Santiago 3:2 - Alacatlatzala Mixtec New Testament

² Ndiꞌi mi̱i yó kua̱ꞌa̱ ní yichi̱ nákava yó kua̱ꞌa̱ ní kua̱chi. Tá kúchiño naníꞌi yó ni̱vi na nda̱ ñii yichi̱ o̱n vása káꞌa̱n nda̱ ñii to̱ꞌon o̱n váꞌa, ta ni̱vi yóꞌo ndixa kúu na nava̱ꞌa ndinoꞌo. Tá ndixa va̱ꞌa kúchiño ni̱vi xáꞌnda chiño na no̱o̱ to̱ꞌon káꞌa̱n na, ta ñii ki̱ꞌva saá kuchiño ni̱vi yóꞌo kaꞌnda chiño na no̱o̱ ndiꞌi ña o̱n váꞌa kóni keꞌé yi̱kí ko̱ñu na.

Santiago 3:2 ပူးပေါင်းရင်းမြစ်များ

San Mateo 12:34

Ta ndóꞌó, káꞌa̱n i̱ xíꞌin ndó, ¡sa̱ꞌya ko̱o̱ xati̱ kúu ndó! Chi mi̱i ndó kúu ni̱vi na o̱n váꞌa, ta ña̱kán o̱n kúchiño ka̱ꞌa̱n ndó to̱ꞌon va̱ꞌa. Nda̱tán yóo níma̱ ni̱vi, saá yóo to̱ꞌon ña káꞌa̱n na.

San Mateo 12:37

Chi xa̱ꞌa̱ to̱ꞌon mi̱i ndó ña ni̱ka̱ꞌa̱n ndó, Ndios kasa nani ra xa̱ꞌa̱ ndóꞌó, ta saá ka̱ꞌa̱n ra án kundo̱o ndó xíꞌin ra, án ko̱ꞌo̱n ndó nda̱ya ―káchí ta̱Jesús xíꞌin na.

Romanos 3:10

Ñii ki̱ꞌva nda̱tán káꞌa̱n to̱ꞌon Ndios ña ni̱taa na xi̱na̱ꞌá, saá yóo ña, chi to̱ꞌon Ndios yóꞌo káchí ña saá: Nda̱ ñii ni̱vi o̱n si̱ví nandii na o̱n ko̱ó kua̱chi ndíso kúu na no̱o̱ Ndios.

Romanos 7:21

Ta kúnda̱a̱ ini i̱ ndí ndixa ndóꞌo i̱ saá: Vará kóni i̱ kasa ndivi i̱ ñava̱ꞌa, ta yatin ní yóo ña o̱n váꞌa xíꞌin i̱ ña sási no̱o̱ i̱ ña o̱n keꞌé i̱ ñava̱ꞌa.

1 Corintios 9:27

Ta nda̱ víka̱, násita xíꞌin mi̱i i̱, ta xáꞌnda chiño i̱ no̱o̱ yi̱kí ko̱ñu i̱ ña sakuáꞌá ña kasa ndivi ña ña kóni i̱. Saá chíkaa̱ i̱ ndee̱ xíꞌin mi̱i i̱, ko̱to̱ o̱n to̱nda̱a i̱ nakiꞌin i̱ ñava̱ꞌa ndaꞌa̱ Ndios ñoyívi ni̱no, vará yi̱ꞌi̱ kúu ta̱a ta̱ ni̱ka̱ꞌa̱n ndoso to̱ꞌon va̱ꞌa xa̱ꞌa̱ Jesucristo no̱o̱ kua̱ꞌa̱ ní ni̱vi.

Gálatas 3:22

Ta to̱ꞌon Ndios ña ni̱taa na xi̱na̱ꞌá káchí ña ndí nda̱tán yóo ni̱vi na ñóꞌo preso, saá yóo ndiꞌi ni̱vi, chi ndee̱ ña o̱n váꞌa xáꞌnda chiño no̱o̱ na, ta yóo na nóꞌni na xíꞌin ndee̱ ña o̱n váꞌa yóꞌo. Ta ndiꞌi ni̱vi na kándixa Jesucristo, Ndios ki̱ndo̱o ra saka̱ku ra nayóꞌo no̱o̱ ndee̱ ña o̱n váꞌa, xa̱ꞌa̱ ña kutaku̱ ndinoꞌo ndíka̱ na.

Gálatas 5:17

Níma̱ Ndios ña táku̱ ini mi̱i yó, ni̱vi na kándixa Jesucristo, kóni ña ndí kasa ndivi yó ñava̱ꞌa. Ta ña kútoo ní yi̱kí ko̱ñu yó kúu ña keꞌé yó ña o̱n váꞌa. Ta saá ña kóni Níma̱ Ndios keꞌé yó kúu ña káni táꞌan xíꞌin ña kútoo ní yi̱kí ko̱ñu yó keꞌé ña. Ta xa̱ꞌa̱ ña káni táꞌan o̱vi̱ ñayóꞌo saá, o̱n vása táxi ña kasa ndivi yó ñava̱ꞌa nda̱tán yóo ña kóni yó keꞌé yó.

Colosenses 1:28

Ta saá mi̱i ndi̱ káꞌa̱n ndoso ndi̱ to̱ꞌon xa̱ꞌa̱ Jesucristo no̱o̱ ndiꞌi ni̱vi. Ndáto̱ꞌon ndi̱ xíꞌin na, ta sánáꞌa ndi̱ na xíꞌin to̱ꞌon ndíchí Ndios. Saá chi tá kixaa̱ ki̱vi̱ ña kuita ndiꞌi yó no̱o̱ Ndios, ta kóni i̱ sanáꞌa i̱ ni̱vi yóꞌo no̱o̱ Ndios, ni̱vi na ni̱to̱nda̱a ndu̱ndii, na o̱n ko̱ó ka̱ kua̱chi ndíso, chi ñii yóo na xíꞌin Jesucristo, ta̱a ta̱ táku̱ ini na.

