1 Korintusu 15:20 - Ma Jou ai Demo-demo o Totobelohoka

²⁰ Masara ona gea ko yagoungua, angamoi o Kristusu Una gea duru igoungu womomikoka ai honengino. Ho gea itararonoka abe ona yohonengoka ahao ka idadi manga honengino yomomiki, angamoi o Kristusu Una womomikokau. De Una o Kristusu wodadioka hoka o momomiki ma domoro, abe Una duru wohira womomiki ai honengino de ko wohonengokaua. De nako o gota ma hofoko ma domoro, gea o himatoko moi abe ahao naga utuoli itoturuino ma hofoko ma ngoe-ngoe. De gea imaketero abe hoka o momomiki, abe Una gea o momomiki ma domoro. Abe wodadi o himatoko moi abe ahao naga utuoli yohonenge yowoe-woe yototuruino ahao yomomiki abe imaketero hoka Unangoli womomikoka.

1 Korintusu 15:20 ပူးပေါင်းရင်းမြစ်များ

Hidingoto 2:24

De ngaro hokogea Ma Jou ai hidee ai Ngofakika masara ipahaino de wihihupu o hone-honenge ma kangelaino abe ma oraha wihimomiki ai honengino. Angamoi tanu o hone-honenge ma kuaha ko apoaua iwitumungu o Yesusu.

Roma 8:11

De gea igoungu abe nia badanga ahao iborihonenge, masara ipahaino de ahao Ma Jou ti ngini nia badanga gea wohimomikoli nia honengino. Angamoi ngini mata-mata de naga Ma Jou o Womaha ngini homoi-homoioka. De gea ngone hohioriki abe ma dihiraino de Ma Jou o Womaha Una gea wihimomiki o Yesusu ai honengino. Ho mangale ma titi Ma Jou o Womaha naga womanoa ngini homoi-homoioka ho ka idadi nihioriki abe ngaro ahao nia badanga naa iborihonenge masara ahao Ma Jou winihimomiki nginioo ma titi to Una ai Womahino abe imaketero hoka o Yesusoli wihimomikoka ai honengino.

1 Korintusu 15:23

De o momomiki gea naga atatoroka, abe gea ma domoro o Kristusu Una duru wohira womomiki. De ipaha de ma oraha Una woboali de ahao to Una ai nyawa mata-mata ahao yokokimomiki.

1 Korintusu 15:6

Gea ipaha de ahao o Kristusu womahimatoko nanga gogianongoruika abe ona manga ngoe-ngoeikali, abe ona yaratuhu motoa yofoloi manga ngoe yomatoomuino ka ma moi, onangikali gea Una womahimatoko. De nanga gogianongoru gea utu marai yohonengoka, masara hatoli yowoe-woe hiadono o wange naa ona nagahi.

Kolose 1:18

De ngaro o garejakaoo, masara ka Una dika o garejaka nanga haeke. Abe o gareja ma nyawa mata-mata homahinganono Unangika, ho ngone hoka to Una ai badanga, de Una to ngone nanga haeke. De Unangoo gea o gareja ma titi, abe Una duru wohira womomiki ai honengino la ko wohone-honengokaua, ho ahao o nyawa utuoli iwihidoduruino abe onangoo ahao yomomiki manga honengino de yowango ka hiado-adonika. Ho ngaro Ma Jou ai dulaadoka eko ngaro ai garejaka, masara gea mata-mataika o Kristusu ai timiuku, angamoi ka Unangohi woloku-loku de duru wokokurutiye.

1 Tesalonika 4:16

Abe ma wange gea nanga Baluhu Una ma hirete woboa o Horogaka de wauku wouti. De gea Una waamo-amokiye wohiboa-boaka de ai pareta ma demo wato, “Naa ngini nimomikoka!” De ma oraha gea o malaekata manga haeke to unangoo ai ilingi yoihene, de gea nagaoo yoihene Ma Jou ai guguli ma ilingi. De gea ka de yoihene de ahao ona yohone-honengoka abe iwingakuoka o Kristusika, ona gea manga badanga ahao yomomikoka manga honengoka de aino la ka idadi yowangoli.

1 Peturusu 1:3

De ngone kiani hihigiriiri nanga Jouika, abe Una gea to nanga Baluhu idodutu o Yesusu Kristusu ai Jou de ai Babaoo, ho duru itiai abe ngone hihigiriiri Unangika. De gea kiani hihigiriiri ma titi to Una ai hininga ma dora kohaamoko ngoneuku. De mangale ma titi ai hininga ma dora gea hiadono ngone homaboali la nanga wowango ma hungi naga Unangoka de aino. De genangoo ma titi hiadono ngone kiani hihigiriiri nanga Jouika. De mangale ma titi o Yesusu Kristusu womomikoka ai honengino, ho hiadono to ngoneoo nanga nganganono duru ko ihihangua ka hiado-adonika, abe ma titi ngone duru hohioriki abe ahao ma oraha adonoka de ngone hamake nanga utumu Unangino. Abe ma oraha naa nanga utumu gea ko hamakeuahi ho ka hongano-nganonohi.

Himatoko 1:5

De nagali o Yesusu Kristusu, abe Una gea watobagou-goungu ai hingahu ma demoino. De naa to Una ai himatoko ma dihirainohi de Ma Jou wihimatokoka Unangika, ho ma oraha naangoli de o Yesusu wohihimatoko gea ena ngohino. De ai himatoko naa ngone duru ka idadi hangaku genangika angamoi o Yesusu Kristusu Una gea watobagou-goungu ai hingahuino. De Una gea duru wohira womomiki ai honengino de ko wohonengokaua. De gea Unangoo o dunia naa ma kokoano manga Koano. Ho nanga Jouika gea abe tinigahoko ngini la ahao ai owa de ai hininga ma miriidi winihidoaka nginika. De naa ngone ngaro ka hihigiriirioka o Yesusu Kristusika, angamoi Una gea wonadora ngoneino de wonahihoheoo nanga howo-howonino abe ma oraha wohonenge de to Una ai awunu iuihi.

Himatoko 14:13

De ahao o ilingi moioli toihene o Horogaka de aino itemo ngohino ato, “Ngona kiani ahi demo naa nohitulihuku, notulihi nato, ‘Ma oraha naa de imahikaika de onagona dika abe yohonenge ma titi iwinii-niiki nanga Baluhu idodutuika, ona gea duru youtumu.’” De ahao Ma Jou o Womaha wapaluhu wato, “Gea duru igoungu, abe ona gea ahao o Horogaka de ka idadi yomahiaini manga kangela de manga karajaanga ma dubuhoino, angamoi ma titi manga karajaanga ma hasilino ho ahao genangoka de yamake manga sosanangi ma utumu.” Hokogea ma ilingi ma demo abe ngohi toihene.