1 Korintusu 8:4 - Ma Jou ai Demo-demo o Totobelohoka

⁴ Ho naa ngohi topaluhu ma leleha abe ma titi o aewani ma roehe gea abe o nyawa yomahihuba manga pangaoika. De ngohi duru tohioriki abe genangoka o Korintusu ma kotaka de naga o nyawa duru manga ngoe abe manga biaha yatobaolomo ma roehe gea abe ihihubaka manga pangaoika. De ngone hohioriki manga pangao gea ko kia-kiaua, abe ena gea ko Ma Jouua de duru ko iwa to ena ma buturungu o duniaka naa. De ngone hohioriki Ma Jou Una ka womatengo dika.

1 Korintusu 8:4 ပူးပေါင်းရင်းမြစ်များ

Maruku 12:29

De o Yesusu wipaluhu wato, “Ma pareta abe itemo hokonaa ato, ‘Abeika ngini o Isiraele ma nyawa nitotoihene, nanga Jou o Yawe, Una gea dika to ngone nanga Jou, de ko iwa utu!

Hidingoto 14:15

Abe yotemo ato, “Mia gogianongoru, ngini naa adodoa ho niato nidiai hokonaa? Angamoi ngomi naa ka o nyawa biaha dika imaketero hoka nginioli! De ngomi miboaino nenangino la o Abari ma Rorahai minihingahu-ngahu nginika, la ngini nia popangao nianoaka. Angamoi ena gea mata-mata ka parahaja dika! Ho gea nianoa dika la nimangali Ma Jouika abe Una duru wotobawango! Abe Una gea wotobatulaada mata-mataika, abe ngaro daku ma dihangoka eko ma duniauku naa de ma gahi de gea mata-mata ma dola, masara ka Una dika wotobatulaada mata-mataika!

Hidingoto 15:20

Angamoi tanu naga o pareta muruono naga dika abe koaho ona yanii-niiki la yahisanangi manga gogianongoru o Yahudi ma nyawaika. Ho koaho ngone o hurata moi hodiai de hahidingoto onangika abe nanga huratoka de hahuloko la ma pareta naa kiani yaniiki. Abe ufa yaolomo o aewani ma roehe abe ihihubaka o pangaoika, de ufa yomakitigi ko itiaiua. De nako naga o aewani abe o nyawa yahookoko la yatoma enangika, gea ko idadiua yaolomo to ena ma roehe. De o aewani ma awunu ma enangoo ko idadiua yaokere eko yaolomo.

Hidingoto 19:26

De marai nihiorikoo abe naga womatengo o dionikino ma nyawa nanga kotaka naa abe ai romanga o Paulusu. De una gea duru wonahikangela nanga karajaangino. Angamoi una gea ma titi ai dodotoko ma demoino de wahigaro o nyawa ko manga ngoeoka wato o popangao gea tanu ko o jou ma gou-goungua angamoi o nyawa manga giamino de idadi! De hokogea idadi ko o Efesusu ma kotakaua dika masara nanga tonaka mata-mataika de o nyawa iwihigihene unangika gea!

1 Korintusu 8:1

De naa ka idadi ma titi moioli topaluhu abe nengokadau ngini nihileha ngohino. Abe ma titi o aewani ma roehe yomahihuba manga pangaoika. Gea ngini nihileha niato, “Sarakia, itiai Ma Jou ai himangoka ma roehe abe yomahihubaka manga pangaoika de ena gea ka idadi haolomo, eko ko itiaiua?” De ahao ngini nimahingahu niato, “Ngone mata-mata naga nanga tobahioriki ma titi ma roehe gea.” De gea ngini niagoungu nimahingahu, abe ngone mata-mata igoungu naga nanga tobahioriki, de gea hohiorikoka abe ma roehe gea ka idadi haolomo de gea ko hahowonua. Masara naa tinihitiari ma titi nia tobahioriki angamoi gea ngini duru ka ifoloiokaholi niagoraka. Abeika, nako o nyawa manga tobahioriki, gea yagorakiye ona ma hirete hiadono yomahigiriiri. Masara nako o dora, hokogenangua. Abe o dora gea inahiputurungu to ngone nanga wowangoka. Ho ngaro ngini duru nioigo niatihira o tobahioriki, masara ho koaho o dorahi niatihira angamoi done nimagoraka dika.

1 Korintusu 8:10

De bote ahao ma moiukuoli de idadi hokogea. De bote ngini utu niwohama o pangao ma tau ma goronaika de niolomo genangoka. De ngini nia tobahioriki naga, abe duru nihioriki doka nia hiningaka abe gea niaolomo de ko niahowonua Ma Jou ai himangoka. Masara de ahao naga nia gogianongoru utu yoboa genangika de nako yomalega o pangao ma tau ma goronaika de inimake naga niolo-olomo ma goronaka gea. De nia gogianongoru gea ko ihiorikuahi abe ko iwa ma howono ma titi nanga inomo o kia haolomo. Gea ona ko ihiorikuahi ho ona yomatemo ato, “Abeika nanga gogianongoru gea manga inomoka dika gea de yahowono. Nako onangoo hokogea, marai ngoneoo ma ka idadi haolomo de hahowono dika hoka onangoli.” Hokogenangoo yomatemo manga hiningaka mangale ti ngini nia datoro yamake de gea yahigaro o howonika.

