Romanos 4:15 - Alacatlatzala Mixtec New Testament

¹⁵ Chi nda̱yí Ndios káchí ña ndí xíni̱ ñóꞌó xo̱ꞌvi̱ ni̱vi na yáꞌa ndoso nda̱yí ra. Tá o̱n ko̱ó nda̱yí Ndios ña sánáꞌa kua̱chi ni̱vi, níkúu, ta o̱n kóo kua̱chi ndíso nayóꞌo.

Romanos 4:15 ပူးပေါင်းရင်းမြစ်များ

San Juan 15:22

’Tá o̱n vása ní‑kixi i̱ no̱o̱ na, tá ni o̱n vása ní‑ndato̱ꞌon i̱ xíꞌin na, níkúu, ta saá o̱n vása ndíso na kua̱chi no̱o̱ ña nda̱to̱ꞌon i̱ xíꞌin na. Ta vitin o̱n ki̱ví kachí na o̱n vása ndíso na kua̱chi, chi ni̱ka̱ꞌa̱n i̱ xíꞌin na yu kúu ñanda̱a̱, ta ni̱‑xiin na kasa ndivi na ña nda̱to̱ꞌon i̱ xíꞌin na.

San Juan 3:36

Ndiꞌi ni̱vi na kándixa Sa̱ꞌya Ndios kúu ni̱vi na ndinoꞌo táku̱ no̱o̱ Ndios ndiꞌi saá ki̱vi̱. Ta ndiꞌi ni̱vi na o̱n xi̱in kandixa Sa̱ꞌya Ndios kúu ni̱vi na o̱n vása táku̱ no̱o̱ Ndios, ta ki̱vi̱ ña va̱xi Ndios saxo̱ꞌvi̱ ní ra ni̱vi yóꞌo ―káchí ta̱Juan.

Romanos 1:17

To̱ꞌon va̱ꞌa yóꞌo sánáꞌa ña ndí xa̱ꞌa̱ ña kándixa yó Jesucristo, Ndios kísa káꞌno ini ra xa̱ꞌa̱ kua̱chi yó, ta sánduu ra yó ni̱vi na ndii, na o̱n ko̱ó kua̱chi ndíso no̱o̱ ra, ta va̱ꞌa yóo yó xíꞌin ra. Ta ndixa o̱n ko̱ó inka̱ xa̱ꞌa̱ ña kuchiño nduu yó ni̱vi na o̱n ko̱ó kua̱chi ndíso no̱o̱ Ndios. Saá chi to̱ꞌon Ndios ña ni̱taa na xi̱na̱ꞌá káchí ña saá: “Ni̱vi na kúu na o̱n ko̱ó kua̱chi ndíso no̱o̱ Ndios xa̱ꞌa̱ ña kándixa na ra, ni̱vi yóꞌo, ndixa kutaku̱ na”, káchí to̱ꞌon Ndios.

Romanos 5:13

Tá o̱n ta̱ꞌán ka̱ taxi Ndios nda̱yí ra ndaꞌa̱ ta̱Moisés, ta kua̱ꞌa̱ ní ña o̱n váꞌa ke̱ꞌé ni̱vi ñoyívi yóꞌo saá. Ta saá ni, Ndios o̱n vása ní‑sakuiso ra kua̱chi sa̱ta̱ ni̱vi yóꞌo, chi o̱n vása ní‑xikomí na nda̱yí ra.

1 Corintios 15:56

Xíni̱ yó ndí ndee̱ ña xáꞌni ni̱vi xi̱komí ña nda̱yí satakuéꞌe̱ ña mi̱i yó xa̱ꞌa̱ ña o̱n váꞌa kéꞌé yó, chi yaꞌvi ña o̱n váꞌa kéꞌé yó kúu ña xíni̱ ñóꞌó kivi̱ yó. Ta xa̱ꞌa̱ ña ndáto̱ꞌon nda̱yí Ndios, kúnda̱a̱ ini yó yu kúu ña o̱n váꞌa, ta kúnda̱a̱ ini yó ndí kivi̱ yó xa̱ꞌa̱ kua̱chi ña ndíso yó no̱o̱ Ndios.

Gálatas 3:10

Ta ndiꞌi ni̱vi na xáni si̱ni̱ ndí xa̱ꞌa̱ ña kísa ndivi na nda̱yí ña ni̱taa ta̱Moisés, nduu na ni̱vi na ndii na o̱n ko̱ó kua̱chi kuiso no̱o̱ Ndios, ta ndiꞌi ni̱vi na xáni si̱ni̱ saá kúu ni̱vi na ndíso chiꞌña. Saá chi to̱ꞌon Ndios ña ni̱taa ta̱Moisés xi̱na̱ꞌá káchí ña saá: “Ni̱vi na ndíso chiꞌña kúu ni̱vi na ni̱‑kuchiño to̱nda̱a kasa ndivi ndiꞌi saá nda̱yí Ndios”, káchí to̱ꞌon Ndios.

