De ahao o Yesusu wahitiari onangika wato, “Ho naa tinihitiari moioli abe ma titi o nyawa ihingaku-ngaku Ngohino de abe tahiromanga to Ngohi ahi ngofa-ngofaka la tato ufa ngini niaemono onangika. Abe ngaro o nyawa ihingaku-ngakuoka ma manga gogere ka ma dodipokouku dika, masara ufa niaemono ahi nyawaika. Angamoi tinihingahu abe ona ihingaku-ngakuoka de daku o Horogaka naga to ona manga malaekata abe yatobapaliara onangika. De to ona manga malaekata ka ihikaika naga ahi Baba ai himangoka, ho koaho ngini onagona dika de ufa niaemono to Ngohi ahi nyawaika gea.”
1 Korintusu 8:9 - Ma Jou ai Demo-demo o Totobelohoka9 Masara ngaro ma inomo gea ko kia-kiaua, ma ngini kiani duru nimahidodiai done o bebeleke nidiai nia gogianongoruika. Abe ngini utu nihiorikoka ka idadi ma roehe gea niaolomo dika, masara ngini utuoli ko nimahigunoauahi la ma roehe gea niaolomo angamoi genangoka de done niato niahowono Ma Jouika. အခန်းကိုကြည့်ပါ။ |
1 Korintusu 8:9
27 ပူးပေါင်းရင်းမြစ်များ
De igoungu ma titi nanga ngongakuino ho hiadono duru hohioriki abe Ma Jou ko wonahohowonua abe ma titi o inomo o kia dika haolomo. De hokogenangoo nako naga nanga datoro moi hodiai de genangino ko hatilakurua to Una ai mau, ho enangoo ma ko wonahohowonua. Masara nanga gogianongoru utu naga abe ona manga ngongaku ko ibaluhuahi, de ona ato koaho ka yaniikohi ma hiaturu abe ka ma dodihirainohi done manga hohowono yadaene. Ho kiani ngone abe nanga ngongaku ibaluhoka homatongohono dika de ufa homaketeribuutu de nanga gogianongoru abe manga ngongaku ka iboleohi. De ufa to ngone dika nanga mau haniiki la homahisosanangi,
De igoungu nako ka ti ngini nia hiningaka ko inihipusingua ma titi ma inomo gea, masara bote o nyawa gea ona manga hininga ipusingoka. Abe nako ngohi naga o nyawa manga tauoka de naga o roehe yakelengauku ahi himangoka, de ahao ihihingahu ngohino ato ma roehe gea ihihubaka o pangaoika, masara tanu gea ma roehe ka idadi dika taolomo. Masara nako ngohi ma roehe gea ka taolomo, gea de ahao o nyawa utu ka idadi ihihohowono ngohino, ngaro ngohi ma hirete tohiorikoka abe Ma Jou wohihigunoa la ma roehe gea ka idadi taolomo.
De bote ahao ma moiukuoli de idadi hokogea. De bote ngini utu niwohama o pangao ma tau ma goronaika de niolomo genangoka. De ngini nia tobahioriki naga, abe duru nihioriki doka nia hiningaka abe gea niaolomo de ko niahowonua Ma Jou ai himangoka. Masara de ahao naga nia gogianongoru utu yoboa genangika de nako yomalega o pangao ma tau ma goronaika de inimake naga niolo-olomo ma goronaka gea. De nia gogianongoru gea ko ihiorikuahi abe ko iwa ma howono ma titi nanga inomo o kia haolomo. Gea ona ko ihiorikuahi ho ona yomatemo ato, “Abeika nanga gogianongoru gea manga inomoka dika gea de yahowono. Nako onangoo hokogea, marai ngoneoo ma ka idadi haolomo de hahowono dika hoka onangoli.” Hokogenangoo yomatemo manga hiningaka mangale ti ngini nia datoro yamake de gea yahigaro o howonika.
Ho nako nia gogianongoru utu ato bote hokonaa de hokonaa de hahowono, de ngaro ngini de ngohi hohiorikoka gea ena ko hahowonua, ma gea ufa ngini niahigaro onangika la hokogea yodiai. Abe nako ngini niahigaro onangika la hiadono yodiai gea abe ona ihiromanga ato o howono ma ka yodiai, gea ngini niahowonoka. Abe ngini ma titi hiadono ona yodiai moi abe yamao yahowono. Ho gea hiadono ngini niahowono nia gogianongoruika de ka hiadono niahowono ilamoko o Kristusikaoo.
De nako ngohi naga nanga gogianongoruoka abe to ona manga tobahioriki nanga ngongakuoka ka ikurangohi, de ahao ngohi hoka onangoli la onangoo gea ka idadi taduhunu la hiadono utuohi ona manga ngongaku ibaluhu. Ho, ngaro o nyawa hokokia dika naga, ma ngohioo hokogea abe hoka onangoli mata-mata la tato ona utu ka idadi taduhunu Ma Jouika.
Marai koaho irahai ngomioo miniao ngini hokogea abe ma oraha ngomi naga nginioka! Masara ngohi ihimaleke angamoi kiani tomangaku abe ngomi naa ko iwa mia domoroini la miniao ngini abe hoka onangoli iniao nginika! Hiokoo ngomi miniao de mia hininga ma rorahaiino dika! De naa tinihihohininga abe ahi demo kangano nginika, abe tato iti ufa niawohanga abe ahi demo naa, ena gea tanu o bodo ma demoino tapake. De abe ma titi ona gea abe yoboaino, ngaro ma titi manga gogere eko o kia dika utu naga abe ona yomahigiriiri genangino masara gea ngohioo ka idadi tomahigiriiri genangino.
