1 Peturusu 5:1 - Ma Jou ai Demo-demo o Totobelohoka1 De naa ahi higaro ma demo naga abe ma dumutu ngini o gareja ma hihiraika. De nako ngohi naa, ngohioo o gareja ma hihira abe imaketero hoka nginioli. De ngohi naa ma hirete ma dodihiraino de tamake de ahi lako hinooto abe ma titi o Kristusu ai kangela ma ngoe iwidaene, ho ngohioo ai kangela gea tahingahu-ngahu o nyawaika abe hoka nginioli niahingahu-ngahu o nyawaika. De ngohioo ahao wohihidoaka ngohino to Una ai medebini ma dararono abe ma oraha womahimatokoli, de gea ko itedekanokaua abe Una womahimatokoli. Ho ngini de ngohi imaketero nanga tagongo de nanga gogere abe Ma Jou wonahidoaka ngoneino. အခန်းကိုကြည့်ပါ။ |
1 Peturusu 5:1
38 ပူးပေါင်းရင်းမြစ်များ
Abe ma dodihiraka ma oraha o Yohanese wiohiki o Yesusika ka hiadono ma wange abe iwigoraka daku o Horogaiye de ka yomakiniikohi. Ho onaguna dika higoraka ahao una gea wodadi womaketero hoka ngoneoli, abe unangoo ahao ka idadi wahiabari o nyawaika abe ma titi o Yesusu womomikoka ai honengino angamoi gea mata-mata unangoo ma hirete wamakeoka.”
Masara naa moi ka idadi tinihingahu, abe ahao ma oraha ngini naa inilufungu de Ma Jou o Womaha de gea duru niamake ai kuaha la ka idadi niahingahu-ngahu o nyawa mata-mataika ma titi Ngohi. Abe ngaro o kia-kiaka dika yogogere, abe ngaro o Yerusaleemoka ma nyawa, de ona abe o Yudea ma tonakoka yomanoa, de ngaro ona abe o Samaria ma tonakoka, de ka hiadono o dunia ma bobahaika, ma ona mata-mataika ka idadi ngini nihiabari ma titi Ngohi!”
De o gareja homoi-homoioka de ona yahinooto yairiki de yagoraka o nyawa yamuruono naga la yodadi ma gareja ma hihira genangoka. Ho yagoraka de ahao ko yosobouahi de yagahoko ma owa Ma Jouino ma titi ma hihira gea, abe o inomo ko yolo-olomuahi de yomaniata Ma Jouiye la manga hininga duru itagi ka Ma Jouika dika. De gea ma hihira yahidoaka Ma Jou ai giama ma hoatika la Una dika watobaduhunu onangika ma titi manga tagongo ma hungi gea. De hokogea yagahoko Ma Jouiye angamoi ma hihira onangoo yomahinganono ka Unangika dika.
De ma tonakoka gea de yosobo de ipahaino yomahiadonika o Yerusaleeme ma kotaika. De yomahiadonoka de o gareja ma nyawa mata-mataika duru yadafongo irahai, abe ngaro o hidingoto ma nyawa de ngaro o gareja ma hihira de ngaro ma nyawa utu, masara ona mata-mata yadafongo duru irahai onangika. De ahao o Paulusu de o Baranabasa yomulaenge yoade-ade onangika abe ma titi hokokia Ma Jou wodiai to ona manga wowangoino abe ma oraha ihiabari o Abari ma Rorahai o nyawa-nyawaika.
“De naa tinihitiari moi nginika! Abe ngini kiani nimagoana ngini ma hirete done nirehene Ma Jou ai ngekomoka de aino. De nginioo kiani niagoana nia gogianongoru mata-mataika abe Ma Jou o Womaha winihitagongoka nginika la ngini nidadioka to ona manga gogoana ma nyawa. Ho Ma Jou ai gareja ma nyawa ona gea kiani ngini niapaliara irahai, angamoi Una womaijaino ai nyawa de wofangu de to Una ma hirete ai awunu!
