44 Cdcm adin-amvrpc pitto, cdcm yalo amvrpc la:sa:toku. Adinamvrko du:mvlo, yalo amvrkosin dung.
Ngo scm nolum lubidung, bvrrangkvdvnga: adinclang i:yc Ru:ncpvnckc migomdokodcm pa:mvnmang, cdcmpcmanggom yogpagpcncdc yogpakpcma:ncdcmpc pa:tcng itc:mvnmang.
Odo buluk amik kvdv:dc darabkang odokkc bulu Bvm kangkinto; odokkc Bv buluk kangkodokkc yokkang.
Pi:nyi longc lcdulo, Bvk agom tadjvgla gvmvnnc kvdv:dc lckoda odo okumdo dungai, odokkc Tomabv buluk lcdulo du:tc:dungai, cmpige:la Jisubv gva:la buluk pongkokdo dagmvnto, odokkc luto, “Nolukkolo mc:po mcnganc dungka:langka.”
Odo longcdok yumcayirdo, kvnvd longcdok a:pongarnc longcdo, agom tadjvgla gvmvnnc tani:kvdv:dc yabgo kvdv:dcm mokabamsula dungai bulu okolo dungaji, Jiwu kvdv:dcm pcsola, Jisubv gva:la buluk ara:do dagkang odokkc bulum luto, “Nolukkolo mc:po mcnga:nc dungka:langka.”
Taycng among agom kinma:nc tani:dc Ru:ncpvnckc Yalodcm torvgsumang, kapila:nc bvkkcpc cdcbulu monba:ba:namc, odokkc bv cdcmbulum mcngkinmang lcga:dc bulu taycng among agomlokkipak aidag aimang cmna angumodag.