LUNGOR LUNAM 12:11 - ANU LUGOD N. T. (BSI)

¹¹ Odokkc bulu bvm Awo Me:rdok i:dokki bulu mopvto odokkc buluk lukan lubinam agomkvdv:dokki, kapcnc bulu buluk turnam kvdv:dcm sidodo:pci aipc mc:tomang.

LUNGOR LUNAM 12:11 ပူးပေါင်းရင်းမြစ်များ

JO:N 16:33

Ngo scm nolum lubitu:bong, ngokkolo mc:pomcnganc nolukkcjen du:ycpc. Rcngamso nolukkc kvnggv:pc mc:dvrc dung; ckvdaggom aipc mc:potoka, ngo rcngamscm mopvto.”

1 JO:N 5:5

Sc:kobv:n cdc rcngamscm mopvncdc jc Jisumc Ru:ncpvnckc Awodc cmna mc:jvgncdcma:mvlo?

1 KORINTIANG KVDVNG 15:57

Cmpige:la Ru:ncpvncmc aipai bitoka, sc:kobv ngolu Ru:tum Jisukokki mopvnammcm bidagji.

LUNGOR LUNAM 2:26

Sc:kobv mopvycji odokkc sc:kobv ngok agercm du:tcrdo:pc gerycnc, ngo bvm angu opvnkvdv:dcm mopvla:nanc tornamcm biyc,

ROMANKVDVNG 16:20

odo sakpola du:namdok Ru:ncpvncdc mcna:pc uidcm mokela alcki tumvg-momvgyc. Ngoluk Ru:tum Jisukc aya:dc nolukkolo du:mvnka:langka.

AGER KVDVNG 20:24

Cmpige:la ngok turnamscm ngo atv arckanckopc kvsumang cdcmanggom ngokkcpc kvnggv:pc aincko cmna, ngo gerpcnamdcm gerra:mvloi odokkc Ru:tum Jisukolok pa:nam inam-sa:nam agerdcm, Ru:ncpvnckc ayang abodok tadpon lutaddcm lukanbipc.

1 JO:N 4:4

Ameo:nc ommangkvdvnga, nolu Ru:ncpvnckc, odokkc cdcmbulum mopvtobong; kapcnc nolukkolo sc:kobv du:nc rcngamso sc:kobv du:ji cdcm bottcya:dag.

LUNGOR LUNAM 3:5

Sc:kobv mopvycnc kampopc attarcm gcyc, odokkc ngo bvk amincm turnc kvdv:dok potindokkcm notpakma:yc; ngo bvk amincm ngok Abukc kcra:do odokkc bvk taycng among lutad lunckvdv:do lukanbiycku.

LUNGOR LUNAM 3:21

Sc:kobv mopvdonc, ngo bvm ngok migom dungkodo du:mvndopc du:mvnmoyc, kapc ngo avycsin mopvtoji odokkc ngok Abudokki bvk migom dungkodo teddoji.

LUNGOR LUNAM 3:12

Sc:kobv mopvycji, ngo bvm ngok Ru:ncpvnckc kumko okumdok kuntapc moyc; cdvlosin bv odokkc gvlenkuma:yc, odokkc ngo bvkkolo ngok Ru:ncpvnckc amincm adlvgyc, odokkc ngok Ru:ncpvnckc nogordok amindcm, cdc anu Jerusalemdcm okodc ngok Ru:ncpvnckc taycng amongtokkc gvidagji, odokkc ngok avkc amincm.

LUNGOR LUNAM 2:7

“Sc:kokc yerungc du:ji, bvm tadmotoka okodcm Yalodc mondoli:kvdv:dcm ludagji. “Sc:kobv mopvdagji ngo bvkkcpc turnamdok vsvnga:ycdcm biyc, okodc Ru:ncpvnckc taycng among ba:ri:do du:ji.

LUNGOR LUNAM 20:4

Odokkc ngo migom dungkokvdvngcm ka:to, odokkc odokbuluk tayc:do tednc kvdv:dc cdcbulu sc:kobulum kcbangcm ba:dopc tolvgtoji. Ngo cdc yalokvdv:dcmsin ka:to sc:kobulu Jisumc buluk lukanbinam kvdv:dok lcgang mittukkvdv:dcm papvrtoji odokkc Ru:ncpvnckc gomug lcgangc, odokkc sc:kobulu simvndcm kumtoji cdcmanggom odok monam moima:dcm odokkc odok mogoddcm bulu tuptakvdv:do cdcmanggom buluk alakkv:dv:do torvgsutoma:ji. Bulu turkangku, odokkc Kristokc lcdulo lv:ying dv:takkopc migomdomvnto.