De hokonaa ma titi hiadono ngomi mia hininga ma lako itagi enangika abe ahao hamake o Horogaka, angamoi to ngone nanga badanga naa ko itongohonua masara ika-ika de ahao ihonenge. Abe nanga badanga naa ka idadi hohiketero de o hijai-jai ma tau abe o duniakahi dika ngone hapake. De hohioriki abe ma oraha to ngone nanga hijai-jai ma tau naa ibinaahaka, gea ahao o Horogaka de Ma Jou wonahidoaka ngone homoi-homoiino nanga tau moioli abe itongohono ka hiado-adonika ho ko ihonengua. De abe tohiromanga nanga tau gea nanga badanga ma hungi, gea ko o nyawa biaha manga giamokaua de aino idadi, masara Ma Jou Una ma hirete dika wohidadi.
Ho ngomi naa ngaro o kia dika idadi mia wowangoka masara duru mitomoroini. De ngaro hiadono ngomi mihonenge masara ka misanangi dika. Angamoi ngomi miato koaho mianoaka mia hijai-jai ma badanga naa la miloiki de mimahiadono mia ngiika abe genangoka ko mimaturuuruokaua mia ngi, abe gea miloiki nanga Baluhu idodutu ai ngiika. De ka enangohi abe duru imihisanangi.
Ahi ngofaka, nako hiadono naga moi ipuda genangoka abe nia gogianongoruoka de naga yahowono Ma Jouika, gea kiani nomahidodiai hokokia naduhunu onangika. Abe nako womatengo ani baluhu de kiani niduhunu unangika, ufa nitaere, ma koaho nitemo de nihigaro unangika abe imaketero hoka to ngona ani babaikali nitemo. De nako womatengoli naga wahowono abe una hatoli ka o goduuruohi, unangika nitemo abe hoka ani dodoto ma dutuika nitemo de niduhunu.
De naa ahi lalaku ma hadia naga ihidodamaa mangale ma titi ahi wowangoino de towango itiai Ma Jou ai himangoka. De ahao ma wange gea abe nanga Baluhu idodutu wonatailako ngone homoi-homoiika, de gea ahao wohihidoaka ahi hadia ngohino. De gea ngone hohioriki abe ma oraha wonatailako nanga datoroka de gea duru woputuhu itiai. Masara gea ka tomatengoua dika abe tamake ahi hadia o wange gea, masara o nyawa onagona dika abe duru de manga magaweoka iwidodamaa de iwingano-nganono ai gahe ma wange abe woboali, ona gea mata-mata ahao manga hadia yamake Unangino imaketero hoka ngohioli ahao tamake Ma Jou ai giamino.
Nengokadau abe ma oraha toninoaika genangoka o Kereta ma nuuhoka de tonihibehehongoka la gea tato ngona ka idadi nohitiai ma kuranga eko ma kangela o kia dika nagahi o gareja ma dodoomu ma goronaka gea. De ma oraha gea tonihibehehongo ngonaika tato ahao ngona kiani nairiki de nagoraka o nau-nauru o kapongo homoi-homoiino abe naga iwingaku-ngakuoka genangoka la ma nau-nauru gea ona yodadi o gareja ma hihira manga ngi homoi-homoioka. Ho ngohi naa tonihihohininga abe ma titi ahi behehongo ma demo ngonaika ma oraha gea. Abe hokonaa ahi demo.
De naa o hiketero moi ka idadi todiai abe tonahiketero to ngone nanga wowango de o roreebe abe ngone o nyawa nanga biaha homapopaata homaketeroreebe. De ona ma dodihiraino abe duru iwingaku-ngakuoka de to ona manga ade-ade niihenoka, ona gea yomahiadonikaka ma roreebe ma batingika ho ma oraha naa ona ko yomaketeroreebeokaua masara gea inawuni-wuningoli ngone naa abe ko homahiadonuahi ma batingika. Ho mangale ma titi ona gea ko manga ngoe inawuni-wuningi, ho abeika ngone hanoaka o kia dika naga ngoneoka abe ena gea inahikokapaanga hiadono ko hotai-taitua, masara koaho gea ena hanoaka la ka idadi homapopaata de houwini. De o howono o kia dika naga ngoneoka abe biaha ena gea inatobatukoro, enangoo ma kiani hanoa la ka idadi ka ihikaika hoaguru nanga himangika de homapopaata de nanga dongohono ka hiadono nanga roreebe ma batingika homahiadonika.
