1 Peturusu 1:22 - Ma Jou ai Demo-demo o Totobelohoka22 De mangale ma titi naga nia hingounu ma gou-goungika abe o Abari ma Rorahaiika hiadono ti ngini nia wowango ihitebinoka genangino. Ho mangale nia wowango itebinoka ho ngini ka niakunu nimakodora ngini o gogianongoruoka abe de nia dora ma gahumu dika. Ho naa tinihuloko nginika tato ngini kiani duru nimakodora de nia hininga ma gahumu abe nia hininga ma debi-debinoka de aino. အခန်းကိုကြည့်ပါ။ |
1 Peturusu 1:22
51 ပူးပေါင်းရင်းမြစ်များ
Abe genangino de ka idadi hohioriki abe Una ko wairikua o nyawa angamoi wonadafongo ka homakadaene dika ngaro ona eko ngaro ngone masara ko wonahikohowonua abe wonakokidafongo ngone mata-mata. De abe waofi o nyawa manga howono manga hiningaka de aino ma titi manga ngongaku, gea to ona manga howono waofi imaketero hoka to ngoneoli nanga howono waofioka.”
De gea to ngone nanga Baluhu idodutu o Yesusu Kristusu abe wohihitagongo ngohino de ahi tagongo duru ma owa naa, la ai Abari ma Rorahai gea tahingahu-ngahu o nyawa yowoe-woeika. Ho Una wohihitagongo hokogea de nagali abe wohihidoaka ai kuaha la tahingahu-ngahu abe ona ko o Yahudi ma nyawaikaua o dunia ma amokika ma titi o Yesusu Kristusu, la ona ahao ka idadi iwingaku de iwihingounu Unangika. De gea ma titi o kia hiadono Una wohihitagongino hokogea? Gea to Una ai hininga ma dumutu la o nyawa manga ngongakuino de naga manga hingounu Unangika ho hiadono Una ahao wamake o higiriiri onangino.
Angamoi nako o nyawa de manga wowango ma goronaka de yanii-niiki manga badanga ma hafini ma dorouika, gea ahao manga wowango hoka ihonengoka angamoi gea ka yomakitingaka Ma Jouoka de aino. Masara Ma Jou o Womaha wonahiakunu la ka idadi nanga badanga ma datoro ma dorou gea hatingakika! De nako nanga datoro gea hatingakika, gea ahao nanga wowango duru irorahai angamoi imakiniiki de Ma Jou ai mau.
De ngaro hokogea to ngomi mia kangela masara mimahitaana abe midadioka Ma Jou ai duduhunu ma gou-goungu ma titi mia wowango ma rorahaiino. Abe to ngomi mia wowango ma datorino de itebi-tebini, de abe nagali mia hininga ma madaoko ma rahai abe Ma Jouoka de aino womihidoaka. De mia dongohono naga o nyawaika abe ngaro ona ko imisanangiua ngomino masara ko miahigurubungua de ko miahidemoua. De nagali abe mimahitaana mia hininga ma titi abe miatobaduhunu o nyawaika, de abe miatobapake Ma Jou o Womaha ai kuahaino, de abe mia hininga ma dora ma gou-goungu ka ihikaika itagi o nyawaika.
De naa ngohi kiani duru tinihiree-reeika abe ngini o Galatia ma nyawaika, angamoi naa ma duruika de ngini duru nibodo abe hokokia nimangiriki ti ngini nia hiningaka. De gea tinimake hoka bote naga nia hiningaka de ma gogorobitoka hiadono nirehenoka ma gou-goungino. Angamoi ngini ma dihirainohi de niataoko duru itararono abe ma titi o Yesusu Kristusu ai hohonenge ma gota isosalioainoka la hokokia winiduhunu ai hohonengino. De gea ngini hadongoo de niwingakuoka masara naa de ai hiningaino nirehenoka ma homoaika! Abe ma dihiraino gea de ngade-ngade imaketero abe hoka ngini de nia lako hinooto ma hirete niwimake nanga Baluhu. Masara naa naga de nia hiningaka hoka inihirafioka.
