1 Korintusu 14:3 - Ma Jou ai Demo-demo o Totobelohoka3 De masara nako yomatengoli yapake manga hiakunu abe yalufungu de ai kuaha hiadono ka idadi yahingahu o nyawa utuika Ma Jou ai hingahu ma demo, gea de ahao ona yaduhunu manga gogianongoruika manga ngongaku. Abe mangale ma titi manga hiakunu gea yapake la ka idadi yahiputurungu de yahilaru onangika manga gogianongoruika. အခန်းကိုကြည့်ပါ။ |
De manga biaha gea manga doomu ma getongo de naga yobasa o Musa ai bukuino o hidoku moi de ahao abe Ma Jou ai uru ma dodofanga ma bukuino enangoo o hidoku moi yobasa. De ma wange gea manga biaha yaniiki, ho yobasa ibooto Ma Jou ai Demo-demoino. De ahao ona abe yahihira-hira yahuloko manga nyawa la manga demo naa yahingahu o Paulusu de o Baranabasika ato, “Mia gogianongoru, nako naga moi nia higaro ma demo abe nioigo nimihikodoku ngomino, gea ka idadi niaino de nimihikodoku!”
De ma kota-kotaka gea de duru yahipoputurungu o ngongaku ma nyawa manga hininga mata-mataika. Abe ona yahitobahigaro la ka ihikaika o ngongaku ma dodotoko yatobanii-niiki enangika. De yahihohininga onangika ato, “Ngone hingaku-ngakuoka ko ma titiua nanga wowango ma goronaka de ma rorahai dika ka ihikaika hamake. Masara kiani nagaoo o kokangela abe haohana. De abe ma kokangela hohimangoka de ahao ika-ika hohapongo dakuiye la Una ka idadi wonahikoano ngone ai nyawa.” Hokogea manga higaro onangika.
De ipahaino de o Yudasa de o Silasa ona yotemo-temo manga gogianongoruika genangoka. Abe ona yahinooto naga manga hiakunu Ma Jouino la yatobalufungu de Ma Jou ai kuaha la ka idadi yatobahingahu o nyawaika to Una ai hingahu ma demo. Ho yotemo-temo onangika manga dekana de duru yahigaro de yahiputurungu manga ngongakuika.
De ipahainoli de o Yesusu ai gareja ma nyawa hatoli ikurangoka abe o nyawa yahikangela onangika. Ho ngaro o Yudea ma tonakoka de ngaro o Galilea ma tonakoka de ngaro o Samaria ma tonakoka, masara ai gareja ma nyawa abe yomanoa ma tonaka mata-mataika gea manga hininga ka idadi iriidi. De ona manga ngongaku ka idogo-dogo iputurungu, de ka ihikaika naga manga horomati itagi nanga Baluhu idodutuika. De nagali abe Ma Jou o Womaha ka ihikaika wahigaro ona abe manga ngongakuika. De ka ihikaika o nyawa yodogo-dogo abe iwingaku Unangika ho ai gareja idogo-dogo ilamoko.
Eko nako Ma Jou winihiakunu la niahigaro o nyawaika, gea niahigaro de nia hininga ma gahumu ma totiaiika. De nako winihidoaka nginika nia hininga la nia tiwi de nia kiahonanga niahikodoku utuika, gea niahidoaka o nyawa utuikali de nia hininga ma rorahaioka de aino. De nako winihiakunu la ka idadi nia gogianongoru utuika niahihira, gea kiani niatobagou-goungu nia tagongo niao itiai. De nako naga nia hiakunu abe niaduhunu o huha ma nyawaika, gea niaduhunu de nia hininga de ma garagoka. De hokogea tinihitiari ma titi nia borihiakunu la genangino de niwileleani itiai Ma Jouika.
De mangale ma titi ahi hitiari ma demo gea, ho ngone kiani ka ihikaika homaribuutu la homakao itiai de o dame ngone de nanga gogianongoru, ho ufa ngone homaketeribuutu. De kiani nanga hininga ma dumutu naga la ka ihikaika homahikagaro ma totiaiika la hiadono ngone mata-mata utuohi hobaluhu Ma Jouika.
De kangano tohitulihukuoka o nyawa manga demo ma dulu gea abe yotemo ato, “Nako ngohi, mata-mata ka idadi todiai angamoi o pareta ko taniikua.” De gea ngohi totemoli tato, ngaro “mata-mata ka idadi,” ma nako ngohino ko mata-mataikaua ihiduhunu. De ngaro “mata-mata ka idadi,” masara nako ngohino ko mata-mataikaua inahigaro ma totiaiika.