Gálatas 3:19

Ta saá, ¿nda̱chun xíni̱ ñóꞌó nda̱yí ña ta̱xi Ndios ndaꞌa̱ ta̱Moisés xi̱na̱ꞌá? Ndios ta̱xi ra nda̱yí ra xa̱ꞌa̱ ña sanáꞌa ra ni̱vi ña kunda̱a̱ ini na ndí kéꞌé na ña o̱n váꞌa ta ndíso na kua̱chi no̱o̱ Ndios. Ta chi̱tóni̱ Ndios ndí nda̱yí ra kaꞌnda chiño ña no̱o̱ ni̱vi nda̱ to̱nda̱a ki̱vi̱ kixaa̱ Jesucristo. Saá chi Ndios ki̱ndo̱o ra xíꞌin ta̱Abraham, ka̱chí ra saá: “Xíꞌin ñii sa̱ꞌya ñani síkuá ún keꞌé i̱ ñava̱ꞌa xíꞌin ndiꞌi ni̱vi ñoyívi”, ka̱chí Ndios. Ta ki̱vi̱ Ndios ta̱xi ra nda̱yí ra ndaꞌa̱ naIsrael, ta siꞌna ta̱xi ra ña ndaꞌa̱ naángel, ta nayóꞌo ta̱xi na ña ndaꞌa̱ ta̱Moisés. Ta ta̱Moisés yóꞌo xi̱kuu ta̱ ni̱xikanoo no̱o̱ Ndios ta no̱o̱ naIsrael.

Efesios 5:6

Ta saá o̱n taxi ndó nda̱ ñii ni̱vi sandáꞌví na ndóꞌó xíꞌin ña káꞌa̱n na to̱ꞌon vatá xíꞌin ndó, chi ndixa Ndios saxo̱ꞌvi̱ ní ra ni̱vi na kúu na toon ini, na kúu na o̱n xi̱in chikaa̱ so̱ꞌo to̱ꞌon ra.

Colosenses 3:6

Ta xa̱ꞌa̱ ndiꞌi ña o̱n váꞌa yóꞌo ña kísa ndivi ni̱vi na toon ní ini, Ndios saxo̱ꞌvi̱ ní ra nayóꞌo ki̱vi̱ ña va̱xi.

1 Juan 3:4

Ndiꞌi ni̱vi na kéꞌé ña o̱n váꞌa kúu ni̱vi na yáꞌa ndoso no̱o̱ nda̱yí Ndios ta ndíso na kua̱chi no̱o̱ ra. Saá chi ndiꞌi no̱o̱ ña o̱n váꞌa kéꞌé ni̱vi kúu ña yáꞌa ndoso nda̱yí Ndios.

Apocalipsis 19:15

Ta yuꞌu̱ ta̱a ta̱ na̱ní To̱ꞌon Ndios ke̱ta ñii espada ña si̱i̱n ní, ta xíꞌin espada yóꞌo kúchiño ra satakuéꞌe̱ ra ni̱vi na ki̱xi ndiꞌi ñoo, na kúu na o̱n xi̱in kandixa ñaꞌá. Ta nda̱kú ní kaꞌnda chiño ra no̱o̱ ndiꞌi nayóꞌo, chi níꞌi ra ñii ka̱a nda̱tán yóo yito̱n káni̱, ta xíꞌin ka̱a yóꞌo kúchiño sandiꞌi ra xa̱ꞌa̱ ni̱vi na sáa̱ ini xíni ñaꞌá. Nda̱tán kéꞌé ni̱vi na kóꞌni tíuva xíꞌin ña xíndo̱so̱ na rí ña táva na nduta̱ rí ña nduu rá vino, saá keꞌé ra xíꞌin ni̱vi na o̱n váꞌa yóꞌo. Chi ña xíndo̱so̱ ra tíuva yóꞌo káꞌa̱n ña xa̱ꞌa̱ ña yo̱ꞌvi̱ ní xo̱ꞌvi̱ ni̱vi yóꞌo chi ndixa sáa̱ ní ini Ndios xíni ra ña o̱n váꞌa ke̱ꞌé na, ta Ndios kúu Ta̱a ta̱ kómí ndiꞌi ndee̱ káꞌno.