1 Peturusu 2:24 - Ma Jou ai Demo-demo o Totobelohoka24 De o Kristusu Una ma hirete to ngone nanga howo-howono womahimoku ai badangika abe ma oraha iwihidapakuika o gotaka gea. De gea Una wohonenge ma titi nanga howono la wato nanga howonino gea ko inahiparetakauali ngone naa. Masara to Una ai hininga la wato ngone howango ka ma totiaioka dika. Ho gea ka idadi hotemo hato mangale ma titi to Una ai kangela kohaamoko ai badangino hiadono ngini winihitogumoka nia howo-howonino. အခန်းကိုကြည့်ပါ။ |
1 Peturusu 2:24
50 ပူးပေါင်းရင်းမြစ်များ
Hokogea ka ihikaika womahitunguu ai pea ma nyore-nyoreoko abe watagongo manga medebini Ma Jouika ma oraha manga huhuba wahihuba Ma Jouika. Mangale ma dodunguuoka ma dulihi, ‘Ma Debi-debini Ma Jou o Yawe ai Himangoka,’ de ma titioka abe nako ma oraha yomahuba de naga yodiai ihowono Ngohino, gea o Harunu wamoku ma hohowono gea. Ho o Harunu ka ihikaika womahidodiai abe ma oraha o Isiraele ma nyawa manga huhuba wahihuba Ngohi Ma Jou o Yaweino la ma oraha yomahuba de Ngohi ka idadi ai nyawa tadafongo.”
Ma Jou wihiromanga una gea ai huhuloko duru wototiai hiadono wihigunoa la wokangela. Ka de ai kangela ma huha ipahaka de una wamake ai kangelaino ma hasili ho hiadono duru ai hininga iriidoka de ai sosanangi. De una ka idadi o nyawa wahitiai manga wowangoka angamoi ahao manga howono mata-mata womahitounaka. De mata-mata gea to una ai tobahiorikoka de aino abe una wohiorikokau Ma Jou ai mau abe kiani una wohonenge la ka idadi o nyawa ko manga ngoe wahitotiai Ma Jou ai himangoka.
“Masara ngini onagona dika abe naga nia horomati de nia hingounu Ngohino, gea duru nimakohowono de ona abe tahohowono ma oraha gea. Abe ngini ahao nia wowango ma datoro ma totiai imahilaku nginioka hiadono duru nigogarago. De mangale ma titi nia datoro ma totiai ahao ka idadi inihitogumu nia kangelaino. Ho ma oraha gea de ngini ko niakunua niatumungu nia gogarago ho hiadono ka inihirarama nia garago gea. Abe ngini niamao nimaketero hoka o totaleo abe ihihupu ma kurungaka de aika ma homoaika la ihoho aika aino.
“De naa tinihingahu abe ngini kiani naga nia totiai ma gou-goungu la dokena nanga himangika de ka idadi Ma Jou winihikoano nginika. De igoungu abe ona yotobadoto-dotoko o Musa ai Paretaino de abe ona o Farisi ma doomuino, ona gea yomaetongo ona ma hirete ato yototiaioka. Masara to ona manga totiai ko ma gou-goungua, ho ahao ko idadiua ona Ma Jou wahikoano abe ma titi manga totiaiino gea. Ho ngini naa kiani naga ti ngini nia totiai ma gou-goungu la ahao Una ka idadi winidafongo de winihikoano nginika.”
De o Yesusu ai datoro gea idadi duru imaketero abe hoka ma dodihiraino Ma Jou ai uru ma dodofanga o Yesaya wonahingahuoka abe wato gea ahao ma Mesia wodiai. De gea ma dodihiraino de o Yesaya wohitulihuku ai demo wato, “To ngone nanga badanga ma kangela Una wagorakoka ngoneino, de to ngone nanga popanyake wonahitogumoka.” Hokogea o Yesaya ai demo ma dodihiraino.
“Ngohi ihilufungu de Ma Jou o Womaha ai kuaha, abe Una wohiiriki de wohihitagongo ngohino la o Abari ma Rorahai tohingahu-ngahu o hu-huha ma nyawaika. De Una wohihidingoto ngohi naa la tohingahu-ngahu abe o nyawa yatao-taokino ahao yahiluasa ma hohailoaika. De abe o nyawa yorafi-rafioka ahao ka idadi yomahioriki. De ona abe duru o kokangela ma goronaka Una wohihidingoto la tahihohe manga papakitino la yohupu ma hohailoaika.
