1 Kokoano 14:23 - Ma Jou ai Demo-demo o Totobelohoka

²³ Abe ona gea yodiai o huhuba ma ngi ma ngoeika abe genangoka yomahuba-huba o jou-jou ma homoaika. De manga huhuba ma ngi-ngi gea yodiai o loku-lokuoka de o gota ma ago-agomo ma timiuku, abe utu yomahuba o hakaruoka de utuoli yomahuba manga pangao o ngo Asera ma liateoka.

1 Kokoano 14:23 ပူးပေါင်းရင်းမြစ်များ

1 Kokoano 12:31

De o Yerobeama wodiai o huhuba ma tau ma ngoe o kiaka naga o tonaka itoporoniye abe o nyawa biaha yomahuba-huba o popangaoika genangoka. De naga o nyawa abe wahidadi manga hidemo abe yoleleani manga popangaoika. De ngaro ma dihira Ma Jou wahibehehongo wato abe manga hidemo kiani o Lewi ma nyawaino masara o Yerobeama wairiki manga hidemo abe ona ko o Lewi ma nyawainoua.

1 Kokoano 14:15

De igoungu Ma Jou o Yawe ahao o Isiraele ma nyawa wahipoha de ai hohowono hiadono o Isiraele ma nyawa manga buturungu ikelu-kelu. Ngohi tohiketero abe ona yodadi imaketero hoka o bongo-bongo abe iwango o taagaka abe ena gea ikelu-kelu ma oraha yawuwu o hidaloko. De nako o bongo-bongo gea ena o hidaloko adaene ko iwa ma buturungu la ka idadi irikotiye imaokoino. De imaketero hokogea o Isiraele ma nyawa manga buturungu ahao naga ma oraha abe enangoo ko iwaka. De ngaro ma dihira manga tonaka ma owa nenanga wahidoaka manga totoforaika de naga manga tonaka ma ngoe o Efaraata ma akere doka ma honongaka masara Ma Jou wohihihanga manga buturungu. De mata-mataika gea Ma Jou o Yawe wodiai onangika la manga buturungu ahao ko iwaka mangale ai ngamo duru ifae manga howonika ma titi o popangao yodiai de yomahuba-huba enangika abe hoka o ngo Asitorete ma liate ma ngoe yomahuba-huba enangika.

1 Kokoano 15:12

Una wahihihanga o popangao mata-mata abe ma dihiraino ai totofora yodiai. De wahihihanga o nau-nauru abe manga badanga yomatobafuku-fukunu o pangao ma tauoka la ato hokogea yomahuba manga pangaoika, ona mata-mata wahihupu ai tonakino ka hiadono ona duru ko idadiokaua yolio manga tonakika.

1 Kokoano 20:23

Ka de o Arama ma nyawa yahikalaka de ahao o Bene-Hadada ai tentara manga hidimono yamuruono naga iwitutumu de yomahingahu manga hininga unangika, ato, “Mia koano, mihioriki abe o Isiraele ma nyawa naa ma duruika yolaku de gea angamoi homaketeparangi to ona manga tonakoka abe iloku-loku ma ngoe de gea ma titi ngomi mikala. De gea angamoi o Isiraele ma nyawa manga popangao to ena ma kuaha duru ilamoko o loku-lokuoka. Ho ngone kiani haparangi o tonaka ma dolaka abe genangoka maraioka to ona manga popangao ko iwa ma kuaha. Ho iti homaketeparangi o tonaka ma dolaka de duru ngone ka idadi hahikala o Isiraele ma nyawa gea.

1 Kokoano 3:2

De ma oraha gea ko ma moiuahi ihigoko Ma Jou o Yawe ai Tau abe iwidingaka Unangika, ho o nyawa ka ihikaika yodoa o loku-lokuiye la genangoka yomahihuba manga huhuba Ma Jouiye.

