1 Yohanese 3:20 - Ma Jou ai Demo-demo o Totobelohoka

²⁰ Ho ngaro ngone ma moi ma moi homamao nanga hininga ko iriidua abe nagahi nanga howono ho kiani Una wonahohowono ngoneino, masara tanu ai hohowono gea ngoneino waofiokau. De nako to ngone nanga hininga de Ma Jou, ma ka to Unangohi ai tobahioriki duru ilamoko angamoi Una gea duru mata-mataika wohioriki. De gea Una duru ko wawohangua abe nanga hohowono waofioka ho ko inadaenokauali. Ho gea ka idadi ngone honganono abe duru ka to Unangohi ai hininga itaana ho ngaro ufa dika de hopusingohi ma titi nanga hininga gea nanga hohowonika. De gea ena ma titi hiadono to ngone nanga hininga ka idadi iriidi dika to Una ai himangoka de ko iwa nanga hawana.

1 Yohanese 3:20 ပူးပေါင်းရင်းမြစ်များ

Yohanese 21:17

Ma ka de wihulokoli hokogea de o Yesusu wilehali o Peturusika wato, “Simono, to Yohanese ai ngofaka, ngona nagoungu nohidora Ngohi?” De o Peturusu naa ai hininga duru ihuhaka ma titi naa ma hangeou o Yesusu wileha wato, “Igoungu ngona nohidora Ngohi?” Ho o Peturusu wopaluhu o Yesusika wato, “Ahi Baluhu ko iwa moi la Ngona ko nohiorikua, ho ka Ngonahi nohioriki abe tagoungu tonidora.” De o Yesusu wihibehehongoli wato, “Ngona kiani ahi domba natofo.”

Yohanese 8:9

Masara ka de o Yesusu ai demo gea yoihene, gea de ka dau yomulaenge yokokiloiki. De o nau-nauru gea utu yaperekioka ona gea yohira yoiki de utu yototuruika ho hiadono yomamataka, homoi-homoi yoiki yomahikabarihi. Ho jai-jai dika de o Yesusokahi naga genangoka de o ngofeka imitao-taokino gea, ho onangokahi dika genangoka.

Hidingoto 5:33

De manga demo gea ma hihira ma doomu yoihene de duru yongamo hiadono yomaputuhu ato kiani yahohonenge o hidingoto ma nyawaika.

1 Korintusu 4:4

Abe ngohi ahi hiningaka, ngaro tonganono, ma ko tamakeua abe ihihohowono. De masara ngaro hokogea tomahingahu, ma ngohi ko totemoua tato ko iwa ahi howono, angamoi ka Ma Jou ma hirete dika abe wakunu wonatailako ngoneino de waputuhu duru itiai ma titi nanga tagongino hodiai itiai eko koua.

Titusu 3:11

Angamoi nako hokogea manga hininga de manga demo, gea ka idadi nahioriki de duru itararonoka abe ona gea yomahirehenoka ma gou-goungino. De gea ngaro manga wowango ma datoroka ma ona yomahitaana abe yahowo-howono Ma Jouika. Ho gea duru itiai nahitogumu onagona dika nginioka abe hokogea manga hininga. Hokogea ahi hitiari ma demo ngonaika.

Ibarani 4:13

De gea moioo de ko iwa abe to Una ai dulaadoka de ka akunu imagogono la ufa wamake. Masara gea duru mata-mataika imatawangeika dika la Ma Jou ai lako ka yobawilika enangika. Ho Unangika ahao ngone kiani homoi-homoi homahitararono abe ma titi nanga hininga ma datoro mata-mataika. Ho igoungu kiani ngone hohidodiai hanii-niiki ai hingahu ma demoika abe Unangoka de aino iboa.

Ibarani 6:13

De gea ena ka idadi hohioriki abe Ma Jou ai behehongo ngoneino gea duru ko waturuurua, angamoi abeika nanga tofora o Abarahaama ai ade-ade homahihohininga. Abe ma oraha gea de Ma Jou wihibehehongo moi o Abarahaamika de gea wohikoboto de to Una ma hirete ai romanga. Angamoi nako Ma Jou de utu mata-mataika, de gea ka Unangohi ai romanga duru ikurutiye, ho ma oraha wohibehehongo de gea to Una ma hirete ai romanga womafetongo, la ka idadi o Abarahaama duru wohioriki abe ahao kiani idadi unangika abe imaketero hoka wihibehehongoka.

1 Yohanese 3:19

De nako ngone homahitaana nanga wowango ma datorino abe hagou-goungu homakodora ngone de nanga gogianongoru, gea ka idadi hohioriki abe ma gou-goungoka ngone homanoa. De mangale ma titi ngone homanoa ma gou-goungoka, ho gea ka idadi nanga hininga iriidi to Ma Jou ai himangoka.

1 Yohanese 3:21

De ahi gogianongoru abe duru tinidora nginika, naa ngohi tonahigaro tato nako to ngone nanga hiningaka de ko hohawanokaua ma titi ai hohowono ahao inadaene ngoneino, gea ka idadi homahitigi Ma Jouika abe ma oraha homaniata de gea ka idadi nanga hininga de ma domoroini.

1 Yohanese 4:4

Masara nako ngini naa, ahi ngofa-ngofaka, ngini nidadioka to Ma Jou ai nyawa, ho tanu niahikalaka ona gea abe yodoto-dotoko o ngelu-ngelukino. De gea ngini nilaku ma titi nako Una abe womanoa ngoneoka de ena gea abe imanoa o dunia ma nyawaka, masara duru ka Unangohi ai kuaha ilamoko, de Una dika abe winihiakunu nginika la ka idadi ngini nilaku.

Himatoko 2:23

De o ngo Isebele gea ami nyawa abe iminii-niiki, ona ahao tahibinaahaka de o hohonenge. De ahi hohowono gea ona yamakeoka de ahao o gareja ma doomu mata-mataika duru ihioriki abe Ngohi duru tatailako o nyawa manga hininga ma dolaka de manga hidee hokokia manga hininga ma goronaka, de gea ahao tahibalaha onangika abe hokokia imakiniiki de manga hininga gea. Ho o gareja ma doomu mata-mata ka idadi duru ihioriki abe ngaro nginioo, ma gea ngini homoi-homoi tohibalaha nginika abe hoka duru imakiniiki de ti ngini homoi-homoiika nia wowango ma datoro hokokia.”