De duru ena gea abe idadi nginioka, abe ngini utu nitemo-temo de ma demo moioli de ngini ko moiua de utu niataoko ma titi. De ngohi tinihioriki abe ngini duru niohafini ma hiakunu abe ka Ma Jou o Womahokahi de aino la niato ahao niamake, de gea irahai. Masara kalioli niohafini ma hiakunika gea abe ka niakunu nitemo-temo de o demo moioli, masara koaho ma hiakunu abe ma garejaika yaduhunu de yahiputurungu, ho koaho ma hiakunu ka genangohi duru niohafini la ahao niamake.
Ho ngaro bote nia niniata gea Ma Jouika duru irahai masara o nyawa gea ko yamakeua ma utumu nia niniatino de ma duduhunu onangikaoo duru ko iwa. Ho nako nioigo nitemo-temo de o demo moioli gea abe ai hiakunoka de aino, ho koaho ngini nimagahoko Ma Jouino la winihidogo ma hiakunu moioli, abe ma hiakunu gea la ka idadi ngini ma hirete nihioriki nia demo moioli gea ma titi de hiadono ka idadi niahitararonoo o demo ma titi gea nia gogianongoruikali.
Ahi gogianongoru, abeika ngohi tohidotoomuino ahi dodotoko ma titi ka ma moi. Abe ngini ma getongo nimatoomuino la niwihigiriiri nanga Baluhu idodutu de ngini homoi-homoi ka idadi nihiboa nia hiakunu ma hofokino moi. Abe nginioka bote yomatengoani ato yonyanyi o higiriiri ma nyanyianga moi, de yomatengoli naga o dodotoko ihiboa, de yomatengoli bote Ma Jou ai hingahu ma demo moi yodafongo abe Una ka wobawilika wahingahu ai demo gea manga hiningaika. De bote yomatengoli nginioka ato yotemo de o demo o fara moioli, de yomatengoli naga abe ma demo gea yatobatao-taoko ma titi la hiadono manga dodiawo manga demo gea ka yakunu yahitararono ngini mata-mataika abe nimatoomuino genangoka. Masara abe mata-mata naa ena, iti ti ngini nia demo mata-mata nitemo la niato inihikokiputurungu de inihikokigaro ngini mata-mata ma totiaiika, angamoi tanu hokogea nia demo ma hidumutu. Hokogea o doomu ma hiaturu.
Angamoi ngini mata-mata abe niamakeoka Ma Jou ai hininga moi de niato niahikodokuoli nia gogianongoruika, gea ngini ka idadi nimahikokaaini la hiadono nia oraha homoi-homoi naga abe nimakokawalimi. Abe ma titi nimatengo niahingahu ibooto de ahao nimatengoli. Koaho hokogea nimahiaturu la hiadono ngini mata-mata nimadotoko manga hingahuino gea de ngini mata-mata ma buturungu de ma lalaru niakokimake manga hingahuino gea.
De naa ka idadi ma titi moioli topaluhu abe nengokadau ngini nihileha ngohino. Abe ma titi o aewani ma roehe yomahihuba manga pangaoika. Gea ngini nihileha niato, “Sarakia, itiai Ma Jou ai himangoka ma roehe abe yomahihubaka manga pangaoika de ena gea ka idadi haolomo, eko ko itiaiua?” De ahao ngini nimahingahu niato, “Ngone mata-mata naga nanga tobahioriki ma titi ma roehe gea.” De gea ngini niagoungu nimahingahu, abe ngone mata-mata igoungu naga nanga tobahioriki, de gea hohiorikoka abe ma roehe gea ka idadi haolomo de gea ko hahowonua. Masara naa tinihitiari ma titi nia tobahioriki angamoi gea ngini duru ka ifoloiokaholi niagoraka. Abeika, nako o nyawa manga tobahioriki, gea yagorakiye ona ma hirete hiadono yomahigiriiri. Masara nako o dora, hokogenangua. Abe o dora gea inahiputurungu to ngone nanga wowangoka. Ho ngaro ngini duru nioigo niatihira o tobahioriki, masara ho koaho o dorahi niatihira angamoi done nimagoraka dika.
Abe ngaro o kangela o kia dika naga ngone haohana masara Una gea wonatobalaru. De ai lalaruino gea de Una wonahiakunu la ngoneoo ka idadi halaru o nyawaika abe onangoo ahao yaohana o kangela manga wowangoka. De gea ka idadi ngone hapake ma lalaru abe hamakeoka Ma Jouoka de aino la onangikali halaru.