Abe nako naga nanga gogianongoru o kiaka dika de manga ngongaku ibole, de gea ngohioo ahi hiningaka tamao ihiboleoka. De nako hiadono toihene naga o nyawa abe yahirehene hiadono yoruba o howonika, gea to ngohi ahi hininga ma ngamo ifaeoka. De hokogea ahi badanga ma kokangela de ahi hininga ma huha abe tamaoka ahi wowango de ahi leleani ma goronaka.
Ahi gogianongoru, ahi demo nginika hokogea ma buturungu angamoi ngini winiahokoka Ma Jou la gea winihihohe ngini o pareta ma papakitino. Ho gea ibootohi nimahinganono genangika la niato genangino de Ma Jou winidafongo. Masara gea ngaro winihihoheoka nia papakitino ma ufa genangino nihititi hiadono nimahigunoa la nia badanga ma hafini ma dorou nianiiki de hiadono niahowono. Masara koaho ngini mata-mataika nimaketeleleani de nimakokuduhunu ma titi nia doraino.
Ahi gogianongoru, ngini kiani nimaagoana done o nyawa abe yotobadotoko o ngelu-ngeluku ma homoa de ona gea ahao initaurino nia hininga de hiadono inihiloara abe to ona manga dodotokika. Abe to ona manga dodotoko gea tanu o nyawaka de aino dika, abe ona o dunia ma biaha yatobadotoko de yomafiki-fikiri hiadono manga hininga ma tobahioriki dika yamake, de genangino yadotoko o nyawaika. Ho manga dodotoko gea duru imakohowono de o Kristusu ai dodotoko.
De abe ahi demo kangano nginika tato kiani niahigihene o poparetaika, gea ufa niataoko ihowono ahi demoino. Angamoi ko ahi hiningaua la ngini nidadi o gogilaongo o popareta ma nyawaika. Hokogenangua ahi hininga ma dumutu, masara tanu tinihigaro nginika la ufa nimahidadi o nyawa utu manga gogilaongo, ma koaho nidadi to Ma Jou dika ai gogilaongo. Abe ma titi ngini ka idadi nimangiriki la ma rorahai dika nitobadiai nia boriwowangoka, ho ngaro ufa dika de ma dorou nimangiriki la nianiiki enangika.
De gea yadotoko onangika ato, “De ngone naa hingakuoka Unangika, ho ngaro ibootohi haniiki o hiaturu de o pareta de o hitiari ngoneino. Ho gea o kia dika hato hodiai, gea ka idadi hodiai dika. Angamoi ngoneoka duru ko iwa o pareta o kia dika abe inahipareta.” Hokogea manga higaro ma demo abe yadotoko onangika abe ahao yomulaenge yomatingaka manga wowango ma dorouino. De ngaro hokogea manga sade ma demo abe yomahingahu ato moioo de ko iwa abe yahipareta onangika, masara abeika ona gea tanu yodadioka o gogilaongo abe manga hininga ma dorouika. Abe imaketero hoka o gilaongo kiani yahigihene manga dutuika, hokogenangoo ona naa kiani naga manga hingounu manga hininga ma dorouika angamoi ena gea idadioka to ona manga dutu. De manga hininga ma dorou ena gea abe yahibinaaha onangika. Angamoi manga hiningaka ma dorou gea yahikalaka ho hiadono yahipareta onangika. De gea duru itaana abe o demo ma dulu itemo ato, “Abe o kia dika naga inahikalaka, de enangika gea ngone hodadioka to ena ma gilaongo ho ena dika inahipareta.” Hokogea itemo o demo ma dulu, de hokogea idadi onangika abe yotobadotoko ko itiaiua. Angamoi ngaro yomahingahu ato duru ko iwa abe yahipareta onangika, masara abe igoungu gea to ona ma hirete manga hininga ma dorou yahiparetaka.
De masara naga utu ahi dodaere ma titi nginika. De ngini ka niahigunoa o nyawa utu nia hidogoronaka abe ona yanii-niiki o Nikolausu ai rerehene ma dodotoko. De nako to ona manga dodotoko, tanu gea ngade-ngade imaketero hoka ma dodihiraka o Bileama ai rerehene, abe una gea ma dihiraino wahirehene o Isiraele ma nyawaika ma titi o Balakino. Abe ma oraha gea o Bileama widotoko o Balakika abe hokokia wodiai la o Isiraele ma nyawa yoruba de yahowono Ma Jouika. De gea o Bileama wahigaro la ona o pangaoika yaniiki abe yaolomo o inomo abe ihihubaka o pangaoika, de nagali abe wahigaro la o howono manga badangoka yodiai. De hokogea idadi o Isiraele ma nyawaka abe duru ma deka-dekanuku. De naa ngini nimaketero dika abe hoka ona o Isiraele ma nyawa ma oraha gea, angamoi nginioo niahigunoa o nyawa utu nginioka abe ona yanii-niiki o rerehene ma dodotoko, de ona gea inihigaro nginika la ato nginioo niruba de niahowono Ma Jouika.
ကြော်ငြာတွေ