1 Korintusu 12:3 - Ma Jou ai Demo-demo o Totobelohoka

³ Masara ma oraha naa de ngaro ufa o toka-tokata inibudiohi nginika, angamoi naa ahi demoino de ngohi tinihingahu abe hokokia ka idadi niatailako o nyawa manga demo la nihioriki gea manga demo Ma Jouoka de aino iboa eko gea o toka-tokatoka. Ho naa tinihitiari ma titi abe o nyawa utu yomaaduru dika abe hoka yalufungoka de hiadono ihidemo o hingahu ma demo moi ato bari Ma Jouoka de aino iboa. Ho ma oraha nimatoomuino o gareja moi de nako hiadono naga o nyawa utu nginioka abe yalufungoka de ahao o hingahu ma demo moi ihidemoiye nginika, gea kiani niataili o nyawa gea manga demo la nihioriki o demo o kia Ma Jou o Womahoka de aino de o demo o kia ko Unangokaua de aino. Ho naa tinihingahu tato nako Ma Jou o Womaha wotemo o nyawaino, gea ona ko yotemoua ato, “O Yesusu Una iwihikobotoka.” Abe nako hokogea yotemo, marai ona gea yahitaanoka abe yabarenikaka. Ho ona gea ufa niahigihene onangika done o toka-tokata inibudioli abe hoka ma dihira inibudioka nginika. Masara nako o nyawa yalufungoka de hiadono ona yahingahu ato, “O Yesusu Una gea nanga Baluhu idodutu,” gea manga demo yahitaana onangikali abe Ma Jou o Womaha naga wotemo manga uruino. Hokogea ngini ka idadi niataili o nyawa manga demo la nihioriki gea Ma Jou o Womaha wotemo onangino eko moioli abe ona yabarenika.

1 Korintusu 12:3 ပူးပေါင်းရင်းမြစ်များ

Matiusu 22:43

De o Yesusu wato, “Gea niagoungu abe Ma Jou ai Mesia gea o Dautu ai toforaukuino womaboa. Masara ngaro Una wodadi o Dautu ai toforauku womatengo ma o Dautu wiahoko unangika gea wato ‘Ahi Baluhu idodutu.’ Ho abeika homafikirohi ma titi o kia naga o Dautu ai hiningaka hiadono womahibaluhu to una ai toforauku gea. Angamoi done sarakia o Dautu ai toforauku womatengo de wodadioo to Dautu ai Baluhu? Ho abeika hotoihene Ma Jou ai Demo-demoka moi abe naga ihitulihukuoka to Dautu ai demo. De ma dodihiraino gea de Ma Jou o Womaha wihiakunu o Dautu hiadono wohitulihuku ma demo naa abe Ma Jou o Baba de to Una ai Mesia yomakoketemo. Ho o Dautu wohitulihuku wato,

Maruku 9:39

De o Yesusu Una wotemo wato, “Una gea niwihigunoa dika de ufa niwitaere. Abeika tinileha. Ka idadi o nyawa ahi romanga yafetongo la o heheranga yodiai de ka ma moi ahi romanga ihipeseke! Duru ko idadiua! Ho Ngohi tato una naa ko wohipesekua to Ngohi ahi romanga.

Yohanese 13:13

Abeika, ngini naa nihihiromanga niato, ‘Mia Guru,’ eko ‘Mia Baluhu,’ de nako hokogea nitemo Ngohino gea nihihitaana igoungu.

Yohanese 13:14

De angamoi Ngohi nia baluhu de nia guru, ho abe todiai ibooto naa, nia lou takokiihoroka, ho nginioo kiani nimakokiihoro ti ngini homoi-homoiika nia lou.

Yohanese 15:26

De o Yesusu wahitararonohi ona iwitobaniikika wato, “Ahao Ngohi tihidingoto Una tihiromanga o Duduhunu, abe Una o Babaka de wauku nginiuku. Una gea o Womaha abe o nyawa wahidumutu Ma Jou ai gou-goungika, ho ma oraha o duniauku woboaka de ahao wahingahu-ngahu o nyawaika ma titi Ngohi.

Roma 10:9

De naa utuohi tinihitararono Ma Jou ai ngekomo gea abe genangino de Una waetongo o nyawa yototiai. De ai ngekomo abe wonahingahuoka, gea ma demoino de inahigaro ngoneino la o nyawa manga himangoka de nanga hininga ma dola homahingahu nanga uruino abe hato o Yesusu Una gea nanga Baluhu idodutu. De itararono abe nanga uru ma demo gea ihititi nanga hiningaka, ho ma hingahu ma demo gea inahigaro la hongakuoo nanga hiningaka abe ma titi Ma Jou wihimomikoka o Yesusu ai honengoka de aino. Ho nako hokogea homahingahu nanga uruoka de aino de abe hongaku nanga hiningaka, de gea Ma Jou wonaduhunu nanga howo-howonino.

