.

Ibarani 9:27

De ngone hohioriki abe ngone o nyawa homoi-homoi nako nanga bobaha o duniaka adonoka de gea kiani hohonengoka. Masara gea ma moi dika hohonenge, de ipaha ahao Ma Jou wonatailako de wonaurusu ma titi nanga wowango homoi-homoiino.

Yakobusu 2:13

Angamoi nako o nyawa ko yapakeua manga hininga ma doraino ho gea ena ko itagiua o nyawa utuika, gea ahao nako ona manga baha adonoka de to Unangoo ai hininga ma dora ko wapakeua ma oraha waurusu onangika. Masara o nyawa onagona dika abe manga wowango ma goronaka de manga hininga ma dora itobatagi o nyawa utuika, ona gea yomahitaanoka abe yomahiketehiningamoioka ona de Ma Jou, ho ahao manga baha adonoka de ona duru yogarago angamoi genangoka de to Ma Jouoli ai hininga ma dora wapake ma oraha Una watailako manga wowangoika.

Yakobusu 2:22

Ho to Abarahaama ai ade-adeino gea de ka idadi hohioriki abe to una ai ngongaku de ai datoro gea ko imakitingakua masara duru imakiniiki, abe una ai datoro wodiai ma titi wingaku Ma Jouika, de nagali abe ai ngongaku idadi ingodumu Ma Jouika ma titi ai datorino.

2 Peturusu 2:9

Ho nako ngone hongano-nganono ma ade-ade gea abe hokokia ma titi nanga Baluhu idodutu waduhunu o Nuhi de o Loti o hohowono ma goronaka de aino, ho gea itararonoka abe ngaro ma oraha naa ma ka wakunohi Una wonaduhunu abe ngone hingaku-ngakuoka ma oraha o kangela haohana. De naga moioli abe ka idadi hamake itararono to ona gea manga ade-adeino, de gea ma titi abe Ma Jou Unangoo ka wakunu wahiaturu o nyawa utu abe ko yototiaiua la ufa hiadono manga hohowono ko amakeua. Masara gea nako o hohowono ma wange adonoka de ahao kiani Una wahohowono onangika gea.

2 Peturusu 3:7

De naa abeika homafikirohi abe ma titi hokokia hiadono o dunia naa ka itagiohi de ko ikiliangua. De nako o dunia ma oraha naa de ma dihangoo, ena gea mata-mataika ma oraha naa de Ma Jou ka wapaliarohi ma titi to Una ai demoino dika. De gea ka wapaliarohi hiadono ai hohowono ma wange adonoka, de genangoka de ahao gea mata-mata wohikokibinaaha de o uku. De ma wange gea enangoo abe Ma Jou wahibinaaha o nyawa iwilawa-lawana Unangika. De ma wange gea de ko o akerinoua Ma Jou wapake la wahibinaaha o duniaika, masara gea de wapake o ukuino. Ho ngaro abe o dunia naa wohidadi eko wapaliara, eko ngaro hiadono Una ahao wohikokibinaaha enangika, masara gea mata-mataika Una wodiai ma titi to Una ai Demo ma kuahaino dika. Masara ona abe ahao yamia-mia Ma Jou ai nyawaika de ai gaheika, ona gea ka yoluku yafikiri ma titi mata-mata gea.

1 Yohanese 2:28

De naa, ahi ngofa-ngofaka o ngongakuoka, ngohi tinihigaro nginika tato ngini ka ihikaika nimanoa o Kristusoka dika. De gea nako Unangoka dika ngini nimanoa, ahao ma oraha Una woboali o duniauku naa de gea ngaro ufa ngini inimaleke to Una ai himangoka masara ka idadi nia hininga de ma domoroini abe ma oraha niwimake Unangika.

1 Yohanese 2:5

Masara o nyawa onagona dika abe yanii-niiki to Una ai Demoika, ona gea yagou-goungu iwidora Ma Jouika de manga dora ma gahumu abe imaketero hoka Ma Jouoli wonadora ngoneino de ai hininga ma dora ma gahumu. Ho nako nanga dora ma gahumu itagi Unangika, de ai Demoika ngone hanii-niiki, gea inahitaanoka de ka idadi duru hohioriki abe ngone homanoa Unangoka.

1 Yohanese 2:6

Ho gea nako ngone homahingahu hato homanoa Unangoka, gea ufa ka nanga uruoka dika masara kiani nanga wowango ma dodagioka howango de homaaduru abe imaketero hoka to Kristusoli ai wowango ma dodagioka wowango.

1 Yohanese 3:1

De abeika homafikirohi hokokia ma amoko Ma Jou ai dora ngoneuku! De gea itararono abe Una duru wonadora angamoi abeika Una hiadono wonahiromanga ngoneino wato ngone to Una ai ngofa-ngofaka! De gea igoungu abe ngone naa hodadioka ai ngofaka idodutu, ho genangino de ka idadi hohioriki abe to Una ai dora ngoneuku duru ilamoko! De masara nako o dunia ma nyawa, ona gea ko inahiorikua abe ngone to Una ai ngofa-ngofaka. De ufa ngone hoheranga ma titi gea, angamoi ngaro Ma Jou ma ona ko iwihiorikua Unangikaoo. Ho tanu ngaro ufa hoheranga abe ngoneoo ona ko inahiorikua ma titi Unangoka de aino hoboa.

1 Yohanese 3:3

De onagona dika abe ma oraha naa yongano-nganono abe ma titi ahao yomahirupa moi de o Kristusu, ona ahao ka ihikaika yomahitebini manga wowangoka la ka idadi yotebi-tebini, angamoi gea ona yoigo ato yomaaduru hoka o Kristusoli abe Una gea duru wotebi-tebini ai hiningaka.

1 Yohanese 3:7

De ahi ngofa-ngofaka o ngongakuoka, ufa nimahigunoa hiadono o nyawa onagona dika de inibudi abe ma titi o howono nanga wowangoka. Angamoi kiani ngone duru hohioriki itararono abe nako o nyawa onagona dika o totiai yanii-niiki manga wowangoka, ona gea yomahitaanoka abe yototiai Ma Jou ai himangoka abe hoka o Kristusoli Unangoo duru wototiai.

1 Yohanese 4:12

De nako ngone o nyawaka de naga womatengo abe ko ma moiuahi homakamake de una, gea ko iwahi nanga gogao unangika. Masara nako ngone de Ma Jou, gea imakohowono. Angamoi ngaro ngone o nyawa ko moiua himake de nanga lako, masara Una gea ka idadi womanoa ngoneoka de to Una ai dora enangoo ka idadi imanoa nanga hiningaka de duru ingodumoka. Ho ngone naa koaho homakodora ngone de nanga gogianongoru. Angamoi iti ngone homakodora de ka idadi nanga gogao ma rahai Unangika.