1 Yohanese 2:14 - Ma Jou ai Demo-demo o Totobelohoka

¹⁴ De ngini to ngohi ahi ngofa-ngofaka o ngongakuoka, mangale ngini niwihiorikoka nanga Babaika ho ngohi ahi demo tohidumutu nginika. De abe ngini o balu-baluhu, mangale niwihioriki Unangika gea abe ka ma dodihirainohi de Una nagau ho ngohi tohidumutu ahi demo nginika. De abe ngini hatoli ka o goohi, mangale naga nia buturungu Unangoka de abe Ma Jou ai Demo-demo imanoa nia kokihiningaka, de abe nihikalaka enangika abe duru ma datoro itobatorou, de gea mata-mata ma titi hiadono ngohi ahi demo tohidumutu nginika.

1 Yohanese 2:14 ပူးပေါင်းရင်းမြစ်များ

Yohanese 15:7

“Ma nako ka ihikaika nia gogere Ngohioka gea niogoana, de ahi demo-demo ka ihikaika imanoa nginioka, de ahao ngaro o kia dika nimagahoko o Babaiye gea ahao wodiai.

Yohanese 5:38

De to Una ai demo genangoo ko niodafongua ho hiadono to Una ai demo-demo ko imanoaua ti ngini nia hiningaka angamoi ko ningakua abe wohihidingotino Ngohi naa.

Yohanese 8:31

Ho o Yahudi ma nyawa abe iwingaku-ngakuika gea o Yesusu wahingahuoli onangika wato, “Nako ahi dodotoko ka ihikaika ngini nimadoihene la nia wowango niao itiai, gea nimahitaana nidadioka nihinii-niiki igou-goungu.

Yohanese 8:37

“Ngini naa tinihioriki abe igoungu ngini to Abarahaama ai totoforauku. Ma ngaro hokogea, masara abeika, nimahidiaioka la niato Ngohi nihitoma! Ngini ko nianiikua abe tinidotokoka ho nihihidee dika niato nihitoma.

Efesusu 6:10

De naa ahi gogianongoru, ahi dodotoko moiokahi naa abe ahi huratoka tato tinihingahu nginika. De gea ngini kiani ka ihikaika nimahiputurungu nanga Baluhu idodutuika de to Una ai kuahaino abe duru kohabuturungu ai kuaha gea.

Filiipi 4:13

De ma titi o kia hiadono ka idadi toriidi? Ngohi ka tapoa toriidi angamoi ma buturungu o Kristusoka de aino wohihidoaka. Ho ngaro o kia dika naga iboa ngohino, ma, ngohi ka tapoa tolaku angamoi naga ngohioka ma buturungu gea abe Una wohihidoaka ngohino.

Kolose 1:11

De minigahokoo Ma Jouiye, la Una duru winihiputurungu hiadono nia buturungu ingodumu. De nia buturungu gea ma titi o kia? Gea ma buturungu iboa to Una ai kuahaka de aino, abe ai kuaha gea duru kohaamoko hiadono ko iwa ma bobaha. Ho nako ai kuahaino gea de winihiputurungu, gea de ahao nia buturungu duru ingodumu. De nako nia buturungu ingodumoka, ahao ngaro o kangela o kia dika ngini niaohana ma, nia ngongaku ko idomo-domoua de ka idadi nimatongohono de gea nia hininga ka igaragohi.

Kolose 3:16

De kiani nimahigunoa la o Kristusu ai demo-demo imanoa nia kokihiningaka hiadono duru niongano-nganono ai demo gea. Abe kiani niapake nia tobahioriki ma gahumu ai demoino gea ma oraha nimakodotoko de ma oraha nimahiketehitiari. De abe ma oraha niapake o Higiriiri ma Nyanyianga ma buku abe ma dihira ihitulihukuoka, de o nyanyianga utuoli naga abe niwihigiriiri Ma Jou, gea mata-mata ka idadi ninyanyi la nimahiketehipoputurungu nia ngongakuoka. De abe ninyanyi, gea niwihigiriiri de nia hininga ma tarimakase Unangika.

2 Timotiusu 2:1

Ho naa ahi ngofaka, ngohi duru toigo la ngona ufa nomaaduru abe hoka onangoli yorehe-rehenoka gea, masara kiani nomaaduru abe hoka ngomioli abe ko mirehe-rehenua ma gou-goungino. De gea kiani ani hininga ma buturungu namake ka nanga Baluhino dika la wonihiputurungu hiadono inimagawe nileleani Unangika. De gea ai buturungu ka wonahidoaka dika ngoneino ma titi nanga gogere o Yesusu Kristusoka.