Roma 9:3

De tanu nako hoka ngohi ka idadi taturuuru ahi gogianongoru o Yahudi ma nyawa gea la to ona manga hohowono ihidaene ngohi naa, gea ngohi tosanangi dika todafongo. Abe ngaro ngohioli ihikatingaka o Kristusoka de aino la genangino de taduhunu ahi gogianongoru gea abe ngohi de ona mimahidutu moi o Yahudi ma nyawa, ma gea ngohi tosanangi todiai iti ufa ona manga hohowono yamake Ma Jouino.

1 Korintusu 16:22

Onagona dika ko iwidoraua nanga Baluhu idodutu o Yesusu Kristusu, ahao ona gea kiani Ma Jou wahikoboto de gea yamake manga hohowono ka hiado-adonika. Nanga Baluhu, duru tonihafini la Ngona nomataiti noboa!

1 Korintusu 8:6

masara nako ngone naa, to ngone nanga Jou ka womatengo dika, de Una gea nanga Baba. Ma dulaada mata-mata Unangoka de aino iboa, de Una ma titi hiadono ngone naga de nanga wowangoka. De to ngone nanga Baluhu idodutu, o Yesusu Kristusu, Unangoo ma ka womatengo dika. De ma dulaada mata-mata Ma Jou watulaada o Yesusu Kristusino dika, de o Yesusu Kristusino ngone howango.

2 Korintusu 11:4

De ngohi tohawana angamoi ngini genangoka ngaro o nyawa o kia dika yoboaino de inidotoko masara gea ngini niadafongo de niatoihene onangika. De abe o nyawa yoboa de inidotoko nginika abe ma titi o Yesusu, de ma dodotoko gea ma demo duru imakohowono de abe ngomi ma dihiraino minihingahuoka ma titi o Yesusu. De masara ngaro duru imakohowono ma ngini ka niodafongo dika manga dodotoko! De ngaro ma dihiraino de ngini niwidafongoka Ma Jou o Womaha, masara naa ma duru naga inidotoko ma titi o womaha moioli de ngini ka nihigihene manga dodotokika gea! De ngomi ma dihiraino minihingahuoka o Abari ma Rorahai de hiadono ngini niodafongo ma abari gea, masara naa hadongoo de nitoihenoli o nyawaika gea abe o abari moioli inidotoko nginika! De gea ma titi hiadono ngohi tamao abe kiani ngini tinigoana.

2 Korintusu 3:5

De nako hoka to ngomi dika mia hiakunu, gea duru mihioriki abe ko kia-kiaua miakunu midiai abe to Una ai karajaangino. Masara ngomi naa miapake to Ma Jou dika ai hiakunu la ka miakunu mihidagi to Una ai karajaanga abe womihitagongo ngomino.

Galatia 3:13

Masara o Kristusu Una wonabangu ibooto ho wonahihoheoka ma koboto ma hohowonino gea abe ma Paretaka de aino iboa. De gea wonaturuuru la wato ka idadi to ngone nanga koboto ma hohowono iwidaene Unangikali la ngone ko hamakeua. Abe gea nanga koboto ma hohowono Una womahimoku ma oraha abe iwihidapakuika o gotaka. De gea ka idadi hohioriki abe Unangika ma koboto ma hohowono iwidaenoka angamoi hokogea ihitulihukuoka Ma Jou ai Demo-demoka ato, “Onagona dika abe yahidapakuika o gotaika, ona gea yadaenoka Ma Jou ai koboto ma hohowono.” Hokogea itemo Ma Jou ai Demo-demoka. Ho mangale ma titi to Una ai badanga ihidapakuika o gotaka, ho ma dodunguu gea inahingahu ngoneino de ka idadi hohioriki abe ma koboto ma hohowono iwidaenoka.

Himatoko 1:10

Ho naa o Patomos ma nuuhoka de o wange moiuku ihilufungu de Ma Jou o Womaha ai kuaha. De gea ihilufungu ma wangeoka abe ngone Ma Jou ai nyawa nanga biaha homatoomuino de hihigiriiri nanga Baluhu idodutuika. De ka itodokanino de ngohi toihene ahi poretoka o ilingi moi duru ilamokiye, de gea ma ilingi ngade-ngade hoka o guguli yawuwu.