Romanos 2:19 - Alacatlatzala Mixtec New Testament

¹⁹ Ta saá xáni si̱ni̱ ndó ndí va̱ꞌa ní tiꞌva ndó sanáꞌa ndó inka̱ ni̱vi na naa ini, na o̱n vása kúnda̱a̱ ini ñanda̱a̱. Ta xáni si̱ni̱ ndó ndí ni̱vi na o̱n vása xíni̱ nda̱yí Ndios ña ni̱taa ta̱Moisés, nayóꞌo yóo na nda̱tán yóo ni̱vi nakuáá nduchu̱ no̱o̱, án ni̱vi na xíka kua̱ꞌa̱n no̱o̱ naa ní, no̱o̱ o̱n ko̱ó ñoꞌo̱ yéꞌe, saá yóo na. Ña̱kán xáni si̱ni̱ ndó ndí nda̱tán yóo ñoꞌo̱ yéꞌe no̱o̱ ni̱vi yóꞌo, saá yóo ndóꞌó, na kúu najudío.

Romanos 2:19 ပူးပေါင်းရင်းမြစ်များ

San Mateo 15:14

Ta saá o̱n kani si̱ni̱ ndó xa̱ꞌa̱ na. Nda̱tán yóo nakuáá tíin na ndaꞌa̱ inka̱ nakuáá kua̱ꞌa̱n na yichi̱, saá yóo nayóꞌo. Tá ñii ta̱kuáá tíin ra ndaꞌa̱ inka̱ ta̱kuáá kua̱ꞌa̱n na yichi̱, ndio̱vi̱ ra saá ko̱yo taꞌvi̱.

San Mateo 4:16

Nda̱tán ndóo na naa ní ini, án na naa ní no̱o̱, saá ndóo na, chi o̱n vása táku̱ na no̱o̱ Ndios. Ta ñii ki̱vi̱ koni na ñii ñoꞌo̱ káꞌno yéꞌe, ña yeꞌe ña no̱o̱ na ta̱nda̱ níma̱ na, chi Ndios taxi ra ña kunda̱a̱ ini na ñava̱ꞌa ña ná kundiko̱n na yichi̱ ra, ta o̱n ndiꞌi xa̱ꞌa̱ na no̱o̱ ra, káchí to̱ꞌon Ndios ña ni̱taa ta̱Isaías xi̱na̱ꞌá.

San Mateo 5:14

’Nda̱tán yóo ñoꞌo̱ ña yéꞌe, saá yóo ndóꞌó no̱o̱ ni̱vi ñoyívi yóꞌo. Ñii ñoo ña yóo si̱ni̱ yuku̱, o̱n si̱ví ña yóo seꞌé kúu ña, ta ndiꞌi ni̱vi kúchiño koni na ña.

San Mateo 6:23

Tá o̱n vása va̱ꞌa yóo nduchu̱ no̱o̱ ndó, ta naa ní ini ndó. Saá chi xáni si̱ni̱ ndó xíka ndó xíꞌin ñoꞌo̱ yéꞌe, ta o̱n si̱ví ñanda̱a̱ kúu ña. Ta saá, ¡nda̱chun naa ní ini ndó! ―káchí ta̱Jesús.

San Marcos 10:15

Ndixa káꞌa̱n i̱ xíꞌin ndó, tá o̱n xi̱in ndó kasa ni̱no̱ xíꞌin mi̱i ndó no̱o̱ Ndios, nda̱tán ni̱no̱ yóo ini naválí yóꞌo, ta o̱n kívi ki̱ꞌvi ndó yichi̱ no̱o̱ xáꞌnda chiño Ndios.

San Lucas 1:79

Saá chi keꞌé ra ña nayeꞌe ñoꞌo̱ no̱o̱ ni̱vi na xíka yichi̱ naa no̱o̱ yóo ña o̱n váꞌa, ta saá kuchiño nakiꞌin na ko̱ꞌo̱n na yichi̱ va̱ꞌa, ta kunakaa̱ ñava̱ꞌa ini na, káchí ta̱Zacarías xíꞌin tikuáꞌá loꞌo sa̱ꞌya ra.

San Juan 9:34

Ta nda̱kuii̱n na, ni̱ka̱ꞌa̱n na xíꞌin ra: ―¡Ta̱a ta̱ kómí chiꞌña kúu yóꞌó! ¡Nda̱ ki̱vi̱ ka̱ku ún ta̱nda̱ vitin ta̱a ta̱ o̱n váꞌa kúu ún! ¿Án xáni si̱ni̱ ún kúu ún ta̱a ta̱ ndíchí ka̱, ña̱kán kóni ún sanáꞌa ún ndi̱ꞌi̱? ―káchí na xíꞌin ra. Ta saá ta̱xin va̱ꞌa na ra veꞌe ño̱ꞌo sinagoga, ta kua̱ꞌa̱n ra ke̱ꞌe.

