1 Samuele 26:11 - Ma Jou ai Demo-demo o Totobelohoka11 Masara nako ngohi naa duru toluku tihohonenge unangika. Angamoi Ma Jou o Yawe wiirikoka de wigoraka la wahikoano ai nyawa, ho done sarakia ngohi naa ka idadi tihohonenge? Ko idadiua! Masara abeika hagoraka dika to una ai kuama gea de ai akere ma boto abe ai pea ma datekoka, de ahao homataiti holio dokaika!” အခန်းကိုကြည့်ပါ။ |
1 Samuele 26:11
11 ပူးပေါင်းရင်းမြစ်များ
De abe nako naga o nyawa yodiai itorou nginika, gea ngini ufa nimahibalaha de o dorou onangikali, masara nihidodiai la nia datoro irorahai dika onangika. Abe nako naga ma datoro abe o nyawa mata-mata manga himangoka de yaetongo ato ma datoro gea duru itaana de irorahai, gea ena ma datoro ngini nianiiki.
De ahi gogianongoru abe duru tinidora nginika, ngaro o nyawa inihikangela nginika masara ufa nimahibalaha onangika, ma koaho niwihidoaka Ma Jouika la Una dika ai hohowono o ngamoino itagi onangika. Angamoi ma dodihiraino de naga ihitulihukuoka Ma Jou ai demo abe Una wotemo wato, “Nako o hibalaha, gea to Ngohi naa ahi kuahaka. De Ngohi naa ahao tahibalaha o nyawaika ma titi to ona manga datoro ma dorou.” Hokogea to ngone nanga Baluhu idodutu wotemo.
Abe nako hoka idadi abe womatengo wodiai ma dorou nginika, gea ufa nimahibalaha de ma dorou unangika. De nako hoka naga o nyawa iningelo nginika, gea ko idadiua nimahibalaha de o ngelo onangikali. Ufa hokogea nia hininga, masara koaho niagahoko Ma Jouiye la ona gea ahao yamake ma owa Unangino. Angamoi ma oraha niagahoko Ma Jouiye de gea duru imakiniiki de Ma Jou ai hininga abe ma dodihirainohi. Abe naga to Una ai hininga ma dumutu la wahiowa o nyawa-nyawaika, de woigo la ngone naa hodadi to Una ai hiowa ma ngekomo la ai hiowa gea adaene o nyawa utuika. Ho nako ngini nianiiki to Una ai hininga de ma owa niagahoko ma titi ona abe inihikangela nginika, gea ahao ka idadi ai hiowa itagi onangika. De hongoli nginioo niamake ma hiowa Ma Jouoka de aino angamoi to Una ai mau ngini nianiikoka.
De ngohi naa duru Ma Jou o Yawe ai himangoka de o Saulu ai himangoka, abe Ma Jou wihitunguuoka wihidadi ti ngini nia koano, de naga abe ngohi tinileha ngini mata-mataika. Sarakia, naga o nyawa nginioka abe tinidohiki hiadono nia hapi eko nia keledai tomale? Eko naga nginioka abe niato ngohi tinirusi? Eko naga nginioka abe niato ngohi tiniribuutu de ma dubuho? Eko naga ma oraha tinitailako nia howono de todafongo o hewaino ma tiwi la gea taniiki to ona dika manga mau? Ma oraha naa de ka idadi nihihingahu ngohino ahi howono o kia dika abe niamakeoka de tahowonoka. De ngohi tomahidiaioka la ma howono gea tomangaku de tohitiai ahi howono nginika hiadono nisanangioka.” Hokogea o Samuele ai leleha ona mata-mataika.
Ho ngaro Ma Jou o Yawe wonaboritailako ngona de ngohi, o nauru inahinooto naa, de ahao Una womaputuhu onaguna inahinootoino naa abe una gea wahohowono. Marai Ma Jou o Yawe ahao wonihohowono ngonaika ma titi ani hidee ngohino itorou masara duru ko iwa ma oraha la ngohi tonihikangela ani badangika ngaro ma dihira de ngaro ma oraha nanga himangoka ma ngohi duru toluku tonihikangela.
De o Dautu ai dodiawo ona duru iwitemo iwihihudu-hudu, ato, “Adonoka ma oraha abe ma dihira Ma Jou o Yawe wonihingahu wato, ‘Ngohi ani musu ahao tonihidoaka to ngona ani kuahaika la ka idadi nodiai unangika o kia dika noigo nodiai.’ Hokogea Ma Jou wonihingahuokau de igoungu, idadioka naa duru imaketero hoka Ma Jou wotemoka.” Hokogea iwihingahu de ahao o Dautu duru wohidodiai wigogataheke de o Saulu ai baju ma guru-gurutuku ma barene woluiti ho waoka.
ကြော်ငြာတွေ