Masara nako ngone onagona dika abe homahinganono Ma Jou ai owaika de hingaku o Kristusika, de gea ngone duru honganono ahao Ma Jou wonafetongo wato ngone hototiai to Una ai himangoka. De nanga nganganono gea iboa Ma Jou o Womahino, ho gea duru hododamaa de nanga magawe la ma wange gea adonoka de nanga totiai naga ingodumoka ma titi nanga ngongakuino.
De kiani nihidodiai niogoana ti ngini nia rimoi abe Ma Jou o Womahoka de aino iboa. Abe gea Una winihidoaka o dame nginika la ma titi genangino hiadono nimaketerimoi abe o badanga moioka, ho gea nia rimoi ngini kiani nihidodiai niogoana. De nako hokogea mata-mata nianiiki nia wowango ma goronaka, gea ahao ngini niataana to Una ai mau nginika.
De abe hoka kangano totemo tato ngini tinigahoko Ma Jouika, gea tinigahoko hokonaa. Tinigahoko la nginioka nia dora ka idogo-dogo hiadono nia tobahiorikoo idogo ilamoko, abe ma titi ka idogoli niwihioriki Unangika. De nako nia dora gea idogo-dogo, de ahao nia hiakunu moioli naa idogo ilamoko, abe nia hiakunu la o kia dika naga ipuda nia hiningaka ma, Ma Jou ai hininga duru niataana. Ho ma titi hange gea tinigahoko Ma Jouiye la idogo ilamoko nia wowangoka.
Mia gogianongoru, ngomi nenangoka ka ihikaika mitarimakase Ma Jouiye ma titi ngini, angamoi gea miihenoka abe ngini nia ngongaku Unangika ka idogo-dogo de nagali nia doraoo ma idogo hiadono ngini duru nimakodora. Ho gea ma titi nia ngongaku de nia dora gea hiadono ngomi miato duru itaana abe miato kiani ngomi naa mitarimakase Unangiye ma titi ngini.
De naa, mia gogianongoru abe duru nanga Baluhu idodutu winidora, ngomi naa ka ihikaika mitarimakase Unangika ma titi ngini. De gea ngomi miato mia tarimakase ma demo itaana angamoi ma dihiraino ngini winiirikoka la wato ka idadi ngini ngaro ufa dika de nginioo niamake ma hohowono abe hoka ona gea ko yangaku-ngakua ma gou-goungika ona gea ahao kiani yamake. Ma nako ngini, winiirikoka la ahao nia baha adonoka de ka idadi winihidoaka nia utumu nginika. Abe nia utumu gea ngini homoi-homoi ahao o hidoku niaborimake ma titi to nanga Baluhu idodutu o Yesusu Kristusu ai medebini ma dararonino niamake. Ho gea ma titi ho hiadono ma dodihiraino de Una winiahoko nia ngongakuino, la gea ahao nia baha adonoka de gea ena ahao niamake. De gea winiahoko o Abari ma Rorahaiino abe ngomi ma dihira minihingahuoka genangoka. Abe ma oraha gea ngini niodafongoka o Abari ma Rorahai de gea Ma Jou waputuhoka wato ma titi Ma Jou o Womahino winitingakino la gea nidadi to Una ai nyawa de niwileleani ka Unangika dika. Ho mangale ma titi nia leleanino de nia ngongaku abe ma gou-goungino hiadono ahao ka idadi nginioo niamake ai medebini ma dararono angamoi ahao ma wange gea de ngini naga nanga Baluhu idodutuoka.
Ahi ngofaka o Timotiusu, ngohi duru toigo de togahoko la ngona ka nomagoo-gogerohi o Efesusu ma kotakahi de bole-boleohi nanoaika ma kota gea. De ahi gogahoko naa ka imakadaene dika abe ma dihira ma oraha ngohi o Makedonia ma tonakika toiki. Abe ma oraha gea duru togahoko la nogogerohi genangoka mangale ma titi naga o nyawa yamuruono naga o Efesusu ma kotaka gea abe yadoto-dotoko ko itiaiua. Abe manga dodotoko gea ka ma homoa dika de ko iwa ma titi. Ona yodotoko ma titi abe to ona manga totofora manga roma-romanga kohangoe ka hiadono manga tofora o Abarahaama de o Isaka, abe duru agorakiye ma roma-romanga gea. Masara gea yodiai dika o ade-ade ma titi manga totofora gea, de genangino yodotoko o nyawaika. Masara gea ma ade-ade ko igou-goungua. Ho ona gea kiani ngona natogumu la ibootohi yodotoko. Abe ngona kiani nataere onangika nato, “Ibootohi ngini niadotoko o nyawaika ma titi o totoade de ma titi o nyawa manga totofora onagona honanga.” Hokogea kiani nataere onangika gea angamoi manga dodotoko gea yodiai la o nyawa yomaketeliliara dika. De manga dodotoko hokogea ko yahigaroua o nyawa la yaniiki Ma Jou ai behehongo onangika. Ho nako hoihene manga dodotokino, gea duru ko inaduhunua. Angamoi abe inahidumutu hokokia haniiki Ma Jou ai behehongo ngoneino, gea duru ka nanga ngongaku ma dodotokino dika.