Hechos 26:18

Saá chi kóni i̱ ña chindeé ún ni̱vi yóꞌo ña kunda̱a̱ káxín ini na yu kúu ñanda̱a̱, xa̱ꞌa̱ ña sandakoo na yichi̱ o̱n váꞌa ña naa ní ndíko̱n na, ta kundiko̱n na yichi̱ va̱ꞌa no̱o̱ yóo ñoꞌo̱ yéꞌe ndinoꞌo. Ta saá o̱n taxi ka̱ na nda̱yí ndaꞌa̱ ñaníma̱ ndiva̱ꞌa káꞌno Satanás kaꞌnda chiño ña no̱o̱ na, ta taxi xíꞌin mi̱i na ndaꞌa̱ Ndios ña kaꞌnda chiño ra no̱o̱ na. Ta xa̱ꞌa̱ ña kandixa na yi̱ꞌi̱, Ndios kasa káꞌno ini ra xa̱ꞌa̱ kua̱chi na, ta saá ndixa nakiꞌin na ndiꞌi ñava̱ꞌa ña taxi Ndios ndaꞌa̱ ni̱vi na kúu sa̱ꞌya ra”, ka̱chí ta̱Jesús xíꞌin i̱.

Romanos 2:18

Xa xíni̱ ndó yukía̱ kóni Ndios, saá chi xa sa̱kuáꞌá ndó nda̱yí Ndios ña ni̱taa ta̱Moisés. Ta nda̱yí yóꞌo sánáꞌa ña ndóꞌó yu kúu ñava̱ꞌa, ta yu kúu ña o̱n váꞌa.

Romanos 2:20

Ta xáni si̱ni̱ ndó va̱ꞌa ní tiꞌva ndó sanáꞌa ndó ni̱vi na naa ini to̱ꞌon Ndios, ta ñii ki̱ꞌva saá va̱ꞌa ní tiꞌva ndó sanáꞌa ndó ni̱vi na sa̱kán loꞌo kuiti kúnda̱a̱ ini ñanda̱a̱. Saá chi xíni̱ ndó nda̱yí Ndios, ña kúu ña ndixa nda̱a̱, ta kúu ña ñandíchí ndinoꞌo.

1 Corintios 3:18

O̱n sandáꞌví xíꞌin mi̱i ndó, ta nda̱ víka̱, va̱ꞌa ndukú ndó ñandíchí ndinoꞌo Ndios. Tá yóo sava ndóꞌó na xáni si̱ni̱ ndí nandíchí ní kúu ndó, chi kómí ndó kua̱ꞌa̱ ní ñandíchí ñoyívi yóꞌo, ta xíni̱ ñóꞌó kasa ni̱no̱ xíꞌin mi̱i ndó ña to̱nda̱a ndó kunda̱a̱ ini ndó ndí kúma̱ni̱ no̱o̱ ndó ñandíchí ndinoꞌo Ndios. Tá keꞌé ndó saá, ta Ndios taxi ra ñandíchí ndinoꞌo ra ndaꞌa̱ ndó.

1 Corintios 4:10

Ta xa̱ꞌa̱ ña ndinoꞌo ini ndi̱ kísa chiño ndi̱ no̱o̱ Jesucristo, ni̱vi na ndíko̱n yichi̱ ñoyívi xáni si̱ni̱ na ndí ni̱vi na kíꞌví si̱ni̱ kúu ndi̱. Ta ndóꞌó, vará Jesucristo kúu ta̱a ta̱ ta̱xi kua̱ꞌa̱ ndee̱ va̱ꞌa ndaꞌa̱ ndó, ta xáni si̱ni̱ ndó ndí mi̱i ndó kúu ndó ni̱vi na ndíchí ní si̱ni̱, ni̱vi na xíni̱ va̱ꞌa ní. Ta xáni si̱ni̱ ndó ndí mi̱i ndó kúu ni̱vi na náꞌno ní ndee̱ kómí, vará mi̱i ndi̱ kúu ni̱vi na loꞌo ní ndee̱ kómí. Ta vará kua̱ꞌa̱ ní ni̱vi kísa to̱ꞌó na ndóꞌó, ta ni̱vi yóꞌo xáa noo na xíni na ndi̱ꞌi̱.

Filipenses 2:15

Saá keꞌé ndó xa̱ꞌa̱ ña o̱n kóo ña o̱n váꞌa naníꞌi ni̱vi ña chikaa̱ na kua̱chi sa̱ta̱ ndó, ta kuu ndó sa̱ꞌya Ndios na kutaku̱ ndii no̱o̱ ra ñoyívi yóꞌo. Vará táku̱ ndó ma̱ꞌñó ni̱vi na kúu na toon ní ini, ta ndiva̱ꞌa ní ini na, ta ndóꞌó, nda̱ loꞌo o̱n vása kutaku̱ ndó nda̱tán táku̱ ni̱vi yóꞌo. Nda̱ víka̱, nda̱tán yóo ñoꞌo̱ yéꞌe no̱o̱ ñanaa ní ñoyívi yóꞌo, saá koo ndóꞌó.