Colosenses 4:12

Ta ñani yó ta̱Epafras, ta̱ kúu ta̱ñoo mi̱i ndó tíꞌví ra to̱ꞌon ña chindeé ra ndóꞌó. Ñii ta̱a ta̱ kísa chiño no̱o̱ Jesucristo kúu ta̱yóꞌo, ta o̱n vása sándakoo ra káꞌa̱n ra xíꞌin Ndios, ta ndinoꞌo ní ini ra xáku ndáꞌví ra xa̱ꞌa̱ ndó no̱o̱ Ndios. Ta ña xáku ndáꞌví ra no̱o̱ Ndios kúu ña taxi ra ndee̱ ndaꞌa̱ ndó xa̱ꞌa̱ ña o̱n sandakoo ndó yichi̱ Jesucristo, ta nda̱ víka̱, kútu̱ ka̱ kundiko̱n ndó yichi̱ ra. Ta ñii ki̱ꞌva saá ndúkú ra ña chindeé Ndios ndóꞌó xa̱ꞌa̱ ña taxi xíꞌin mi̱i ndó ña kasa ndivi ndó ndiꞌi ña kóni Ndios.

Hebreos 13:21

Yi̱ꞌi̱ ndúkú i̱ no̱o̱ Ndios, ña taxi ra ndee̱ ra ndaꞌa̱ ndó xa̱ꞌa̱ ña kuchiño ndó kasa ndivi ndó ña kóni ra. Ta xíꞌin ña kísa chiño Jesucristo ini yó, ná sanduu ra yó ni̱vi na sakusii̱ ini Ndios. Ta xa̱ꞌa̱ ñayóꞌo, ná kasa káꞌno ní yó Jesucristo ndiꞌi saá ki̱vi̱. Saá ná koo ña.

Santiago 1:26

Tá yóo ñii ndó ta xáni si̱ni̱ ndó va̱ꞌa ndíko̱n ndó yichi̱ Ndios, ta o̱n vása násita xíꞌin mi̱i ndó no̱o̱ ndiꞌi ña o̱n váꞌa ka̱ꞌa̱n ndó, ta na sándáꞌví xíꞌin mi̱i kúu ndó, chi no̱o̱ Ndios o̱n vása ndáya̱ꞌví yichi̱ kua̱ꞌa̱n ndó.

Santiago 1:4

Tá o̱n vása sandakoo yó yichi̱ va̱ꞌa, vará kua̱ꞌa̱ ní ña xóꞌvi̱ yó, ta saá nduu yó ni̱vi na va̱ꞌa ni̱xaa̱ xa̱ꞌno no̱o̱ Ndios, kuu yó ni̱vi na o̱n vása xíni̱ ñóꞌó ka̱ inka̱ no̱o̱ ndee̱ ña kasa ndivi na ña káchí ini Ndios.

Santiago 2:10

Ta saá, tá yóo ni̱vi na kísa ndivi ndiꞌi nda̱yí Ndios ña ni̱taa ta̱Moisés, ta yáꞌa ndoso na ñii la̱á kuiti nda̱yí yóꞌo, ta xa̱ꞌa̱ ñayóꞌo nákuiso na kua̱chi no̱o̱ Ndios. Ñii ki̱ꞌva nda̱tán ni̱yaꞌa ndoso na ndiꞌi nda̱yí Ndios, saá yóo kua̱chi ndíso na no̱o̱ Ndios.

1 Pedro 3:10

Ta to̱ꞌon Ndios ña ni̱taa na xi̱na̱ꞌá, káchí ña saá: Tá kóni ndó si̱i̱ kutaku̱ ndó, ta ñii ki̱ꞌva saá kóni ndó va̱ꞌa koo ndó ñoyívi yóꞌo, ta saá kundaa va̱ꞌa xíꞌin mi̱i ndó ña o̱n ka̱ꞌa̱n ndó to̱ꞌon ndiva̱ꞌa xa̱ꞌa̱ ni̱vi, ni o̱n ka̱ꞌa̱n ndó ñavatá ña sandáꞌví ni̱vi.

1 Pedro 5:10

Tá xa ndi̱ꞌi ni̱yaꞌa ña ni̱xo̱ꞌvi̱ ní ndó, vará nda̱ loꞌo ki̱vi̱ án kui̱ya̱ ni̱xo̱ꞌvi̱ ní ndó, ta Ndios taxi ra ña tuku va̱ꞌa kutaku̱ ndó. Chindeé ra ndóꞌó ña nda̱ ñii ki̱vi̱ o̱n sandakoo ndó kándixa ndó ra, ta taxi ra ndee̱ ra ndaꞌa̱ ndó ña o̱n nakava ini ndó, ta kasa ndivi ra ñava̱ꞌa xíꞌin ndó ña chindeé ra ndóꞌó ña ndixa ndinoꞌo ini ndó kandixa ndó ra ndiꞌi saá ki̱vi̱ ña va̱xi. Ndixa mi̱i Ndios kasa ndivi ra to̱ꞌon ra xíꞌin ndó xa̱ꞌa̱ ña kíꞌvi ní ini ra xíni ra ndóꞌó, saá chi xa ka̱na ra ndóꞌó ni̱vi na kándixa Jesucristo ña kutaku̱ ndó xíꞌin ra ndiꞌi saá ki̱vi̱ ñoyívi ni̱no no̱o̱ yóo ñava̱ꞌa káꞌno livi.