1 Peturusu 2:22 - Ma Jou ai Demo-demo o Totobelohoka

²² Abe nako o Kristusu, Una gea duru ko wahowonua, de moioo de ko iwa o ngeluku abe ai uruoka de aino ipaata.

1 Peturusu 2:22 ပူးပေါင်းရင်းမြစ်များ

Higiriiri 34:13

Nako hokogea nioigo kiani nimahidodiai de nia uru, Done naga ani demo ihititi de ena abe itorou. De kiani ka ihikaika nimahitiari la ufa niapake o ngelu-ngeluku.

Yesaya 53:9

De o nyawa iwihidee la to una ai honenge yahidotulungunu de o dorou ma nyawa manga honenge ma ngiika. Masara ipaha una ka de wohonengoka de iwihinoaika o kaya ma nyawa manga lungunika. De mata-mata gea idadi unangika ngaro ko ma moiuahi una wodiai hoka o dualono ma datoro. De una gea ko ma moiuahi de o budi ma demo wapake.

Matiusu 27:19

De o Pilatusu naga wogogeruku ai pareta ma kaderaka de una walehaka o kokawaahaika masara ona ko yopaluhuahi de naga iboaino o behehongo ma demo abe o Pilatusu ngoi fekatoka de aino mohidingoto. De ami demoka gea de mihibehehongo mato, “Ufa nihohowono Una gea abe ko iwa ai howono, angamoi o futuika de ngohi ahi buluharino de duru ihiruwae ahi hiningaka ma titi Una gea!”

Matiusu 27:4

De womahiadono onangika de womahingahu wato, “Ngohi tahowonoka, angamoi Una abe tihidoakoka nginika, Una gea ko iwa ai howono.” Masara ona yopaluhu ato, “Ho? Gea to ngona dika ani tagongo de ko to ngomiua. Ho ufa nomiruwae de to ngona ma hirete ani howono gea!”

Lukasa 23:41

Abe ngone inahinooto homakohowono de Una, angamoi to ngone nanga hohowono duru imakataana de nanga dorou ma datoro abe hodiaioka. Masara Una naa hoka ngoneua, abe to Una ko iwa ai howono wodiaioka!”

Lukasa 23:47

De naga womatengo o Roma ma tentara manga hidimono abe ai digi-digino womalega-lega, de una wamake mata-mata abe idadi o Yesusika. De ka de gea wamake de una wihigiriiri Ma Jouika wato, “Abe Una naa wohonengoka, duru tongaku de tohioriki abe Una o totiai ma nyawa!”

Yohanese 1:47

Ho yoboaino o Yesusino de ona yotagiohi iwihimangino abe o Natanele ko womahiadonuahi de o Yesusu wihidaere unangika wato, “Ho ngone naa himakeoka o nauru abe ko woelu-elukua ho itiai una naa hihiromanga o Isiraele ma nyawa ma gou-goungu.” Hokogea o Yesusu wotemo o nyawa manga himangoka.

Yohanese 8:46

Masara ngini niato Ngohi tahowonoka e? Sarakia naga nginioka abe ka idadi nihihitaana abe ma moiokau tahowonoka? Ho nako tagou-goungu dika totemo, gea kiani Ngohi nihingaku e?

2 Korintusu 5:21

De ka idadi o nyawa yomakadame de Ma Jou angamoi to ngone nanga howo-howono Ma Jou wagoraka ngoneoka de aino de wihinoauku o Yesusu Kristusuku. Abe ngaro to Yesusu Kristusu ma hirete ai howono duru ko iwa, masara Ma Jou wihitagongo to ngone nanga howono o Yesusu Kristusika la gea imaketero hoka Una wodadi to ngone nanga howono. De ai datorino gea de ka idadi Ma Jou ai totiai wonahidoaka ngoneino la imaketero hoka wonahinoauku ai totiai ngoneuku.

Ibarani 4:15

De to ngone nanga Hidemo wokokurutiye Ma Jouika, Una gea ka idadi duru wonahioriki abe to ngone nanga hininga ma buturungu ka ikurangohi. Angamoi Unangoo ma dihiraino de iwihiata-atara ma ngoe, de abe o hiatara mata-mataika inadaene ngone o nyawaino, enangoo gea mata-mata iwidaenoka Unangika. Masara ngaro hokogea iwihiata-atara Unangika, masara Una duru ko wahowonua.

Ibarani 9:28

De hokogenangoo o Kristusu Una ma moi dika wohonenge, ho genangino de ngone o nyawa hatoli homaketero de Una abe ma titi nanga hohonenge. Masara abe homakohowono de Una, gea to Una ai hohonenge idadi o huhuba Ma Jouiye la ngone o nyawa nanga ngoe nanga howono waofioka. De igoungu Una ahao woboali, masara gea woboa ko ma titiua la nanga howono waofioli, angamoi ai karajaanga gea wabootokau. Ho ahao ma oraha woboali ma hinootoino de gea womahimatoko o nyawaika abe duru iwidodamaa de iwingano-nganono Unangika, de ma oraha gea abe Una wadafongo ai nyawa Unangino, angamoi genangoka de ahao ai duduhunu ngoneino duru wohingodu-ngodumoka.

1 Yohanese 2:1

Ahi ngofa-ngofaka o ngongakuoka, ahi hurata ma demo naa tohitulihuku de tohidingoto nginika la tato ibootohi ngini niahowono. Masara nako hiadono idadi abe niahowono, ufa niawohanga abe naga womatengo ka idadi winiduhunu de winihidemo Ma Jou o Baba ai himangoka. De Una gea o Yesusu Kristusu abe duru wotobatotiai, ho Una ka wakunu wonahidemo o Babaika nako idadi abe hahowonoka.

1 Yohanese 3:5

De hiokoo ona gea ka yahowo-howonohi, angamoi ngini nihiorikoka abe ma dodihiraino o Yesusu Kristusu woboa o duniauku naa la wonahihohe nanga howono ma kuahaino la ufa hogila-gila nanga howono ma goronaka, ho ona gea tanu ngaro ufa dika de yogila-gila enangika. De ngini nihiorikoo abe Unangoka duru ko iwa o howono.

Himatoko 14:5

De ona gea manga uruoka duru ko yoelu-elukua, de ona duru o debi-debini ma nyawa angamoi ko iwa manga howono onangoka.