1 Tesalonika 5:4 - Ma Jou ai Demo-demo o Totobelohoka

⁴ Masara mia gogianongoru, ngini nigogere ko o fufutuokaua, ho nako ahao ai gahe ma wange gea iboa de gea ngini ikuranga initodokana. De abe nako ona ko iwingakuahi o Kristusika, ona gea igoungu ahao ma oraha gea de duru yatodokana abe imaketero hoka o nyawa womatengo wotobatohiki una gea woboainoka de wadohiki. Masara ngini naa nihioriki abe nanga Baluhu wonagaheoka wato ahao woboali, ho nako ahao ma wange gea adonoka abe woboa, ma, ngini ko niherangua de ko niwimodongua.

1 Tesalonika 5:4 ပူးပေါင်းရင်းမြစ်များ

Matiusu 10:15

De naa tagou-goungu tinihingahu abe ahao dokengika ma oraha Ma Jou watailako de wahohowono o nyawa, ahao ona gea manga hohowono duru kohadubuho. Abe ngaro o Sodomo de o Gomora ma nyawa abe manga datoro duru itorou, masara ka onangohi abe iniolu-oluku nginika manga hohowono duru itubuho onangika.”

Lukasa 21:34

“De naa Ngohi tinihitiarioli la ka ihikaika nimagoana done nia hininga irehene Ma Jouoka de aino ma titi o rame-rame ma daluku inihipareta eko o dunia naa ma perelu nihitihira nia wowangoka. Angamoi done Ma Jou ai hohowono ma wange adonoka de ko nimahidiaiua ho duru initodokana nia hiningaka. De ufa hiadono inihidiliko ma hohowonoka angamoi ko nimagoanua ho ko nimahidiaiua ma oraha iboaino ai hohowono. Angamoi ai hohowono gea ahao yakokidaene o nyawa mata-mata o dunia ma lokuoka.

Hidingoto 26:18

la to ona manga hininga ma lako ka idadi ifelenga la ka idadi ihioriki ma gou-goungu. De abe ihiorikoka ma gou-goungu, gea imaketero hoka manga hininga ma fufutu yanoaka la o dararoninoli yoboa, angamoi gea yanoa o Ibilihi ma haeke ma kuaha la yomanoali Ma Jou ai kuaha ma goronaka. De ona gea ahao ka idadi manga howo-howonino aofioka. De gea yodadi Ma Jou ai kokawaaha la manga gogere duru imakadaene dika de to Una ai kokawaaha utu mata-mataika manga gogere. Abe ma hiowa gea mata-mata ahao idadi onangika ma titi abe ihingaku-ngakuoka Ngohino.’ De hokogea ahi Baluhu idodutu o Yesusu ai demo ngohino abe ma dihiraino.”

Higalioli 28:15

De o Musa ai demo ma owa onangika wohibobaha de o hitiari ma demo wato, “Masara nako ngini ko niwihingounua ti ngini nia Jou, Ma Jou o Yawe, de nako ngini ko nihidodiaiua nianiiki itiai ai behehongo mata-mata abe tinihidoaka o wange naa, ngini ahao ma dorou inidaene hiadono inihidatapalu de o hohowono irupa-rupa kohangoe.” Hokogea o Isiraele ma nyawa ko yowohamuahi o behehongo ma tonakika de o Musa duru wahitiari.

Kolose 1:13

Abe igoungu Ma Jou wonahitingakoka nanga boditoino abe iboa o fufutu ma kuahaino, de ahao wonaturuuru ngone de wonahidogogere de to Una ai Ngofaka ai kuahaka, abe ai Ngofaka gea duru Ma Jou widora Unangika.

1 Tesalonika 5:2

Angamoi ngini naa duru nihioriki abe nanga Baluhu ai gahe ma wange gea imaketero hoka womatengo wotobatohiki woboa nanga tauino la inadohiki, abe ngone duru ko hohiorikua o futu o kia ahao una woboaino.

2 Peturusu 3:10

De igoungu Una ma oraha naa ka womatongohonohi, masara ahao nako ai gahe ma wange adonoka de gea kiani woboali. De gea woboa imaketero hoka womatengo wotobatohiki woboa nanga tauino la wonadohiki, abe ngone duru ko hohiorikua o wange o kia ahao una woboaino. De ma oraha gea ahao naga ma koroongo ma ilingi moi duru kohaamokiye de gea ka itodokanino de ma dihanga ka aiaho. De ngaro ma dihanga ma dola mata-mataika ma duru youkuoka hiadono ikokitinoka. De ngaro o dunia naa ena ma enangoo de ma dola mata-mataika ikokibinaahaka ma oraha gea. Ho ngini ufa hiadono ona yotobamia-mia gea inihirehene nia ngongakuino, ma koaho ka ihikaika niangaku to Ma Jou ai Demo-demoika angamoi ma bahauku de kiani idadi imaketero hoka Una wonahibehehongoka.

1 Yohanese 2:8

De ngaro ma behehongo ma demo gea tanu ma dekanoka masara ka idadi tohiromangoo enangika tato hoka ma behehongo ka ma hungiohi, angamoi naa ma duru hamakeoka o Kristusu ai wowango ma goronaka de wonahimatoko ngoneino abe hokokia homakodora. De tohiorikoka abe ngaro ti nginioo nia wowangoka ma idadioka abe nimakodora ngini o gogianongoruoka. Angamoi ma oraha naa de o fufutu ka ihutulu moduku de ma dararono ma gou-goungu gea imulaengoka inahitawange ngoneuku. Ho mangale naa ma duru de ahao o Kristusu ai dora ma gou-goungu imulaenge itagi o dunia ma lokuoka ho hiadono ngohi tohiromanga ma behehongo ma demoika gea, tato ena gea hoka o behehongo ka ma hungiohi.

Himatoko 16:15

De ahao nanga Baluhu idodutu wonahitiari wato, “Abeika nitotoihene! Ngohi ahao ka itodokanino de toboa nginika. De gea toboa imaketero hoka womatengoani wotobatohiki woboa la wato winidohiki, angamoi ngini duru ko nihiorikua o futu o kia ahao toboaino. Ho onagona dika yomagoa-goana de yomahinoaukuoka manga baju, ona gea ahao duru de manga utumoka. Masara nako ona utu abe ko yomahidiaiuahi, done ahao yotagi-tagi ka manga bululunokahi de utu yamake de duru yamaleke ona gea.” Hokogea nanga Baluhu idodutu ai hitiari ma demo.

Himatoko 3:3

Ho naa ngini kiani ka ihikaika nimahihohininga ma titi ma dodotoko ma rorahai abe ma dihiraino ngini niihene de niodafongoka, la genangino de nitoba hiadono ma rorahai gea nianiikoli. De masara nako ngini ko nimomikua nia howo-howonino, gea Ngohi ahao ka itodokanino de toboa nginika la tinihohowono. De gea toboa imaketero hoka womatengoani wotobatohiki woboa winidohiki, angamoi ngini duru ko nihiorikua o futu o kia ahao Ngohi toboaino.”