Ho nginioo koaho nimahitingini to Kristusu ai hininga gea. Abe ngohi tinihuloko la nimaetongo abe ngini ma hirete hoka nihonengoka o howonika de ma oraha naa niwangokali Ma Jouika, angamoi ngini naa inihingohamoka o Yesusu Kristusika ho koaho ti ngini nia hininga imakadaene dika de to Unangoli ai hininga. Ho gea ufa ngini ka nianiikohi o howonika abe ma oraha inihigaro la ato niahowonoli. Masara kiani nginioo niwango Ma Jouika la ka ihikaika o higiriiri nihiboa Unangika.
Ho ufa ngini nimahidoaka nia badanga ma kiahonanga la gea idadi o howono ma dodiawo de genangino nimahitorou. Masara koaho ngini nimahidoaka Ma Jouika la nia badanga ma kiahonanga mata-mata nimahigunoa la Ma Jou wapake hiadono o datoro ma totiai wodiai ti ngini nia badangino. De ma titi o kia hiadono ngohi tinihigaro tato nimahidoaka Ma Jouika? Kiani hokogea angamoi nia wowango ihititi Unangoka de aino! Abe Una gea winihimomikoka nia wowango ma honengoka de aino la nia wowango ma ngango niamake!
Angamoi nako ngini niatobaniiki o howonika, gea tanu nimahidadioka hoka o gogilaongo ma nyawa abe o howonika, ho ena gea idadioka nia dutu. De abeika tohiketero moi. De nako hoka ngone homahidoaka o nyawaika la hato ka ihikaika haniiki de hahingounu onangika, de gea homahidadioka to ona manga gilaongo. De hokogenangoo de o howono, abe nako naga nanga hingounu enangika, de gea ena idadioka nanga dutu. Ho gea iti ngone nanga putuhu. Abe ngone ka idadi hohingounu o howonika masara hohioriki abe o howono ma hofoko gea o hone-honenge dika. Ekola ka idadi nanga hingounu itagi Ma Jouika la genangino de ihihofoko de o datoro ma totiai to ngone nanga wowangoka. Ho done sarakia de o nyawa yoigo yomangiriki o howono? Genangoka de duru ka yobodo dika!
Koua! Duru ko idadiua hokogea hodiai! Angamoi Ma Jou ai hininga ma dumutu naga ngoneino la wato ngone howango hototiai dika. De hokonaa ma titi muruono naga hiadono ngone hingaku-ngakuoka duru ko idadiua haniikohi o howono nanga wowangoka. Abe ma titi ihira, ngone naa tanu homaketero hoka hohonengoka ma titi nanga howonika gea.
Angamoi nako o nyawa manga howono de gea ma hibalaha o hone-honenge dika. Masara ma oraha naa de ti ngini nia wowango ma hofoko duru imakohowonoka de ma dihiraino. Angamoi ma oraha naa de ko nidadiokaua o gogilaongo ma nyawa abe o howonika masara niwihingounoli Ma Jouika, ho to Unangoli ai gogilaongo ngini nidadioka. Ho ma oraha naa de naga nia wowango ma hofoko ma rorahai abe iniduhunu hiadono inihihira-hira la ngini nitebi-tebini Ma Jou ai himangoka. De mangale Una winihihoheoka nia howonino ho gea ma bahauku de ihihofoko de o wowango ka hiado-adonika nginika. De gea duru igoungu, abe mangale ma titi to ngone nanga gogao nanga Baluhu idodutu o Yesusu Kristusika ho hiadono Ma Jou ka wonahidoaka dika o wowango ka hiado-adonika ngoneino. Abe Una ko wonahibalahua ma titi nanga howono, masara nanga wowango gea ka o hidoaka dika Unangoka de aino ngoneino! Ho mangale ma titi ai hidoaka ma hohailoa gea ho ngone ma oraha naa de koaho howango hokokia la nanga wowangoino de duru itararono abe o howono ko inahiparetakaua ngoneino!
Masara ma oraha naa de ngone inahihoheoka ma Paretaino. Angamoi ngone naa inahingohamoka o Kristusika, ho abe ma oraha Una wohonenge de gea imaketero ngoneoo hohonenge ka ma moi de Una. De gea ma titi hiadono ngohi tato ngone hohonengoka ma Paretaika ho inahihoheoka genangino. Ho igoungu ma dihiraino de nagahi nanga papakiti ma Paretaika ho kiani hanii-niikohi ma ngekomo ihira-hiraika gea. Abe ma pareta ma demo o kia dika ihitulihuku, de ena gea duru hanii-niiki enangika. Masara ma oraha naa de inahihupuoka genangino la ka idadi hileleani Ma Jouika de to Una ai Womaha ai kuahaino, abe Ma Jou o Womaha wonaduhunu nanga hiningaka la hiniiki Unangika de hileleani itiai Ma Jouika.
