Santiago 5:15 - Alacatlatzala Mixtec New Testament

¹⁵ Tá naxi̱kua̱ꞌa̱ yóꞌo ndáa ini na Ndios xíꞌin ndinoꞌo ini na, ta kándixa na ndí Ndios kasa ndivi ra ña ndúkú na no̱o̱ ra, ta saá Ndios sandaꞌa ra na ndeé ndóꞌo. Chi tá ni̱vi na ndeé ndóꞌo yóꞌo kómí na kua̱chi no̱o̱ Ndios, ta Ndios kasa káꞌno ini ra xa̱ꞌa̱ kua̱chi na.

Santiago 5:15 ပူးပေါင်းရင်းမြစ်များ

San Mateo 17:20

Ta nda̱kuii̱n ta̱Jesús, káchí ra xíꞌin na: ―O̱n vása ní‑kuchiño ndó chi xíni̱ ñóꞌó kandixa ka̱ ndó Ndios. Ndixa káꞌa̱n i̱ xíꞌin ndó, tá kandixa ndó Ndios vará nda̱ loꞌo kuiti, nda̱tán yóo ndiki̱n mostaza loꞌo ní ña, ta xa̱ꞌa̱ ña loꞌo kuiti kandixa ndó, ñayóꞌo taxi ña kukomí ndó ndee̱ ña ka̱ꞌa̱n ndó xíꞌin yuku̱ káꞌno ñíndichi yóꞌo: “Kutaꞌa ún yóꞌo ta kua̱ꞌa̱n ún inka̱ xiiña kaa̱”, kachí ndó, ta yuku̱ káꞌno ñíndichi yóꞌo kutaꞌa ña. Saá chi tá kándixa loꞌo ndó Ndios, ta kuchiño ndó kasa ndivi ndó ndiꞌi ña̱ꞌa.

San Juan 5:14

Ta ni̱yaꞌa loꞌo, ta saá ta̱Jesús na̱kutáꞌan ra xíꞌin ta̱a ta̱ ndu̱va̱ꞌa yóꞌo ini veꞌe ño̱ꞌo káꞌno, ta ni̱ka̱ꞌa̱n ra xíꞌin ra: ―Koto ún, vitin xa ndu̱va̱ꞌa ún, ta saá o̱n ki̱ꞌvi ka̱ ún kua̱chi, chi ko̱to̱ kixaa̱ inka̱ ña ndeé ní ka̱ kundoꞌo ún ―káchí ta̱Jesús xíꞌin ra.

San Juan 6:39

Ta Yivá i̱, ta̱a ta̱ ti̱ꞌví yi̱ꞌi̱ va̱xi i̱, kóni ra ña o̱n sandañóꞌó i̱ nda̱ ñii ni̱vi na ta̱xi ra ndaꞌa̱ i̱. Ta saá tá kixaa̱ ki̱vi̱ sondíꞌí ñoyívi yóꞌo, ta sanataku̱ i̱ ndiꞌi ni̱vi yóꞌo.

1 Corintios 1:21

Chi Ndios, ta̱ kúu ta̱a ta̱ ndíchí ndinoꞌo, chi̱ndúꞌu̱ ra ndí ni̱vi na ndíko̱n yichi̱ ñoyívi yóꞌo o̱n kuchiño koni̱ va̱ꞌa na ra xíꞌin ñandíchí mi̱i na. Ta saá xa̱ꞌa̱ ñava̱ꞌa ní ini Ndios, kúsii̱ ini ra xíni̱ ñóꞌó ra to̱ꞌon ra ña káꞌa̱n ndoso ndi̱ no̱o̱ ni̱vi, xa̱ꞌa̱ ña saka̱ku ra ni̱vi na chíkaa̱ so̱ꞌo to̱ꞌon yóꞌo ta kándixa na Jesucristo. Saá kéꞌé Ndios, vará kua̱ꞌa̱ ní ni̱vi xáni si̱ni̱ na ndí to̱ꞌon kíꞌví kúu to̱ꞌon yóꞌo xa̱ꞌa̱ Jesucristo.

2 Corintios 4:14

Saá chi xíni̱ ndi̱ ndí Ndios, ta̱a ta̱ sa̱nataku̱ Jesucristo, ñii ki̱ꞌva saá ki̱vi̱ ña va̱xi sanataku̱ ra ndi̱ꞌi̱ no̱o̱ ña ni̱xiꞌi̱ ndi̱. Ta saá nakiꞌin ra mi̱i ndi̱ xíꞌin ndóꞌó ña ko̱ꞌo̱n yó xíꞌin ra ta kutaku̱ yó no̱o̱ ra ndiꞌi saá ki̱vi̱.

Santiago 1:6

Ta ki̱vi̱ ndúkú yó ñandíchí no̱o̱ Ndios, ta xíni̱ ñóꞌó kandixa ndinoꞌo ini yó ndí ndixa taxi ra ña xíni̱ ñóꞌó yó ndaꞌa̱ yó. Ta o̱n váꞌa kaka o̱vi̱ ini yó, chi nda̱tán yóo takuií tá kánda xíno no̱o̱ mi̱ni, ta kua̱ꞌa̱n rá yóꞌo ta kua̱ꞌa̱n rá kaa̱, ke̱ꞌé ta̱chi̱ xíꞌin rá, saá yóo ni̱vi na xíka o̱vi̱ ini.

Santiago 5:13

Tá ñii ndóꞌó yóo ní ña xóꞌvi̱ ndó, ta xíni̱ ñóꞌó ka̱ꞌa̱n ndó ndukú ndó no̱o̱ Ndios ña chindeé ra ndóꞌó. Tá ñii ndóꞌó kúsii̱ ní ini ndó, ta xíni̱ ñóꞌó kata ndó yaa yi̱i̱ ña kasa káꞌno ndó Ndios.

Santiago 5:16

Ña̱kán xíni̱ ñóꞌó naꞌma ndó kua̱chi ndó xíꞌin táꞌan ndó, ta ndukú ndó no̱o̱ Ndios xa̱ꞌa̱ táꞌan ndó ña sandúva̱ꞌa Ndios ndóꞌó. Chi Ndios xíni̱ so̱ꞌo ra ta táxi ra ña xíni̱ ñóꞌó ni̱vi na kúu na xíꞌin ña ndixa ndinoꞌo ini ndukú no̱o̱ ra.

Santiago 5:20

ta yi̱ꞌi̱ kóni i̱ ña kunda̱a̱ va̱ꞌa ini ndó ndí ña va̱ꞌa ní kúu ña keꞌé ndó saá. Chi tá chindeé ndó ni̱vi ña nandikó ini na ta sandakoo na kua̱chi ña na̱kava tuku na, ta tuku nakiꞌin na kua̱ꞌa̱n na yichi̱ Ndios, ta xíꞌin ñayóꞌo chindeé ndó na ña ka̱ku na ña o̱n ndañóꞌó na no̱o̱ Ndios. Ta Ndios kasa káꞌno ini ra xa̱ꞌa̱ ndiꞌi kua̱chi ni̱vi yóꞌo, vará yóo kua̱ꞌa̱ ní kua̱chi ndíso na.