De ngaro ona tanu duru yoigo yamake ai hidee abe hokokia wonaduhunu nanga howonino masara gea Ma Jou wahitararono onangika abe ona ko yadaenua de yohonengoka. Ho gea ai uru ma dodofanga yohonengoka de ipahaino de ahao ai hidee idadi abe ma oraha ngoneuku naa, ho ngoneoli naa abe hadaene ai hidee. Abe naa ma duruika de ngini niihenoka ai hidee gea o Abari ma Rorahaiino la ka idadi niongaku enangika. De o Abari ma Rorahai gea o nyawa inihitobahingahu-ngahu nginika ma titi Ma Jou o Womaha ai kuahaino, abe Una o Horogaka de wauku woboa. Ho gea kiani niwihigiriiri Unangika! De Ma Jou ai hidee de ai hininga ma owa ngoneuku, ena gea duru ihohailoaholi hiadono ka Ma Jou ai uru ma dodofangua dika abe yoigo ihioriki, masara ngaro Ma Jou ai momalaekatoo, onangoo duru yoigo yamake la ihioriki ai hidee gea abe ngone naa hamakeoka. Abe ona yomakokeleha ato, “Bote hokokia ma ngekomo Ma Jou ahao wapake la waduhunu o nyawa gea manga howo-howonino? Marai ai ngekomo gea kiani duru ihohailoa!” Hokogea ona duru yoigo ihioriki, de abeika, ngone naa abe ka idadi hamake ai ngekomo gea. Ho ngoneoo abe hamake hokokia ma amoko Ma Jou ai hiowa ngoneuku abe wonaduhunu nanga howonino. Ho ngone naa kiani duru hihigiriiri nanga Jouika ma titi ai duduhunu ngoneino de abe nanga utumu wonahidoaka ai hininga ma owaka de aino.
De nia kangela gea naga de ma dumutu la ahao ma oraha nia baha adonoka de itararono abe nia ngongaku duru ireeika. Abe ma titi ngaro ma oraha naa de o kokangela nioborihimanga nia wowangoka, masara ko inihikalaua genangino. De nia dongohono gea inihitaana abe nia ngongaku duru ilaku nia hiningaka. De abe o kokangela yataili nia ngongakuika, gea ngade-ngade imaketero hoka o nyawa yataili o gurasi o ukuika. Angamoi ma bahauku abe ataili ipaha de duru itararono ma gurasi gea o gurasi dika ireeika. De hokogenangoo de ti ngini nia ngongaku abe o kangela ataili ipaha de itararono abe nia boringongaku ka ireeika dika de ko ikalaua. Masara nako o gurasi de ti ngini nia ngongaku, gea ka nia ngongakuohi abe duru ikurutiye Ma Jou ai himangoka. Abe nako o gurasi gea ika-ika de ahao ko iwaka ho ko itongohonua masara nako nia ngongaku hokogenangua, angamoi nia boringongaku gea itongohono ka hiado-adonika. De mangale ma titi nia ngongaku ireeika, gea ka idadi nihioriki abe nia utumu genangino ahao niamake ma oraha o Yesusu Kristusu womahimatokoli o dunia mata-mataika. De nia utumu gea naga o fara muruono ahao niamake. Abe naga moi, ahao inihigiriiri nginika, de nagaoo abe niamake ti ngini nia medebini ma dararono de nagali nia horomati abe niamake ma wangeoka gea. De nia utumu gea ma titi moioli hiadono koaho hihigiriiri Unangika.