Angamoi nengokadau ngohi tinihikodokuoka nginika ma dodotoko abe ma titi o Yesusu Kristusu. De abe nako ma dodotoko eko ma hingahu mata-mataika, ma ka enangohi ikurutiye. De ma dodotoko gea ma dihira ngohioo tamake imaketero hoka nginioli niamake. De hokonaa ma dodotoko gea, itemo ato, “O Kristusu Una wohonenge ma titi to ngone nanga howono, de ai hohonenge gea idadi imaketero hoka ma dihira Ma Jou ai Demo-demoka ihitulihukuoka.
De naga moioli abe Ma Jou wotemo ai nyawaika la wato ona yomatingaka o dorou ma nyawaino, wato, “Ngini kiani nihupu o nyawa gea manga hidogoronaino la nimatingaka onangoka de aino. De ufa nimahitigi to ona manga kiahonangika abe ipeseke to Ngohi ahi himangoka. De nako hokogea nimatingaka Ngohino, de gea Ngohi ahao tinidafongo.”
Masara o Kristusu Una wonabangu ibooto ho wonahihoheoka ma koboto ma hohowonino gea abe ma Paretaka de aino iboa. De gea wonaturuuru la wato ka idadi to ngone nanga koboto ma hohowono iwidaene Unangikali la ngone ko hamakeua. Abe gea nanga koboto ma hohowono Una womahimoku ma oraha abe iwihidapakuika o gotaka. De gea ka idadi hohioriki abe Unangika ma koboto ma hohowono iwidaenoka angamoi hokogea ihitulihukuoka Ma Jou ai Demo-demoka ato, “Onagona dika abe yahidapakuika o gotaika, ona gea yadaenoka Ma Jou ai koboto ma hohowono.” Hokogea itemo Ma Jou ai Demo-demoka. Ho mangale ma titi to Una ai badanga ihidapakuika o gotaka, ho ma dodunguu gea inahingahu ngoneino de ka idadi hohioriki abe ma koboto ma hohowono iwidaenoka.
Abe to ngone nanga howo-howono waofi hokonaa. Ma dihira naga ihitulihukuoka to ngone nanga howono mata-mata o bukuku. De ma buku gea ka idadi hohiromanga hato nanga nagimi Ma Jouika ma buku. De ena gea idadioka nanga bodito. Masara o Kristusu nanga nagimi gea waofioka abe waoika de wohidapakuika o gota isosalioaika, la genangoka de nanga nagimi ihihangoka.
De ngini naa ka idadi hotemo hato winihidohonengoka ka ma moi de o Kristusu abe ma oraha Una wohonenge. De abe nihonengoka, gea ho hiadono nia wowango abe ihititi o dunia ma biahaino ihonengoka. Ho nako nia wowango ma dihira gea ihonengokau, done o kia ma titi de hiadono ka niwangohi hoka o duniali ma nyawa yowango? De done sarakia hiadono nagahi nia hingounu o dunia ma biaha ma paretaika?
De genangino o Yesusu Kristusu duru waniiki Ma Jou ai mau. Abe ma moi dika womahidoaka de ko womahigaliokaua womahidoaka ka hiado-adonika. Ho mangale ma titi Una waniiki Ma Jou ai mau, ho ngone naa hingaku-ngakuoka Una duru wonahitebinoka nanga howonino. De gea wohahitebini ma titi o Yesusu Kristusu ai badanga womahidoaka ma titi ngone.
De gea ma titi hiadono ma dihiraino ma oraha o Kristusu woboa o duniauku naa de witemo ai Babaika wato, “Baba, Ngohi naa tonihioriki ani hininga, abe nako to Ngona ani mau gea ko o nyawa manga hidoakinoua Ngonaika de ko o aewani ma huhubainoua abe Ngona noigo. De ngaro o huhuba iharo-harongo eko o huhuba utuino abe o nyawa yaoino la ato genangino de manga howono atamunu, masara hokogenangua abe inihisanangi Ngonaika. Masara abe Ngona duru noigo la to Ngohi ahi badanga ahao idadi o huhuba Ngonaika, de gea ma titi hiadono o nyawa manga badanga nohihidiai la gea ka idadi tapake.”
