1 Peturusu 5:2 - Ma Jou ai Demo-demo o Totobelohoka

² Ho naa ngohi tinihigaro ngini o gareja ma hihiraika la ngini niagoana de niapaliara Ma Jou ai nyawa abe naga nia doomuoka. Abe onangika niao imaketero abe hoka ngini o domba ma gogoana de ona gea yodadi nia domba ma duduono. De abe niatobahiaturu onangika, gea nia tagongo ufa niaetongo niato o hiribuutuino hiadono gea ngini nidiai, masara koaho ngini nia hiningaka de duru niomagawe nia tagongika gea. Angamoi nako naga nia hininga ma magawe enangika, gea nianiiki Ma Jou ai mau nginika. De ufa nia tagongo nidiai ma titi nia gaji ma tiwi niohafini genangino, masara koaho gea nidiai angamoi doka nia hiningaka de nimatemo niato, “Ngohi naa duru toigo la tileleani dika Ma Jouika.”

1 Peturusu 5:2 ပူးပေါင်းရင်းမြစ်များ

Yesaya 40:11

De Una watobapaliara ai nyawaika gea imaketero hoka o domba ma gogoanoli watobagoana ai domba ma duduono. Abe ma domba ma ngofaka wagorakiye de watotiri ai aluino, de ma domba ma mayo Una wahihira-hira ma ngekomino.’”

Yesaya 56:11

De to ona manga horoodo duru ilamoko abe hoka o kaholi ma horoodo, de manga hafini ko itoa-toakua. De onangoo tahiketero hoka o domba ma gogoana abe manga sosawaro duru ko iwa hiadono ona homoi-homoi manga mau yahitihira, ho yomalingiri manga boriutumu homoi-homoiika.

Yesaya 6:8

De ahao ngohi toihene nanga Baluhu idodutu woleha wato, “Onagona ka idadi Ngohi tohidingoto? De done onagona yodadi to Ngomi mia hidingoto ma nyawa la mia demo yatotaka?” De ai leleha gea toihene ho ngohi topaluhu tato, “Ngohi naga. Ka idadi Ngona nohihidingoto ngohi!”

Yeremia 6:13

De Ma Jou wotemohi wato, “Abe to Ngohi ahi nyawa o Yerusaleeme ma kotaka naa ngaro o nyawa biaha de ka hiadono ona yokokurutiye masara mata-mataika yomalingiri manga utumu abe ka ihikaika yatobaelu-eluku de yatobarusi-rusi o nyawaika. De ahi uru ma dodofanga de ona abe o nyawa yahidemo Ngohino onangoo yotobaelu-eluku!

Lukasa 12:32

“De igoungu abe ngini Ma Jou ai nyawa ko niwoeua de nia kuaha hatoli ko iwa. Masara ufa nihawana, angamoi ti ngini nia Baba duru wosanangi dika winigorakiye la nidadi to Una ma hirete ai nyawa hiadono Una winihikoano nginika.”

Hidingoto 20:29

De kiani niagoana irahai angamoi ngohi duru tohioriki abe tosoboka de ahao naga o nyawa abe o rerehene ma dodotoko yotobadotoko. Abe ahao ona yoboa ti ngini nia doomuino de yahirehene nia gogianongoru utu manga ngongakuoka de aino. De ona gea tahiketero de o fuhuku ma kaho abe duru itualono de gea yatobatoma o domba.

Hidingoto 21:13

De o Paulusu womipaluhu wato, “Done adodoa ho ngini hokonaa niari-ari? Angamoi nia koongoino de duru nihihitubuho ahi hininga! Abe ngohi tanu tomahidiaioka la o Yerusaleemoka de ihibuika, de hongoli ka idadi ona ihitomaka, iti tohiboa o higiriiri nanga Baluhu o Yesusu ai romangika!”

Roma 1:15

De ena gea ma titi hiadono ngohi naa duru toigo la o Abari ma Rorahai tinihingahu-ngahu nginiokaoo abe o Roma ma kotaka.

1 Korintusu 9:7

Abeika naa tinileha. Sarakia, nako naga womatengo womahingohama o tentaraika la una de ai dodiawo yaparangi manga musuika, sarakia, una gea kiani to una ma hirete ai tiwi wapake la ai baju de ai inomo womahiija? Ko hokogenangua! Eko hokonaa. Sarakia, naga womatengo wotobaredi-redi abe ai angguru ma redi wodatomoka, de ipaha ahao ai angguru ma hofoko ko idadiua waolomo genangino? Ko iwa moi idadi hokogea! Eko hokonaa. Bote naga o domba ma gogoana abe o wange-wangeiye wogoana ma domba, masara ko idadiua ma domba ma huhu ma teongo waokere? Duru ko iwa hokogea!

1 Timotiusu 3:3

De ufa wotobaokere o daluku eko wotobangamo masara kiani waabole-bole o nyawaika de ai hininga iriidi. De ufa wohafini o tiwi.