De duru ena gea ma titi hiadono toigo ngona nomagoo-gogerohi genangoka la nadotoko o nyawaika ma titi o dora. Angamoi ngohi duru toigo la hiadono o nyawa o Efesusoka gea naga manga dora ilaku manga hidogoronaka. Abe nako hiadono nanga dora ka idadi hokogea ilaku, la gea ngone kiani naga nanga hininga ma debi-debini, de kiani naga nanga ngongaku ma gou-goungu Ma Jouiye, de abe ma oraha nanga hininga ka de itemo de inahigaro ma totiaiika, ena gea kiani haniiki. Nako hokogea ngone, de ahao ka idadi nanga dora ilaku de itagi o nyawa utuika.
De ufa ani datoroka naga ma titi hiadono o nyawa iningelo ngonaika ma titi ngona ka o goduuruohi dika. Masara koaho to ngona ani wowango ma totiai naga la hiadono ona ka idadi yomaaduru abe hoka ngonali ani wowango. Abe ngaro ani demo, de ani datoro, de ani dora o nyawaika, de ani ngongaku, de ngaro ani hininga ma hohailoa, ma, kiani gea mata-mata itiai Ma Jou ai himangoka la hiadono nia gogianongoru gea ka idadi yomaaduru abe hoka ngonali ani wowango.
De nako o ngofeka momatengo imitimonoka, gea de ahao ka idadi nomihigaro munangika abe imaketero hoka to ngona ngoni meme nomihigaro. De nako naga momatengoli abe hatoli ka o goohi eko naga ka o moholehohi, munangika nomiduhunu abe hoka to ngona ngoni firanga o dodotoli nomiduhunu, ma iti nomahitiari la ani hininga ka irorahai dika abe ma oraha nomiduhunu munangika.
De nako o Abarahaama, mangale unangoo wingaku ho wihingounu abe ma oraha Ma Jou wihibehehongo unangika wato kiani wanoaka ai tonaka de woiki o tonaka moiikali abe ahao ma tonaka gea Ma Jou wihidoaka unangika la idadi to una ai tonaka. De gea wihingounu de wosoboka, ngaro ma oraha wosobo de ko wohiorikuahi abe ai dumutu gea ma tonaka o kiaka idateke.
De gea ai wowango ma dodagi mata-mataika de duru wihingounu ai Babaika ho hiadono duru itiai o Yesusu wodadi nanga Hidemo Ma Jouika, angamoi duru ko iwa ai kuranga Unangoka. De hokogea Una ka wakunu wonaduhunu la ngone abe naga nanga hingounu Unangika, gea ngone ka idadi howango ka hiado-adonika, de gea nanga wowango ma titi ka Unangoka dika.
De gea ma rorahai ahao niamake Unangino angamoi hohioriki Una gea duru itiai dika ai putuhu abe ma oraha waurusu o nyawaika. Ho mangale to Una ai putuhu ka itiai dika, ho Una duru ko wawohangua nia datoro ma rorahai, masara ahao ngini niamake nia utumu genangino. Abe ti ngini nia karajaanga abe nidiaioka Unangika de abe nia dora Unangika itagioka ma titi niatobaleleani nia gogianongoruika ma dihirainohi ka hiadono ma oraha naa naga. De gea nia datoro mata-mata duru ko wawohangua, masara ahao nia utumu Unangino niamake abe ma titi nia datorino gea.