1 Kokoano 3:3

De o Saloomo una witobanii-niiki Ma Jouika abe ka ihikaika waniiki ai baba o Dautu ai hitiari de ai demo abe ma dihiraino ai baba widotoko unangika. Masara naga moi dika ai datoro abe ko itiaiua, de gea o Saloomo ka ihikaika wodoaiye o loku-lokuiye gea la womahihuba ai huhuba Ma Jouiye.

2 Kokoano 17:16

Abe ona yalawana Ma Jou o Yawe ai behehongika ka hiadono manga pangao yodiai abe ma rupa o hapi ma ngofaka hinooto. De ona o pahitaaka yapake yodiai abe o hapi ma rupa o gurasino eko ma kiahonangino abe ma dogowini hoka o behi. De ihigoko o liate abe genangoka yomahuba-huba manga pangao o ngo Asitoretika, de yomahuba-huba o pangao o Baalika. De onangoo yomahuba-huba o muru-murumika abe ena gea daku o dihangoka de yangaku o muru-murumika gea naga de ma kuahaka manga wowangoka.

2 Kokoano 17:19

Masara abe ona yogogere o Yehuda ma tonakoka onangoo ko iwiniikua manga Jou itiai angamoi yoluku ihingounu Ma Jou o Yawe ai behehongika. Abe ona yomaaduru imaketero hoka manga gogianongoru o Isiraele ma tonakoka ma titi to ona manga wowango ma datoro ka imakadaene dika.

Huhupu 34:13

Masara kiani manga popangao niakokioluku ho manga huhuba ma ngi kiani niakokikilianga, de manga hakaru yohapa ma ngoe abe yomahijou enangika kiani niakokiwedere, de manga pangao o ngo Asera ma liate abe yomahuba enangika kiani enangoo mata-mata niakokitolanga.

Yeremia 2:20

De ahao Ma Jou o Yawe wohigila-gila ai demo ai nyawaika, wato, “Masara naa duru ma dekanoka abe ngini nioluku nihihingounu Ngohino de niaumo nia papakiti abe ma dihiraino de homahidapakiti moi ngini de Ngohi. Abe ngini nimahingahu niato, ‘Ngomi mioluku mimahuba-huba Ngonaika!’ De gea igoungu abe ko nimahubakaua Ngohino, masara nako o jou de o pangao utuika de ngini duru nisanangi nimahuba-huba de nimahidoaka enangika! Abe to ena ma huhuba ma ngi mata-mata o loku-lokuoka de o gota-gota ma timiuku de nimahuba-huba enangika! De nia datoro gea tohiromanga tato ngini nimaketero hoka o ngofeka abe manga badanga yomatobafukunu o nau-naurika de duru yosanangi dika yomaidu de o nauru ma homoa de manga badanga yomahidoaka dika onangika!

Yeremia 3:13

Ho gea ka idadi nilio Ngohino, masara naga moi kiani nimahingahu la itararono. Abe kiani nimangaku ma titi nia howo-howono angamoi niatilakuroka to Ngohi Ma Jou o Yawe ahi demoika. Ho ngini kiani nimangaku abe nimahidoakoka o jou de o pangao utuika la nimahuba-huba enangika o gota ma timi-timiuku. De abe ahi pareta ma demo nginika niatilakuroka, enangoo kiani nimahingahu la ka idadi nanga gogao ilioli abe hoka ma dihiraino.

Hosea 10:1

Abeika tohiketero o Isiraele ma nyawa de o angguru ma roehe moi abe duru ikutufuru de to ena ma hofoko duru ifoloiholi. Abe ahi nyawa gea to ona manga redi ma hasili de manga kiahonanga duru ma ngoe. Masara gea manga boloi hokokia yapake? Gea ka yahidoaka manga popangaoika dika! Abe ma oraha Ma Jou wohiowa la manga redi ma hasili idogo ilamoko, de gea ahao utuohi ilamoko abe ona yomahihuba manga pangao ma hima-himangoka! De nagali abe ona yomadiai manga pangao ma huhuba ma ngi abe utuohi ihohailoa la ka idadi yomahuba-huba enangika dika!