De nako nimakoketemo, ufa nihigunoa la o demo ma pese-peseke ihupu nia uruoka de aino. Masara nia demo mata-mataika abe nitemo, gea kiani nia demo ka idadi yaduhunu o nyawaika la hiadono ona yoaguru manga ngongakuika. De nia demo gea kiani imakiniiki de abe ona yototoihene manga perelu hokokia la nia demo idadioka o duduhunu de abe yahiutumu onangika.
De gea mia domoroini bote ma titi o kia hiadono duru minihigaro la o Abari ma Rorahai niodafongo? De gea ma titi abe ngomi mihioriki mia abari ma demo gea duru igou-goungu mata-mataika. De mia higaro ma demo gea ko ma titiua la o ngelukino, de gea ko iwa utu mia hininga ma dumutu ma dorouika hiadono ma abari gea mihingahu-ngahu o nyawaika. De gea duru ko ma titiua mia hiningaka miato miabudi o nyawaika.
masara iti ka idadi wiwihidingoto nanga gianongoru o Timotiusu nginika abe o Tesalonika ma kotaika la ka idadi una winitutumu. Abe o Timotiusu una gea wileleani Ma Jouika ma titi ai karajaangino, abe Ma Jou ai karajaanga gea la o Kristusu ai Abari ma Rorahai ihiabari o nyawa-nyawaika. De gea wiwihidingoto o Timotiusu nginika la miato una ka idadi winihigaro de hiadono winihiputurungu ngini ma titi nia ngongakuoka,
Ho naa, mia gogianongoru, ngomi minihibehehongo nginika. De gea nengokadau ma oraha ngomi nagahi nginioka de gea minidotokoka nginika abe hokokia kiani niwango la niwihisanangi Ma Jouika. De igoungu nengokadauinohi ngini naa nianiiki mia demo gea hiadono Unangika niwihisanangi. De masara naa ngomi duru minihigaro de minihibehehongo nginika ma titi nanga gogao nanga Baluhu idodutu o Yesusika, de gea minihibehehongo la ngini ka idogo-dogoli abe nianiiki mia dodotoko ma demo gea hiadono utuohi niwihisanangi Unangika ma titi nia wowango ma datorino.
Ho naa ngomi duru minihibehehongo de minihigaro de nanga Baluhu idodutu o Yesusu Kristusu ai himangoka abe ngini ko nitobakokarajaangua. De hokonaa mia behehongo nginika. De ngini kiani nia hininga iriidoka, de kiani nia karajaanga nimulaengoli niagoraka, de ngini homoi-homoi kiani nimahidailakoli nia inomo. Hokogea minihibehehongo nginika.
De nako naga o gilaongo womatengo abe ai hidimono unangoo wingaku ho hiadono yahinootoo mata-mata iwiboringakuoka, o gilaongo gea kiani ilamokoli ai leleani de ai hayanga ai hidimonika gea. Abe ngaro ona yahinooto yomaketero dika Ma Jou ai himangoka, ma ko idadiua ai horomati ikuranga ai hidimonika ma titi ai hidimonoo wingaku Ma Jouika. Hokogea ko itiaiua, ma koaho ai leleani unangika utuohi irahai angamoi gea wileleani ai gianongoru o Kristusoka, ho hiadono koaho ai dora itagi ai hidimonika abe ai hidimono gea wodadioka ai gianongoru o Kristusoka. Ho ahi higaro naa ena totulihuku, gea togahoko la ngona nadotoko de nahigaro nanga gogianongoruika.
Ngona kiani ka ihikaika Ma Jou ai Abari nahingahu-ngahu o nyawaika, done nako nomahoa-hoana nomahidiai de hiadono naga ma oraha abe ngona ko nomahidiaiuahi de done ko nakunua ai abari gea nahingahu onangika. Abe ngaro o nyawa yosanangi dika yotoihene ani demoino eko ngaro ona ko yamagaweua, ma kiani nahingahu dika onangika. De gea kiani o nyawa manga howono nahitobadaere onangika de duru nahitiari done ahao yogila-gila dika yorehene manga howonika gea. De ngona kiani o nyawa mata-mataika nahigaro onangika gea la ona yaniiki ma totiai de ufa yomahipidili genangino. De ngaro hokokia naduhunu o nyawaika ma titi ani demo-demoino, ma gea kiani nohidodiai nadotoko de ani hininga nabole-bole onangika.