Ho ufa niheranga masara koaho nigogarago. Angamoi nako inihikangela nginika ma titi o Kristusu, gea ngini de Una nimakokutuono niamao to Una ai kangela, de gea ngini hatoli nimahidutuku o Kristusika. De abe nimakiniiki de Una ai kangela ma goronaka, gea ahao dokengika ma oraha Una womahimatokoli de ka idadi ngini nimakokutuono abe duru nigogarago Unangoka. Abe ma oraha gea womahimatoko de Una naga duru de ai medebini ma dararonoka, de genangino ma titi hiadono ngini duru nigogarago de nimorenoka. De nia garago gea ahao duru ilamokoholi angamoi nengokadau de ti ngini nia kangela enangoo duru ilamoko. Ho ngini ngaro ufa de nia hininga duru ihuha ma titi nia kangela niaohana, masara ka idadi nigogarago angamoi nia kangela gea ahao dokengika de ihihofoko de o gogarago nginioka!
De nako nia tagongo gea niao itiai, ahao ngini niamake ma hiowa moi duru kohaamoko o Kristusino. De Una ka idadi tihiromanga Unangika tato Una gea to ngone nanga domba ma gogoana abe ngaro ma gogoana mata-mataika masara ka Unangohi abe duru wokurutiye. De dokengika abe ma oraha Una womahimatokokali de ahao wonahikokodoku to Una ai medebini ma dararono ngone homoi-homoiino abe hagoana itiai to Una ai domba, abe ma titi to Una ai nyawa ngone hagoana. Abe ai dararono gea ena idadi nanga karajaangino ma hofoko. De ai medebini ma dararono gea ngoneoka duru ko ihihangua masara itobatongohono ka hiado-adonika ngoneoka. De gea ma titi hiadono ngohi tinihigaro nginika la niagoana de niapaliara itiai Ma Jou ai nyawa nia doomu homoi-homoioka.
Ahi gogianongoru abe duru tinidora nginika, ngone hagoungu hodadioka to Ma Jou ai ngofa-ngofaka! De gea ngaro duru hohiorikoka abe ai ngofaka hodadioka, masara naga ma titi moi abe ngone ko hohiorikuahi. De gea ko hohiorikua abe ma titi ahao dokengika de to ngone nanga rupa ahao hokokia. De ngaro nanga rupa dokengika ko hohiorikuahi masara ma oraha naa de duru hohiorikoka abe ahao ma oraha womahimatoko de gea to ngoneoo nanga rupa idadi abe hoka to Unangoli ai rupa. Angamoi ma oraha gea de ahao ngone ka idadi himake Unangika abe ai rupa ma gou-goungu. Ho gea to ngoneoo nanga rupa ma hungioli kiani naga la ka idadi homarihimanga ngone de Una.
Ahi gogianongoru o Yesusu Kristusoka. Ngohi naa ti ngini nia dimono nanga ngongakuoka. De naa ahi hurata tohidingoto abe ngona ahi dodiawoika de to ngona ani ngofa-ngofakikaoo. De igoungu abe ngona Ma Jou woniirikoka la wonihidadi to Una ai ngofaka. De ngini mata-mata duru tagoungu tinidora nginika, masara ka ngohiua dika tinidora, ma naga utu nanga gogianongoru manga ngoe abe onangoo ihiorikoka ma dodotoko ma gou-goungu, de onangoo mata-mata duru inidora nginika.
Ngohi naa o Yohanese ti ngini nia gianongoru o Yesusoka. De mangale ngohi de ngini nanga borigogere naga Unangoka, ho ngone mata-mata naga nanga kangela abe hoborihimanga. De genangino tohioriki abe ngini de ngohi homahiketehigogao angamoi ngone mata-mata hodadioka to Una ai kokawaaha o doomu moioka. De ngohi tohiorikoo abe ngone homaketero ma titi abe ngaro o kangela ma goronaka masara ngone ka homatongohono dika ma dorouino. De naa tomahingahu nginika abe ngohi nengokadau ihitaokino de ihihidingoto nenangino la ihihohowono ma nuuhino naa abe ma romanga o Patomos. De gea ngohi ihitaokino de ihihohowono ma nuuhino naa ma titi tahingahu-ngahu o nyawaika abe Ma Jou ai Demo-demo de abe o Yesusu ai ade-ade gea duru tahigaro la tato yangaku enangika.
ကြော်ငြာတွေ