1 Korintusu 8:11

Ho mangale ma titi abe ti ngini nia tobahioriki hatoli ilamoko de nia gogianongoru gea manga tobahioriki hatoli ihutulu, done genangoka dika ma titi hiadono nia gogianongoru manga wowango ngini nihirusaka. Duru hiokoo nako idadi hokogea, angamoi o Kristusu wohonenge ma titi nia gogianongoru gea, masara de ahao nginioli niahiruba!

Galatia 4:8

Ho igoungu ngini naa nidadioka Ma Jou ai ngofa-ngofaka idodutu, ho done ma titi o kia ho hiadono nia hininga niato nimahidadioli o gogilaongo abe hoka ma dodihirainoli? De abe nako ma dihiraino, gea ngini ko niwihiorikuahi Ma Jou, ho gea ngini nidadi hoka o gogilaongo enangika abe o nyawa utu ihiromanga ato o jou, masara gea ena tanu igoungu ko o jouua. Masara ngini ma oraha naa de niwihiorikoka Ma Jou idodutu, eko, iya, koaho totemo tato gea Una abe winihioriki nginika. Ho mode gea ena de ngini niato niogilioli abe o pareta de o duniaka naa ma hiaturu! Angamoi genangino ma kuaha de ma utumu duru ko iwa, ho gea ena duru ka parahaja dika hanii-niiki. Ho bote ngini duru nioigo nidadi o gogilaongo genangika e?

Efesusu 4:6

De gea to ngone nanga Jou de nanga Baba, Unangoo ma ka womatengo dika, abe Una gea ngone mata-mataika wonahipareta, de gea Una womanoa nanga kokibadangoka, de abe wokarajaangoo nanga kokiwowangoka. Ho gea ma titi hiadono nanga rimoi kiani hohidodiai hoogoana angamoi ngone naa igoungu hodadioka o badanga moi.

Higalioli 3:24

‘Mia Baluhu idodutu o Yawe, ngohi duru tohioriki abe to Ngona ani datoro duru de ma kuaha kohaamoko de abe ani giama duru kohabuturungu. Abe ani datoro gea utu ngohi ani huhuloko tamakeoka masara duru tonganono abe nagahi ani datoro abe utuohi ikokurutiye de ihohailoa. De boteua ko iwa o jou utuoli o Horogaka ekola naa o duniauku abe yakunu yodiai manga datoro abe hoka to Ngonali ani datoro!

Higalioli 32:39

Ho naa abeika nimalega Ngohino la duru nihioriki Ngohi naa o Yawe! De duru ko iwa o jou utu yomakadaene hoka Ngohioli! Abe Ngohi dika ka idadi tahohonenge de tohiwango, de ka Ngohi dika takunu tahiodiri de ahao tahitogumoli. Nako hiadono ahi kuaha itagioka, moioo de ko iwa ka idadi ihitatoko eko ihilawana Ngohi.

Higalioli 4:35

De ai datoro gea winihimatoko la genangino de winidotoko nginika abe nanga Jou Una gea o Yawe de duru ko iwa o jou utuoli abe yagou-goungu Ma Jou.

Higalioli 4:39

“Ho o wange naa ngini kiani niongano-nganono de ufa niawohangika abe nanga Jou o Yawe ka Una dika Ma Jou o Horogaka de o duniauku naa. Duru ko iwa utu nanga Jou!

Higalioli 6:4

De o Musa ka wotemohi onangika wato, “Abeika hototoihene, o Isiraele ma nyawa mata-mata! O Yawe Una gea dika to ngone nanga Jou, de ko iwa utu!

1 Timotiusu 1:17

De naa tihigiriiri nanga Koanoiye, abe Una gea naga ka hiado-adonika, de ko iwa ai bobaha. Abe Una duru ka womatengo dika Ma Jou de Una ko himake-makeua de nanga lako. Ho Unangika dika kiani nanga higiriiri de nanga horomati hohiboa naa de ka hiado-adonika. Amin.

1 Timotiusu 2:5

Abe ma gou-goungu gea hokonaa. Ma Jou Una ka womatengo dika, de nagali nanga hidemo abe Una wakunu wonahiketerimoi ngone o nyawa de Ma Jou, Unangoo gea ma ka womatengo dika. De ma nyawa womatengo gea o Yesusu Kristusu.

Yudasa 1:25

Ho gea duru itiai abe ngone hihigiriiri Ma Jouika. Angamoi ka Una dika Ma Jou nanga Duduhunu, de utuikali ko iwa. Ho gea duru itiai abe nanga Baluhu idodutu o Yesusu Kristusino de hihigiriiri Ma Jouika, angamoi ngaro ka hiado-adonino eko ngaro ma oraha naa naga, eko ngaro ka hiado-adonika, masara Ma Jou dika abe duru de ai medebini ma dararonoka, de ngaro mata-mataika ma gea ka to Unangohi ai gogere duru ikurutiyeholi. De ka Unangoka dika imanoa ma kuaha duru kohaamoko la Una mata-mataika wohipareta de wohikoano naa de ka hiado-adonika. De gea ma titi hiadono kiani ngone hihigiriiri Unangika. Amin.