De una gea kiani duru womahigagaoika o Abari ma Rorahaiika abe nengokadauino hidotokoka unangika la hiadono ai hiningaka ibitumoka de ko ikelu-kelua. Angamoi nako o Abari ma Rorahai gea duru womahigagaoika, de gea ahao ka idadi wakunu o dodotoko ma gou-goungu wadotoko o nyawaika de wakunoo onangika wahigaro la hiadono ma gou-goungu gea ona yatobanii-niiki. De iti abe o Abari ma Rorahai ibitumu o hihira gea ai hiningaka, de ahao nako naga o nyawa yalawana ma gou-goungika, onangikali una gea ka idadi wataere la ona ihioriki o kiaka manga hininga ko ataanua ma dumutu. Hokogea ahi demo abe ma titi o gareja ma hihira kiani manga wowango ma dumutu hokokia. Ho o nauru onaguna dika abe duru yomahigagaoika o Abari ma Rorahaiika de nahiorikoo abe manga wowango ma datoro imakiniiki de gea mata-mata abe ahao kangano nabasaka ahi hurata ma demoka naa, ona gea ka idadi nagoraka la ona yodadioka o gareja ma hihira.
Ho naa ahi hurata ma goronaka de ahi behehongo ma demo ngonaika ma ngoe, de gea mata-mata duru ka tonihibehehongokali tato kiani nadotoko nanga gogianongoruika o Kereta ma nuuhoka gea. Abe gea kiani onangika nahigaro la yaniiki ma behehongo abe onangika yahidumu-dumutu. De abe onangikali ko yaniikua ani dodotoko, onangika gea kiani ngona nataere. De ngaro o nyawaika nadotoko eko nahigaro ekola nataere, ma gea ufa nawohanga ani kuaha naga Ma Jouoka de aino la hokogea kiani nodiai onangika. De ufa nahigunoa la o nyawa genangoka de yaetongo ani dodotoko ma demo onangika done ato ani dodotoko gea ko kia-kiaua.
Ho naa moioli ahi behehongo ngonaika, abe o nau-nauru ka o goohi genangoka, onangikaoo kiani nadotoko abe imaketero hoka ona yatimo-timonokali. De onangika kiani nahigaro la ngaro o kia dika mata-mata naga ahao yohimanga manga wowangoka, de ka idadi yakunu yomatongohono ma dorouino. Hokogea kiani nahigaro onangika abe o nau-nauru ka o goohi.
Ho naa moioli tonihibehehongo ngonaika, abe nanga gogianongoru genangoka abe ona gea ka o nyawa manga gogilaongohi, onangikaoo ma kiani nadotoko. De gea kiani yomahitipokouku manga hidimono manga himangoka, abe ngaro o kia dika ahao yohimanga, masara kiani naga manga hingounu manga hidimonika. De gea kiani ona yamagawe la yahisanangi manga hidimonika, de ufa yotariana onangika.
De igoungu, nanga gogianongoru utu naga abe ona ko yaniikokaua manga doomu abe ma oraha manga gogianongoru yomatoomuino de iwihigiriiri de yomahuba Ma Jouika. Masara nako ngone naa ufa homaaduru abe hoka onangoli. Masara koaho ngone ka ihikaika homatoomuino de homahikokagaro nanga ngongakuika. Abe nako ma dihiraino de ma oraha naa naga, de ma oraha nenangohi duru hoperelu homahikokagaro ngone o gogianongoruino angamoi ka itigi moduku nanga Baluhu idodutu ai gahe ma wange abe Una woboali.
De ahi hurata ma dodipoko naa tohitulihuku de naga o Silasa ahi datekoka wohiduhunu. De nako o Silasa una gea tifetongo unangika tato ahi gianongoru abe duru watobagou-goungu ai ngongakuino. Ho ahi hurata naa tohidingoto nginika la tato tinihigaro la utuohi nia ngongaku iputurungu nia hiningaka Unangika. De naa duru tagou-goungu tinihingahu abe ahi hurata ma demo mata-mataino de duru inihimatoko igou-goungu nginika ma titi Ma Jou ai hininga ma owa ngoneuku. Ho ngini ka idadi nimahingutukuku to Una ai hininga ma owaka la ufa nikelu-kelu genangoka de aino. De gea ma titi hiadono ahi demo naa tinihurata nginika.
Masara nako ngini ahi gogianongoru abe ngohi duru tinidora nginika, ufa ngini nimaaduru abe hoka onangoli gea. Masara ngini kiani nimahiketehiputurungu Ma Jouika abe ma titi nanga ngongaku ma dodotokoka de aino. De nanga ngongaku ma dodotoko gea ngaro o dodotoko utu mata-mataika ma ka nenangohi duru itebi-tebini. De ngini kiani ka ihikaika nimaniata de gea nimahinganono Ma Jou o Womaha ai kuahaika la gea Una winihihira-hira nia niniata ma goronaka.