LU:KKC 14:26

“Sc:koiyc ngokkolo:pc gva:mvlo odokkc bvk avkc abudcm, ancdcm, nc:dcm, ommangkvdv:dcm, bvrrangkvdv:dcm odokkc bvrmangkvdv:dcm, c:, odokkc bvk avkc turnamdcmsinci aimang cmna mc:ma:mvlo bv ngok agom mc:jvgla gvmvnnc tani:pc ila:ma:yc.

LUNGOR LUNAM 11:7

Odokkc cdvlo buluk lukanbinamcm lungaptoji, simvndc cdc du:tcrkama:pc o:rv:nc jiko:dokkc lenncdc bulum mimagcm moyc odokkc bulum mopvto odokkc bulum moketo,

LUNGOR LUNAM 1:2

Sc:ko Ru:ncpvnckc agomdcm lukanbikaji odokkc Jisu Kristokc lukanlubinamdcm, Bvk ka:nam appv:dcmci.

AGER KVDVNG 21:13

Odo Poulbv luto, “Nolu okkom idu:n, ngok asinscm kabla bedmodu:nci? Kapila:nc ngo makana:lo tumkosuppong cmnai mosv:sumang cmpige:la Ru:tum Jisukc amin lcgangc Jerusalemolo sipcsincimvn mosv:sutung.”

LUNGOR LUNAM 19:10

Odo ngo Bvk alcdo owa:la Bvm kumpc cmna ito, cmpige:la bv ngom luto, “No cdcm ipcru:ma:namc! Ngo nok lcdulo ager gerjonko odokkc nok bvrrang kvdv:dokkc sc:kobulu Jisukc lukan lubinammcm lutvla du:ji. Ru:ncpvncmc kumtoka.” Kapcnc Jisukc lukan lubinamdc lungor lunamdok yalodc.

LUNGOR LUNAM 6:9

Cdvlo bv anggo tubjetdcm moge:toji, ngo kumko palvgko kcvgdo cdc yalokvdv:dcm ka:begto sc:kobulu Ru:ncpvnckc agom lcgangc palvgtoji odokkc buluk lukanbinam lcgangc bulum onamai;

LUNGOR LUNAM 2:17

“Sckkc yerungc du:ji, bvm tadmotoka okodcm Yalodc mondoli:kvdv:do ludagji Bvkkolo:pc sc:kobv mopvycji ngo lc:sula lc:nam manna:dcm biyc, odokkc ngo bvm kamponc vlvngcm biyc, vlv:do anu amin annamko okodcm sc:ko pa:ycji bv:ma:mvlo sc:kosin kinma:yc.

LUNGOR LUNAM 2:13

Ngo kindag no okolo dagdoji, okolo Satan migom dungkodc:ji; Antipaskc longcdo ngom lukan lubinamdo:sinci no ngok amincm gagtvla dung odokkc no ngok mc:jvgcm lupaksutomang, ngok mc:jvgnc okodc sc:kom nolukkolo moketoji, okolo uidc du:doji.

LUNGOR LUNAM 1:9

Ngo noluk bvro Jo:nbv, sc:kobv noluk lcdulo Jisukolo asin mc:dvrdcm mc:mvndagnc odokkc cdc migom doko mo:pv:dcm odokkc cdc du:tvdanna mentumsula du:donc, Patmo cmnam siycng amongkolo Ru:ncpvnckc agomclang Jisu Kristokc lukan lubinam lcgangc dungai.

LUNGOR LUNAM 12:17

Odo alapkanc tabvdc nc:ng tani:dcm aglvng sangkang, odokkc mimag mokapc gvlenkang bvkkolokkc lennc ommang du:paknc akekvdv:dokki, cdc sc:kobulu Ru:ncpvnckc lulvg agomkvdv:dcm gagla dungaji odokkc Jisukcpc lukanbinam agomcm lukaji.