Ho genangino de ka idadi hamake abe barikua ngaro o kabingi ma awunu masara genangino de ka idadi o nyawa yahitebini manga badangino la yomahuba Ma Jouika. Hongoli nako to Kristusu ai awunu! Abe genangino de ka idadi inahitebini ngone nanga hiningaka. De gea inahitebini nanga hininga la ibootohi nanga datoro ma homoa haniikohi nanga wowangoka, masara ka idadi ka Unangika dika homahuba de hileleani abe Una gea wotobawango ka hiado-adonika. De abeika ngone hafikirohi o Kristusu ai huhuba gea ma titi ngone. Abe Una wapake to Ma Jou o Womaha ai kuahaino abe naga ka hiado-adonika, la genangino ka idadi o Kristusu womahidoaka Ma Jouika. De gea Una wodadi imaketero hoka o huhuba moi abe duru ko iwa ma howono eko ma heluku, la gea Ma Jou duru wosanangi wodafongo ai huhuba gea. De gea ma titi hiadono to Una ai huhuba gea duru inahiutumu ngoneino, la ngone ka idadi homahuba Unangika ka hiado-adonika.
Ho ngini niatingakika nia datoro de nia hininga ma dodorou eko ma pese-peseke o kia dika abe nagahi nginioka, de nimahitipokouku nia hiningaka la nianiiki Ma Jou ai hingahu ma demo abe Una wodatomoka nginioka. Angamoi nako ai demo gea ngini nianiiki, genangino de ka akunu iniduhunu o howono ma kuahaino.
De ngini kiani nimahitigi Ma Jouino la nimagahoko ai duduhunu Unangino. De gea ahao Unangoli womahitigi nginika abe ma titi winiduhunu ai hininga ma owaka de aino. De ngini o howo-howono ma nyawa abe nia wowango ma datoroka de nimahipesekoka, gea kiani nimahitebini la nia wowango itebini. De abe ngini nia hininga ka hinootohi ma titi nia ngongaku ma dumutu, gea kiani nimaputuhoka la ka Ma Jouika dika niwinii-niiki nia hiningaka.
De ngini naa duru ma dodihiraka de Ma Jou o Baba winihiorikokau abe ngini ahao nidadi to Una ai nyawa duru ma hohailoa. De ipahaino de idadi hokogea, abe Ma Jou o Womaha winitingaka ngini o nyawa manga hidogoronaka de aino. De abe Una winitingaka ngini, gea to Una ai hininga ma dumutu la ngini duru niwihingounu Unangika. De ufa ngini niawohanga abe o Yesusu Kristusu womahidoaka la ai awunino de ngini ka idadi niwiniiki de niwihingounu Unangika. De hokogea Ma Jou winiao nginika ma titi ma dodihirakahi de ngini winihiorikokau abe ahao nidadi to Una ai nyawa duru ma hohailoa. De ngini naa to Una ai nyawa abe tinihurata nginika. De naa ngohi tinigahoko Unangiye la ahao to Una ai hininga ma owa de ai hininga ma miriidi gea duru ma amoko winihidoaka nginika.
Ho nako ngini niwango hoka Ma Jou dika ai gogilaongo, gea kiani nia wowango hokonaa. Abe ngini kiani naga nia horomati o nyawa mata-mataika, De kiani nimakodora nia gogianongoru o ngongakuoka, De kiani nia horomati naga duru kohaamoko Ma Jouika, De ngaro ma kokoano o duniaka masara kiani onangikaoo niahoromati.
De naga moioli ahi behehongo abe ma dumutu ngini o feka-fekatika. Ho ngini o feka-fekata tinihibehehongo la niahigihene nia roka-rokatika. De ngaro naga nia rokata abe ona ko yodafongua Ma Jou ai Demo-demoika, masara ngini niahigihenohi onangika la ona ahao iwingaku nanga Baluhika ma titi ti ngini nia wowango ma datorino. Angamoi marai nia rokata inilega-lega hiadono yomafikirohi ma titi nia wowango ma datoro ma debi-debini de nia horomati ma amoko onangika. De gea ona ma bahauku de ngaro ko niadotokua ma titi nia demoino onangika masara ka idadiohi ona iwingaku nanga Baluhu idodutuika.