Ibarani 8:10

De ahao ka wogila-gilahi wotemo wato, “Ho ngona naa Ngohi ani Baluhu idodutu tonihingahu ngonaika abe ahao ma oraha dokengika de o behehongo ma hungioli tahidoaka o Isiraele ma nyawa mata-mataika. De hokonaa abe ahi behehongo ma hungi ma demo ahao tahidoaka onangika. Ahao to Ngohi ahi pareta tohingohama to ona manga hininga homoi-homoi ma goronaika la enangika gea duru yongano-nganono, de gea ngade-ngade imaketero hoka ahi pareta gea tohitulihika to ona manga hiningaika. De ma oraha gea ona ahao duru yagou-goungu yomahuba-huba Ngohi manga Jouino, de gea Ngohi duru tafetongo onangika tato to Ngohi ahi nyawa tatobapaliara.

1 Yohanese 1:1

De ngohi tinihurata nginika ma titi o Yesusu Kristusu, abe Una gea iwihiromanga Unangika o Hingahu ma Demo ma dutu, de abe Unangoka o wowango ma ngango ma titi. De Una gea ngaro ai dulaada naa ko idadiuahi masara Una nagau. De ipahaino de ahao ngomi naa abe wiwinii-niiki, ngomi ma hirete miihene de miamake ma Hingahu ma Demo gea. Abe ma titi ngomi mitotoihene to Una ai ilingi ma demoino, de ngomi wiwilega-lega Unangika de to ngomi ma hirete mia lako hinooto, de nagali wiwiso to Una ai badangika de to ngomi mia giama.

1 Yohanese 1:10

De nako ngone homahingahu hato ngone ko hahowonua, gea imaketero abe hoka hihiromanga Ma Jouika hato Una woelu-eluku, angamoi ma dihiraino de Una wonahingahuoka abe ngone hahowonoka Unangika. Ho nako nanga hiningaka hokogea itagi, gea inahitaanoka abe to Una ai Demo-demo duru ko imanoaua to ngone nanga hiningaka.

1 Yohanese 2:13

De abe ngini o balu-baluhu, ngohi ahi demo tohidumutu nginika mangale ngini niwihioriki Unangika abe ka ma dodihirainohi de Una gea nagau. De abe ngini hatoli ka o goohi, ngohi ahi demo tohidumutu nginika ma titi ngini nihikalaka enangika abe duru ma datoro itobalawanika.

2 Yohanese 1:2

De gea ngomi mata-mata minidora nginika mangale ma titi ma dodotoko ma gou-goungu naga imanoa to ngone nanga hiningaka, de gea ka ihikaika imanoa ngoneoka naa de ka hiado-adonika.

3 Yohanese 1:3

De gea tohiorikoka ma titi ani ngongaku ma wowangoino angamoi naa ma duruika nanga gogianongoru yamuruono naga yolioka ngonaka de aino ngohino, de ona homoi-homoi yoade-ade abe ngona duru ma gou-goungoka nomanoa. Ho mangale manga demo gea ho ngohi duru tonidogarago ma titi ngona. De ma dihiraino de ngohi ma hirete tamake de ahi lako abe ngona nanii-niiki ma gou-goungu. Ho gea manga demo imakiniiki abe hoka ngohi ma dihiraino tamake ani wowangoka, abe igoungu ngona duru ma gou-goungika natobaniiki.

Himatoko 2:3

De Ngohi tinihioriki abe ngini naga de nia dongohonoka, angamoi inihikangela nginika ma titi Ngohi, masara ngini ko nirehenua nia ngongakuino.

Himatoko 2:7

“De onagona dika de manga ngaukoka kiani ihigihene Ma Jou o Womaha ai Demo-demoino abe ahao naa niihenoka, abe Una gea ai demo wohidumutu ma gogarejaika.” “De onagona dika yolaku ho ma dorou ko yahikalaua onangika, ona gea tahigunoa la o wowango ma gota ma hofokino ka idadi yaolomo, de ma gota gea naga iwango Ma Jou ai ngi ma hohailoa abe o Horogaka.” Hokogea ma hurata abe o Efesusu ma garejaika.