1 Korintusu 4:21 - Ma Jou ai Demo-demo o Totobelohoka

²¹ Ho naa tinileha, Sarakia ngini? Ngini nioigo la ngohi toboa nginika de o boboha tomagao, ekola koaho ngohi toboa de o dora de o hininga ma bole-bole? Iti ngini. Nako tomahiadonoka de nia hininga hoka ma dihirainohi, gea kiani tinihohowono. Masara nako nia hininga niaturuuruoka, gea ka idadi tinihigaro dika de ahi dora ma demo. Gea iti ngini dika nia ngiriki.

1 Korintusu 4:21 ပူးပေါင်းရင်းမြစ်များ

1 Korintusu 4:18

Ahi gogianongoru, ngohi tinihioriki abe nginioka naga utu abe duru nimagorakiyeoka, ma titi bote ngini niato ngohi ko toboakaua nginika.

1 Korintusu 5:5

de ahao una wahowo-howono gea hitingakoka ti ngini nia doomuino de hihigunoa la una gea ai badanga o Ibilihi ihibinaaha. De hokogea hodiai unangika la hato ai jiwa gea ahao Ma Jou ka wodafongohi abe ma wange nanga Baluhu woboali.

2 Korintusu 1:23

De abe nengokadauino de igoungu naga ahi hidee la tinitutumu, ho naa tinihingahu nginika ma titi o kia idadi ngohino hiadono ko tinitutumua. De naa ngohi tohibehehongo de tafetongo Ma Jou ai romanga abe Una ma hirete wodadi to ngohi ahi hakihii abe ngohi ko tinielukua. Ho ngohi duru tagou-goungu abe ahi demo nginika. Ho naa tomahingahu tato ngohi ko tolioua nginika angamoi tato done ngohi duru tinitaere nginika de o dodaere ma dubuho. Angamoi ngohi tomahioriki abe nako ma oraha gea toboa nginika de ahao duru tinitaere, ho tomaputuhu la ngarouahi toboa tinitutumu ngini o Korintusoka done tinihitubuho nginika. De abe ma titi gea duru ko tinielukua.

2 Korintusu 10:6

De abe ma titi ngini naa, ngomi duru mioigo la ngini niwihingounu Unangika, ho minihidoakohi nia oraha la ka idadi niwigilio de niwiniiki nanga Baluhika. Masara nako ahao ma oraha mimahiadono nginika de gea ngomi mimahidiaioka la minidotoko de ma dubuho abe ngini onagona dika ko niwihingounua Unangika.

2 Korintusu 10:8

De naa ngohi tamao abe ka tomahigiriiriholi ma titi to ngomi mia tagongo de mia kuaha nanga Baluhoka, de ngaro totemo hokogea masara ko ihimalekua. Angamoi ma kuaha gea nanga Baluhu idodutuoka de aino womihitagongo ngomino la minihiputurungu ngini nia ngongakuika, de ko ma titiua la ngomi minihirehene o homoaika.

2 Korintusu 12:18

De nengokadau ma oraha o Titusu tihigaro la woiki winitutumu, de nagali nanga gianongoru womatengoli abe yomakiniiki yoboa nginika, sarakia ona? Marai ona gea inibudi nginika? Duru ko hokogenangua, angamoi nako ngohi de o Titusu de to ngomi mia hininga ka moi, de ngaro mia wowango ma dodagi ma enangoo ka moi dika.

2 Korintusu 13:10

Ho naa ngohi ko toboauahi nginika de tomahingahuoka ahi hininga ma dola abe ahi hurata naa ma demoino. De hokogea tomahingahu angamoi ngohi tonganono la ahao ma oraha tomahiadono nginika de ngaro ufa de tapake o dodotoko ma dubuho nginika abe ahi kuahaino nanga Baluhu idodutuoka. De ahi kuaha gea nanga Baluhu wohihidoakino de gea ko ma titiua la tinihitubuho hiadono tinihirehene ma hoanika, masara gea wohihidoakino la ka idadi ngohi ahao tinihiputurungoli nia ngongakuika.

2 Korintusu 13:2

De ma dihiraino abe tinitutumu ma hinooto de gea ngini utu tinihitiarioka la ibootohi nianiiki nia howono gea. De naa ko toboauahi de ma moioli tinihitiari nginika de abe onagona dika genangoka abe ona ka yaniikohi o howono manga wowangoka. De gea tinihitiari tato ahao ma oraha tomahiadono nginika de onagona dika ko yoliouahi o totiai ma ngekomika, ona gea ahao yamake manga dodotoko ngohino.

2 Korintusu 2:1

Ho ngohi tomaputuhu tato koaho ngarouahi toboa tinitutumu done ma moioli tinihitubuho nia hiningaka, abe gea imaketero hoka nengokadauino de nia hininga ma huha naga ma titi tinitutumu nginika.

2 Korintusu 2:3

De genangino ma titi hiadono nengokadau ka tinihurata dika nginika de ko toboaua, done toboa nginika de ahao ahi hininga ihuha mangale ma titi nia howono abe tamake nginioka. Angamoi nako ngohi toboa nginika, tanu irahai tamake o hininga ma garago dika nginioka. De ngohi duru tohioriki abe to ngohi ahi garago gea ihititi ti ngini nia garagoka.

2 Korintusu 3:10

De nako hohidotelega ma behehongo hinooto gea, tanu ka idadi hotemo hato ma behehongo ihira-hira ma horomati ko kia-kiaua abe nako de ma behehongo ma hungi ma horomati, angamoi naangohi duru ikurutiyeholi to ena ma horomati.

Galatia 6:1

Ahi gogianongoru, nako hoka naga womatengo nginioka abe worubaka o howonuku, gea ngini abe niwinii-niiki Ma Jou o Womaha ai mau, ngini kiani niwiduhunu womatengo gea la una wolioli o totiai ma ngekomino. De gea niwiduhunu ma kiani de nia hininga ma bole-bole unangika, de kiani nimakokuduhunu abe ma titi nia hininga ma dubuho, done naga utu abe itubuhoholi manga hiningaka. De nako hokogea nimakokuduhunu, gea ngini nianiikoka o Kristusu ai behehongo nginika. Masara ma oraha niwiduhunu unangika gea de kiani nimahitiarioo de nimahidodiai done ahao nginioo inihiata-atara de niahowono abe imaketero hoka unangoli.

1 Tesalonika 2:7

Masara nako ngomi gea mia hininga ko hokogenangua. Abe ngomi ko miapakeua mia kuaha Unangoka la miniribuutu la hiadono nimihoromati ngomino. Masara gea ngomi duru minibole-bole nginika abe imaketero hoka momatengo manga meme abe mapaliara muna ma hirete ami ngofa-ngofakika de ami dora.

Yakobusu 3:17

Masara nako Ma Jou ai sosawaro o nyawa yanii-niiki manga hiningaka, gea ahao manga hininga ka itebini iree-reeika. De nagali abe manga borigogao manga gogianongoruoka yoogoana la duru yomaketedodiawo, de abe yomakao de manga hininga ma mobole, de yomahikokongounu, de yomakuduhunu manga kangela ma goronaka, de nagali manga datoro ma rorahai utuoli ma ngoe yotobadiai. De nagali abe ona o nyawa ko yairikua, de abe yatobagou-goungu manga hiningaka ho ko ma iwa abe yomadokangelukino dika. De hokogea o nyawa manga hininga nako Ma Jou ai sosawaro o Horogaka de auku yahihira-hira onangika.