De naa ahi behehongo moiokahi abe tinihibehehongo ma titi nia gogao nia gogianongoruoka. De gea ngini mata-mata kiani nimahiketehiningamoi, de nako naga nia gianongoru abe yamao yohuha manga hiningaka eko yogarago, masara nginioo nia hiningaka de hoka niamao abe imaketero hoka to onangoli manga hiningaka. De kiani ngini nimakodora nia gogianongoruoka abe de nia hininga ma mobole de ma dodipokouku.
De naa, ahi gogianongoru, ka idadi utuohi tinihitararono abe ma titi nia kangela abe niaohana ma oraha naa. Abe nia kangela gea idadi ma dodunguu la ngone hohioriki abe duru itigioka ma oraha la Ma Jou watailako o nyawa. De abe ma oraha Una watailako o dunia mata-mataika de nagali abe wonahigunoa la ngoneoo to Una ai nyawa nanga dodotoko ma dubuho inadaene. Angamoi Una woigo wonahitiari nanga kangelaino gea la utuohi nanga wowango hao itiai to Una ai himangoka, ho wonahigunoa la o kangela inadaene ngoneuku. Ho mangale ma titi imulaengoka abe nanga kangela ma ngoe haohana, gea hohioriki abe itigioka ma oraha Una watailako o dunia mata-mataika. De abeika ngaro ngone abe hodadioka to Una ma hirete ai nyawa masara o kangela inadaene. Ho hongoli o dunia ma nyawa manga kangela kohadubuho yadaene onanguku! Abe o nyawa gea ko ihigihenua Ma Jou ai Abari ma Rorahaiika, ho duru ka to onangohi manga hohowono ahao itubuho onanguku abe ma oraha Una watailako ona manga wowangoika!
De naa moi ahi demo kiani nihitihira angamoi ka enangohi ikurutiye, de gea ngini ka nigila-gilahi nimakokodora de nia dora duru kohaamoko nia gogianongoruika. Angamoi ngaro idadi abe nanga gogianongoru duru ma ngoe inihowono nginika, masara nako ngini nimakodora, gea ahao nimahikokinginioo ka idadi nimahikokoofi nia gogianongoru manga howo-howono gea nginika.
De gea ngaro nia hiningaka imakiniikoka de to Ma Jouoli ai hininga, ma gea ka nimahidogohi abe nimakodora nia gogianongoru o Yesusoka abe imaketero hoka o ria-dodoto o tau moioka yomakodora. De ngaro nia dora itagioka nia gogianongoruika, masara kiani ka nimahidogohi la o nyawa mata-mataika niadora.
De nako ngone o nyawaka de naga womatengo abe ko ma moiuahi homakamake de una, gea ko iwahi nanga gogao unangika. Masara nako ngone de Ma Jou, gea imakohowono. Angamoi ngaro ngone o nyawa ko moiua himake de nanga lako, masara Una gea ka idadi womanoa ngoneoka de to Una ai dora enangoo ka idadi imanoa nanga hiningaka de duru ingodumoka. Ho ngone naa koaho homakodora ngone de nanga gogianongoru. Angamoi iti ngone homakodora de ka idadi nanga gogao ma rahai Unangika.
De abeika ngone hafikirohi ma titi nanga dora gea. Abe nako o nyawa yomahingahu ato, “Ngohi naa tidora Ma Jouika,” masara ngaro manga demo hokogea ma ona iwidohata manga gianongoruika, de ona gea yoeluku dika de ko yagoungua iwidora Ma Jouika. Angamoi nako ngone ko hadoraua nanga gogianongoruika abe ona ka idadi hamake de nanga lako, ho gea done sarakia de hidora Ma Jouika abe Una gea duru ko himakeua de nanga lako? Gea ko idadiua!
Ahi gogianongoru abe duru tinidora nginika, ngone naa irahai homakodora, angamoi o dora ma titi gea Ma Jouoka de aino, ho Una gea abe wonahiakunu ngone la ka idadi homakodora de nanga gogianongoru. De nako o nyawa yomakodora gea yomahitaanoka abe ona iwihioriki Ma Jouika de abe manga wowango ma hungi yamakeoka Unangino.
ကြော်ငြာတွေ