1 Timotiusu 3:8

De o gareja ma duduhunu, onangoo ma kiani o nyawa utu yahayanga onangika abe imaketero hoka o gareja ma hihirali o nyawa yahayanga onangika. Ho o gareja ma duduhunu gea, kiani manga wowango itotiai. Ufa ona yomahihawo-hawo dika de manga ngeluku ma demo, de ufa o nyawa abe o angguru ma gohaka ma teongo ifoloiholi yokere, de ufa ona abe yosanangi yarusi o nyawaika la hiadono manga tiwi yomamake genangino.

Titusu 1:11

De naa tonihibehehongo tato ona gea ufa nahigunoa la yadotoko o nyawaika, angamoi mangale ma titi manga dodotoko ma demoino hiadono o nyawa manga ngoe manga tau yahikapusakoka hiadono manga tau ma goronaka ona mata-mata iwiporetoka o Yesusika. Abe ona manga tau ma goronaka de manga hininga yomangali ma gou-goungino de yaniikoli abe ona gea yotobadotoko manga demo ma homoa. De tanu duru ko itiaiua manga demo gea abe yadotoko o nyawaika. De ona gea bote ma titi o kia naga manga hiningaka hiadono o rerehene yodoto-dotoko? Gea la ka idadi manga tiwi yomamake abe ona yototoihenino. De gea abe yomatiwi-tiwi manga dodotokino, gea manga datoro moi duru ka o himaleke dika ma datoro yodiai.

Titusu 1:7

Abe una gea kiani o nyawa abe ai wowangoka ko iwa ai datoro ma dorou, ho o nyawa utu duru ko idadiua iwitae unangika, angamoi una gea Ma Jou wihitagongika la wato una gea watobagoa-goana ai gogianongoru o garejaka. De nako naga womatengo nato nigoraka la una ahao wodadi watobagoa-goana o garejaka, ho una gea iti ufa hiadono womahitobakurutiye eko wotobatualono eko womatobadaluku eko watobapoha o nyawaika ma titi ai ngamo. De iti ufa womatengoani abe wosanangi o nyawaika warusi la hiadono ai tiwi womamake genangino. Ko idadiua ai wowango ma datoro hokogea.

Titusu 2:14

Abe Una gea womahidoaka la ka idadi wonahihohe nanga howono ma kuahaino de wonahitebini nanga wowango. De ai datorino gea de wonatingaka Unangino la hiadono hodadi to Una ma hirete ai nyawa, de Una woigo wato ngone duru inamagawe hotobadiai ma rorahai dika. Ho mangale ma titi ai hininga ma owa gea ngoneino ho hiadono ngone mata-mata kiani nanga wowango hao itiai ma oraha naa de ka hiadono nanga Baluhu ai gahe ma wange adonoka.

Titusu 3:1

De naa, ahi gianongoru o Titusu, naa tonihibehehongoli ngonaika tato kiani ka ihikaika nahihohininga nanga gogianongoruika genangoka. De gea nahihohininga la kiani naga manga hingounu o poparetaika de onangikaoo abe manga gogere ikurutiye la hiadono manga huhuloko ma demo o nyawaika yatobaniiki. De gea nahihohiningaoo la ona ka ihikaika yomahidiaioka la nako naga ma oraha abe ka idadi yodiai ma rorahai, gea kiani yodiai de ufa hiadono yokapaanga de ko yodiaiua.

Filemono 1:14

Tanu hokogea todiai, masara ngohi tato ufa hiadono ko tonilehauahi ani hininga de ka todiai. Masara ngohi duru toigo la ani datoro ma rorahai gea ngonaka de aino nomaputuhu done nato ka ngohioka de aino toniribuutu.

Ibarani 12:15

De ngini kiani nimakokelega ti ngini mata-mata nia perelu nia boringongakuoka homoi-homoioka, de nimahiketehitiari done utu nginioka yorehenoka nia ngongakuino. Abe done naga utu abe yorehene hiadono manga hiningaka yomaputuhu la ato ko iwiniikokaua Ma Jou de gea ahao to Una ai hiowaikaoo, ma enangoo ma yaolukoka. De gea done hiadono to ona manga hininga gea imahora-hora ngini utuikali hiadono ko nia ngoe inihirehenoka nginioo.

2 Peturusu 2:3

De abe ma titi ona yotobadoto-dotoko ko itiaiua, mangale ona gea duru yohafini o tiwika, ho ona gea ahao inirusi-rusi ngini ma titi manga dodotoko ma demoino la gea yomatiwi-tiwi dika nginioka. De gea manga demo ka yofeto-feto dika, de ko iwa ma titi genangino. Masara duru ma deka-dekanuku de Ma Jou waputuhokau abe ahao hokokia yamake manga hohowono, de manga bobinaaha gea ko wawohangua masara ka itigi moduku. Ho ngini ufa niahigihene onangika gea.