De ti ngini nia lou kiani niapake la niahingekomo o ngekomo abe duru itiaiika de irikotika, la ahao onagona dika inihidoduruino abe ona yosuga, gea ko ihiurotokaua ho ko yopelekua masara ka idadi manga lou itaiti itogumu de iputurungu la onangoo yomapopaata de youwini. De gea ahi hiketero ma demo ma titi hokonaa. De gea ngini kiani o totiai ma ngekomika dika nianii-niiki nia wowangoka la ahao nia gogianongoru abe to ona manga ngongaku ka idomo-domohi, ona gea ka idadi yomaaduru abe hoka nginioli la onangoo yomahiputurungu manga ngongakuika.
De abeika ngone hafikirohi to Yesusu ai hininga hokokia. Angamoi Una gea duru wotebi-tebini ho hiadono Ma Jou wisanangi Unangika, angamoi to Una ai hiningaka duru ko iwa ma dorou eko o howono o kia dika. De Una gea iwihikitingakoka ngoneino o howo-howono ma nyawaino, de ma oraha naa duru iwigorakiyeoka ho nako o Horogaka ma gogere mata-mataika, gea ka to Unangohi ai gogere duru ikurutiye. Ho o Yesusu ai wowangoino gea ka idadi ngone hohioriki de itararono abe Una dika ka idadi duru wonahingodumu to ngone nanga perelu mata-mataika.
De hokogenangoo o Kristusu Una ma moi dika wohonenge, ho genangino de ngone o nyawa hatoli homaketero de Una abe ma titi nanga hohonenge. Masara abe homakohowono de Una, gea to Una ai hohonenge idadi o huhuba Ma Jouiye la ngone o nyawa nanga ngoe nanga howono waofioka. De igoungu Una ahao woboali, masara gea woboa ko ma titiua la nanga howono waofioli, angamoi ai karajaanga gea wabootokau. Ho ahao ma oraha woboali ma hinootoino de gea womahimatoko o nyawaika abe duru iwidodamaa de iwingano-nganono Unangika, de ma oraha gea abe Una wadafongo ai nyawa Unangino, angamoi genangoka de ahao ai duduhunu ngoneino duru wohingodu-ngodumoka.
Ho mangale ma titi nanga Baluhu idodutu ka idadi wonahitogumu nanga popanyakeino de ka idadioo wonahiapongo nanga howono ma titi nanga niniatino, ho duru tinihigaro nginika la nia howo-howono nimangaku nia gogianongoruika de nimakokagahoko Ma Jouiye la ngaro nia kangela nia bada-badangoka eko ngaro nia gogao Unangika itoakoka, ma gea mata-mataika de Una ka idadi winihitogumu genangino. Angamoi nako womatengo wataana de Ma Jou ai mau, to una gea ai gogahoko naga duru de ma kuahaka angamoi Ma Jou ahao wihigihene unangika de hiadono wohingodumu ai gogahokino gea.
De ngone hohiorikoka abe Ma Jou Una gea duru wototiai dika, ho genangino de ka idadi hohioriki abe o nyawa onagona dika o totiai dika yanii-niiki manga wowangoka, ona gea Ma Jouoka de aino yomaboakali. Angamoi o totiai ma titi imanoa ka Unangoka dika, ho nako o nyawa yaniiki to Una ai totiai manga wowangoka, gea hohioriki abe onangoo tanu Unangoka de aino yoboa abe imaketero hoka manga totiai enangoo iboa Unangino.
De ahi ngofa-ngofaka o ngongakuoka, ufa nimahigunoa hiadono o nyawa onagona dika de inibudi abe ma titi o howono nanga wowangoka. Angamoi kiani ngone duru hohioriki itararono abe nako o nyawa onagona dika o totiai yanii-niiki manga wowangoka, ona gea yomahitaanoka abe yototiai Ma Jou ai himangoka abe hoka o Kristusoli Unangoo duru wototiai.
la duru o ngekomo ma goronaino ihahuru. De ma akere gea ma arihonongaka naga iwango o gota abe enangoo nako ma hofoko yaolomo gea ka idadi o wowango yahidoaka o nyawaika. De ma gota gea naga to ena ma hofoko o fara ngimoi de hinooto, de gea imakiniiki de ma mede, ho o mede moi gea ma hofoko moi, de ahao o mede ma himangoka de gea ma hofoko aturuuruoka ho o fara moioli. Hokogea ma hofoko o fara ngimoi de hinooto gea imakiniiki de ma mede. De nako ma gota ma hoka, ena gea yapake la o dunia ma nyawa mata-mataika ibootohi yagogama masara ka ihikaika manga badanga isosanangi dika.
ကြော်ငြာတွေ